Gbu ngangu ti ku lâ ti Jéhovah

“Na ndo mabe ti i, . . . i zia bê so azia pëpe.”​—2 PIERRE 1:5, 6.

1, 2. Gbungo ngangu ayeke nyen? Ngbanga ti nyen aChrétien ayeke na bezoin ni?

KOTA lâ ti Jéhovah aga nduru awe (Joël 1:15; Sophonie 1:14). Teti so e yeke aChrétien so aleke na bê ti ala ti ngbâ be-ta-zo na Nzapa, e yeke ku na ngia ngoi so Jéhovah ayeke fa ande so lo la lo yeke na droit ti komande dunia. Ti fadeso, azo ayeke ke e, ala yeke tene sioni tënë ti e, ala yeke sara ngangu na e nga e yeke wara kuâ ndali ti mabe ti e (Matthieu 5:10-12; 10:22; Apocalypse 2:10). Ye so ahunda na e ti gbu ngangu, so ti tene ti kanga bê na gbele aye ti sioni. Bazengele Pierre awa e, lo tene: “Na ndo mabe ti i, . . . i zia bê so azia pëpe” dä (2 Pierre 1:5, 6). E yeke na bezoin ti gbu ngangu, ndali ti Jésus atene: “Zo so agbu ngangu juska na nda ni, fade A sö lo.”​—Matthieu 24:13.

² Na ndo ni, e yeke tï kobela, azo ti e ayeke kui nga e yeke wara ambeni tara nde. So tâ ngia si Satan ayeke duti ande na ni tongana mabe ti e atï! (Luc 22:31, 32). Teti so Jéhovah ayeke mû maboko na e, e lingbi ti gbu ngangu na gbele atara nde nde kue (1 Pierre 5:6-11). Zia e bâ ambeni ye so asi na aita na so afa so e lingbi ti gbu ngangu ti ku lâ ti Jéhovah na mbeni mabe so akpengba.

Kobela akanga lege na ala pëpe

3, 4. Fa mbeni tapande so afa so e lingbi ti ngbâ be-ta-zo na Jéhovah atâa e yeke na kobela.

³ Laso, Nzapa ayeke sava e pëpe na lege ti ye ti kpene, me lo yeke mû na e ngangu ti kanga bê na ngoi so tere ti e aso (Psaume 41:2-4). Sharon atene: “Ngbene ye so mbi de kete, vélo ti awazin so mbi yeke na ni ayeke tongana kamarade ti mbi. A dü mbi na mbeni kobela so abuba mongoli ti mbi na akanga lege na mbi ti wara ngia tongana tanga ti amolenge kue.” Mandango ye na ndo Jéhovah nga na azendo so lo mû ti tene azo akiri awara nzoni seni asara si Sharon awara beku. Atâa so lo yeke sara tënë nzoni pëpe nga a yeke ngangu na lo ti tambela, lo wara ngia na yâ fango tënë. A sara ngu 15 awe so Sharon atene: “Seni ti mbi alingbi peut-être ti ngbâ ti buba, me mbi zia bê ti mbi kue na Jéhovah nga mbi yeke na kpengba songo na lo, na a yeke aye so mbi yeke tâ na bezoin ni ti ngbâ ngangu. So kota ngia si mbi yeke na ni ti duti na popo ti awakua ti Jéhovah nga ti bâ so lo yeke mû maboko na mbi lakue!”

⁴ Bazengele Paul awa aChrétien ti Thessalonique ti “lungula vundu ti ala so bê ti ala anze”. (1 aThessalonicien 5:14). Kota vundu so zo awara ndali ti mbeni ye so atambela nzoni pëpe alingbi ti sara si bê ti lo anze. Na ngu 1993, Sharon atene: “Teti so mbi bâ so mbi yeke ye oko pëpe, mbi . . . tï na yâ ti mbeni kota vundu so aninga ngu ota. . . . A-ancien adë bê ti mbi na ala mû wango na mbi. . . . Na lege ti a-article ti Tour ti Ba Ndo, Jéhovah abâ lani lege ti mbi na ndoye na lege so lo fa ngbanga ti nyen bê ti azo ayeke nze. Biani, Jéhovah ayeke bâ lege ti awakua ti lo nzoni mingi nga lo hinga ngbanga ti nyen e yeke na ngia wala e yeke na vundu.” (1 Pierre 5:6, 7). Sharon angbâ lakue be-ta-zo na Nzapa na ngoi so lo yeke ku gango ti kota lâ ti Jéhovah.

