Jéhovah ayeke bi bê mingi na awakua ti lo so aga mbakoro

“Nzapa ayeke kirikiri pëpe si Lo lingbi girisa kusala ti i, ndoye so i fa giriri teti iri ti Lo.”​—AHÉB. 6:10.

1, 2. (a) Bango mbeni zo so kuä ti li ti lo avuru alingbi ti dabe ti mo na nyen? (b) Jéhovah ayeke bâ aChrétien so aga mbakoro awe tongana nyen?

TONGANA mo bâ aita ti yâ ti kongregation so aga mbakoro awe na so kuä ti li ti ala avuru, a dabe ti mo na mbeni tënë so a tene na yâ ti mbeti ti Daniel? Na yâ ti mbeni ye so Daniel abâ tongana suma, Jéhovah Nzapa asara tënë ti lo wani tongana mbeni zo so ayeke na vuru kuä ti li. Daniel atene: “Mbi bâ juska a zia trône nde nde na place ni, na Lo Ti Giriri aduti; bongo ti Lo ayeke vuru tongana neige, na kuali ti Lo ayeke tongana kuä ti ngasangbaga so avuru kue.”​—Dan. 7:9.

² So a tene kuä ti li ti Nzapa avuru kue nga a iri lo “Lo ti Giriri”, a ye ti fa so ngu ti Nzapa ayeke mingi nga lo yeke na kota ndara, na a lingbi e ne mingi aye use so. Tongaso, Jéhovah so ayeke Lo ti Giriri abâ akoli na awali so ayeke sara na lo na bê ti ala kue na so aga mbakoro awe tongana nyen? Mbeti ti Nzapa atene so “kuali so avuru ayeke couronne ti gloire, zo awara so na lege ti mbilimbili.” (aProv. 16:31). Ni la, tongana mbeni Chrétien so ayeke be-ta-zo awara vuru kuä ti li, vuru kuä ti li so ayeke mbeni pendere ye na lê ti Nzapa. Mo yeke na oko bango ndo so Jéhovah ayeke na ni na ndo ti aita ti mo so aga mbakoro awe?

Ndani so a bâ ala na nene ni mingi

3. Ngbanga ti nyen la e bâ na nene ni mingi aita ti e so aga mbakoro awe?

³ Na popo ti awakua ti Jéhovah so aga mbakoro awe, so aduti be-ta-zo na yâ ti akongregation, a yeke wara aita-koli ti Wabatango Bungbi ti aTémoin ti Jéhovah, asurveillant so ayeke gue na ando nde nde nga na ala so asara ni kozo, apionnier so ayeke fa tënë na bê ti ala kue nga na awafango tënë so akpengba. Peut-être mo hinga ambeni ita so afa nzo tënë na yâ ti angu mingi na so nzoni tapande ti ala apusu aita so ngu ti ala ayeke kete na ti ala ti sara kua ti Jéhovah nga ti changé asarango ye ti ala. Ambeni ita ti e so aga mbakoro awe asara lani akota kusala na yâ ti bungbi ti Jéhovah nga ala gbu ngangu na yâ ti aye ti ngangu so a sara na ala ndali ti nzo tënë. Jéhovah nga na “ngbâa be-ta-zo na ti ndara” abâ na nene ni mingi akua kue so ala sara ândö nga na ati so ala yeke sara laso ti mû maboko na kusala ti Royaume.​—Mat. 24:45, MN.

4. Ngbanga ti nyen a yeke nzoni e ne aChrétien so aga mbakoro awe nga e sambela ndali ti ala?

⁴ Aita so, so ayeke be-ta-zo, alingbi biani ti tene tanga ti awakua ti Jéhovah Nzapa akiri singila na ala nga ane ala. Ti tâ tënë ni, Ndia so Nzapa amû na lege ti Moïse afa so bingo bê na ambakoro nga na nengo ala ague oko na kpengo mbeto ti Jéhovah (Lév. 19:32). A yeke nzoni e sambela lakue ndali ti aita so, so ayeke be-ta-zo, nga e kiri singila na Nzapa ndali ti ngangu kusala so ndoye apusu ala ti sara. Bazengele Paul asambela lani ndali ti amba ti lo so lo na ala ayeke sara kusala, atâa ala yeke amaseka wala ala yeke ambakoro.​—Diko 1 aThessalonicien 1:2, 3.

