Gi laso ti sara ye alingbi na ye so Nzapa aleke ti sara

“[Christ akui] awe teti azo kue, tongaso a lingbi ala so ayeke na fini aduti teti ala mveni mbeni pëpe.”​—2 ACORINTHIEN 5:15.

1. Fa ye so asi na mbeni missionnaire na kodoro so a tokua lo dä.

“KUTUKUTU ti e ayeke kozo kutukutu so ayeke ti aturugu pëpe ti lï na yâ ti mbeni kete kodoro ti Afrika so ayo na atanga ni, na pekoni so mbeni bira na popo ti azo ti kodoro ni ahunzi. Kozo, e wara lani lege pëpe ti hinga ye na ndo ti kete kongregation so ayeke kâ, na a lingbi e bâ lege ti aye so atia aita ni. E gue na kobe, bongo nga na ambeti ti Nzapa. Me e gue nga na kasete vidéo Les Témoins de Jéhovah : un nom, une organisation.a Tongaso, azo so asara nzara ti tënë ni ague lani gbani gbani ti bâ ni na ‘cinéma’ ti kete kodoro ni, so ayeke mbeni kota da ti pere so télé nga na masini ti bango na vidéo ayeke dä. E fa vidéo so lege use, nga na pekoni azo mingi ayeda ti manda Bible. Biani, ngangu so e sara lani ayeke senge senge pëpe.” So ayeke ye so Aaron,b mbeni missionnaire, adabe ti lo na ni la.

2. (a) Ngbanga ti nyen aChrétien aleke na bê ti ala ti mû fini ti ala ti sara na kusala ti Nzapa? (b) Ahundango tënë wa e yeke bâ ni fadeso?

² Ngbanga ti nyen Aaron na amba ti lo ti kusala abi tere ti ala na yâ ti mara ti ngangu kua tongaso? A yeke ngbanga ti so singila ti bê ti ala, ndali ti sandaga ti Jésus Christ so azi e, apusu ala ti mû fini ti ala kue na Nzapa; na ala ye ti tene ye so ala sara na fini ti ala ague oko na ye so Nzapa aleke ti sara. Legeoko nga, aChrétien kue so amû tere ti ala na Nzapa aleke na bê ti ala ti duti na fini “teti ala mveni mbeni pëpe,” me ti sara ye kue so ala lingbi ti sara teti “Tene-nzoni”. (2 aCorinthien 5:15; 1 aCorinthien 9:23). Ala hinga so tongana aye ti ngoi so ahunzi ande, nginza nga na yango iri na yâ ti sese so ayeke ga ande ye senge. Ni la, ndali ti so ala yeke na fini nga na mbeni nzoni seni, ala ye ti sara kusala na aye so ti lingbi na ye so Nzapa aleke ti sara (Zo-ti-fa-tene 12:3). E lingbi ti sara ni tongana nyen? E lingbi ti wara ngangu na ndo wa ti sara na ye so? Akusala wa ayeke na gbele e ti sara?

Sara atâ ye oko na oko

3. Ti sara ye so bê ti Nzapa aye, akozo ye wa a lingbi zo asara?

³ Ti atâ Chrétien, sarango ye so bê ti Nzapa aye ayeke mbeni ye so zo ayeke sara na yâ ti fini ti lo kue. Mingi ni a yeke to nda ni na akozo ye tongana ziango iri na Ekole ti Kusala ti aChrétien, dikongo Bible lâ na lâ, fango tënë nga lekengo tere ti wara batême. Tongana e yeke gue na li ni, e yeke dabe ti e na atënë ti bazengele Paul so lo tene: “Mo bata ye so kue nzoni; zia bê ti mo kue na ye so, si azo kue alingbi bâ lege so mo yeke kpengba.” (1 Timothée 4:15). Mara ti guengo na li ni tongaso ayeke pëpe pikango kate, me a yeke fa na gigi so e leke na bê ti e ti sara gi ye so bê ti Nzapa aye. Sarango tongaso ayeke fa so e zia lege na Nzapa ti fa lege na aye kue so e yeke sara na yâ ti fini ti e, na lo yeke sara ye so nzoni mingi ahon ye so e mveni e lingbi ti sara.​—Psaume 32:8.