5. Ye wa afa so aChrétien alingbi ti kanga bê na gbele akota kpale so asara ngangu mingi na ndo ti ala?

⁵ Ambeni Chrétien ayeke bâ pasi mingi ndali ti aye so asi ândö na ala. Harley ayeke lani turugu na ngoi ti Use Bira so Amû Sese Kue. Na pekoni, lo bâ li ti lo mingi na ndo ti aye so asi lani na ngoi ti bira so. Na ngoi so lo lango, lo yeke dekongo, lo tene: “Hange, hange si!” Tongana lo zingo, gbiki amû lo kue. Ye oko, lo to nda ni lani ti sara ye alingbi na ye so Mbeti ti Nzapa afa, na a si na mbeni ngoi, lo yeke bâ asioni bango li mingi pëpe tongana ti kozo.

6. Na lege wa mbeni Chrétien agbu lani ngangu na gbele mbeni kobela so asara si kete lo yeke na ngia, kete lo yeke na kota vundu?

⁶ Mbeni Chrétien so ayeke na kobela so asara si kete lo yeke na ngia, kete lo yeke na kota vundu abâ so a yeke ngangu na lo ti fa tënë da na da. Ye oko, lo ngbâ lakue ti sara ni ndali ti so lo hinga so fango tënë ayeke sara si lo na azo so ayeke mä lo awara fini (1 Timothée 4:16). Ngoi na ngoi, lo bâ so lo lingbi pëpe ti pika ko ko ko. Me lo tene: “A si na mbeni ngoi, mbi wara lege ti kanga bê ti mbi si mbi duti kamême kpô, na mbi gue na mbeni da mbi fa tënë. Teti so mbi ngbâ lakue ti sigigi na fango tënë, mbi ngbâ lakue ti kpengba na lege ti yingo.” A yeke nga lani mbeni kota kpale na ita so ti gue na abungbi, me lo hinga so ti bungbi na aita ayeke kota ye mingi. Tongaso, lo sara ngangu ti gue na bungbi.​—aHébreu 10:24, 25.

7. Ambeni Chrétien ayeke na mbeto ti sara tënë na gbele azo wala ti ga na bungbi. Tongana nyen ala fa so ala yeke gbu ngangu?

⁷ Ambeni Chrétien ayeke na mbeni kobela so asara si ala yeke sara mbeto ahon ndo ni. Na tapande, ala lingbi ti duti na mbeto ti sara tënë na gbele azo wala même ti gue na bungbi. Tara ti bâ tongana nyen a yeke ngangu na aita so ti kiri tënë na ngoi ti abungbi wala ti sara devoir na ngoi ti Ekole ti Kusala ti aChrétien! Ye oko, ala yeke gbu ngangu; na, e bâ na nene ni mingi gango ti ala na bungbi nga na mungo mbage ti ala dä.

8. Ye wa zo ayeke tâ na bezoin ni tongana lo yeke na akpale so asara si lo yeke na vundu wala na mbeto?

⁸ Ti wu tere mingi nga ti lango nzoni alingbi ti mû maboko na mbeni zo ti gbu ngangu na gbele aye so asara si zo ayeke na vundu wala na mbeto. A yeke nzoni peut-être ti bâ mbeni docteur. Ye oko, tâ ye so ayeke mû maboko na zo ayeke ti sambela Nzapa na ti zia bê kue na lo. Psaume 55:23 atene: “Mo zia kungba ti mo na ndo L’Eternel, na fade Lo bata mo. Fade Lo zia ye ayengi azo ti mbilimbili lâ oko pëpe.” Tongaso, “zia bê ti mo kue na L’Eternel”.​—aProverbe 3:5, 6.

