Ngbâ ti bata “kozo ndoye ti mo”

“Ye so ayeke na mo, mo gbu [ni] ngangu.”​—APOC. 3:11.

1, 2. Bê ti mo ayeke lani tongana nyen na ngoi so mo wani mo bâ so aye so mo yeke manda na ndo ti Jéhovah ayeke tâ tënë?

MO DABE ti mo na ngoi so, ti kozoni, mo manda tâ tënë na ndo ti pendere ye so Jéhovah aleke ti sara ndali ti azo so amä yanga? Tongana mo yeke ândö na yâ ti mbeni bungbi ti nzapa nde, bê ti mo ayeke tongana nyen na ngoi so a fa na mo na yâ ti Bible aye so Nzapa aleke na bê ti lo ti sara wala a zi nda ti afango ye so ândö ayeke ngangu na mo ti gbu nda ni? Peut-être mo bâ so atënë so a fa na mo ândö na ndo ti Nzapa ayeke tâ tënë pëpe. Me mo yeke biani na ngia mingi fadeso ndali ti so mo hinga tâ tënë. Tongana mo kono na yâ ti mbeni sewa ti aTémoin ti Jéhovah, mo dabe ti mo na ngoi so lani mo yeda na bê ti mo wani so aye so mo manda na ndo ti Jéhovah ayeke tâ tënë nga mo mû desizion ti sara ye alingbi na ni?​—aRom. 12:2.

² Mingi ti amba ti mo aChrétien ayeke tene so na ngoi so Jéhovah asara si ala ga na mbage ti lo, ala yeke na kota ngia mingi, ala bâ so ala yeke nduru na lo nga ala kiri singila ndali ni (Jean 6:44). Ngia so ala yeke na ni apusu ala ti mû mbage na yâ ti akusala so aChrétien ayeke sara. Ala yeke na ngia mingi na a sara si ala ye ti fa tënë ti bê ti ala na azo kue. A yeke ye so asi na mo la?

3. Dutingo ti kongregation ti Ephèse ayeke lani tongana nyen na ngoi so Jean afa tokua ti Jésus na ala?

³ Na ngoi so Jésus ayeke sara lani tënë na aChrétien ti kongregation ti Ephèse na ngoi ti akozo Chrétien, lo tene so ‘ala zia kozo ndoye ti ala’ awe. A-Chrétien ti Ephèse ayeke lani na apendere sarango ye mingi. Ye oko, ndoye so ala yeke lani na ni na mbage ti Jéhovah akiri na peko. Ni la Jésus atene na kongregation ni, lo tene: “Mbi hinga ye so mo sara, na kusala ti mo ti ngangu, na bê ti mo so azia pëpe, na Mbi hinga mo lingbi sara beoko pëpe na azo ti sioni, na mo tara ala so adi iri ti ala mveni abazengele, na ala yeke abazengele pëpe, na mo bâ ala yeke awamvene; na Mbi hinga mo yeke na bê so azia pëpe, na mo gbu ngangu teti iri ti Mbi, na bê ti mo anze pëpe. Me ye so Mbi ke ayeke so: mo zia kozo ndoye ti mo.”​—Apoc. 2:2-4.

4. Ngbanga ti nyen tënë so Jésus atene na aChrétien ti Ephèse ayeke kota tënë mingi teti e laso?

⁴ Tongana e bâ dutingo ti aChrétien so a sa yingo na ndo ti ala teti mbeni ngoi, ti londo na ngu 1914 ti ga na ni, wango so Jésus amû na aChrétien ti kongregation ti Ephèse nga na tanga ti akongregation so lo sara tënë na ala na yâ ti mbeti ti Apocalypse alingbi biani na ni (Apoc. 1:10). Ye oko, a yeke si so même laso, ambeni Chrétien ‘azia kozo ndoye ti ala’ na mbage ti Jéhovah nga na mbage ti tâ tënë. Na hingango ni tongaso, zia e gi ti bâ tongana nyen ti dabe ti mo na ndo ti aye so asi na mo wani nga ti gbu li na ndo ni ayeke mû maboko na mo si mo bata ndoye ti mo na mbage ti Nzapa nga na mbage ti tâ tënë. A yeke sara nga si mo kiri mo ye Nzapa nga na tâ tënë mingi.

Nyen la afa na mo so tâ tënë la?

5, 6. (a) A lingbi Chrétien oko oko ahinga nyen na bê ti lo kue? (b) Nyen la afa na mo so aTémoin ti Jéhovah ayeke fa tâ tënë? (c) Nyen la alingbi ti mû maboko na mbeni Chrétien ti kiri ti wara kozo ndoye ti lo?

