Aye so a hunda ti sara ti wara batême

“Ye nyen akanga lege na mbi ti wara batême?”​—KUSALA 8:36.

1, 2. Tongana nyen Philippe ato nda ti lisoro na mbeni kota zo ti Ethiopie? Ye wa afa so tënë ti vorongo tâ Nzapa agbu bê ti koli so mingi?

NGU oko wala use na peko ti kuâ ti Jésus, mbeni kota zo ti yangbo ti gbia ti Ethiopie alondo na Jérusalem ti mû lege so ague na Gaza, na mbage ti mbongo. A ngbâ na lo fadeso akilomètre 1500 ti tambela na char ti si kodoro. Koli ni so, so aye tënë ti nzapa mingi, asara yongoro voyage so ti gue lani na Jérusalem ti voro Jéhovah. Na ndo lege ti kiringo ni, lo mû ngoi ti lo ti diko Tënë ti Nzapa, ye so afa so lo yeke na mabe. Jéhovah abâ lani koli ti mabe so, tongaso na lege ti mbeni ange lo pusu Philippe ti gue ti fa tënë na lo.​—Kusala 8:26-28.

² Philippe abâ lani so a yeke ngangu pëpe ti to nda ti lisoro ndali ti so kota zo ti Ethiopie so ayeke diko mbeti ni na kota go, tongana ti so azo ti ngoi ni kâ ayeke sara ka ni. Tongaso, tongana lo yeke diko rouleau ti Esaïe, Philippe amä lo. Gi mbeni senge hundango tënë ti Philippe azingo nzara ni na bê ti lo: “Mo hinga nda ti ye so mo yeke diko?” Ye so ague na ala ti sara lisoro na ndo Esaïe 53:7, 8. Na nda ni, Philippe ‘afa na lo Tene-nzoni ti Jésus.’​—Kusala 8:29-35.

3, 4. (a) Ngbanga ti nyen Philippe abatize zo ti Ethiopie sân ti ku? (b) Ahundango tënë wa e yeke bâ ni fadeso?

³ Gi na yâ ti kete ngoi, zo ti Ethiopie so ahinga kusala ti Jésus na yâ ti aye so Nzapa aleke nga na oko ngoi ni lo bâ nene ti ga disciple ti Jésus so awara batême awe. Tongana lo bâ mbeni ndo so ngu ayeke dä, lo hunda Philippe, lo tene: “Ye nyen akanga lege na mbi ti wara batême?” Biani, aye so asi na koli so ayeke nde mingi. Kota zo ti Ethiopie so ayeke na mabe kozoni awe teti so lo yeke voro Nzapa tongana mbeni zo so agbian ti ga Juif. Na, peut-être, a yeke hunda ande na lo ti ku ngoi mingi kozo ti tene lege akiri azi na lo mbeni. Mingi ahon so, koli so agbu nda ti ye so Nzapa ahunda na lo, na lo ye ti sara ni na bê ti lo kue. Na ngia na bê, Philippe ayeda na ye so lo hunda, na tongana zo ti Ethiopie so awara batême awe, “lo gue na lege ti lo na ngia mingi.” Kite ayeke dä pëpe so lo yeke lani na ngia ti fa nzo tënë ti Royaume na kodoro ti lo.​—Kusala 8:36-39.

⁴ Atâa so mungo tere na Nzapa nga na batême ayeke pëpe ambeni ye so mo lingbi ti sara ni sân ti gbu li nzoni kozoni, tapande ti kota zo ti Ethiopie so afa so a si awe so ambeni zo awara batême gi kete na peko ti so ala mä tâ tënë.a Tongaso, a yeke na lege ni ti bâ ahundango tënë so: Aye wa a hunda ti sara kozoni ti wara batême? Tënë ti ngu ti zo ayeke kota ye dä? A lingbi hingango ye ti zo asi na ndo wa si lo wara batême? Ahon so kue, ngbanga ti nyen Jéhovah ahunda na awakua ti lo ti wara batême?

Mbeni kota zendo

5, 6. (a) Tongana nyen azo ti Nzapa asara ye lani ti fa so ala yeda na ndoye ti Jéhovah? (b) Songo wa e lingbi ti duti na ni na Nzapa na ngoi so e wara batême?