4. Tongana nyen e lingbi ti kpe ti sara mbeto senge senge?

⁴ Ye oko, tongana e yeke sara mbeto ti mû desizion na e yeke bâ gi e mveni, ye so alingbi ti kanga lege na e ti gue na li ni na yâ ti kusala ti Nzapa (Zo-ti-fa-tene 11:4). Ni la, kozoni ti tene e wara ngia na sarango kusala na Nzapa nga na ambeni zo, a yeke nzoni e hon ndo ti ambeto ti e. Bâ tapande ti Erik, so aye lani ti sara kua na yâ ti mbeni kongregation so azo ni atene mbeni yanga ti kodoro nde. Me lo yeke gi bê ti lo, lo tene: ‘Fade mbi na azo ni e yeke mä tere la? Mbi yeke ye aita ni ande? Aita ni ayeke ye ande mbi?’ Bâ tënë so lo tene: “Na nda ni, mbi bâ so a yeke nzoni mbi bi bê mingi na aita ni ahon ti bi bê gi na mbi wani. Mbi mû desizion ti zia ti gi bê ti mbi ahon ndo ni, na ti mû tere ti mbi kue na yâ ti aye kue so mbi lingbi ti sara. Mbi sambela Jéhovah ti mû maboko na mbi na mbi tï dä ti sara ye so mbi leke ti sara. Fadeso mbi wara ngia mingi na yâ ti kusala ti mbi.” (aRomain 4:20). Biani, tongana e sara mingi na Nzapa nga na azo, e yeke wara ande ngia mingi na pekoni.

5. Ti sara ye alingbi na ye so Nzapa aye, ngbanga ti nyen a hunda ti leke aye nzoni? Mû mbeni tapande.

⁵ Ti sara ye nzoni alingbi na ye so Nzapa aleke ti sara ahunda nga ti leke aye ti e nzoni. Na ndara, e yeke kpe ti sara gbâ ti bon so alingbi ti sara si e ga ngbâa ti aye ti sese so, na so alingbi ti kanga lege na e ti sara kusala ti Nzapa. Bible adabe ti e atene: “Nginza ti mbeni zo ayeke na tïtî mo, mo ga ngbâa ti lo awe.” (aProverbe 22:7, Tene ti Nzapa, Kozo Mbouki). Tongana e zia bê ti e na Jéhovah na e zia aye ti yingo na kozo ndo, ye so ayeke mû maboko na e ti zia lê ti e gi na ndo ti ye oko. Bâ tapande ti Guoming na aita ti lo ti wali use. Ala na mama ti ala ayeke lango na mbeni ndo so ngere ti da ayeke ngangu mingi nga warango nzoni kua ayeke kpale. Me ndali ti so ala sara kusala na nginza ti ala na ndara na ala kangbi yâ ti aye so ala lingbi ti vo, ala wara lege ti wara aye so ala yeke na bezoin ni, atâa na ngoi so ambeni asara kua ti nginza pëpe. Guoming atene: “Ngoi na ngoi a yeke pëpe e kue si e yeke wara nginza ti kua ti e. Me e ngbâ ti sara kua ti pionnier nga ti bâ lege ti mama ti e nzoni. E kiri singila na mama so aye pëpe ti tene e zia kua ti pionnier ti sara aye so alingbi ti mû lege na e ti gi na lo aye ti nginza mingi.”​—2 aCorinthien 12:14; aHébreu 13:5.

