Mo yeda so Jéhovah ayeke kota gbia ti dunia kue?

“I fa tënë na popo ti amara, i tene, L’Eternel akomande.”​—PSAUME 96:10.

1, 2. (a) Kpengba ye wa abâ gigi peut-être na nze ti octobre ti ngu 29? (b) Ye so asi andu fini ti Jésus tongana nyen?

MBENI kpengba ye so ade ti si lâ oko pëpe na ndo ti sese abâ gigi na nze ti octobre ti ngu 29. Na pekoni so Jésus awara batême awe, lo sigigi fade fade na yâ ti ngu. Jean-Baptiste abâ yingo ti Nzapa azu na ndo ti Jésus tongana bungu. Matthieu so ayeke mbeni zo ti sungo Évangile atene: “Bâ, yanga asara tënë na yayu, a tene, So ayeke Molenge ti Mbi so Mbi ndoye Lo, Lo mû ngia na Mbi mingi.” So ayeke oko ti aye so a sû na yâ ti a-Évangile osio kue.​—Matthieu 3:16, 17; Marc 1:9-11; Luc 3:21, 22; Jean 1:32-34.

² Jean abâ yingo vulu aga na ndo ti Jésus na ye so afa polele so Jésus ayeke Lo so a sa yingo na ndo ti lo, so ti tene Messie, wala Christ (Jean 1:33). Na nda ni, “hale” ti zendo ni abâ gigi awe! Jésus so ayeke luti lani na gbele Jean-Baptiste ayeke lo so Satan amboko lani nda-gere ti lo. Na a yeke Jésus ande si ayeke neka li ti Satan so ayeke kota wato ti Jéhovah nga na ti komandema ti lo (Genèse 3:15). Ti to nda ni na ngoi ni so, Jésus ahinga nzoni mingi so a lingbi lo sara kue si aye so Jéhovah aleke ti sara, so andu komandema ti lo nga na Royaume ti lo, aga tâ tënë.

3. Tongana nyen Jésus aleke tere ti lo ti sara kua so ayeke fa so Jéhovah la ayeke na droit ti komande dunia kue?

³ Ti leke tere ti lo ti sara kua so ayeke ku lo, “Jésus, so asi na Yingo Vulu, alondo na Ngu ti Jourdain ti kiri, na Yingo afa lege na Lo ti tambela na yando”. (Luc 4:1; Marc 1:12). Kâ, teti alango 40, Jésus awara ngoi ti gbu li mingi na ndo ti tënë ti zo so ayeke na droit ti komande dunia, so Satan asigigi na ni. Lo gbu li nga na ndo ti ye so a lingbi lo sara ti fa so lo yeda so Jéhovah ayeke Kota Gbia ti Dunia Kue. Tënë so andu acréature kue: a-ange nga na azo. Tongaso, zia e bâ aye so Jésus asara ti fa so lo yeke be-ta-zo nga aye so a lingbi e sara ti fa so e nga kue e yeda so Jéhovah ayeke Kota Gbia ti Dunia Kue.​—Job 1:6-12; 2:2-6.

Satan adë kite polele na ndo ti droit ti Nzapa ti komande

4. Nyen la Satan asara lani ti sara si tënë ti zo so ayeke na droit ti komande dunia asigigi polele?

⁴ Biani, Satan ahinga aye kue so asi na Jésus na ngoi ni so. Hio tongaso, lo gi ti sara sioni na kozo mbage ti “hale” ti “wali” ti Nzapa (Genèse 3:15). Satan atara Jésus fani ota, lo tene so a yeke nzoni Jésus asara mbeni ye so alingbi ti ga na ye ti nzoni na Jésus ni wani ahon ti sara ye so Babâ ti lo aye. A yeke mbilimbili ota tara ni la asara si tënë ti zo so ayeke na droit ti komande dunia asigigi. Na fango na Jésus “aroyaume kue ti sese na gloire ti ala”, sân kamene, Satan atene na Jésus: “Tongana Mo kuku na sese, Mo sambela mbi, fade mbi mû na Mo ye so kue.” Teti so Jésus ahinga polele so “aroyaume kue ti sese” so ayeke na yâ ti maboko ti Zabolo, Jésus afa zo so lo mû mbage ti lo na ndo ti tënë ti komandengo dunia. Lo tene: “Gue kâ, Satan! teti Mbeti ti Nzapa atene, A lingbi mo sambela Seigneur Nzapa ti mo, na mo sara gi na Lo oko.”​—Matthieu 4:8-10.