Kangango bê tongana mbeni zo ti e akui

9-11. (a) Ye wa alingbi ti mû maboko na e ti kanga bê tongana mbeni zo so e ye lo mingi akui? (b) Tongana nyen tapande ti Anne alingbi ti mû maboko na e ti kanga bê tongana mbeni zo so e ye lo mingi akui?

⁹ Na ngoi so mbeni zo akui, asewa ti lo ayeke na kota vundu mingi. Abraham atoto kuâ ti wali ti lo Sara so lo ye lo mingi (Genèse 23:2). Même Jésus so ayeke mbilimbili-kue “atoto na ngule” tongana kamarade ti lo Lazare akui (Jean 11:35). Tongaso, a yeke tâ na lege ni ti tene mbeni zo awara vundu ndali ti kuâ ti mbeni zo so lo ye lo mingi. Ye oko, aChrétien ahinga so a yeke zingo ande akuâ (Kusala 24:15). A yeke ndali ni la si “vundu asara [ala] pëpe tongana atanga ni so ayeke na beku pëpe.”​—1 aThessalonicien 4:13.

¹⁰ Tongana nyen si e lingbi ti kanga bê na ngoi so mbeni zo ti e akui? Ti mû mbeni tapande alingbi peut-être ti mû maboko na e. Fani mingi, e yeke sara vundu aninga pëpe tongana mbeni kamarade ti e ague na voyage ndali ti so e hinga so e yeke kiri ti wara tere na lo. Ti duti na oko bango ndo tongaso na ndo ti kuâ ti mbeni Chrétien so ayeke be-ta-zo alingbi ti sara si bê ti e adë kamême ndali ti so e hinga so a yeke zingo ande lo.​—Zo-ti-fa-tene 7:1.

¹¹ Ti zia bê ti e kue na “Nzapa ti lungula vundu kue” ayeke sara si e kanga bê ti e na ngoi so mbeni zo ti e akui (2 aCorinthien 1:3, 4). Nga, ti gbu li na ndo ti ye so Anne, mbeni womua na ngoi ti akozo Chrétien asara alingbi ti mû maboko na e. Lo ga womua na pekoni so lo sara mariage a sara gi ngu mbasambala. Me même na ngoi so lo yeke na ngu 84, lo ngbâ lakue ti sara kusala ti Jéhovah na temple (Luc 2:36-38). Kite ayeke dä pëpe so ti mû tere ti lo kue na kua ti Jéhovah tongaso asara si lo hon ndo ti vundu ti lo nga lo bâ so lo duti gi lo oko pëpe. Ti mû mbage lakue na akusala ti aChrétien so na popo ni mo yeke wara kusala ti fango tënë ti Royaume alingbi ti mû maboko na e ti kanga bê na gbele vundu so e yeke wara tongana mbeni zo ti e akui.

Gbungo ngangu na gbele atara nde nde

12. Na yâ ti sewa, ambeni Chrétien agbu ngangu na gbele tara wa?

¹² A hunda ti tene ambeni Chrétien akanga bê na gbele atara so ayeke si na yâ ti asewa ti ala. Na tapande, tongana mbeni koli wala mbeni wali so asara mariage awe asara lango-sioni, ye so alingbi ti ga na kota vundu mingi na yâ ti sewa ni. Ndali ti kota vundu so koli wala wali ti zo so asara lango-sioni ayeke na ni, lango alingbi ti kpe na lê ti lo nga lo lingbi ti toto mingi. Gi na sarango akete kua, lo lingbi ti sara afaute wala ti wara sioni ndali ti so vundu asara lo mingi. Lo lingbi ti te ye gbä, lo lingbi ti ngen nga apensé ti lo alingbi ti gue kirikiri. A lingbi ti duti ngangu na lo ti sara akusala ti aChrétien. Nga, amolenge ni kue alingbi ti duti na vundu mingi.

13, 14. (a) Dengo bê wa mo wara na yâ ti sambela ti Salomon na ngoi ti mungo temple na Nzapa? (b) Ngbanga ti nyen e yeke sambela ti wara yingo vulu ti Nzapa?

