Atënë so azo ahunda

E hinga tongana nyen so ndara so a sara tënë ni na aProverbe 8:22-31 ayeke Jésus Christ kozoni si lo ga na sese?

Na yâ mbeti ti aProverbe, e diko tënë so alondo na Nzapa na ndo ndara: “Mbi yeke ti L’Eternel na komansema ti lege ti Lo, mbi yeke kozoni si kusala ti Lo ti giriri ayeke. . . . Kozoni si ahoto ayeke na place ni, kozoni si A sara akete hoto, A dü mbi, . . . mbi yeke kä tongana Lo leke ayayu, . . . mbi yeke na tere ti Lo tongana wakode. Lakue Lo wara ngia na yâ mbi, mbi duti na ngia na gbele Lo lakue. . . . Mbi wara ngia na popo ti amolenge ti azo.”

Aversê so ayeke sara gi tënë ti ndara ti Nzapa wala ti zo pëpe. Ngbanga ti nyen? Ngbanga ti so ndara so a fa lo ge atene ‘a dü lo’, wala a créé lo, kozoni si Jéhovah asara sese. Lakue Jéhovah Nzapa ayeke dä na lakue lo yeke na ndara (Psaume 90:1, 2). Komansema ti ndara ti lo ayeke pëpe; a dü ni wala acréé nga ni pëpe. Na ndo ni, a tene ndara ni asara tënë na lo sara kusala, tongana ti mbeni zo.​—aProverbe 8:1.

Mbeti ti aProverbe atene so giriri kozoni, ndara ni ayeke na tere ti Jéhovah, Wasarango ye, tongana “wakode.” Tënë so abâ biani Jésus. Ngu mingi kozoni si lo ga na sese, Jésus asara kua nduru mingi na Jéhovah, tongaso Mbeti ti Nzapa atene: “Lo yeke kozoni ye kue, na ye kue angbâ na place ni na yâ Lo.”​—aColossien 1:17; Apocalypse 3:14.

Ti sara tënë ti Molenge ti Nzapa tongana ndara alingbi biani, teti lo yeke Zo so afa ye so Jéhovah aleke giriri na ndara ti sara nga na andia ti lo. Na ngoi so lo de lani na yayu, Jésus ayeke Tënë ti Nzapa, wala zo so afa peko ti tënë ti Nzapa (Jean 1:1). A fa lo tongana “ngangu ti Nzapa na ndara ti Nzapa.” (1 aCorinthien 1:24, 30). So pendere fango ye si a tene na ndo Molenge ti Nzapa, lo so ndoye ti lo teti azo apusu lo ti mû fini ti lo na sandaga ti sö ala!​—Jean 3:16.

[Foto na lembeti 31]

“Kozoni si ahoto ayeke na place ni, . . . A dü mbi”