Mo yeke sara lisoro nzoni na wali wala koli ti mo?
NA YÂ ti ambeni ngu so ahon, mbeni banque na Japon asara mbeni mandako so azia iri ni: “Lettre ti yengo tere so mbeni koli wala wali ti ngu 60 atokua.” Banque ni a hunda na aJaponais so ngu ti ala alondo na 50 ti si na 69 ti fa na gigi tâ tënë ti bê ti ala na mbage ti wali wala koli ti ala. Mbeni koli so ayeke na yâ ti mandako ni asû mbeti na wali ti lo, lo tene: “Tënë so mbi yeke tene na mo alingbi ti sara mo ngia me tongana mbi tene na mo ni pëpe mbi yeke wara vundu. Tënë ti mbi ni ayeke so, na mbi yeke tene ni na kota go: Merci so mo yeda ti duti wali ti mbi.”
Na yâ ti angobo ti sarango ye mingi, na tapande na ambeni kodoro so ayeke na mbage ti ndo so lâ ayeke sigigi dä, a ye pëpe ti tene zo afa tënë ti bê ti lo na gigi na wali wala koli ti lo. Ye oko, azo ahon 15 000 si asara lani mandako so. Tënë ti mandako ni so amû ndo na asara si a kiri a sara mbeni na pekoni, na a sigigi nga na abuku so asara tënë na ndo ti alettre so. Aye so aye ti fa so na yâ ti bibe ti azo mingi, ala ye ti fa tongana nyen ala ye akoli wala awali ti ala mingi. Ye oko, ambeni zo aye pëpe ti fa tënë ti bê ti ala na koli wala na wali ti ala. Ngbanga ti nyen? Peut-être ngbanga ti so a hunda na ala ti sara ngangu kete nga ti duti na mbeni kode tongaso si ala fa na gigi tënë ti bê ti ala na ambeni zo, na tapande koli wala wali ti ala.
Pakara Hitoshi Kato, so asigigi na mbeni buku so asara tënë na ndo ti azo so ague na retraite awe, atene so na popo ti akoli na awali so aga mbakoro na Japon, a yeke awali si ayeke mû li ni kozo ti suru yâ ti mbeti ti mariage ngbanga ti atënë so ala bata na bê ti ala aninga angu mingi. Nga lo tene: “Me a yeke nga ngbanga ti so akoli na awali ni ayeke sara lisoro pëpe na popo ti ala na ngoi so ala wara kpale.”
Peut-être li ti mbeni koli so ague na retraite awe alingbi ti kpe tongana wali ti lo aga ti fa na lo so lo wali ni lo ye ti suru yâ ti mbeti mariage ti ala. Peut-être teti angu mingi, ala yeke fa na mba ti ala pëpe atënë so ayeke na bê ti ala. Koli na wali ni alingbi ti tara ti fa tënë ti bê ti ala na mba me peut-être ala wara lege pëpe ti sara si lisoro ni angbâ ti nzere na mba. Ahon ti tene ala kpengba songo ti ala, ala bâ ti ala so ala yeke bi tere ti ala lakue na yâ ti akota papa.
Tongana nyen koli na wali so amä tere pëpe alingbi ti mä tere na yâ siriri nga ti fa atënë ti bê ti ala na mba na mbeni lege so ayeke nzoni? A lingbi ti nzere na mo ti hinga so na ndo tënë so, awango so ayeke nzoni mingi ayeke dä, awango so mo lingbi ti wara ni pëpe na yâ ti afini buku so awawango na ndo tënë ti mariage asigigi na ni me mo yeke wara awango ni so na yâ ti mbeni ngbene mbeti so azo abâ ni na nene ni mingi: mbeti ni so ayeke Bible.