⁵ A hunda ti tene azo kue so amû tere ti ala na Jéhovah agi kozoni kue ti “hinga” ala wani ye so ayeke “nzoni, ye so alingbi na lê ti Lo, na ye so alingbi kue.” (aRom. 12:1, 2). Mbeni ye so ayeke mû lege na zo ti sara ni ayeke ti manda tâ tënë. Ye so apusu azo ti hinga so aTémoin ti Jéhovah ayeke fa tâ tënë ayeke nde nde. Ambeni adabe ti ala so ala changé bango ndo ti ala na ngoi so ala bâ iri ti Nzapa na yâ ti Bible wala na ngoi so ala hinga ye so ayeke si na zo tongana lo kui (Gen. 22:14; Zo-ti. 9:5, 10). Ye so apika bê ti ambeni ayeke ndoye so ala bâ na popo ti aTémoin ti Jéhovah (Jean 13:34, 35). Ti ambeni, ala gbu li ti ala na ndo ti ndani so aChrétien ayeke yôro tere ti ala pëpe na yâ ti ambeni ye so mingi ti azo ayeke sara ka ni. Ala bâ na nda ni so atâ Chrétien alingbi pëpe ti mû mbage na yâ ti atënë ti poroso so ayeke kporo na popo ti azo nga na abira so amara ayeke sara na popo ti ala.​—Es. 2:4; Jean 6:15; 17:14-16.

⁶ Ti azo mingi, a yeke atënë so e bâ ni ge nga na ambeni nde la azingo kozo ndoye ti ala na mbage ti Nzapa. Mû ngoi ti dabe ti mo na ndo ti ye so apusu mo ti hinga so tâ tënë la. Dutingo ti mo nga na asarango ye ti mo ayeke nde na ti amba ti mo. Tongaso, kite ayeke dä pëpe so aye so apusu mo ti ye Jéhovah nga ti zia bê kue na azendo so lo mû ayeke nde na ti amba ti mo. Âmanke araison so apusu mo lani ti ye Jéhovah ayeke gi a-oko raison so mo yeke na ni laso. Tâ tënë achangé pëpe. Ni la, ti dabe ti mo na ndo ti atënë so nga na aye so andu bê ti mo lani alingbi ti sara si mo kiri mo ye tâ tënë tongana ti kozo.​—Diko Psaume 119:151, 152; 143:5.

Kpengba kozo ndoye ti mo

7. Ngbanga ti nyen e yeke na bezoin ti kpengba kozo ndoye ti e na mbage ti tâ tënë? E lingbi ti sara ni tongana nyen?

⁷ Peut-être aye achangé mingi na yâ ti fini ti mo ngbene ye na ngoi so mo mû tere ti mo na Jéhovah. Kozo ndoye ti mo na mbage ti tâ tënë ayeke kota ye mingi, me tongana ngoi ayeke hon, mo yeke na bezoin ti kpengba ndoye so ti mû lege na mo ti luti na lê ti akpale so mo yeke wara ndali ti mabe ti mo. Ye oko, Jéhovah amû maboko na mo (1 aCor. 10:13). Tongaso, aye so asi na mo na yâ ti angu so ahon ayeke nga akota ye mingi na lê ti mo. Aye ni so amû maboko na mo ti kpengba kozo ndoye ti mo na mbage ti tâ tënë, na a yeke nga mbeni lege so azi na mo ti hinga ye so ayeke nzoni, ye so ague oko na ye so bê ti Nzapa aye.​—Jos. 23:14; Ps. 34:9.

8. Na lege wa Jéhovah afa tere ti lo lani na Moïse? Nyen la asara si azo ti Israël aga ti hinga Nzapa nzoni mingi?

⁸ Ti mû mbeni tapande, tara ti bâ dutingo ti azo ti Israël na ngoi so Jéhovah afa so lo leke na bê ti lo ti zi ala na yâ ti ngbâa na Egypte. Jéhovah afa tere ti lo wani na Moïse, lo tene: “Mbi yeke ga ye so fade mbi yeke ga ni.” (MN ) (Ex. 3:7, 8, 13, 14). Jéhovah aye biani ti tene lani so lo yeke sara ye kue so a hunda ti sara ti zi azo ti lo. Aye so asi na pekoni amû lege na azo ti Israël ti bâ akua nde nde so Jéhovah asara alingbi na aye so asi: lo sara kua tongana Nzapa ti Ngangu Ahon Kue, tongana Juge, tongana Mokonzi, tongana Zo ti zingo azo, tongana Zo ti sarango bira nga tongana Zo ti mungo ye na zo.​—Ex. 12:12; 13:21; 14:24-31; 16:4; Néh. 9:9-15.