5. Ngangu kua wa a mû lani na Jésus ti sara?

⁵ Aye so Jésus asara afa polele so kozo ye so agbu bê ti lo ayeke ti fa so Jéhovah la ayeke na droit ti komande dunia kue. Jésus ahinga lani nzoni mingi so a lingbi lo ngbâ be-ta-zo juska lo wara kuâ na maboko ti Satan, ye so prophétie afa ni kozoni awe tongana mbokongo nda-gere ti “hale” ti wali ni. A hunda ti sara ni ti fa so Nzapa ayeke na droit ti komande dunia kue (Matthieu 16:21; 17:12). A lingbi Jésus afa nga so na lege ti Royaume ti Nzapa, Jéhovah ayeke zi Satan so ake yanga, na lo yeke sara ande si siriri nga na aye kue so lo créé akiri na place ti ala (Matthieu 6:9, 10). Ye wa amû lege lani na Jésus ti sara ngangu kua so a mû na lo?

“Royaume ti Nzapa ayeke nduru”

6. Na lege wa Jésus afa so Royaume ti Nzapa ayeke ye so Nzapa ayeke mû ande ni ti ‘futi na kusala ti zabolo’?

⁶ Ti to nda ti kusala ti lo, “Jésus asi na Galilée, Lo fa Tene-nzoni ti Nzapa. Lo tene, Lâ asi awe, na royaume ti Nzapa ayeke nduru.” (Marc 1:14, 15). Biani, Jésus atene: “A yeke ngbanga ti Mbi ti fa Tene-nzoni ti royaume ti Nzapa . . . teti A to Mbi teti tënë so.” (Luc 4:18-21, 43). Jésus atambela lani na yâ ti kodoro ni kue, “Lo fa tënë, na Lo mû na [azo] Tene-nzoni ti royaume ti Nzapa.” (Luc 8:1). Jésus asara gbâ ti amiracle: lo mû kobe na azo, lo kaï kota pupu, lo sava akobela nga lo zingo akuâ. Na lege ti amiracle so, Jésus afa so Nzapa alingbi ti zi aye ti sioni kue nga na apasi kue so aga na lege ti kengo yanga so abâ gigi na Eden, na sarango tongaso lo yeke “futi kusala ti zabolo.”​—1 Jean 3:8.

7. Ye wa Jésus afa na adisciple ti lo ti sara? Ye ti pekoni ayeke so wa?

⁷ Ti sara si a fa nzo tënë ti Royaume na azo mingi, Jésus abungbi adisciple so ayeke be-ta-zo nga lo fa na ala tongana nyen ti sara kusala so. Kozoni kue, Jésus amû kua na abazengele ti lo 12, “Lo to ala ti fa tënë ti royaume ti Nzapa”. (Luc 9:1, 2). Na pekoni, Jésus atokua nga adisciple 70 ti fa tënë, na ti tene: “Royaume ti Nzapa aga nduru na i.” (Luc 10:1, 8, 9). Tongana adisciple so akiri, na ala fa na Jésus peko ti anzoni ye so ala wara dä, Jésus akiri tënë na ala, lo tene: “Mbi bâ Satan alondo na yayu, lo tï tongana nyekpa.”​—Luc 10:17, 18.

