Ti gue na eglize a ga na ye ti nzoni?

“MBI lingbi ti duti nzoni zo sân ti gue na eglize!” A yeke tënë so azo mingi ayeke tene. Azo mingi so asara ye na lege ni, so ayeke bâ mawa ti zo na so azo alingbi ti zia bê na ala aye tënë ti nzapa pëpe. Na tapande, na Poto ti Do, azo mingi ague na eglize pëpe atâa so mingi ti ala atene so ala mä na bê na Nzapa.a Même na Amerika ti Mbongo, tongana mo mû aCatholique 100 gi ala 15 wala 20 si ayeke gue lakue na eglize.

Tongana ambeni zo mingi, peut-être mo kue mo bâ so a-eglize asara pëpe si gigi ti zo aga nzoni. Me, peut-être mo hinga nga so giriri, na ngoi ti akotara ti mo, azo aye ti gue na eglize mingi ahon ti laso. Ngbanga ti nyen si tënë ti nzapa agbu bê ti azo fadeso mingi pëpe? Mbeni zo alingbi ti duti nzoni zo sân ti gue na eglize? Mbeni bungbi ti nzapa ayeke dä so alingbi ti sara si gigi ti mo aga nzoni?

Nda ni so azo mingi aye ti gue na eglize pëpe

Teti ngu ngbangbo mingi, mingi ti azo so atene ala yeke ti Christ amä na bê so Nzapa ahunda na zo ti mä yanga. Na lege ti akusala ti aprêtre wala na lege ti fango lege ti mbeni pasteur na eglize, azo ayeke sara ngangu ti ga nzoni na lê ti Nzapa. Biani, azo mingi ahinga lani so a-eglize asara ye na ndendia. Azo kue ahinga ye so a-eglize asara na ngoi ti abira, nga na asioni tambela ti ambeni mokonzi-nzapa ni. Me mingi ti ala abâ so a-eglize ayeke nzoni. Ambeni zo aye amozoko ni, asarango ye ti ndima ni nga na tambelango ti aye na yâ ti eglize; ambeni même abâ so mbeto ti guengo na enfer ayeke mbeni ye so amû maboko na ala, atâa so a wara tënë so na yâ Mbeti ti Nzapa pëpe. Na pekoni, ambeni ye aga agbian lege so azo mingi ayeke bâ na a-eglize.

Azo mingi ayeda na tënë so atene zo aga na lege ti nyama. Ambeni atene so fini aga gi tongaso na bê ti lo, maboko ti Nzapa ayeke na pekoni pëpe. A-eglize mingi awara lege oko pëpe ti fa na azo polele so Nzapa ayeke Lingu ti fini (Psaume 36:10). Na ndo ni, teti so senda-kode ague na li ni, akode ti kaïngo kobela, akode ti yongo azo nga na ti tokuango asango amaï ngangu mingi na azo abâ so senda-ye alingbi ti leke kpale kue. Na ndo ni, a bâ so awandara so ayeke bâ tënë ti dutingo ti azo nga ala so ayeke bâ seni ti bibe ti zo ayeke fa lege na zo nzoni ahon a-eglize. Ti a-eglize, ala lingbi pëpe ti fa polele na azo so batango ndia ti Nzapa ayeke tâ nzoni lege ti duti na fini.​—Jacques 1:25.

Ni la, a-eglize mingi agbian yâ ti fango tënë ti ala. Aprêtre na apasteur adö lege ti fango tënë so atene Nzapa ahunda na zo ti mä yanga azia. Fadeso mingi ti ala ayeke fa so a yeke na zo oko oko ti soro lo mveni ye so ayeke nzoni wala sioni. Ti tene azo mingi amû peko ti ala, ambeni mokonzi-nzapa atene so atâa dutingo ti mo ayeke tongana nyen Nzapa ayeke yeda na mo. Mara ti fango ye tongaso adabe ti e na ye so Bible atene giriri: “Lâ ni ayeke ga so fade ala ye ti mä nzo tënë pëpe; me, teti mê ti ala asara ala, fade ala iri amaître mingi na lege ti nzara ti ala mveni ti fa tënë na ala.”​—2 Timothée 4:3.