5. Tongana nyen e lingbi ti wara aye ti nzoni na sarango lisoro na aChrétien so aga mbakoro awe?

⁵ Na ndo ni, azo kue ti yâ ti kongregation ayeke wara aye ti nzoni na sarango lisoro na aChrétien so aga mbakoro awe. Aye so aChrétien so amanda, aye so ala bâ nga na aye so asi na ala asara si ala hinga ye mingi. Ala manda ti kanga bê nga ti bâ mawa ti azo, na ala fa ye so ala manda na aita so ngu ti ala ayeke kete na ti ala, na ye so aga na ala kota ngia (Ps. 71:18). Ala aita so ngu ti ala ayeke kete na ti aChrétien so, ala sara ye na ndara nga ala sara ngangu ti wara nzoni na lege ti hingango ye ti aChrétien so, tongana ti so zo ayeke sara ngangu ti gboto ngu na yâ ti mbeni dungu so alï mingi.​—aProv. 20:5.

6. Na lege wa mo lingbi ti fa na aita so ayeke ambakoro so mo bâ ala na nene ni mingi?

⁶ Mo yeke fa na aita so aga mbakoro awe so mo ye ala tongana ti so Jéhovah aye ala? Mbeni lege ti sarango ni ayeke ti tene na ala so mo ye ala mingi ndali ti so ala yeke be-ta-zo nga mo bâ tënë so ala yeke tene na nene ni mingi. Na ndo ni, na sarango ye alingbi na ye so mo manda na mbage ti ala, mo yeke fa biani so mo ne ala. Gbâ ti aChrétien so aga mbakoro ayeke dabe ti ala na wango ti ndara so ala wara lani na mbage ti aChrétien so ayeke mbakoro nga ayeke be-ta-zo. Ala yeke dabe ti ala nga na ndo ti lege so sarango ye alingbi na wango so aga na aye ti nzoni na ala na yâ ti fini ti ala kue.a

E sara aye so afa so e ye ala mingi

7. Akozo zo so Nzapa ahunda na ala ti bâ lege ti ambakoro ayeke azo wa?

⁷ Nzapa afa so akozo zo so a lingbi ala bâ lege ti ambakoro ayeke afami ti ala. (Diko 1 Timothée 5:4, 8.) Jéhovah ayeke na ngia tongana afami ni abâ lege ti azo ti ala so aga mbakoro awe ndali ti so na sarango tongaso, ala yeke fa so ala yeke bi bê mingi na ambakoro tongana ti so Jéhovah ayeke sara. Nzapa ayeke mû maboko na asewa so nga lo yeke iri tënë nzoni na ndo ti ngangu so ala yeke sara nga na asacrifice so ala sara.b

8. Ngbanga ti nyen a yeke nzoni aita afa so ala yeke bi bê na aChrétien so aga mbakoro awe?

⁸ Legeoko nga, na yâ ti akongregation, a yeke wara aita so aga mbakoro awe na so ayeke be-ta-zo, so ayeke na bezoin ti ambeni ye me afami ti ala ayeke aTémoin ti Jéhovah pëpe wala afami ni aye ti mû maboko na ala pëpe. Jéhovah ayeke na ngia tongana aita ti akongregation amû maboko na aita ti ala so (1 Tim. 5:3, 5, 9, 10). Na sarango tongaso, aita ti akongregation ayeke fa so ala ‘sara be-nzoni na popo ti ala, ala ndoye tere ti ala tongana aita, na ala duti na be-ti-ndoye’ na mbage ti aita so aga mbakoro awe (1 Pi. 3:8). Paul afa nzoni mingi bingo bê so aita ti kongregation ayeke na ni na mbage ti ambakoro so ayeke na yâ ti kongregation. Paul atene so tongana mbeni membre ti tere awu pono, “amembre kue awu pono legeoko na lo”. (1 aCor. 12:26). Ti sara aye ti fa so e bâ mawa ti ambakoro afa so e sara ye ague oko na kpengba-ndia so e wara na yâ ti wango ti Paul, so lo tene: “I yô kungba ti ambeni zo na popo ti i, tongaso fade i bata ndia ti Christ kue.”​—aGal. 6:2.