⁵ Na peko ti so Jéhovah asigigi na azo ti Israël na sese ti Egypte, lo yeda ti tene ala ga “ye ti [Lo] mveni”, ti ndoye ala, ti bata ala na ti sara si ala ga mbeni “mara ti nzoni-kue.” Ye oko, ti wara mara ti deba nzoni so, a lingbi mara ni asara mbeni ye ti fa so ala yeda na ndoye ti Nzapa so. A yeke ye so ala sara tongana ala yeda ti sara ye alingbi na “ye kue so L’Eternel atene” na ti te mbele na lo (Exode 19:4-9). Na ngoi ti akozo Chrétien, Jésus ahunda na azo so amû peko ti lo ti sara si azo ti amara kue aga adisciple, na azo kue so ayeda na afango ye ti lo awara batême. Nzoni songo na Nzapa aluti na ndo mabe so ala yeke na ni na Jésus nga na batême so ala wara na pekoni.​—Matthieu 28:19, 20; Kusala 2:38, 41.

⁶ Atondo ti Bible so afa so Jéhovah ayeke iri deba nzoni na ndo ti azo so amû zendo ti sara na lo na a ngbâ ti sara ye alingbi na yanga so ala mû. Mungo tere na Nzapa nga na batême ayeke akota ye so amû lege na aChrétien ti wara deba nzoni ti Jéhovah. E leke na bê ti e ti sara ye alingbi na andia ti lo na ti gi fango lege ti lo (Psaume 48:15). Na ye so Jéhovah asara na pekoni ayeke so, na lege ti fä, lo yeke gbu maboko ti e ti gue na e na lege so a lingbi e tambela dä.​—Psaume 73:23; Esaïe 30:21; 41:10, 13.

7. Ngbanga ti nyen a lingbi e mveni si e mû desizion ti sara na Nzapa?

⁷ Ye so ayeke pusu e ti mû desizion so ayeke ndoye so e yeke na ni na mbage ti Jéhovah nga na nzara so e yeke na ni ti sara na lo. A lingbi zo awara batême pëpe gi ngbanga ti so mbeni zo atene na lo so lo manda Bible a ninga awe wala ngbanga ti so akamarade ti lo ayeke wara batême. A yeke na lege ni ti tene ababâ na mama nga na aChrétien so ayeke biazo awa mbeni zo ti bi bê na mungo tere ti lo na Nzapa na ti wara batême. Bazengele Pierre awa azo so ayeke mä lo na ngoi ti Pentecôte ti “kamata batême”. (Kusala 2:38). Ye oko, ti tene mbeni zo amû tere ti lo na Nzapa a bâ gi zo ni mveni, na mbeni zo nde alingbi ti sara ni na place ti lo pëpe. A lingbi e mveni si e mû desizion ti sara na Nzapa.​—Psaume 40:9.

Nzoni lekengo tere ndali ti batême

8, 9. (a) Ngbanga ti nyen Mbeti ti Nzapa ake tënë ti mungo batême na akete molenge? (b) A lingbi hingango ye ti amaseka asi na ndo wa si ala wara batême?

⁸ Amolenge alingbi ti mû desizion ti mu tere ti ala na Nzapa? Bible afa pëpe ngu so a lingbi zo awara ni kozo si lo wara batême. Ye oko, akete molenge alingbi pëpe ti ga awamabe, ti fa mabe wala ti mû tere ti ala na Nzapa (Kusala 8:12). Na ndo akozo Chrétien, wasungo mbaï August Neander atene tënë so na yâ mbeni buku ti lo (General History of the Christian Religion and Church): “A yeke ândö gi akota zo si awara batême ngbanga ti so ala bâ so batême na mabe ague tâ gi oko.”

⁹ Ti amaseka, ambeni agbu nda ti akozo ye na ndo Nzapa na aye so lo leke ti sara hio mingi, na ala ye ti sara ye so bê ti lo aye; me ti ambeni, ala gbu nda ni hio pëpe. Ye oko, kozo ti tene mbeni maseka awara batême, a lingbi lo lë songo na Nzapa, lo hinga nzoni akozo tënë ti Mbeti ti Nzapa nga ye so mungo tere na Nzapa andu ni, legeoko tongana akota zo.