¹³ Na ngoi so e wara mara ti atara tongaso, Jéhovah ayeke mû na e maboko so e yeke na bezoin ni (Psaume 94:19). Sambela so Gbia Salomon asara na ngoi ti mungo temple ti Jérusalem na Nzapa afa so Jéhovah ayeke mä asambela ti azo ti lo. Salomon asambela, lo tene: “Tongana mbeni zo wala azo ti Israël kue asambela Mo na ahunda Mo, na azo oko oko kue ti ala ahinga kobela ti bê ti ala, na ala yä maboko ti ala na da so; tongaso, Mo mä tënë so na yayu, ndo ti duti ti Mo, na Mo pardone ala, na Mo sara, na Mo so Mo hinga bê ti azo, Mo futa azo oko oko kue alingbi na lege ti ala kue (teti Mo, gi Mo oko, Mo hinga bê ti amolenge ti azo kue); si ala lingbi kpe mbeto ti Mo na lâ ni kue so ala duti na ndo sese so Mo mû na akotara ti e.”​—1 aGbia 8:38-40.

¹⁴ Mbeni ye so alingbi ti mû maboko mingi na e ayeke ti ngbâ lakue ti sambela Nzapa ti mû yingo vulu ti lo na e (Matthieu 7:7-11). Tâ ngia nga na siriri ayeke ambeni mbage ti lengo ti yingo (aGalate 5:22, 23). So tâ dengo bê si e yeke na ni tongana Babâ ti e ti yayu akiri tënë na asambela ti e na lo sara si kota ngia amû place ti vundu ti e nga siriri amû place ti kota gingo bê so e yeke na ni!

15. Aversê wa alingbi ti sara si agingo bê ti e adë kete?

¹⁵ A yeke na lege ni ti tene e gi bê ti e na angoi so a lingbi e gbu ngangu na yâ ti angangu kpale. Me agingo bê ti e ni alingbi ti dë kete tongana e girisa pëpe atënë ti Jésus so lo tene: “I gi bê ti i tënë ti fini ti i pëpe, fade i te nyen, wala i nyon nyen, wala i yü bongo ti nyen. . . . I gi royaume ti Nzapa na mbilimbili ti Lo kozoni, na fade A mû ye so kue na i nga.” (Matthieu 6:25, 33, 34). Bazengele Pierre awa e ti tene ‘ye kue so e gi bê ti e dä, e zia na tïtî Nzapa, teti Lo yeke bata e.’ (1 Pierre 5:6, 7). A yeke tâ na lege ni ti tene zo asara ngangu ti leke kpale so lo wara. Ye oko, na pekoni so e sara ye kue so e lingbi ti sara awe, gingo bê na ndo akpale ti e alingbi pëpe ti mû maboko na e, me sambela alingbi ti sara ni. Zo ti sungo psaume atene: “Zia lege ti mo na tïtî L’Eternel; zia bê ti mo na Lo, na fade Lo sara ye.”​—Psaume 37:5.

16, 17. (a) Ngbanga ti nyen agingo bê ti e alingbi ti hunzi kue pëpe? (b) Ye wa ayeke si na e tongana e sara ye alingbi na aPhilippien 4:6, 7?

¹⁶ Paul atene: “I gi bê ti i na ye oko pëpe; me na yâ ye kue i fa na Nzapa ye so i ye, na lege ti sambela na ti hunda mingi na tënë ti merci. Na fade siriri ti Nzapa so ahon bibe kue abata bê ti i na abata bibe ti i na yâ Christ Jésus.” (aPhilippien 4:6, 7). Ti tâ tënë ni, e yeke amolenge ti Adam so e yeke mbilimbili-kue pëpe, na tongaso agingo bê ti e alingbi ti hunzi kue pëpe (aRomain 5:12). Awali ti Esaü so ayeke azo ti mara ti Heth ayeke lani “ye ti vundu na bê” ti Isaac na Rebecca, babâ na mama ti Esaü so akpe mbeto ti Nzapa (Genèse 26:34, 35). Kite ayeke dä pëpe so kobela asara si aChrétien tongana Timothée na Trophime agi bê ti ala lani mingi (1 Timothée 5:23; 2 Timothée 4:20). Paul agi bê ti lo lani mingi na ndo ti amba ti lo aChrétien (2 aCorinthien 11:28). Me ‘Lo so amä sambela’ ayeke lakue nduru ti mû maboko na azo so andoye lo.​—Psaume 65:3.

