Ye so Nzapa aleke teti sese so aga nduru ti ga tâ tënë awe

LANI so Adam na Eve ade na yâ Paradis, Nzapa amû yanga na ala, lo tene: “I dü amolenge mingi, i wu, i si singo na sese, i sara si ye kue aga na gbe gere ti i; i komande asusu ti kota ngu ti ingo, andeke ti nduzu, na ye ti fini kue so atambela na ndo sese.”​—Genèse 1:28.

Ti sara si sese aga na gbe gere ti ala aye gi pëpe ti tene ti dë mbeni kete mbage ti sese ni na ti lu ye dä. A ye nga ti tene so a lingbi Adam na Eve nga na amolenge ti ala akono yâ ti Paradis ni juska a mû ndo ti sese kue. Ye oko, Adam na Eve asara siokpari, na tongaso a tomba ala na yâ ti yaka ti Eden (Genèse 3:23, 24). Me so aye ti tene so azo ayeke sara ande si sese aga na gbe gere ti ala lâ oko pëpe? Ên-ën.

Ndali ti so Nzapa ayeke iri ande deba nzoni na ndo azo so amä yanga ti lo, fade ala yeke sara si sese ni aga na gbe gere ti ala. Na ngoi so lani Nzapa airi deba nzoni na ndo ti azo ti Israël ti giriri, akobe ti ayaka ti ala asara pendere nga akeke so ala lu alë nzoni mingi. Gi oko ye so si ayeke si ande na ngoi so yeke yeke sese kue ayeke ga Paradis. Tongana ti so Mbeti ti Nzapa afa, fade ‘sese ayeke lë lengo; fade Nzapa, même Nzapa ti e, airi tënë nzoni na ndo e.’ (Psaume 67:7). Biani, fade abenyama so fini pere ayeke dä, ahoto, akeke, akongö, abale nga na akota ngu ti ingo ayeke duti na ngia (Psaume 96:11-13; 98:7-9). Fade akeke na apere, apendere ndeke na anyama nga na azo ti nzoni bê ayeke si singo na ndo sese.

Fini sese aga nduru awe!

Ti ndembe so, e yeke tâ gi na yanga ti fini sese so Jéhovah Nzapa amû zendo ni. Bazengele Pierre atene: “Na lege ti zendo ti Lo, e yeke ku ayayu ti fini na sese ti fini so mbilimbili aduti na yâ ni.” (2 Pierre 3:13). Na dikongo atënë ti Pierre so, ambeni zo alingbi ti tene so sese so ayeke ga ti lo paradis lâ oko pëpe. Ala lingbi ti bâ ti ala so a yeke tâ yayu so e yeke bâ ni nga tâ sese so e yeke na ndo ni si ayeke hon na a yeke zia ambeni fini ni na place ni. Tënë ni ayeke tongaso?

“Ayayu ti fini” wala fini yayu ni ayeke nyen? A yeke pëpe yayu so e yeke bâ na lê ti e so, so Nzapa si asara ni (Psaume 19:​2, 3). Na yâ ti aversê so aga kozo na versê 13 ni, Pierre alondo ti sara tënë ti “ayayu” na lege ti fä, so ti tene angorogbia so ayeke komande na ndo ti azo (2 Pierre 3:10-12). “Ayayu” ni so akomande azo na lege ni pëpe na fade ala yeke hon (Jérémie 10:​23; Daniel 2:​44). ‘Fini yayu’ ni so ayeke mû place ti angorogbia ti azo ayeke Royaume ti Nzapa. Na yâ Royaume ni so, a yeke wara Gbia Jésus Christ nga na azo 144 000 so ayeke zingo ti wara fini na yayu nga so ayeke komande legeoko na lo.​—aRomain 8:16, 17; Apocalypse 5:9, 10; 14:1, 3.

“Sese ti fini” wala fini sese so Pierre asara tënë ni ayeke pëpe mbeni fini sese so Nzapa ayeke leke ni ti zia na place ti ngbene ni so. Jéhovah aleke lani sese so tâ na lege ni ti tene azo aduti dä lakue lakue (Psaume 104:5). Ngoi na ngoi, tongana Bible asara tënë ti “sese”, lo ye ti sara tënë ti azo (Genèse 11:1). Sese so a ga nduru ti futi ni awe ayeke azo ti sioni, legeoko tongana ti so a futi lani azo ti sioni na Kota Moa na ngoi ti Noé (2 Pierre 3:5-7). Tongaso, ‘fini sese’ ni ayeke nyen? A yeke mbeni fini bungbi ti azo, so ti tene azo so ayeke atâ wavorongo Nzapa so “bê ti ala ayeke mbilimbili.” (Psaume 125:4; 1 Jean 2:17). Andia kue so ayeke fa lege na ‘fini sese’ ni ayeke londo ande kâ na ‘fini yayu’ ni. Fade ambeni koli be-ta-zo na sese ge ayeke bâ mbilimbili si a sara ye alingbi na andia ni so.