10. Aye wa a lingbi mbeni zo asara kozo ti tene lo mû tere ti lo na Nzapa na lo wara batême?

¹⁰ Jésus ahunda na adisciple ti lo ti fa na afini zo aye so kue lo komande na ala (Matthieu 28:20). Tongaso, kozoni kue, a lingbi fini zo ni awara tâ hingango ye ti Bible, na ye so ayeke pusu lo ti duti na mabe na Jéhovah nga na yâ Tënë ti lo (aRomain 10:17; 1 Timothée 2:4; aHébreu 11:6). Na pekoni, tongana tâ tënë andu bê ti zo ni awe, a yeke pusu lo ti gbian bê ti lo na ti zia lege ti angbene sarango ye ti lo (Kusala 3:19). Ti hunzi na ni, fadeso lo yeke na nzara ti mû tere ti lo na Jéhovah na ti wara batême, tongana ti so Jésus ahunda.

11. Ngbanga ti nyen a yeke kota ye ti tene e mû mbage lakue na fango tënë kozoni ti wara batême?

¹¹ Mbeni kota ye so ayeke gue na zo na batême ayeke ti mû mbage na fango nzo tënë ti Royaume. So ayeke mbeni kota kusala so Jéhovah amû na azo ti lo ti sara na lâ ti nda ni so (Matthieu 24:14). Awafango tënë so ade ti wara batême pëpe alingbi ti duti na ngia ti fa atënë ti mabe ti ala na ambeni zo. Ti mû mbage na yâ ti kusala so ayeke leke ala ti fa tënë lakue nga na wâ na peko ti batême ti ala.​—aRomain 10:9, 10, 14, 15.

Mbeni ye akanga lege na mo ti wara batême?

12. Aye wa ambeni azia ti kanga lege na ala ti wara batême?

¹² Ambeni zo alingbi ti yeda pëpe ti mû batême ndali ti so ala ye pëpe ti yô kungba so mungo batême ayeke ga na ni. Ala hinga so ti sara ye alingbi na andia ti Jéhovah, a lingbi ala gbian gbâ ti aye kozoni na yâ ti fini ti ala si. Ambeni alingbi ti bâ so a yeke duti ande ngangu na ala ti sara ye alingbi na ndia ti Nzapa na peko ti batême ti ala. Ambeni alingbi peut-être ti tene: “Peut-être mbeni lâ mbi lingbi ti sara ye ti sioni na a bi mbi na gigi ti bungbi.”

13. Na ngoi ti Jésus, aye wa azo azia ti kanga lege na ala ti ga adisciple ti lo?

¹³ Na ngoi ti Jésus, ambeni zo azia si songo so atingbi ala na afami ti ala akanga lege na ala ti ga adisciple ti lo. Mbeni scribe atene so ni ye ti mû peko ti Jésus na ando kue so lo ye ti gue dä. Me Jésus atene so fani mingi ni yeke même na mbeni ndo ti lango dä pëpe. Tongana Jésus ahunda mbeni zo so ayeke mä lo ti ga na peko ti lo, zo ni atene so ni ye ti gue kozoni kue ti “lu” babâ ti ni si. Peut-être lo ye lani ti ngbâ na yanga-da ti ku juska babâ ti lo ni akui si, ahon ti mû peko ti Jésus na ti lu babâ ti lo gi tongana ngoi ni asi. Na nda ni, ota zo ni atene so kozo ti mû peko ti Jésus, a yeke nzoni ni gue kozoni ti “bara” azo ti da ti ni si. Jésus afa so ye so koli so na atanga ni asara ayeke mo bâ mo tene ala yeke “bâ ndo na peko” ti bâ aye so ala zia awe. Tongaso, a yeke polele so azo so laso akiri na peko adesizion so ala ye ti mû ayeke wara lakue ambeni nda ti tënë ti yô kungba ti ala ti Chrétien pëpe.​—Luc 9:57-62.

14. (a) Tongana nyen Pierre, André, Jacques na Jean asara ye na ngoi so Jésus atisa ala ti ga azo ti gingo azo? (b) Ngbanga ti nyen a lingbi e gi bê ti e pëpe ti yô joug ti Jésus?