6. Tapande wa afa so e lingbi ti sara si fini ti e alingbi na ye so Nzapa aleke ti sara?

⁶ Tongana mo lï mingi awe na yâ ti gingo aye ti mitele, nginza wala ambeni ye nde, ti zia na kozo ndo sarango ye alingbi na ye so Nzapa aleke ti sara a hunda ti tene mo changé ambeni ye mingi na yâ ti fini ti mo. Mo lingbi ti changé aye so gi hio tongaso pëpe; nga tongana na tongo nda ni mo pika gere ti mo, tene pëpe so aye so mo leke ti sara atï na ngu awe. Bâ tapande ti Koichi so kpale ti lo lani ayeke so lo yeke mû ngoi mingi ndali ti sarango ngia. Koichi amanda Bible lani na ngoi so lo de molenge, me teti ngu mingi, ngia ti vidéo ahon ndo ti lo. Mbeni lâ Koichi atene na bê ti lo, lo tene: ‘Nyen la mbi yeke sara so? Ngu ti mbi ahon 30 awe, na mbi yeke sara mbeni nzoni ye na fini ti mbi pëpe!’ Koichi akiri ato nda ti manda Bible na lo yeda na maboko so kongregation amû na lo. Atâa so agbiango ye ni aga gi yeke yeke, lo zia lege ni pëpe. Ndali ti so lo sambela mingi na ambeni zo amû maboko na lo na ndoye, na nda ni lo zia lege ti ngia ti vidéo ni (Luc 11:9). Fadeso Koichi ayeke sara kusala na ngia tongana mbeni serviteur ti mungo maboko.

Manda ti zia aye na place ti ala

7. Na yâ ti kusala so e yeke sara na Nzapa, ngbanga ti nyen a lingbi e zia aye na place ti ala?

⁷ Ti gi ti sara ye alingbi na ye so Nzapa aleke ti sara a hunda ti tene e sara ye na ngangu ti e kue. A yeke nzoni oko pëpe ti sara kusala gi kete kete na ngangu ti e wala ti sara ye na goigoi (aHébreu 6:11, 12). Ye oko, Jéhovah aye pëpe si e hunzi ngangu ti e ti mitele kue, e gbu li ahon ndo ni wala tënë agbu bê ti e ahon ndo ni. Tongana, na tâ be-ti-molenge, e hinga so e lingbi pëpe ti sara kusala ti Nzapa na ngangu ti e wani, ye so ayeke mû gonda na lo nga ayeke fa so e yeke zia aye na place ti ala (1 Pierre 4:11). Jéhovah amû zendo ti mû na e ngangu so e yeke na bezoin ni ti sara ye so bê ti lo aye, me a lingbi e sara ye pëpe ahon ngangu ti e, ti gi ti sara aye so lo ku na mbage ti e pëpe ti sara ni (2 aCorinthien 4:7). Ti ngbâ ti sara na Nzapa sân ti hunzi ngangu ti e kue, a yeke nzoni e sara kua na ndara na ngangu ti e.

8. Tongana mbeni ita-wali so ade maseka agi ti mû ngangu ti lo kue na kua ti nginza nga na Jéhovah, ye wa asi? Aye wa lo changé na yâ ti fini ti lo?

⁸ Na tapande, Ji Hye, so ayeke na Asie, asara kua ti nginza so amû ngoi ti lo mingi teti ngu use. Na oko ngoi ni lo yeke sara kua ti pionnier. Lo sara tënë so: “Mbi gi lani ti mû ngangu ti mbi kue na Jéhovah nga na kua ti nginza ti mbi. Me mbi yeke lango lani gi ngbonga oku. Na nda ni, mbi gbu li mingi na ndo ti tâ tënë pëpe, na mbi wara ngia mingi pëpe na yâ ti aye ti yingo.” Ti sara na Jéhovah na ‘bê ti lo kue, na âme ti lo kue, na bibe ti lo kue, na ngangu ti lo kue’, Ji Hye agi mbeni kua so amû ngoi ti lo mingi pëpe (Marc 12:30). Lo tene: “Atâa so sewa ti mbi asara ngangu na ndo ti mbi ti tene mbi wara gbâ ti nginza, mbi sara kue ti zia na kozo ndo sarango ye so bê ti Nzapa aye. Mbi ngbâ ti wara nginza so alingbi na aye so mbi yeke na bezoin ni, aye tongana abongo so ayeke nzoni. Ti lango mingi ahon ti kozo asara mbi nzoni. Mbi yeke na ngia na yâ ti kusala ti mbi ti fango tënë nga mbi yeke na ngangu na lege ti yingo ahon ti kozo. A yeke tongaso ndali ti so mbi yeke mingi pëpe na gbe ti ngangu ti apendere ye ti sese so, so ayeke gboto lê ti zo yongoro.”​—Zo-ti-fa-tene 4:6; Matthieu 6:24, 28-30.