Aye kue fini nga pendere!

Na ngoi so Jéhovah amû na e sese tongana ndo ti duti ti e azo, lo leke tâ ni pendere awe. Lo wani lo tene so aye so kue lo sara na sese ayeke “nzoni mingi.” (Genèse 1:31). Me Satan Zabolo apusu Adam na Eve ti ke yanga ti Nzapa (Genèse 3:​1-5; Apocalypse 12:9). Ye oko, na yâ ti ngoi kete, Nzapa ayeke sara si azo ti mbilimbili awara “fini so ayeke tâ fini biani”, so ti tene “fini ti lakue lakue” na yâ Paradis (1 Timothée 6:12, 19). Zia e bâ fadeso ambeni ye ti nzoni so azo ayeke wara ni na ngoi ni so.

Na ngoi ti Komandema ti Ngu Saki Oko ti Christ, a yeke kanga Satan na lo yeke wara ande lege pëpe ti ga na ye ti vundu na ndo ti azo. Bazengele Jean atene: “Mbi bâ mbeni ange [archange Michel, wala Jésus Christ] alondo na yayu, a zu, na clé ti bukulugbu-ti-bingo na kota zingiri ayeke na maboko ti lo. Na lo gbu kota ngbo ni, ngbo ti giriri, so ayeke Zabolo na Satan, lo kanga lo ngu [saki] oko, lo bi lo na yâ bukulugbu-ti-bingo, na lo kanga yanga ni na ndo lo na lo zia sceau dä, si lo lingbi handa amara mbeni pëpe juska ngu [saki] oko so awe.” (Apocalypse 20:1-3; 12:12). Na ndo ti liberté so azo ayeke duti na ni ngbanga ti so a kanga Satan awe, ala yeke wara nga ande ambeni ye ti nzoni mingi na gbe ti komandema ti Royaume ni.

Ye ti sioni, sarango ngangu na azo nga na bira ayeke duti ande mbeni pëpe. Bible amû zendo so: “A ngbâ kete, na fade azo ti sioni ayeke mbeni pëpe; fade mo bâ ndo so ala duti dä, na ala yeke mbeni pëpe. Me azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi. Sese ni aga ye ti héritier ti azo ti mbilimbili, na fade ala duti dä lakue.” (Psaume 37:10, 11, 29). Jéhovah Nzapa ayeke sara ande si “bira awe juska na nda ti sese”. (Psaume 46:10). So tâ tënë ti dengo bê ti hinga so siriri na nzoni dutingo ayeke duti dä biani!

Nzoni kobe ayeke duti ande mingi. Wasungo psaume ahe bia so: “Fade le-kobe ayeke mingi na sese na li ti ahoto.” (Psaume 72:16). Na ngoi ni kâ, zo oko ayeke bâ pasi na nzara pëpe.

Zo ti bâ pasi na kobela ayeke dä pëpe. Biani, “fade wakodoro atene pëpe, Mbi yeke na kobela.” (Esaïe 33:24; 35:5, 6). Na tango so Jésus Christ ayeke lani na sese, lo sava azo ti buruma, awazin nga na awaziba (Matthieu 9:35; Marc 1:40-42; Jean 5:5-9). Tara ti bâ ye so lo yeke sara ande na yâ ti fini sese. Tara ti bâ ngia so ayeke duti ande dä tongana awaziba, awambongi, awazin nga na awabuburu awara sava ti tere.

Na ngoi so azo so amä yanga ayeke gue yeke yeke ti ga mbilimbili-kue, asioni ye ti peko ti gango mbakoro ayeke hunzi ande. Atatara ti lê, akeke so azo ti bubango-gere nga na ambakoro ayeke tambela na ni ayeke duti dä mbeni pëpe. Nga, avélo ti azo ti bubango-gere, ada-nganga nga na ayorö ayeke duti dä mbeni pëpe. So tâ gbiango ye si ayeke duti ande na ngoi so azo akiri awara ngangu ti ala ti maseka! (Job 33:25). Lango oko oko, e yeke zingo na ndapre na nzoni tere ti to nda ti mbeni lango ti kusala so aga na e ngia.

Londongo ti afami ti e na kuâ nga na ti ambeni zo ayeke zia ande ngia mingi na bê ti e (Jean 5:28, 29; Kusala 24:15). So tâ ngia si e yeke duti ande na ni ti yamba azo tongana Abel, Noé, Abraham, Sara, Job, Moïse, Ruth, David, Elie, Esther nga na ambeni wakua ti Jéhovah mingi! Ambeni zo nde so wungo ti ala ayeke mingi mingi ayeke londo ande nga na popo ti akuâ. Mingi ti ala amanda ye lâ oko pëpe na ndo ti Jéhovah; me azo ayeke duti ande dä ti yamba ala nga ti fa ye na ala na ndo Nzapa, na ndo ye so lo leke ti sara nga na ndo Molenge ti lo Jésus Christ. Na ngoi so azo so a zingo ala na kuâ ayeke hinga Wasarango ala, fade hingango ye ti Jéhovah asi singo na ndo sese.