9, 10. Mara ti ye wa so ayeke si na zo alingbi ti mû maboko na lo ti hinga Nzapa? Ngbanga ti nyen a yeke nzoni ti tene zo adabe ti lo na mara ti aye tongaso?

⁹ Dutingo ti mo ayeke nde na ti azo ti Israël ti giriri. Atâa so a yeke tongaso, kite ayeke dä pëpe so aye so asi na mo afa so Nzapa abi bê ti lo na mo, na ye so akpengba mabe ti mo. Peut-être Jéhovah asara mbeni ye si mo bâ lo tongana Zo ti mungo ye na mo, Zo so adë bê ti mo wala Zo ti fango ye na mo. (Diko Esaïe 30:20b, 21.) Wala mo lingbi ti bâ so lo kiri tënë polele na sambela ti mo. A lingbi ti si so mo wara akpale, na pekoni mbeni mba ti mo Chrétien amû maboko na mo. Wala na ngoi ti mandango Bible ti mo wani, mo wara ambeni versê so alingbi tâ na dutingo ti mo.

¹⁰ Tongana mo fa peko ti aye so asi na mo na azo, peut-être a yeke ndu bê ti ala mingi pëpe. Kozoni kue, aye so asi na mo ayeke aye ti miracle pëpe. Me mo bâ ni tongana akpengba ye. Biani, Jéhovah aga ye so a hunda ti tene lo ga ni ndali ti mo. Dabe ti mo na angu so mo sara na yâ ti tâ tënë. Mo lingbi ti dabe ti mo na angoi so mo bâ so Jéhovah abâ lege ti mo nzoni? Tongana a yeke tongaso, ti dabe ti mo na aye ni so nga na lege so aye ni so andu bê ti mo alingbi ti sara si mo ye Jéhovah tongana ti so mo ye lo lani. Bâ aye so asi na mo na nene ni mingi. Gbu li ti mo na ndo ni. A yeke aye so afa so Jéhovah abi bê ti lo na mo, na zo oko pëpe alingbi ti kanga lege na mo ti bâ ni tongaso.

Tara bê ti mo wani

11, 12. Tongana ndoye ti mbeni Chrétien na mbage ti tâ tënë akiri na peko, kpale ni alingbi ti duti so wa? Jésus amû wango wa?

¹¹ Tongana mo bâ so mo ye Jéhovah nga na tâ tënë tongana ti kozo pëpe, a yeke pëpe ngbanga ti so Jéhovah achangé sarango ye ti lo na mbage ti mo. Jéhovah ayeke changé lâ oko pëpe (Mal. 3:6; Jacq. 1:17). Lo yeke bi bê ti lo lani mingi na mo, na a yeke ye so lo ngbâ ti sara laso. Tongaso, tongana mbeni ye achangé na yâ ti songo ti mo na Jéhovah, ndani ayeke nyen? A yeke ndali ti so mo bâ so akpale ahon ndo ti mo, na mo yeke gi bê ti mo mingi ahon ti kozo? Peut-être mo yeke sambela ândö na bê ti mo kue, mo yeke manda ye nzoni nga mo yeke gbu li mingi na ndo ni. Mo yeke fa tënë lani mingi nga mo yeke gue na bungbi lani mingi ahon ti fadeso?​—2 aCor. 13:5.

¹² A lingbi ti si so mo bâ so mo yeke na yâ ti mara ti akpale so pëpe. Me tongana a yeke akpale ti mo la, nyen la asara si akpale so asi na mo? A yeke na lege ni ti tene zo agi ti wara ye so sewa ti lo ayeke na bezoin ni, ti bâ lege ti seni ti lo wala ti sara ambeni ye tongaso. Me a yeke na lege ni ti zia si aye so apusu mo ti sara ye mo bâ mo tene lâ ti Jéhovah angbâ yongoro? Jésus atene na abazengele ti lo, lo tene: “I bata nzoni, wala peut-être tengo kobe na nyongo sämba mingi, na kusala ti leke ye ti fini so ane bê ti i, na lâ ni so aga na ndo i tongana son; teti fade lâ ni so aga tongana son na ndo ala kue so aduti na lê ti sese kue. Me i bata na ngoi ni kue, i sambela, si i lingbi wara ngangu ti kpe ye kue so fade asi.”​—Luc 21:34-36.