9. Tongana nyen ngangu so e yeke sara alingbi ti sara ye na ndo ti azo na fango tënë?

⁹ A yeke azo kue pëpe si alingbi ti sara kusala ti ngoi kue. Tongana mo yeke mbakoro, mo yeke na nzoni seni pëpe wala ambeni ye akanga lege na mo, hinga so Jéhovah ayeke bâ mo na nene ni mingi ndali ti so mo duti be-ta-zo nga mo yeke sara kusala na bê ti mo kue (Luc 21:2, 3). Ngangu so e yeke sara na kua ti Nzapa ayeke sara ye na ndo ti azo, atâa tongana ambeni ye akanga lege na e. Ni la, zia e oko oko kue e bâ ye so pëpe tongana mbeni senge ye. Na tapande, e fa peut-être tënë na ambeni da na zo oko asara nzara ti mä tënë ti e pëpe. Na pekoni so e hon, teti angbonga mingi wala alango mingi, azo ti da ni alingbi peut-être ti sara tënë na ndo ti gango ti e, atâa so zo oko ayeda na tënë ti e pëpe! E ku pëpe ti tene azo kue so amä nzo tënë ayeda na ni, me ambeni ti ala yeke sara ni (Matthieu 13:19-23). Ambeni alingbi mbeni lâ ti yeda na tënë ni na ngoi so aye agbian na yâ ti sese so wala na yâ ti fini ti ala. Atâa ye ni ayeke tongana nyen, na sarango ye so e lingbi ti sara na yâ ti fango tënë, e yeke sara kusala ti Nzapa. E yeke “afon Nzapa na kusala.”​—1 aCorinthien 3:9.

10. Ambeni kua wa e lingbi ti sara na yâ ti kongregation?

¹⁰ Na ndo ni, e kue e lingbi ti mû maboko na azo ti sewa ti e nga na aita ti e na yâ ti kongregation (aGalate 6:10). Nzoni ngangu so e yeke sara na ndo ti azo alingbi ti duti kota nga a ninga (Zo-ti-fa-tene 11:1, 6). Tongana a-ancien na aserviteur ti mungo maboko asara kusala ti ala na bê ti ala kue, ala yeke sara si kongregation aduti nzoni na lege ti yingo na a yeke luti nzoni. Kusala ti aChrétien ayeke maï. E hinga na bê ti e kue so tongana e “wu na kusala ti Seigneur”, fade ngangu kua ti e “ayeke senge pëpe”.​—1 aCorinthien 15:58.

Tongana kusala ti e ti lakue

11. Nde na kua ti kongregation ti ndo so e yeke dä, ambeni kua wa e lingbi peut-être ti sara?

¹¹ E so e yeke aChrétien, e ye fini na e ye ti mû gonda na Nzapa na yâ ti aye kue so e yeke sara (1 aCorinthien 10:31). Tongana e sara kue ti fa gi nzo tënë ti Royaume na ti fa ye na azo ti bata aye kue so Jésus ahunda, e yeke wara ande alege nde nde ti sara kusala na Nzapa (Matthieu 24:14; 28:19, 20). Nde na sarango kua na kongregation ti e, lege ayeke dä peut-être ti sara kua na mbeni ndo so kota bezoin ayeke dä, atâa na yâ ti mbeni territoire nde, mbeni kodoro nde wala na mbeni ndo so azo atene mbeni yanga ti kodoro nde. A-ancien na aserviteur ti mungo maboko so alingbi na so ade kumbamba, alingbi ti gue na Ekole ti Formation Ministérielle. Na pekoni, ala yeke sara kua na yâ ti akongregation so ahunda ti wara aChrétien so akpengba na lege ti yingo, atâa na yâ ti kodoro ti ala wani wala na kodoro wande. Mbeni koli na wali ti lo, so ayeke na yâ ti kusala ti ngoi kue, alingbi ti manda ye na Ekole ti Galaad na ti sara kua na kodoro wande. Nga, a yeke na kota bezoin ti aita ti sara akusala nde nde na Béthel nga ti leke na ti bata nzoni ada ti bungbi nga na ti afiliale.