Ahon ti gboto azo na peko ti ala, afango ye tongaso ayeke tomba azo ni yongoro. A yeke na lege ni si ala hunda tere ti ala: ‘Tongana a-eglize adë kite so a yeke Nzapa si asara ye kue na ngangu ti lo nga so lo yeke na ndara ti lu andia, ngbanga ti nyen ti gue na eglize? Ndani nyen ti tene mbi pika li ti fa na amolenge ti mbi tënë ti nzapa?’ Azo so ayeke tara ti duti nzoni na yâ fini ti ala ato nda ti bâ so vorongo nzapa aga senge ye. Ala dö a-eglize azia, na tënë ti nzapa ayeke kota ye na lê ti ala mbeni pëpe. Tongana nyen si vorongo nzapa so alingbi fade ti sara nzoni na zo aga fadeso mbeni senge ye na lê ti azo? Bible afa nda ti tënë so nzoni.

A mû vorongo nzapa ti sara na sioni

Bazengele Paul agboto mê ti akozo Chrétien so ambeni zo ayeke mû ande lege ti vorongo so Christ azia na sese ti sara na sioni. Lo tene: “Fade aikaï [wala ambo ti ngonda] ti sioni alï na popo ti i, ala zia kundu ni pëpe; na fade azo alondo na popo ti i mveni, ala fa tënë ti kirikiri si adisciple ague na peko ti ala.” (Kusala 20:29, 30). Mbeni zo so lani afa “tënë ti kirikiri” ayeke Augustin, wafango ye na ndo nzapa ti aCatholique. Jésus afa na adisciple ti lo so a yeke na lege ti Tënë ti Nzapa si ala lingbi ti sara si ambeni zo amä na bê. Na Luc 14:23, Jésus asara tënë ti “forcé azo ti ga na yâ ni”. Ye oko, Augustin aba yâ ti tënë so, na lo tene so a yeke na lege ni ti gbu azo na ngangu ti mä na bê (Matthieu 28:19, 20; Kusala 28:23, 24). Augustin amû tënë ti nzapa ti komande na azo.

A yeke Satan, mbeni ange ti kpengba-li, si ayeke na peko ti sio kusala so nga na ye so abuba tënë ti nzapa. Lo pusu lani azo ti nzapa ti gi lege ti buba akongregation ti akozo Chrétien. Na ndo azo so Mbeti ti Nzapa atene: “Azo tongaso ayeke abazengele ti wataka, ala sara kusala na lege ti handa, ala gbian tere ti ala si azo abâ ala tongana abazengele ti Christ. Na so ayeke ye ti dongo bê pëpe, teti Satan mveni agbian tere ti lo si azo abâ lo tongana ange ti lumière. Tongaso a yeke kota ye pëpe tongana azo ti lo agbian tere ti ala nga si azo abâ ala tongana azo so asara kusala ti mbilimbili.”​—2 aCorinthien 11:13-15.

Satan angbâ lakue ti sara kusala na abungbi ti nzapa so atene ala yeke ti Christ, so atene ala yeke na nzoni tambela nga so ala tene ala yeke tene tâ tënë ti handa na azo ti mû peko ti lo ahon ti mû peko ti Nzapa (Luc 4:5-7). Peut-être mo bâ awe so amokonzi-nzapa mingi laso ayeke mû tënë ti nzapa ti yä tere ti ala na nduzu na yongo akota iri nga ti wara nginza na maboko ti akundu ti ala. Angorogbia nga asara kusala na abungbi ti nzapa ti pusu azo ti gue na bira ndali ti kodoro ti ala.