8. Aye so Jésus asara na yâ ti fini ti lo afa nyen polele?

⁸ Jésus amû ngoi ti lo kue ti fa tënë ti Royaume nga lo gbu alege kue so azi na lo ti sara ni. Lo mû ngangu ti lo kue ti sara kusala so bï na lâ, même lo zia bê ti lo pëpe na ndo ti aye so azo ayeke gi ka ni ti sara si gigi ti ala aduti nzoni. Jésus atene: “Ambako ayeke na dû ti ala, na andeke ti nduzu ayeke na da ti ala, me Molenge Ti Zo ayeke na ndo oko pëpe ti zia li ti Lo dä.” (Luc 9:58; Marc 6:31; Jean 4:31-34). Ngoi kete kozo ti tene Jésus akui, na mbeto pëpe lo tene na gbele Ponce Pilate, lo tene: “Mbi ga na sese teti [ye] so, si Mbi sara tënë ti témoin ti tene-biani.” (Jean 18:37). Aye so Jésus asara na yâ ti fini ti lo afa so lo ga na sese, pëpe ti duti gi mbeni kota wafango ye wala mbeni kota zo ti sarango amiracle wala même ti duti gi mbeni zo so ayeke mû fini ti lo na sandaga ti sö azo. Me, lo ga ti sara ye so bê ti Jéhovah so ayeke Kota Gbia ti Dunia Kue aye, nga ti fa so Nzapa alingbi ti sara ye so bê ti lo aye na lege ti Royaume ti lo.​—Jean 14:6.

“Awe!”

9. Na lege wa Satan awara lege na nda ni ti mboko nda-gere ti “hale” ti wali ti Nzapa?

⁹ Aye kue so Jésus asara ndali ti Royaume anzere na kota wato ti Nzapa so ayeke Satan Zabolo pëpe. Fani mingi, Satan agi ti fâ “hale” ti wali ti Nzapa na lege ti mbage ti “hale” ti lo so ayeke na sese, so ti tene azo ti poroso nga na abungbi ti nzapa ti wataka. Ngbene ye na ngoi so a dü Jésus juska na ngoi ti kuâ ti lo, Satan na azo ti lo agi ti sara sioni na lo. Na nda ni, na nze ti mars wala ti avril ti ngu 33, ngoi ni asi awe ti tene a zia Molenge ti zo na tïtî kota wato ti lo ti mboko nda-gere ti lo (Matthieu 20:18, 19; Luc 18:31-33). Atënë so a sû na yâ ti a-Évangile afa polele tongana nyen Satan asara kusala na azo ti fâ ngbanga na ndo ti Jésus nga ti sara si lo wara kuâ ti ngangu na ndo ti keke ti pasi. Lo sara kusala na azo tongana Judas Iscariote, akota prêtre, awasungo peko ti mbeti, aFarizien nga na aRomain ti sara ni.​—Kusala 2:22, 23.

10. Kozo ye wa Jésus asara na lege ti kuâ ti lo na ndo ti keke ti pasi?

¹⁰ Ye wa ayeke ga na li ti mo tongana mo yeke bi bê ti mo na ndo ti Jésus na ngoi so lo yeke bâ pasi na ndo ti keke na lo gue yeke yeke ti kui? Peut-être mo yeke dabe ti mo na fini ti Jésus so lo mû na sandaga ti zi azo so ayeke awasiokpari (Matthieu 20:28; Jean 15:13). Bê ti mo adö peut-être ti bi bê na ndo ti kota ndoye so Jéhovah afa na lege ti sandaga so (Jean 3:16). Peut-être mo yeda na tënë ti turugu ti kota kamba ti Rome so bê ti lo apusu lo ti tene: “Biani, Zo so ayeke Molenge Ti Nzapa.” (Matthieu 27:54). Asarango ye so kue ayeke tâ na lege ni. Na mbage, girisa pëpe ndangba tënë ti Jésus na ndo ti keke ti pasi so lo tene: “Awe!” (Jean 19:30). Nyen la awe ni? Atâa so Jésus asara aye mingi na lege ti fini ti lo nga na kuâ ti lo, kozo ye so lo ga na sese ndali ni ayeke ti leke tënë so andu droit ti Jéhovah ti komande dunia kue. Nga, a fa kozoni awe so fade “hale” ni ayeke bâ pasi mingi na maboko ti Satan ti sara si iri ti Jéhovah akiri aga nzoni-kue (Esaïe 53:3-7). Aye so kue ayeke angangu kusala, me Jésus asara ni kue. So atâ kota ye so lo sara!