9. Akpale wa ambakoro ayeke wara ni?

⁹ Akpale wa aita so aga mbakoro awe ayeke na ni, so ayeke tongana anengo kungba? Ngangu ti ambeni mingi ayeke hunzi hio. Ala lingbi ti bâ so a yeke ngangu na ala ti sara ambeni kusala tongana guengo ti bâ docteur, sarango lettre, balengo yâ ti da nga na tongo kobe. Teti so tongana ngu ti mbeni zo ayeke gue na li ni, nzara ti ngu nga na ti kobe ayeke gbu lo mingi pëpe, ambakoro alingbi ti pensé so ala yeke na bezoin ti te ye mingi pëpe wala ti nyon ngu mingi pëpe. Ye so alingbi ti ndu nga mandango Bible nga na guengo na abungbi. Lê ti ambakoro alingbi ti sara si a yeke ngangu na ala ti diko mbeti, mê ti ala alingbi ti sara si mango aye so ayeke fa na abungbi aga ngangu nga lekengo tere ti gue na abungbi alingbi ti ga ngangu mingi na ala. Tongaso, nyen la aita alingbi ti sara ndali ti ambakoro so?

Lege so mo lingbi ti mû maboko na ala

10. Nyen la a-ancien alingbi ti sara si ambakoro awara aye so ala yeke na bezoin ni?

¹⁰ Na yâ ti akongregation mingi, a yeke bâ lege ti ambakoro nzoni mingi. Na ndoye, aita ayeke mû maboko na ala na lege so ala yeke gue ti vo ye na ala, ti to ye na ala nga ti balé yâ ti da ti ala. Aita ayeke mû maboko na ala ti manda ye, ti leke tere ti ala ti gue na abungbi nga ti ngbâ lakue ti fa tënë. Aita so ngu ti ala ayeke kete na ti ambakoro so ayeke gue legeoko na ala na bungbi wala na fango tënë nga ala yeke yô ala wala ala yeke futa lege na ala. Tongana ambakoro ni alingbi pëpe ti gue na bungbi, a yeke zia aye so atambela na ngoi ti bungbi na yâ ti kasete ndali ti ala. Tongana lege ayeke dä, a-ancien ayeke leke aye ti sara si ambakoro awara aye so ala yeke na bezoin ni.c

11. Fa ye so mbeni sewa asara lani ti mû maboko na mbeni ita-koli so aga mbakoro awe.

¹¹ A-Chrétien oko oko nga alingbi ti yamba ambakoro na da ti ala nga ti mû ye na ala. Na tapande, letäa ayeke mû mbeni nginza na mbeni ita-koli na wali ti lo so ala use kue aga mbakoro awe. Me na pekoni so wali ti lo akui, nginza so letäa ayeke mû na lo alingbi mbeni pëpe ti futa da so ala loué ni. Lo na wali ti lo amanda Bible lani na mbeni sewa, so na yâ ni a yeke wara babâ ni, mama ni nga na amolenge ti ala ti wali use. Sewa so alango na yâ ti mbeni kota da. Sewa ni amû achambre use na mbakoro so ti lango dä. Teti angu 15, ala yeke te ye place oko, ala yeke he ngia na popo ti ala nga ala ye tere mingi. Amaseka-wali ni awara ye ti nzoni mingi na lege ti mabe ti ita so nga na aye so asi na lo; lo nga kue lo wara aye ti nzoni na ngoi so ala duti place oko. Ita-koli so alango na da ti ala juska lo kui na ngu 89. Sewa so angbâ lakue ti kiri singila na Nzapa ndali ti aye ti nzoni mingi so ala wara na ngoi so ala duti place oko na lo. Na mungo maboko na mbeni disciple ti Jésus Christ, ala ‘girisa futa ti ala’ pëpe.​—Mat. 10:42.d

12. Nyen la mo lingbi ti sara ti fa so mo ye mingi aita so aga mbakoro awe?

¹² Peut-être mo lingbi pëpe ti mû maboko na mbeni ita so ayeke mbakoro, tongana ti so sewa so asara. Me mo lingbi peut-être ti mû maboko na ambakoro ti gue na abungbi nga ti sigigi na fango tënë. Mo lingbi nga ti tisa ala na da ti mo nga ti zia ala na tere ti mo na ngoi so mo yeke hon na ambeni kete tambela ti wungo tere. Mo lingbi ti gue ti bâ ala, mbilimbili na ngoi so ala yeke na kobela wala na ngoi so ala lingbi pëpe ti gue na mbeni ndo. Na ndo ni, a lingbi mo sara ye lâ oko pëpe na mbage ti ala mo bâ mo tene ala yeke amolenge. Na angoi kue so aChrétien so aga mbakoro awe alingbi ti mû adesizion, a yeke nzoni a hunda ala na ndo ti adesizion so andu ala. Même ambakoro so hingango ndo ti ala akiri mingi na peko ayeke hinga wala a ne ala wala a ne ala pëpe.