13. Jacques ahaka Mbeti ti Nzapa na nyen?

¹³ Jacques so ayeke mbeni zo ti sungo Bible ahunda na amba ti lo aChrétien ti sara kusala na Mbeti ti Nzapa ti tara bê ti ala wani na ala honde ndo ti ye oko pëpe. Jacques atene: “I sara ye so Tënë ni afa na i, i mä senge pëpe ti handa tere ti i mveni. Teti tongana mbeni zo ayeke zo ti mä Tënë senge na lo yeke zo ti sara ye pëpe, lo yeke tongana zo so abâ lê ti lo mveni na tatara; na tongana lo bâ awe, lo gue, na fade fade lo girisa ye so lo bâ. Me zo so abâ na yâ ndia so alingbi kue, ndia ti liberté, na lo ngbâ na lege ni, lo yeke zo so amä tënë senge pëpe ti girisa tënë ni, me lo yeke zo so asara ye; fade zo so awara nzoye na lege ti kusala ti lo.”​—Jacq. 1:22-25.

14, 15. (a) Tongana nyen Bible alingbi ti mû maboko na mo ti gue na li ni na lege ti yingo? (b) A yeke nzoni mo gbu li ti mo na ndo ti ahundango tënë wa?

¹⁴ Zo alingbi ti bâ tere ti lo na tatara ti bâ wala lo leke tere ti lo nzoni. Na tapande, tongana mbeni koli abâ tere ti lo na tatara na lo bâ so cravate ti lo ayeke na lege ni pëpe, lo lingbi ti leke ni. Tongana mbeni wali abâ tere ti lo na tatara na lo bâ so kuä ti li ti lo ayeke na lege ni pëpe, lo lingbi ti leke ni. Legeoko nga, Bible ayeke mû maboko na e ti bâ asarango ye ti e wani. Tongana e haka asarango ye ti e na ye so Bible ahunda na e ti sara, e yeke sara kusala na ni mo bâ mo tene ayeke tatara. Nda ti bango tere ti e na tatara ni ayeke nyen tongana e bâ mbeni ye so ayeke na lege ni pëpe na e ke ti leke ni? E yeke sara ye na ndara tongana e ga ‘azo so asara ye’ alingbi na ye so e bâ na yâ ti “ndia so alingbi kue”. Ni la, a yeke nzoni azo so abâ so kozo ndoye ti ala na mbage ti Jéhovah nga na mbage ti tâ tënë akiri na peko agbu li ti ala na ndo ti ahundango tënë so: ‘Akpale wa mbi yeke wara na yâ ti gigi ti mbi? Mbi yeke sara ye tongana nyen na lê ti akpale so? Ândö mbi yeke sara ye tongana nyen na lê ti akpale? Mbeni ye achangé na yâ ti sarango ye ti mbi?’ Tongana e gbu li ti e wani tongaso na e bâ so mbeni kpale ayeke dä, zia e kanga lê na ndo ni pëpe. Tongana a hunda ti leke ambeni ye, e sara kue ti leke ni sân ti ku.​—aHéb. 12:12, 13.

¹⁵ Mara ti gbungo li tongaso alingbi ti mû maboko na mo ti zia na gbele mo aye ti yingo so mo lingbi ti si dä, so ayeke sara si mo gue na li ni. Yingo ti Nzapa apusu bazengele Paul ti mû wango na mba ti lo wakua Timothée ti sara si lo sara kua ti Nzapa nzoni ahon ti kozo. Paul awa Timothée so ngu ti lo ayeke kete na ti lo, lo tene: “Mo bata ye so kue nzoni; zia bê ti mo kue na ye so, si azo kue alingbi bâ lege so mo yeke kpengba.” E nga kue e yeke sara nzoni tongana e sara kua na Bible ti “bata”, wala ti gbu li nzoni na ndo ti aye so e lingbi ti sara ti gue na li ni na lege ti yingo.​—1 Tim. 4:15.