Zabolo ayeke sara kusala na abungbi ti nzapa mingi ahon ti so azo ahinga ni. Peut-être mo tene ti mo so ayeke gi ambeni kete bungbi ti nzapa so ayeke sara ye na lege ni pëpe si ayeke ti Satan. Me Bible atene so “lo so ala di iri ti lo Zabolo na Satan” ayeke “wahanda ti azo ti sese so kue”. Bible akiri a tene: “Sese so kue ayeke na tïtî wato-sioni.” (Apocalypse 12:9; 1 Jean 5:19). Ambeni mokonzi-nzapa asara kusala na tënë ti nzapa ti gboto azo na peko ti ala. Nzapa abâ ti lo ni tongana nyen?

“Teti nyen ala ga na mbi?”

Tongana bê ti mo aso ndali ti sioni tambela ti ambeni bungbi ti nzapa so atene ala yeke aChrétien, hinga so bê ti Nzapa ti Ngangu Ahon Kue aso mingi na ala. Tongana ti so Israël asara giriri, a-eglize so atene ala yeke aChrétien atene ala te nga mbele na Nzapa. Ala use kue angbâ be-ta-zo pëpe. Tongaso oko ngbanga so Jéhovah afâ lani na ndo ti Israël ayeke tï nga na ndo ti a-eglize so laso atene ala yeke ti Christ. Jéhovah atene: “Ala mä tënë ti Mbi pëpe; na ala ke Ndia ti Mbi awe. Teti nyen ala ga na Mbi na yombo ti libano so alondo na Séba? . . . sacrifice ti i anzere na Mbi pëpe.” (Jérémie 6:19, 20). Nzapa ayeda pëpe na kusala so awandendia asara na lo. Angobo ti sarango ye ti ala nga na asambela so ala yeke tene na lo anzere na lo oko pëpe. Lo tene lani na Israël: “Âme ti Mbi ake fini nze ti i, na fête ti i so A diko lâ ni awe; ye so ayeke kungba na ndo Mbi; Mbi nze ti yö ye so. Na tongana i yä maboko ti i, fade Mbi honde lê ti Mbi na i. Biani, tongana i sambela lege mingi mingi, fade Mbi mä pëpe.”​—Esaïe 1:14, 15.

Amatanga so a-eglize airi ni amatanga ti aChrétien me so agonda lani anzapa ti wataka anzere biani na Jéhovah? Lo yeke mä sambela ti amokonzi-nzapa so abuba aye so Christ afa? Nzapa ayeda na mbeni eglize so ake ndia ti lo? Mo lingbi ti hinga biani so bango ndo ti Nzapa na ndo angobo ti sarango ye ti a-eglize laso ayeke legeoko na bango ndo so lo yeke na ni na ndo asandaga ti Israël giriri. Na ndo ala, lo tene: “Teti nyen ala ga na mbi?”

Ye oko, Jéhovah ayeke bi bê ti lo mingi na ndo tâ lege so azo ti mbilimbili ayeke voro na lo. Bê ti Nzapa anzere mingi tongana azo akiri singila teti ye kue so ala wara na maboko ti lo (Malachie 3:16, 17). Tongaso, mo lingbi ti duti nzoni zo sân ti voro Nzapa? Mbeni zo so asara ye oko pëpe ndali ti babâ na mama ti lo so afa ndoye na mbage ti lo alingbi pëpe ti bâ tere ti lo tongana nzoni zo, ni la pëpe? Mbeni zo so asara ye oko pëpe teti Nzapa alingbi ti duti nzoni zo? Ti tâ tënë ni, a lingbi e bi bê biani na tâ Nzapa, lo so amû na e fini. Na yâ article ti peko, e yeke bâ tongana nyen tâ vorongo agonda gi Nzapa pëpe me nga a sara nzoni na e.

[Kete tënë na gbe ni]

[Foto na lembeti 4]

A-eglize afa polele so a yeke Nzapa si asara ye kue?

[Foto na lembeti 4, 5]

Zo ti Nzapa alingbi ti duti na ndo so?

[Foto na lembeti 5]

Tongana nyen Nzapa abâ mara ti amatanga tongaso?

[Lingu ti foto]

AP Photo/​Georgy Abdaladze