11. Ye wa Jésus ayeke sara ande ti tene prophétie so a fa na Eden aga tâ tënë kue?

¹¹ Teti so Jésus aduti be-ta-zo, a zingo lo na kuâ, pëpe tongana mbeni zo, me tongana “Yingo so amû fini.” (1 aCorinthien 15:45; 1 Pierre 3:18). Zendo so Jéhovah amû lani na Molenge ti lo so awara gloire ayeke so: “Mo duti na koti ti Mbi, juska Mbi sara si awato ti Mo aga mbata ti gere ti Mo.” (Psaume 110:1). Na popo ti “awato” so a yeke wara Satan so ayeke kota wato nga na ala kue so ayeke “hale” ti lo. Jésus Christ so ayeke Gbia ti Royaume ti Jéhovah ayeke mû ande li ni ti zi azo ti kengo yanga so kue na yayu nga na sese (Apocalypse 12:7-9; 19:11-16; 20:1-3, 10). A yeke na ngoi so si atënë ti prophétie so ayeke na Genèse 3:15 ayeke ga tâ tënë kue. Jésus ayeke sara nga si atënë ti yâ ti sambela so lo fa na adisciple ti lo aga tâ tënë. Atënë ni atene: “E ye royaume ti Mo aga. E ye ala sara na sese ye so bê ti Mo aye legeoko tongana ala sara na yayu.”​—Matthieu 6:10; aPhilippien 2:8-11.

Jésus azia na e tapande

12, 13. (a) Aye wa azo ayeke sara na pekoni so ala mä nzo tënë ti Royaume? (b) Atënë wa a lingbi e hunda tere ti e na ni tongana e ye ti mû tapande ti Christ?

¹² Laso, a yeke fa nzo tënë ti Royaume na yâ ti akodoro mingi tongana ti so Jésus asara tënë ni kozoni awe (Matthieu 24:14). Ye ti pekoni ayeke so azo kutu mingi amû fini ti ala na Nzapa. Ala yeke na ngia mingi ndali ti aye ti nzoni so Royaume ti Nzapa ayeke ga ande na ni. Ala yeke ku kungo ngoi so ala yeke duti ande nzoni nga na siriri teti lakue lakue na yâ ti paradis so ayeke duti ande na sese, nga ala yeke na ngia ti fa tënë ti beku ti ala na azo (Psaume 37:11; 2 Pierre 3:13). Mo yeke oko ti awafango tënë ti Royaume so? Tongana a yeke tongaso, e gonda mo mingi. Ye oko, mbeni ye nde ayeke dä so a lingbi e oko oko kue e gbu li ti e na ndo ni.

¹³ Bazengele Pierre atene: “Christ awu pono teti i nga, na Lo mû tapande na i si i lingbi tambela na senda ti Lo.” (1 Pierre 2:21). Bâ so Pierre asara pëpe tënë ti kota nzara so Jésus ayeke na ni ti fa tënë wala ti kode ti fango ye ti lo, me lo sara tënë ti pasi so lani Jésus abâ. Teti so Pierre ayeke lani dä, lo hinga juska na ndo wa Jésus ayeke lani nduru ti bâ pasi ti sara ye so bê ti Jéhovah so ayeke Kota Gbia ti Dunia Kue aye nga ti fa so Satan ayeke zo ti mvene. Tongaso, na alege wa e lingbi ti mû tapande ti Jésus? A lingbi e hunda tere ti e na atënë so: ‘Juska na ndo wa mbi yeke nduru ti bâ pasi ti fa so mbi yeda so Jéhovah ayeke Kota Gbia ti Dunia Kue nga ti yekia Jéhovah tongana kota gbia? Mbi yeke fa na lege ti asarango ye ti mbi nga na kusala ti Nzapa so mbi yeke sara so kozo ye so agbu bê ti mbi ayeke ti fa so mbi yeda so Jéhovah ayeke Kota Gbia ti Dunia Kue?’​—aColossien 3:17.