16. Na ngoi so mo yeke sara kua na Bible ti tara bê ti mo wani, ye wa a lingbi mo sara hange na ni?

¹⁶ Tongana mo tara bê ti mo wani na mo honde ndo ti ye oko pëpe, mo yeke bâ ambeni wokongo ti mo. Awokongo so alingbi ti sara si tere ti mo ayapu pëpe, me zia si mara ti ye tongaso asi na mo pëpe. Kozoni kue, raison so zo ayeke tara bê ti lo wani ayeke ti bâ aye so a hunda ti tene lo leke ni. Ye oko, Satan aye si awokongo ti mbeni Chrétien apusu lo ti bâ so lo yeke ye oko pëpe. Biani, a tene lani so ngangu kue so awakua ti Nzapa ayeke sara anzere na lo Nzapa kete pëpe (Job 15:15, 16; 22:3). So ayeke mbeni tënë ti mvene so Jésus ake ni na kuru go; Nzapa ayeke bâ e oko oko kue na nene ni mingi. (Diko Matthieu 10:29-31.) Nda ti hingango awokongo ti mo ayeke ti sara si na tâ be-ti-molenge mo leke na bê ti mo ti zia lege na Jéhovah ti mû maboko na mo ti sara ye nzoni ahon ti kozo (2 aCor. 12:7-10). Kobela wala gango mbakoro ayeke akpale so alingbi ti sara si zo asara kua ti Nzapa mingi pëpe tongana ti kozo. Tongana a yeke kpale ti mo la, zia na gbele mo ti sara aye so alingbi na ngangu ti mo, me mo ngbâ ti sara ngangu na mo zia pëpe si ndoye ti mo akiri na peko.

Aye ti kiringo singila ndali ni ayeke mingi

17, 18. Aye ti nzoni wa mo yeke wara tongana mo kpengba kozo ndoye ti mo?

¹⁷ Zo so angbâ ti kpengba kozo ndoye ti lo na mbage ti tâ tënë ayeke wara aye ti nzoni mingi. Mo lingbi ti kono hingango ye ti mo na ndo ti Nzapa nga ti kiri singila ndali ti so na ndoye lo yeke fa lege na mo. (Diko aProverbe 2:1-9; 3:5, 6.) Zo ti sungo psaume atene so zo ayeke “wara futa nzoni na lege ti bata [atënë ti ngbanga ti Jéhovah]”. Lo tene nga so “tënë ti témoin ti L’Eternel ayeke tâ tënë, a sara si zo so li ti lo ayeke dä pëpe aga zo ti ndara.” Na ndo ni, “ngia ayeke na azo so lege ti ala ayeke mbilimbili, ala so atambela na lege ti Ndia ti L’Eternel.”​—Ps. 19:8, 12; 119:1.

¹⁸ Mo yeda biani so aye ti nzoni mingi ayeke dä so e lingbi ti kiri singila ndali ni. Mo hinga nda ti aye so ayeke si laso. Nzapa ayeke bâ lege ti awakua ti lo laso nzoni na lege ti yingo na mo nga kue mo yeke bâ nzoni dä. Kite ayeke dä pëpe so mo yeke kiri singila nga na Jéhovah ndali ti so lo sara si mo ga na yâ ti kongregation ti lo so a yeke wara ni na ndo ti sese kue na lo mû lege na mo ti duti oko ti aTémoin ti lo. Kiri singila ndali ti anzoni ye so mo wara. Tongana a hunda ti tene mo sû molongo ti aye ti nzoni so mo wara, kite ayeke dä pëpe so aye ni ayeke hon ndo ni. Ti gbu li na ndo ti aye so ngoi na ngoi ayeke mû biani maboko na mo ti sara ye alingbi na wango so atene: “Ye so ayeke na mo, mo gbu [ni] ngangu.”​—Apoc. 3:11.

19. Nde na gbungo li na ndo ti songo ti mo na Nzapa, kpengba ye wa ayeke mû maboko na mo ti ngbâ ti kpengba na lege ti yingo?

¹⁹ Ti gbu li na ndo ti lege so mabe ti mo amaï na yâ ti angu so ahon alingbi ti mû maboko na mo ti gbu ye so mo yeke na ni ngangu. Fani mingi, Tour ti Ba Ndo agboto lê na ndo ti akpengba ye so ayeke mû maboko na e ti duti lakue na nzoni songo na Jéhovah. Na popo ti akpengba ye so, a yeke wara sambela, gango na abungbi nga na mungo mbage dä; a yeke wara nga mungo mbage na kusala ti fango tënë na bê kue. Aye so alingbi ti mû maboko na mo ti kiri ti wara na ti kpengba kozo ndoye so mo yeke lani na ni.​—aEph. 5:10; 1 Pi. 3:15; Jude 20, 21.

Mo yeke kiri tënë tongana nyen?

• Na lege wa ti gbu li na ndo ti araison so apusu mo ti ye Jéhovah ayeke kpengba mo laso?

• Ti gbu li na ndo ti aye so asi na mo na yâ ti angu so ahon alingbi ti sara si mo hinga nyen biani?

• Ngbanga ti nyen a yeke nzoni mo gi ti bâ wala mo ye Nzapa mingi?

[Foto na lembeti 29]

Nyen la apusu mo ti bâ so tâ tënë la?

[Foto na lembeti 31]

Mo bâ ambeni ye na yâ ti asarango ye ti mo so a hunda ti changé ni?