Jéhovah ayeke girisa ande pëpe aye so mo sara

13. Ngbanga ti nyen a yeke kota ye mingi ti bi bê na aye so ayeke mû vundu na aChrétien so ayeke ambakoro?

¹³ A yeke kota ye mingi ti bi bê na aye so ayeke mû vundu na ambakoro. A yeke bâ ka mingi so ambakoro ayeke wara vundu mingi ndali ti so ala lingbi mbeni pëpe ti sara aye so ala yeke sara ândö na ngoi so ala ngbâ na ngangu nga na nzoni seni. Na tapande, mbeni ita-wali so asara aye mingi na yâ ti kua ti Jéhovah teti angu 50 tongaso nga so asara lani kusala ti ngoi kue awara mbeni kobela so awoko lo kue, tongaso a hunda na lo ti sara ngangu si lo gue na abungbi. Na ngoi so lo haka aye so lo yeke sara ândö na yâ ti kua ti Jéhovah na aye so lo yeke sara fadeso, lo tï na toto. Lo kuku li ti lo na sese, na ngoi so lo yeke toto, lo tene: “Ye so mbi yeke sara fadeso ayeke ye oko pëpe.”

14. Atënë ti dengo bê wa awakua ti Jéhovah so aga mbakoro awe alingbi ti wara na yâ ti apsaume?

¹⁴ Tongana mo yeke mbeni mbakoro, mara ti kota vundu tongaso asi na mo awe? Wala na ambeni ngoi mo bâ so peut-être Jéhovah azia mo awe? Peut-être zo ti sungo psaume ayeke lani na mara ti bibe tongaso na ngoi so lo ga mbakoro, ni la lo sambela Jéhovah, lo tene: “Mo ke mbi pëpe tongana mbi ga mbakoro; zia mbi pëpe tongana ngangu ti mbi awe. Tongana mbi ga mbakoro na kuali ti mbi avuru, O Nzapa, Mo zia mbi pëpe.” (Ps. 71:9, 18). Ti tâ tënë ni, Jéhovah azia zo ti sungo psaume so lani pëpe, na lo yeke zia ande mo pëpe. Na yâ ti mbeni psaume nde, David afa so lo hinga na bê ti lo kue so Nzapa ayeke mû maboko na lo. (Diko Psaume 68:20.) Zia mo hinga na bê ti mo kue so tongana mo yeke mbeni Chrétien so aga mbakoro awe na so ayeke be-ta-zo, Jéhovah ayeke na mo nga lo yeke ngbâ ande ti mû maboko na mo lâ na lâ.

15. Nyen la alingbi ti mû maboko na ambakoro ti ngbâ ti duti na anzoni bibe?

¹⁵ Jéhovah alingbi lâ oko pëpe ti girisa ye so ala aTémoin ti lo so aga mbakoro awe asara ândö nga na ati so ala yeke sara fadeso teti gloire ti lo. Bible atene: “Nzapa ayeke kirikiri pëpe si Lo lingbi girisa kusala ti i, ndoye so i fa giriri teti iri ti Lo.” (aHéb. 6: 10). Ni la, zia ala ke ti duti na bibe so ayeke na lege ni pëpe, na tenengo so ndali ti so ala ga mbakoro awe, Jéhovah alingbi mbeni pëpe ti sara kusala na ala. Ala zia anzoni bibe na place ti abibe so ayeke sara si ala woko. Ala duti na ngia ndali ti aye ti nzoni so ala wara nga ndali ti beku ti ala ti kekereke. E yeke na mbeni “beku” so mara ni ayeke use pëpe, na a yeke Wasarango e la amû na e ni (Jér. 29:11, 12; Kus. 17:31; 1 Tim. 6:19). Ala gbu li na ndo ti beku so, ala sara kue ti ngbâ ti yapu na ti duti na nzoni bibe nga zia ala hinga so aita ti kongregation abâ na nene ni mingi gango ti ala na abungbi.e

16. Ngbanga ti nyen la mbeni ita-koli so aga mbakoro awe abâ so a yeke nzoni lo ngbâ ancien mbeni pëpe? Me na lege wa amba ti lo a-ancien akpengba lo?