¹⁴ Tapande ti Pierre, André, Jacques na Jean ayeke nde mingi na ti azo so. Tongana Jésus atisa ala ti ga na peko ti lo na ti ga azo ti gingo azo, Bible atene: “Fade fade ala zia gbanda ti ala, na ala gue na peko ti Lo.” (Matthieu 4:19-22). Na mungo desizion so hio, ala hinga nda ti tënë so Jésus atene lani: “I yô joug ti Mbi, i manda tënë ti Mbi; teti Mbi yeke na tâ be-ti-molenge na bê ti Mbi ayeke kota pëpe; na fade i wara lege ti wu âme ti i.” (Matthieu 11:29, 30). Atâa so batême aga na kungba na ndo go ti e tongana mbeni joug, Jésus adë bê ti e so joug ti lo ayeke ngangu pëpe na a yeke ga na e kota wungo tere.

15. Tongana nyen tapande ti Moïse na Jérémie afa so e lingbi ti zia bê ti e Nzapa ti mû maboko na e?

¹⁵ A yeke na lege ni ti tene mbeni zo abâ so lo lingbi pëpe ti yô kungba so aga na peko ti batême. Na tongo nda ni, Moïse na Jérémie abâ so ala lingbi pëpe ti yô akungba so Jéhovah amû na ala (Exode 3:11; Jérémie 1:6). Tongana nyen si Nzapa adë bê ti ala? Lo tene na Moïse: “Mbi yeke na mo.” Na Jérémie, lo mû zendo so: “Mbi yeke na mo ti sö mo.” (Exode 3:12; Jérémie 1:8). E nga kue, e lingbi ti zia bê ti e kue na Nzapa ti mû maboko na e. Ti ndoye Jéhovah na ti zia bê kue na lo alingbi ti mû maboko na e ti hon ndo ti mbeto so e lingbi pëpe ti sara ye ande alingbi na mungo tere ti e na Nzapa. Bazengele Jean atene lani so “mbeto ayeke na yâ ndoye pëpe, me ndoye so alingbi kue atomba mbeto.” (1 Jean 4:18). Mbeni molenge-koli alingbi ti duti na mbeto ti tambela gi lo oko, me mbeto ni alingbi ti hon tongana babâ ti lo agbu maboko ti lo na ngoi so ala yeke tambela. Legeoko nga, tongana e zia bê ti e kue na Jéhovah, lo mû zendo so fade ‘lo sara si lege ti e aga mbilimbili’ na ngoi so e yeke tambela na lo.​—aProverbe 3:5, 6.

Mbeni ngoi so a lingbi e yekia ni

16. Ngbanga ti nyen ti wara batême ahunda ti tene a yôro zo ni kue na yâ ngu?

¹⁶ Kozoni na batême ni mveni, a yeke mû ka mbeni diskur ti fa ngbanga ti nyen aChrétien ayeke wara batême. Na hunzingo ti diskur ni, a yeke hunda na azo so aye ti wara batême ti fa tënë ti mabe ti ala polele na kiringo tënë na ahundango tënë ti batême use (aRomain 10:10; bâ encadré na lembeti 22). Na pekoni, a yeke yôro azo so aye ti wara batême ni na yâ ti ngu ti lingbi na tapande so Jésus mveni azia. Bible afa so na peko ti so Jésus akamata batême awe, “Lo sigigi fade na yâ ngu.” (Matthieu 3:16; Marc 1:10). A yeke polele so Jean Wabatizengo zo ayôro Jésus kue na yâ ngu.b Ti yôro zo kue na yâ ngu afa tâ nzoni mingi kota gbiango ye so e sara na yâ fini ti e: na lege ti fä, e kui awe na lege ti akozo sarango ye ti e na e ga fadeso mbeni fini zo ti sara ye so bê ti Nzapa aye.