¹⁷ Na ngoi so e yeke ku gango ti lâ ti Jéhovah, “Nzapa ti siriri” ayeke mû maboko na e nga lo yeke dë bê ti e (aPhilippien 4:9). Jéhovah ayeke Nzapa ti “be-nzoni na ti grâce” lo yeke ‘nzoni, na lo ye ti pardone’ nga “Lo dabe Lo na lege so e yeke pupu-sese.” (Exode 34:6; Psaume 86:5; 103:13, 14). Tongaso, zia e “fa na Nzapa ye so [e] ye,” teti ye so ayeke sara si e wara “siriri ti Nzapa”, so ayeke sara si azo ahinga pëpe ngbanga ti nyen bê ti e aduti na siriri.

18. Tongana ti so Job 42:5 atene, na lege wa e lingbi ti ‘bâ’ Nzapa?

¹⁸ Tongana Nzapa akiri tënë na asambela ti e, e hinga so lo yeke na e. Na pekoni so Job agbu ngangu na gbele atara, lo tene: “Giriri mbi mä tënë ti Mo [Jéhovah] na mê ti mbi; me fadeso lê ti mbi abâ Mo.” (Job 42:5). Tongana e hinga aye nzoni na ndo ti Nzapa, e yeke na mabe nga e yeke kiri singila, e lingbi ti gbu li na ndo lege so Nzapa ayeke sara ye na mbage ti e nga lê ti e alingbi ti ‘bâ’ lo nzoni ahon ti kozo. Hingango Nzapa nzoni mingi tongaso ayeke sara si e duti na siriri ti bê.

19. Ye wa ayeke si tongana ‘ye kue so e gi bê ti e dä, e zia na tïtî Jéhovah’?

¹⁹ Tongana ‘ye kue so e gi bê ti e dä, e zia na tïtî Jéhovah,’ e lingbi ti duti na siriri so abata bê ti e nga na bibe ti e na ngoi so e yeke na yâ ti atara. Tongaso, e yeke gi bê ti e pëpe nga mbeto ayeke sara e pëpe. Fade agingo bê ayeke sara pëpe si apensé ti e ague kirikiri.

20, 21. (a) Na lege wa ye so asi na Etienne afa so zo alingbi ti duti na siriri na ngoi so a yeke sara ye ti ngangu na lo? (b) Fa mbeni tapande ti ngoi ti e so afa tongana nyen ambeni ita agi bê ti ala pëpe na ngoi so ala yeke na yâ ti atara.

²⁰ Disciple Etienne afa so lo gi bê ti lo pëpe na ngoi so a yeke sara ngangu na lo ndali ti mabe ti lo. Kozo ti tene Etienne ahunzi tënë ti lo, azo kue so ayeke na yâ ti Sanhédrin ‘abâ so lê ti lo akpa lê ti ange.’ (Kusala 6:15). Lê ti lo ayeke na mbeto pëpe tongana ti mbeni ange, wala mbeni watokua ti Nzapa. Na pekoni so Etienne afa so a yeke ajuge ni la ayeda si a fâ Jésus, “ngonzo agbu ala mingi, na ala te pembe ti ala na tere ti lo.” Etienne “asi na Yingo Vulu, lê ti lo angbâ ti bâ yayu, lo bâ gloire ti Nzapa, na Jésus ayeke luti na koti ti Nzapa.” Ye so Etienne abâ tongana suma akpengba lo, na lo ngbâ be-ta-zo juska na kuâ (Kusala 7:52-60). Atâa so e yeke bâ suma pëpe tongana ti Etienne, Nzapa alingbi ti mû na e siriri ti bê na ngoi so a yeke sara ye ti ngangu na e.