14, 15. (a) Jésus asara ye lani tongana nyen na ngoi so azo aye ti pusu lo ti yeda na aye so ayeke na lege ni pëpe? Ngbanga ti nyen? (b) Kota tënë wa a lingbi e girisa ni lâ oko pëpe? (Sara tënë na ndo ti encadré “Mû mbage ti Jéhovah.”)

¹⁴ Lâ oko oko, e yeke tingbi na atara nga na adesizion so ambeni akpengba me ambeni akpengba pëpe. Ye wa ayeke mû maboko na e ti hinga ye so e lingbi ti sara? Na tapande, tongana e tingbi lê na lê na mbeni tara so alingbi ti pusu e ti sara ye tongana Chrétien pëpe, e yeke sara ye tongana nyen? Tongana Pierre ahunda lani na Jésus ti pensé gi na anzoni ye na ndo ti lo wani, Jésus asara ye tongana nyen? Lo tene: “Mo zia lege ti Mbi, Satan; . . . teti mo bi bê ti mo na ye ti Nzapa pëpe, me na ye ti azo.” (Matthieu 16:21-23). Tongana lege azi na e ti wara nginza mingi ahon ti kozo wala ti wara mbeni kota ndo na place ti kua ti e, atâa so aye so alingbi ti sara si e wara akpale na lege ti yingo, e yeke sara ye tongana ti Jésus? Na ngoi so Jésus abâ lani so azo so ayeke bâ amiracle so lo sara ayeke nduru “ti ga ti kamata Lo ti sara si Lo ga gbia,” lo zia ala hio lo hon na mbeni ndo nde.​—Jean 6:15.

¹⁵ Ngbanga ti nyen Jésus asara ye hio tongaso na angoi so nga na ambeni ngoi nde? A yeke ngbanga ti so lo hinga polele so atënë so andu pëpe gi nzoni duti ti lo. Lo ye ti sara ye so bê ti Babâ ti lo aye nga ti fa so lo yeda so Jéhovah ayeke Kota Gbia ti Dunia Kue, atâa a hunda aye mingi na lo (Matthieu 26:50-54). Ni la, legeoko tongana ti Jésus, na ngoi kue, a lingbi e bata na li ti e tënë ti droit ti Nzapa ti komande dunia. Tongana e sara tongaso pëpe, a lingbi ti pusu e mbeni lâ ti doro ndia ti Nzapa. Ndali ti nyen? Ndali ti so e lingbi hio ti tï na yâ ti agbanda ti Satan, lo so ayeke kota zo ti pusungo azo ti bâ ye so ayeke sioni tongana nzoni ye, tongana ti so lo sara lani na Eve.​—2 aCorinthien 11:14; 1 Timothée 2:14.

16. A lingbi e zia kota ye wa na gbele e na ngoi so e yeke gi ti mû maboko na azo?

¹⁶ Na yâ ti fango tënë ti e, e yeke gi ti sara tënë na azo na ndo ti aye so agbu bê ti ala nga e yeke fa na ala ye so Bible atene. So ayeke mbeni nzoni lege ti ziango na bê ti azo ni nzara ti mandango Bible. Ye oko, kota ye so e zia na gbele e ayeke gi pëpe ti mû maboko na azo ni ti hinga ye so Bible atene wala ti hinga aye ti nzoni so Royaume ti Nzapa ayeke ga ande na ni. A lingbi e mû maboko na ala ti gbu nda ti kota tënë so andu droit ti Jéhovah ti komande dunia kue. Azo ni ayeke yeda ti ga atâ Chrétien nga ti yô “keke ti pasi” ti ala ndali ti Royaume? (Marc 8:34, MN ). Ala yeke duti ande nduru ti bungbi oko na azo so ayeda so Jéhovah ayeke Kota Gbia ti Dunia Kue na tongaso ala fa so Satan ayeke zo ti mvene nga na zo ti zongango ndo? (aProverbe 27:11). E yeke na kota pasa ti mû maboko na e wani nga na ambeni zo ti sara tongaso.​—1 Timothée 4:16.