17. Tongana nyen si azo so aye ti wara batême nga na azo so ayeke bâ ni alingbi ti yekia ni?

¹⁷ Batême ayeke mbeni ye so a lingbi a mû na nene ni nga a yeke mbeni ngoi ti ngia. Bible afa so Jésus ayeke sambela lani tongana Jean ayôro lo na yâ Ngu ti Jourdain (Luc 3:21, 22). Ti gue oko na tapande so, a lingbi azo so aye ti wara batême laso afa so ala mû ngoi so na nene ni. Nga, teti so Bible awa e ti yü bongo nzoni na yâ fini ti e ti lâ oko oko, a yeke kota ye biani nga ti yü bongo nzoni na ngoi ti batême ti e! (1 Timothée 2:9). Ti azo so ayeke bâ batême ni, a lingbi ala fa nga so ala mû batême ni na nene ni na dengingo mê nzoni na diskur ni nga na bango aye so ayeke tambela na ngoi ni.​—1 aCorinthien 14:40.

Adeba nzoni ti adisciple so awara batême awe

18, 19. Amatabisi nga na adeba nzoni wa mungo batême ayeke ga na ni?

¹⁸ Na ngoi so e mû tere ti e na Nzapa na e wara batême awe, e lï yâ ti mbeni sewa so ayeke nde. Kozoni kue, Jéhovah aga Babâ ti e na Ndeko ti e. E yeke yongoro na Nzapa kozoni na batême ti e, me fadeso e lë songo na lo (2 aCorinthien 5:19; aColossien 1:20). Na lege ti sandaga ti Christ, e ga nduru na Nzapa na lo ga nduru na e (Jacques 4:8). Prophète Malachie afa tongana nyen Jéhovah ayeke zi mê ti lo ti mä ala so ayô iri ti lo na ayeke sara kusala na ni, nga lo yeke zia iri ti ala na yâ ti mbeni mbeti ti dango bê. Nzapa atene: “Fade ala yeke ti Mbi, . . . na fade Mbi sara be-nzoni na ala, legeoko tongana babâ asara be-nzoni na molenge ti lo mveni so asara kusala ti lo.”​—Malachie 3:16-18.

¹⁹ Batême amû lege na e nga ti lï na yâ ti sewa ti aita na ndo sese kue. Tongana bazengele Pierre ahunda ti hinga adeba nzoni wa adisciple ti Christ alingbi ti wara na peko ti so ala zia aye kue, Jésus amû zendo so: “Azo kue so azia da, wala aita ti ala ti koli, wala aita ti ala ti wali, wala babâ, wala mama, wala amolenge, wala yaka, teti iri ti Mbi, fade A mû ye so kue na ala lege ngbangbo oko, na fade ala wara fini ti lakue lakue.” (Matthieu 19:29). Ngu mingi na pekoni, Pierre asû mbeti na ndo sewa ti “aita ti i kue so ayeke na sese so,” so mo yeke wara ni na ndo sese kue. Pierre mveni ahinga mungo maboko nga na adeba nzoni so zo awara na lege ti sewa ti aita kue, na e kue e lingbi ti hinga ni nga.​—1 Pierre 2:17; 5:9.

20. Nzoni beku wa warango batême amû?

²⁰ Na ndo ni, Jésus afa so ala so amû peko ti lo ayeke wara ande “fini ti lakue lakue.” Biani, mungo tere na Nzapa nga na batême azi na e beku ti “gbu fini so ayeke tâ fini biani”: fini ti lakue lakue na yâ fini sese ti Nzapa (1 Timothée 6:19). Mbeni nzoni kekereke so e lingbi ti leke teti e mveni nga na asewa ti e ti hon so ayeke pëpe. Nzoni beku so ayeke mû maboko na e ti “tambela na iri ti [Jéhovah, NW ] Nzapa ti e lakue lakue.”​—Michée 4:5.

[Akete tënë na gbe ni]

Mo lingbi ti fa nda ni?

• Tongana nyen nga ngbanga ti nyen a yeke nzoni e fa so e yeda na ndoye ti Jéhovah?

• Guengo na li ni na lege ti yingo wa a lingbi zo afa ni kozoni ti wara batême?

• Ngbanga ti nyen a lingbi e zia pëpe mbeto ti tingo ni wala ti yongo kungba akanga lege na e ti wara batême?

• Adeba nzoni wa so ayeke nde adisciple ti Jésus so akamata batême awe ayeke wara ni?

[Foto na lembeti 26]

“Ye nyen akanga lege na mbi ti wara batême?”

[Afoto na lembeti 29]

Batême ayeke mbeni ye so a lingbi a mû na nene ni nga ayeke mbeni ngoi ti ngia