Kusala ti Marie na yâ ti ye so Nzapa aleke ti sara

NA NGOI ti kusala ti Jésus na sese, mbeni wali asara tënë na kota go na popo ti gbâ ti azo so abungbi, lo tene: “Ngia ayeke na yâ so lani ayô mo nga na me so mo nyon!” Tongana Jésus aye fade ti tene azo avoro mama ti lo, ka lo lingbi ti gbu ngoi ni so ti hunda na ala ti sara ni. Me lo tene na wali ni: “Ên-ën. Ngia ayeke na ala so amä tënë ti Nzapa na abata ni!”​—Luc 11:27, 28.

Jésus ane mama ti lo ahon ndo ni pëpe; nga, lo hunda lâ oko pëpe na adisciple ti lo ti sara tongaso. Ye so abâ vorongo so azo mingi so atene ala yeke awamabe ayeke voro na Marie so tongana nyen? Zia e bâ ye so Bible atene na ndo ti afango ye so amû ndo na ndo ti mama ti Jésus.

‘Grâce asi mo,’ ‘a iri tënë nzoni na ndo ti mo na popo ti awali’

Ange Gabriel afa na Marie kusala ti lo na yâ ti ye so Nzapa aleke ti sara. Na ngoi ni so, lo tene na Marie: “Bara mo, mo so Nzapa abâ mo tâ na nzoni lê mingi. Jéhovah ayeke na mo.” (Luc 1:28). Mbeni Bible akiri na peko ti tënë ti bara so, atene: ‘Bara mo, Marie, grâce asi mo, Gbia ayeke na mo.’ Ngoi kete na pekoni, Élisabeth abara Marie, lo tene: “Nzapa airi tënë nzoni na ndo ti mo na popo ti awali, na lo iri tënë nzoni na ndo ti molenge so ayeke na yâ ti mo!” (Luc 1:42). Atënë so aye ti fa so a lingbi a voro Marie?

Ti tâ tënë ni, a yeke tongaso pëpe. Atâa so a zia atënë so na yâ ti atënë ti sambela so aCatholique ayeke tene na Marie, Bible afa pëpe mbeni nda ti tënë so amû lege na azo ti sambela Marie. Gabriel na Élisabeth abâ na nene ni kota pasa so Marie ayeke na ni ti dü zo so ayeke ga ande Messie, me Bible afa oko pëpe so a lingbi a sambela Marie. Ahon ti sara tongaso, na ngoi so adisciple ti Jésus ahunda na lo ti fa na ala tongana nyen ti sambela, lo fa na ala so a lingbi ala sambela Babâ ti lo. Lo fa ni na lege ti tapande ti sambela so lo fa na adisciple ti lo, so ato nda ni na atënë so: ‘Babâ ti e so mo yeke na yayu.’​—Matthieu 6:9.

Lo yeke oko ti agbia

Mbeni fango ye so amû ndo na ndo ti Marie ayeke so a tene so lo yeke fadeso “Gbia-wali ti yayu.” Bible atene lâ oko pëpe so Marie ayeke Gbia-wali ti yayu. Ye oko, Bible atene so lo yeke sara mbeni kpengba kusala na yâ ti ngorogbia ti yayu. Kusala ti nyen?

Jésus atene so fade ambeni disciple ti lo so ayeke be-ta-zo ayeke komande legeoko na lo na yâ ti Royaume ti lo (Luc 22:28-30). Jésus ayeke mû ande na ala so a soro ala ngangu ti sara kua tongana “aprêtre ti Nzapa ti e, na ala yeke komande tongana agbia na ndo ti sese.” (Apocalypse 5:10). Bible asara si e hinga polele so Marie ayeke na popo ti adisciple so a mû na ala apendere kusala so. Ngbanga ti nyen e tene tongaso?

Peut-être mo dabe ti mo so na peko ti kuâ ti Jésus, Marie “angbâ gi ti sambela”, lo na adisciple ti Jésus nga na aita ti Jésus. Na popo ti adisciple 120 tongaso so abungbi ti sambela, a yeke wara “ambeni wali”. (Kusala 1:12-15). Bible atene so na ngoi so “matanga ti Pentecôte ni angbâ ti gue, ala kue abungbi ndo oko”, a tuku yingo vulu ti Nzapa na ndo ti ala na asara si ala sara tënë na ayanga ti kodoro so ala hinga ni kozo pëpe.​—Kusala 2:1-4.

So Marie nga na ambeni wali ayeke na popo ti azo so a tuku yingo vulu ti Nzapa na ndo ti ala afa so a soro lo nga na awali so ti komande na yâ ti Royaume ti Jésus na yayu. Ni la, e yeke na anda ti tënë kue ti tene so Marie ayeke duti fadeso na tere ti Jésus na yâ ti gloire ti yayu (aRomain 8:14-17). Bâ ambeni pendere kusala so Marie nga na ambeni zo so ayeke komande legeoko na Jésus ayeke sara ande na yâ ti aye so Nzapa aleke ti sara.

Lo yeke oko ti ala so asara si azo awara aye ti nzoni mingi

Mbeti ti Apocalypse atene so a yeke zingo azo 144 000 ti wara gloire na tere ti Jésus na yayu tongana aprêtre, ajuge nga na agbia (Apocalypse 14:1, 4; 20:4, 6). Teti so ala yeke aprêtre, ala yeke sara ande si azo so amä yanga awara aye ti nzoni na lege ti sandaga so Jésus amû. Ala yeke sara ande si azo akiri alingbi kue na lege ti yingo, na lege ti asarango ye ti ala nga tere ti ala aga nzoni kue (Apocalypse 21:1-4). So tâ anzoni ye si ayeke ku awakua ti Jéhovah so ayeke be-ta-zo!a

Marie asara lani mbeni kpengba kusala na yâ ti aye so Jéhovah aleke ti sara na lo ngbâ lakue ti sara tongaso. Teti so lo yeke na tâ be-ti-molenge, lo yeke na mabe, lo mä yanga nga lo yeke lani nzoni mama nga mingi ahon ti duti nzoni mama, lo gbu ngangu na gbe ti atara, lo lingbi biani ti tene e mû tapande ti lo. Marie alingbi ti tene a ne lo mingi ndali ti so lo dü Messie nga lo yeke na popo ti azo so ayeke sara si azo awara aye ti nzoni teti lakue lakue.

Ye oko, tâ kpengba ye so e manda na lege ti tapande ti Marie ayeke so lo na tanga ti awakua ti Jéhovah kue so ayeke be-ta-zo ayeke voro gi Jéhovah me mbeni nzapa nde pëpe. Marie nga na tanga ti azo so ayeke komande na tere ti Christ na yayu ayä go ti ala, ala tene: “Zia a iri tënë nzoni, a mû gonda, gloire na ngangu na Lo so aduti na ndo ti trône [Jéhovah Nzapa] nga na Molenge ti ngasangbaga ni [Jésus Christ] teti lakue lakue nga kpu na kpu.”​—Apocalypse 5:13; 19:10.

[Kete tënë na gbe ni]

[Kete tënë na lembeti 4]

A yeke nzoni e mû tapande ti Marie so ayeke na tâ be-ti-molenge, lo yeke na mabe nga lo mä yanga