Bango mawa ti zo na yâ ti sioni sese ti laso

KOBELA ti palu asara mbeni koli na kodoro ti Burundi ngangu mingi. A hunda ti tene a gue na lo hio na da-nganga. Me, so kutukutu ayeke dä pëpe, a yeke gue na lo tongana nyen? Akota kamarade ti lo use aga amû maboko na lo. Ala zia lo na ndo ti vélo na ala pusu lo teti angbonga oku na ndo ti mbeni lege so ahoto ayeke dä. Na pekoni, ala zia lo na yâ ti mbeni bus ague na lo na da-nganga so ayo pëpe. Ambeni lango na pekoni, koli so awara ngangu nzoni.

Na mbeni mbage ti sese, Katrina, mbeni kota pupu so aga na ngu abuba aye na yâ ti akodoro so ayeke na tere ti ngu na mbage ti mbongo ti Amerika na nze ti août ti ngu 2005. Ambeni zo so aga na bê ti ala wani ti mû maboko na azo abâ mbeni da so akeke akungbi ni. Na yâ ti lango ni kue azo so, so ahinga wa ti da ni pëpe amû mbeni masini ti fango keke na ala zi na akeke so akungbi na ndo ti da ni nga na aye ti tere ti da ni. Wa ti da ni atene: “Mbi kiri singila mingi na azo so.”

Radio, télé nga na ambeti-sango ayeke sara tënë mingi na ndo ti aye ti sioni mingi so ayeke si nga na aye ti ngangu so a yeke sara na azo. Na ala yeke sara tënë mingi pëpe na ndo ti anzoni ye so azo ayeke sara na mbage ti amba ti ala lâ oko oko. Ye oko, na ndo kue, azo ayeke lakue na kota nzara ti tene a ye ala nga a bâ mawa ti ala. E yeke na kota nzara ti tene a bâ mawa ti e. A yeke bâ mara ti nzara tongaso na ngoi ti Noël, mbeni ngoi so azo ayeke sara tënë wala ayeke he bia na ndo ti “siriri na ndo sese na popo ti azo”.​—Luc 2:14.

A yeke ngangu mingi ti tene zo afa so lo bâ mawa ti mba ti lo na yâ ti mbeni sese so sarango ye ti azo adê dengo na mbage ti amba ti ala. Mingi ti azo laso ayeke bâ mawa ti azo kete pëpe, na ala bâ so a yeke sara si ala wara nzoni dä. Azo mingi ayeke sara ye ague oko na tënë so atene: ‘A yeke na lege ti ndara ti sara ye ti ngangu mingi na azo ahon ti bâ mawa ti ala.’ Bê ti warango ye nga na kion ayeke kanga lege na azo ti bâ mawa ti amba ti ala.

Ye ti pekoni ayeke so, azo mingi ayeke zia ye so agbu bê ti ala na kozo ndo sân ti bi bê na tënë ti bê ti amba ti ala nga na ye so agbu bê ti ala. A yeke bâ akoli so ayeke akpengba zo ti sarango ngia ti awanguru, ti alimon nga na ti amozoko tongana “atâ koli” so ayeke woko tere ti ala pëpe ti bâ mawa ti azo. Ambeni kota zo ti poroso ayeke sara nga ye tongaso.

Tongaso, a yeke nzoni e hunda tere ti e: Ngbanga ti nyen ti bâ mawa ti azo? Bango mawa ti azo ayeke ga na aye ti nzoni? Nga, aye wa ayeke mû maboko na e ti bâ mawa ti azo? Article ti peko ayeke kiri tënë na ahundango tënë so.

[Encadré na lembeti 3]

•Bango mawa ti azo ayeke mbeni wokongo?

•Bango mawa ti azo ayeke ga na aye ti nzoni?

•Na alege wa mo lingbi ti fa so mo bâ mawa ti azo?