12, 13. (a) Tongana nyen mo lingbi ti hinga kusala so a lingbi mo gi ti sara? (b) Fa tongana nyen ye so zo amanda na yâ ti mbeni kua alingbi ti mû maboko na lo na yâ ti ambeni kua nde.

¹² Mara ti akusala wa mo lingbi ti gi ti sara? Teti so mo yeke mbeni wakua so amû tere ti lo kue na Jéhovah awe, bâ ndo lakue na mbage ti lo nga na bungbi ti lo ti fa lege na mo. “Nzo Yingo” ti Lo ayeke mû maboko na mo ande ti mû nzoni desizion (Néhémie 9:20). Mbeni kua so e sara ayeke gue na e ti sara mbeni kua nde. Aye nga na akode so e manda na yâ ti mbeni kua alingbi ti mû maboko na e na yâ ti mbeni kua nde na pekoni.

¹³ Na tapande, Dennis na wali ti lo Jenny ayeke leke lani lakue aDa ti Royaume. Na pekoni so Kota pupu so a iri ni Katrina abuba aye na mbage ti dö ti Amerika, ala gue ti sara kua kâ ti mû maboko na azo. Dennis atene: “E mû akode so e manda na lekengo aDa ti Royaume ti mû maboko na aita ti e. Ye so aga na e ngia mingi. Singila so azo so e mû maboko na ala amû na e andu bê ti e biani. Mingi ti abungbi ti azo so aga ti mû maboko akiri aleke aye, me ala sara ye ni kue pëpe. A-Témoin ti Jéhovah aleke wala akiri aleke ada so abuba ahon 5 300 nga na gbâ ti aDa ti Royaume. Azo abâ ye so na fadeso ala yeke sara nzara ti tënë ti e mingi ahon ti kozo.”

14. Ye wa e lingbi ti sara tongana e ye ti sara kusala ti ngoi kue lakue?

¹⁴ Mo lingbi ti sara ye alingbi na ye so Nzapa aleke ti sara na sorongo ti sara kusala ti ngoi kue lakue? Tongana a yeke tongaso, hinga so mo yeke wara ande aye ti nzoni mingi. Tongana dutingo ti mo ti laso amû lege na mo pëpe, peut-être mo lingbi ti gbian ye na yâ ni. Sambela tongana ti so Néhémie asara tongana lo ye lani ti sara mbeni kota kusala. Lo sambela lo tene: “O Seigneur, mbi voro Mo, . . . sara si ye ti boi ti Mo aga nzoni.” (Néhémie 1:11). Na pekoni, ndali ti so mo zia bê ti mo na ‘Lo so amä sambela,’ sara ye alingbi na sambela ti mo (Psaume 65:3). Ti tene Jéhovah airi tënë nzoni na ndo ti ngangu so mo sara ti sara kusala ti lo mingi ahon ti kozo, a lingbi mo sara ngangu so kozo. Tongana mo mû desizion ti mû kusala ti ngoi kue, ngbâ ti sara ye alingbi na desizion ni. Tongana ngoi ayeke hon, ye so mo yeke manda nga na ngia ti mo ayeke maï.

So ayeke tâ nzoni ye ti sarango ni

15. (a) Ti sara lisoro na aita so asara na Nzapa aninga nga ti diko ambaï ti gigi ti azo ayeke ga na aye ti nzoni wa na e? (b) Fa mbeni mbaï ti gigi ti azo so mo bâ amû ngangu na mo.