Tâ ye ti nzoni ahon kue ayeke so e yeke wara lege ti voro oko tâ Nzapa teti lakue lakue. E yeke wara ande kota matabisi ti ‘sara na Jéhovah na ngia,’ nga e yeke sara kusala maboko na maboko ti leke apendere da, ti dë yaka nga, na nda ni, ti sara si sese ni kue aga na gbe gere ti e (Psaume 100:1-3; Esaïe 65:21-24). A yeke duti ande ye ti ngia mingi teti e ti duti na fini lakue lakue na yâ ti mbeni pendere paradis ti siriri, so alë anzoni kobe na so amû gloire na iri ti Jéhovah so ayeke nzoni-kue.​—Psaume 145:21; Jean 17:3.

Tara ti nda ni so aku azo kue

Na ngoi ti Komandema ti lo ti Ngu Saki oko, fade Jésus ayeke sara si azo oko oko kue so amä yanga ti Nzapa abâ nzoni na lege ti sandaga ti lo. Na nda ni, a yeke zi siokpari kue na tere ti azo na a yeke sara si azo aga mbilimbili-kue (1 Jean 2:2; Apocalypse 21:1-4). So a zi aye ti peko ti siokpari ti Adam kue awe, azo so aga mbilimbili-kue ayeke lingbi ande kue na lê ti Nzapa na lege ti mitele, na lege ti yingo, na lege ti bibe nga na ti sarango ye. A yeke na ngoi so azo ayeke ga mbilimbili-kue si ala yeke kiri ande na “fini” ni biani tongana ti so Nzapa aye (Apocalypse 20:⁠5). Biani, so azo aga mbilimbili-kue na so sese kue aga Paradis ayeke mû ande gonda mingi na Jéhovah.

Kete na peko ti so Komandema ti Ngu Saki Oko ti Christ ayeke hunzi ande, a yeke zi Satan na adémon ti lo na kanga ti ala so ala sara teti ngu saki oko (Apocalypse 20:1-3). A yeke mû ande lege na ala ti sara tanga ti ngangu ti ala ti tara ti gboto azo yongoro na Nzapa. Atâa so ambeni zo ayeke zia ande lege si asioni nzara ti tere ti ala ahon ndo ti ala, ye ni ayeke ngbâ ande tongaso pëpe. Jéhovah ayeke futi ande ala legeoko na Satan nga na ayingo sioni ti lo kue. Ye ti sioni ayeke kiri ande ti bâ gigi mbeni pëpe. Azo ti sioni kue ayeke hon biaku biaku, na azo ti mbilimbili ayeke wara fini ti lakue lakue.​—Apocalypse 20:7-10.

Mo yeke duti ande dä?

Ngia ti lakue lakue ayeke na gbele ala so andoye Jéhovah Nzapa. Fade mbeni ye ti sara si fini ti lakue lakue na yâ Paradis afun sen ayeke duti dä pëpe. Biani, tongana ngoi ayeke hon, gigi ni ayeke nzere ande mingi ndali ti so hingango ye na ndo ti Jéhovah Nzapa ayeke hunzi pëpe (aRomain 11:33). Lakue mo yeke wara ande lege ti manda mbeni fini ye, na mo yeke wara ande ngoi mingi ti manda ye. Ngbanga ti nyen? Ngbanga ti so mo yeke ngbâ ande na fini gi teti ngu 70 wala 80 pëpe, me lakue lakue.​—Psaume 22:27; 90:10; Zo-ti-fa-tene 3:11.

Tongana mo ye Nzapa, mo yeke duti lakue na ngia mingi ti sara ye so bê ti lo aye. Bazengele Jean atene: “So ayeke ndoye ti Nzapa: e bata komandema ti Lo. Na komandema ti Lo ayeke tongana nengo ye pëpe.” (1 Jean 5:3). Tongaso, zia lege pëpe na mbeni ye ti kanga lege na mo ti nzere na Jéhovah Nzapa na sarango ye so ayeke mbilimbili. Bi bê ti mo lakue na pendere beku so Bible azia na gbele mo. Leke na bê ti mo ti sara ye so bê ti Jéhovah aye, na mo zia lege ni lâ oko pëpe. Na nda ni, mo yeke duti ande dä tongana ye so Nzapa aleke teti sese so aga tâ tënë na sese kue aga paradis teti lakue lakue.

[Foto na lembeti 4]

Deba nzoni ti Nzapa asara si ayaka ti azo ti Israël alë lani mingi

[Foto na lembeti 7]

Aye ti nzoni wa mo yeke ku ti wara na yâ paradis?