²¹ Zia e bâ tënë ti bê ti ambeni Chrétien so aNazi afâ ala na ngoi ti Use Bira so Amû Sese Kue. Mbeni oko ti ala atokua lettre na babâ na mama ti lo na lo sara tënë ti ye so asi na lo na yâ ti da-ngbanga, lo tene: “A dë ngbanga ti kuâ na li ti mbi. Mbi mä ni, nga na pekoni so mbi tene ‘Duti be-ta-zo juska na kui,’ nga na ambeni tënë so Seigneur ti e atene, ngbanga ni ahunzi. Me ala gi bê ti ala mbeni pëpe na ndo ye so asi na mbi. Raison ni ayeke so, atâa so peut-être a yeke ngangu na ala ti gbu nda ni, mbi yeke na siriri na mbi gi bê ti mbi oko pëpe!” Mbeni maseka so ayeke Chrétien na so ayeke ku lani ti tene a fâ go ti lo asû mbeti na babâ na mama ti lo, lo tene: “Bê ti bï ahon awe. Lege ayeke dä ti tene mbi changé desizion ti mbi. Me mbi lingbi ti kiri ti wara ngia na sese so tongana mbi bere tënë ti Seigneur ti e? Oko pëpe! Me fadeso, a lingbi ala gi bê ti ala pëpe, ndali ti so atâa so mbi yeke kui ande, mbi yeke na ngia nga na siriri.” Kite ayeke dä pëpe so Jéhovah ayeke mû maboko na awakua ti lo so ayeke be-ta-zo.

Mo lingbi ti gbu ngangu!

22, 23. Ye wa mo lingbi ti hinga ni biani na ngoi so mo yeke gbu ngangu ti ku lâ ti Jéhovah?

²² Peut-être aye so e sara tënë ni ge asi na mo pëpe. Ye oko, Job so akpe mbeto ti Nzapa ayeke na raison tongana lo tene: “Zo so wali adü lo ayeke na lâ mingi pëpe, na vundu ti lo asi singo.” (Job 14:1). Peut-être mo yeke mbeni babâ wala mama so ayeke sara ngangu ti fa na amolenge ti mo ye so Mbeti ti Nzapa afa. Amolenge ni ayeke wara atara na ekole, me so tâ kota ngia si mo yeke na ni tongana ala duti be-ta-zo na Jéhovah nga ala sara ye alingbi na akpengba-ndia ti lo! Peut-être mo yeke wara aye ti ngangu nga na atara na place ti kua ti mo. Ye oko, mo lingbi ti gbu ngangu na gbele aye so nga na ambeni ye nde ndali ti so Jéhovah ‘ayô kungba ti mo lâ na lâ’.​—Psaume 68:20.

²³ Peut-être mo bâ tere ti mo tongana mbeni senge zo, me hinga so Jéhovah ayeke girisa ande lâ oko pëpe kusala so mo yeke sara nga na ndoye so mo yeke fa ndali ti iri ti lo so ayeke nzoni-kue (aHébreu 6:10). Lo yeke mû maboko na mo ti gbu ngangu na gbele atara so ayeke si na mo ndali ti mabe ti mo. Ni la, ngbâ ti zia aye so bê ti Nzapa aye na yâ asambela ti mo nga na yâ ti aye so mo leke ti sara. Tongaso, mo lingbi ti hinga biani so Jéhovah ayeke iri tënë nzoni na ndo ti mo nga lo yeke mû maboko na mo ti ngbâ ti gbu ngangu ti ku lâ ti lo.

Mo yeke kiri tënë tongana nyen?

• Ngbanga ti nyen aChrétien ayeke na bezoin ti gbu ngangu?

• Aye wa alingbi ti mû maboko na e ti gbu ngangu na ngoi so e yeke na kobela nga tongana mbeni zo ti e akui?

• Na lege wa sambela ayeke mû maboko na e ti gbu ngangu na yâ ti atara?

• Ngbanga ti nyen zo alingbi ti gbu ngangu ti ku lâ ti Jéhovah?

[Foto na lembeti 17]

Ti zia bê ti e kue na Jéhovah ayeke sara si e gbu ngangu tongana mbeni zo ti e akui