¹⁶ Bâ tapande ti Johan, so ayeke na ngu 80 na so amû ngoi ti lo mingi ti bâ lege ti Sannie, wali ti lo so ayeke be-ta-zo na so gere ti lo anze.f Aita-wali nde nde ayeke ga ti duti na Sannie ti mû lege na Johan ti gue na abungbi nga ti sigigi na fango tënë. Ye oko, ade ti ninga pëpe, Johan abâ so ngangu ti lo kue ahunzi awe nga lo to nda ti pensé so a yeke nzoni lo zia ti duti ancien. Na ngoi so ngu ti lê asi yâ ti lê ti lo, lo tene: “Ndani so mbi ngbâ ancien ayeke nyen? Fadeso, mbi sara nzoni ye oko pëpe ti mû maboko na kongregation.” Amba ti lo a-ancien adë bê ti lo so aye so asi na lo ândö nga na ndara so lo yeke na ni ti bâ popo ti aye nzoni ayeke kota ye mingi na lê ti ala. Ala hunda na lo ti ngbâ ti sara kua ti ancien, atâa tongana lo yeke sara aye mingi pëpe. Johan so amba ti lo akpengba lo mingi angbâ lakue ancien, na ye so aga na aye ti nzoni mingi na aita.

Jéhovah ayeke bi bê ti lo biani na ala

17. Wango wa Bible amû ti dë bê ti aChrétien so aga mbakoro awe?

¹⁷ Bible afa polele so ambakoro alingbi ti ngbâ ti maï na lege ti yingo atâa akpale so ala yeke wara. Zo ti sungo psaume atene: “A lu ala na yâ da ti L’Eternel awe . . . Na lâ ti mbakoro ti ala, fade ala lë lengo.” (Ps. 92:14, 15). Bazengele Paul, so peut-être awara lani kpale ti seni, ‘bê ti lo anze pëpe; kamême zo-ti-gigi ti lo ayeke futi’.​—Diko 2 aCorinthien 4:16-18.

18. Ngbanga ti nyen la aChrétien so aga mbakoro awe nga na azo so ayeke bâ lege ti ala ayeke na bezoin ti tene a mû maboko na ala?

¹⁸ Mingi ti aye so ayeke si laso afa so ambakoro alingbi ti ngbâ ti “lë lengo”. Me akpale so kobela nga na gango mbakoro aga na ni alingbi ti sara si bê ti zo awoko, ye so alingbi même ti si na ambakoro so afami ti ala ayeke bâ lege ti ala nzoni. Azo so ayeke bâ lege ti ambakoro alingbi nga ti woko. Aita ti kongregation ayeke na pasa ti fa ndoye ti ala na mbage ti ambakoro nga na azo so ayeke bâ lege ti ala, nga a yeke ye so a ku na mbage ti ala ti sara ni (aGal. 6:10). Mara ti mungo maboko tongaso afa so e yeke tene pëpe gi na yanga na aita so ti gue nga ti ‘duti na tere ti wâ; ti te kobe, na yâ ti ala asi’ sân ti gi biani ti mû na ala aye so ala yeke na bezoin ni.​—Jacq. 2:15-17, Fini Mbuki, 2001.

19. Ngbanga ti nyen aChrétien so ayeke mbakoro na so ayeke be-ta-zo alingbi ti duti na nzoni bibe na ndo ti kekereke?

¹⁹ Tongana ngu ti mbeni Chrétien ayeke gue na li ni, lo lingbi pëpe ti sara kua ti Jéhovah mingi tongana ti kozo, me ye so ayeke sara pëpe si ndoye ti Jéhovah na mbage ti lo akiri na peko. Jéhovah abâ aChrétien kue so ayeke mbakoro na so ayeke be-ta-zo na nene ni mingi nga lo yeke zia ande ala lâ oko pëpe (Ps. 37:28; Es. 46:4). Jéhovah ayeke ngbâ ande ti mû maboko na ala nga ti fa lege na ala na lâ ti mbakoro ti ala.​—Ps. 48:15.

[Akete tënë na gbe ni]

Mo yeke kiri tënë tongana nyen?

• Ngbanga ti nyen la mo bâ aChrétien so ayeke mbakoro na so ayeke be-ta-zo na nene ni mingi?

• Tongana nyen e lingbi ti fa so e ye mingi aita ti e so aga mbakoro awe?

• Nyen la alingbi ti mû maboko na awakua ti Jéhovah so aga mbakoro awe ti duti na nzoni bibe?

[Afoto na lembeti 23]

Aita ti kongregation ane ambakoro mingi