Ngoi so Nzapa ayeke ga ye kue ndali ti azo kue

17, 18. Ngoi ti ngia wa e lingbi ti ku kungo tongana e fa so e yeda so Jéhovah ayeke Kota Gbia ti Dunia Kue?

¹⁷ Tongana e yeke sara ngangu kue fadeso ti fa na lege ti sarango ye ti e nga na lege ti kusala ti e so e yeda so Jéhovah ayeke Kota Gbia ti Dunia Kue, e lingbi ti ku kungo ngoi so fade Jésus Christ ayeke “mû royaume na Nzapa Babâ mveni”. Ngoi ni so ayeke si lawa? Bazengele Paul atene: “Tongana Lo lungula akozo-gere-ti-komande, na ayanga-ti-komande kue, na angangu kue. Teti a yeke ngbanga ti Lo ti komande, juska Lo zia awato ti Lo kue na gbe ti gere ti Lo. . . . Tongaso fade Molenge mveni nga ayeke na gbe ti Nzapa so azia ye kue na gbe ti Lo, tongaso Nzapa alingbi ga ye kue na yâ ye kue.”​—1 aCorinthien 15:24, 25, 28.

¹⁸ So tâ ngoi ti ngia ande tongana Nzapa aga ye kue ndali ti azo kue! Andâ Royaume ni asara aye kue so a sigigi na ni ndali ni awe! A zi azo kue so ake ti yeda so Jéhovah ayeke Kota Gbia ti Dunia Kue. Siriri ayeke duti na yâ ti dunia kue nga aye kue akiri na place ti ala. Zo ti sungo psaume atene so fade acréature kue ayeke he bia, ala tene: “I mû na L’Eternel gloire alingbi na iri ti Lo; . . . I fa tënë na popo ti amara, i tene, L’Eternel akomande.”​—Psaume 96:8, 10.

Mo lingbi ti fa nda ni?

• Na lege wa Jésus agboto lê lakue na ndo ti droit ti Nzapa ti komande dunia kue?

• Kozo ye so Jésus asara lani na lege ti kusala ti lo nga na kuâ ti lo ayeke nyen?

• Na lege wa e lingbi ti mû tapande ti Jésus ti fa so e yeda so Jéhovah ayeke Kota Gbia ti Dunia Kue?

[Encadré/Foto na lembeti 11]

MÛ MBAGE TI JÉHOVAH

Tongana ti so aita mingi na kodoro ti Corée nga na ti ambeni kodoro nde ahinga, na ngoi so aChrétien atingbi lê na lê na angangu tara, ye so ayeke mû maboko na ala ayeke ti hinga polele nda ni so mara ti atara tongaso asi na ala.

Mbeni Témoin ti Jéhovah so a kanga lo na ngoi ti ngorogbia ti ngbene Union soviétique atene: “Ye so amû maboko na e ti gbu ngangu ayeke so e hinga lani nzoni mingi tënë so a sigigi na ni na yaka ti Eden: droit ti Nzapa ti komande. . . . E hinga lani so ye so asi na e amû lege na e ti mû mbage ti komandema ti Jéhovah. . . . Ye so asara si e kpengba nga e wara ngangu ti ngbâ be-ta-zo.”

Mbeni Témoin ti Jéhovah ni nde afa ye so amû maboko na lo na amba ti lo na ngoi so ala yeke na yâ ti kando ti sarango kua ti ngangu. Lo tene: “Jéhovah amû maboko na e. Atâa so ye ayeke lani ngangu mingi, e ngbâ lakue ti duti na kpengba songo na Jéhovah. E yeke kpengba amba ti e na anzoni tënë, e yeke tene so e mû mbage ti Jéhovah na ndo ti tënë ti zo so ayeke na droit ti komande dunia kue.”

[Foto na lembeti 8]

Na ngoi so Satan atara Jésus, tongana nyen Jésus afa so lo yeda so Jéhovah ayeke Kota Gbia ti Dunia Kue?

[Foto na lembeti 10]

Kuâ ti Jésus amû lege na lo ti sara nyen?