¹⁵ Tongana mo sara si fini ti mo ague oko na ye so Nzapa aleke ti sara, ye ti nzoni wa mo yeke wara na pekoni? Sara lisoro na aita so asara na Jéhovah aninga, mbilimbili ala so asara ngu mingi na yâ ti kusala ti ngoi kue. So tâ ye ti nzoni si aita so asara na fini ti ala! (aProverbe 10:22). Ala yeke tene ande na mo so Jéhovah agirisa lâ oko pëpe ti mû maboko na ala; même na ngoi so ala yeke na yâ ti akpale, lo yeke sara si ala wara ye so ala yeke biani na bezoin ni na même mingi ahon so (aPhilippien 4:11-13). Na yâ ti angu mingi so ahon, asigigi na a-article mingi na ndo ti gigi ti aita na yâ ti Tour ti Ba Ndo. Atënë ti yâ ti mbaï ti gigi ti ita oko oko kue ayeke pusu zo ti sara ye na ngangu ti lo kue nga na ngia, na ye so adabe ti e na ye so e wara na yâ ti Bible na mbeti ti Kusala. Dikongo mara ti a-article tongaso ayeke pusu e ti tene: ‘So ayeke mara ti gigi so mbi ye ti sara la!’

16. Ye wa asara si mbeni Chrétien abâ so lo sara tâ nzoni ye na fini ti lo nga lo yeke na ngia?

¹⁶ Aaron so e sara tënë ti lo na tongo nda ti article so adabe ti lo, na lo tene: “Na Afrika, fani mingi mbi tingbi na amaseka so ayeke gue na agbata nde nde ti kodoro ni ti gi ti wara mbeni nzoni ye so ala lingbi ti sara na fini ti ala. Mingi ti ala awara ni lâ oko pëpe. Me ti e, e yeke sara ye so ague oko na ye so Nzapa aleke ti sara na lege so e yeke fa nzo tënë ti Royaume. Ye so asara si e bâ so e yeke na aye mingi ti sara nga e hinga so e yeke sara tâ nzoni ye na yâ ti fini ti e. E bâ tâ na lê ti e gango tâ tënë ti tënë so a tene ngia ayeke na zo so amû ye, ahon ngia ti lo so awara ni.”​—Kusala 20:35.

17. Ngbanga ti nyen ayeke ngoi ni la ti sara si fini ti e ague oko na ye so Nzapa aleke ti sara?

¹⁷ Ka ti mo ayeke tongana nyen? Ye wa mo ye ti sara ande ni? Tongana mo hinga pëpe mbilimbili ye ti yingo so mo lingbi ti sara ande, ambeni ye nde ayeke mû hio ngoi ti mo nga na ngangu ti mo. Nda ni nyen ti buba fini ti mo ndali ti aye so azo ti sese ti Satan abâ tongana tâ ye? Na yâ ti kete ngoi, na ngoi so “kota ye ti vundu” ayeke tï, mosoro nga na kota ndo ayeke ga ande asenge ye. Kota ye ni ayeke songo so e yeke na ni na Jéhovah. So tâ singila si e yeke duti ande na ni ndali ti so e sara na Nzapa nga na amba ti e, na e sara si fini ti e kue ague oko na ye so Nzapa aleke ti sara!​—Matthieu 24:21; Apocalypse 7:14, 15.

[Akete tënë na gbe ni]

Mo lingbi ti fa nda ni?

• Jéhovah abâ kusala so e sara na lo tongana nyen?

• Na lege wa ti sara atâ ye nga ti zia aye na place ti ala ayeke mû maboko na e ti sara na Nzapa nga na amba ti e?

• Ambeni kua wa e lingbi ti sara na Nzapa?

• Na lege wa e lingbi fadeso ti sara nzoni ye na fini ti e?

[Afoto na lembeti 25]

Ti ngbâ ti sara na Jéhovah na bê ti e kue, a hunda ti zia aye na place ti ala

[Afoto na lembeti 26]

Alege ti sara na Nzapa ayeke mingi