Mo yeke “wabatango ye ti kota nzobe ti Nzapa”?
“Na yâ ti yengo tere ti aita, zia ala duti na tâ yengo tere na popo ti ala. Na ndo ti tënë ti nengo mba na popo ti ala, zia ala duti azo so amû li ni kozo ti sara ni.”—AROM. 12:10.
FANI mingi, Bible adë bê ti e so Jéhovah ayeke mû ande maboko na e tongana bê ti e anze wala e yeke na vundu. Na tapande, bâ atënë ti dengo bê so: “L’Éternel abata azo so ayeke tï, na Lo yä na nduzu ala kue so tere ti ala aba.” “Azo so bê ti ala afâ awe, Lo sara si ala ga nzoni, na Lo kanga kä ti ala.” (Ps. 145:14; 147:3). Na ndo ni, Babâ ti e ti yayu lo wani atene: “Mbi, L’Éternel Nzapa ti mo, Mbi gbu maboko ti mo ti koti. Mbi tene na mo, Zia mbeto; fade Mbi sara na mo.”—Es. 41:13.
2 Me, na lege wa Jéhovah, so ayeke kâ na yayu na so e bâ lo pëpe, ‘agbu maboko’ ti e? Na lege wa “Lo yä na nduzu ala kue so tere ti ala aba” ndali ti so ala yeke na vundu? Jéhovah Nzapa ayeke mû na e maboko so na alege nde nde. Na tapande, na lege ti yingo vulu ti Nzapa, lo yeke mû na awakua ti lo “ngangu so ahon ti so zo ayeke na ni”. (2 aCor. 4:7; Jean 14:16, 17). Awakua ti Jéhovah ayeke bâ nga tongana nyen lo yeke kpengba ala na lege ti atënë ti lo so ayeke na yâ ti Mbeti ti Nzapa, Bible (aHéb. 4:12). Mbeni lege nde ayeke dä so Jéhovah ayeke kpengba na e? E yeke wara kiringo tënë ni na yâ ti kozo mbeti ti Pierre.
“Kota nzobe ti Nzapa so lo yeke sara ni na alege nde nde”
3 Na sarango tënë na aChrétien so a soro ala ti gue na yayu, bazengele Pierre atene so ala yeke na nzoni nda ti tënë ti duti na ngia ndali ti so mbeni nzoni futa ayeke ku ala. Na pekoni, lo tene: “Atâa so teti kete ngoi fadeso, a lingbi atara nde nde azia vundu na bê ti ala.” (1 Pi. 1:1-6). Bâ so lo sara kusala na tënë “nde nde”. Tënë so aye ti fa so atara ayeke nde nde. Ye oko, Pierre aluti gi ge pëpe, lo zia pëpe si aita ti lo ahunda tere ti ala ti bâ wala ala lingbi ti gbu ngangu na yâ ti atara nde nde so. Me Pierre atene so aChrétien alingbi ti hinga biani so Jéhovah ayeke mû ande maboko na ala ti gbu ngangu na gbe ti atara oko oko kue so ala wara, atâa tara ni ayeke tongana nyen. A yeke wara tënë ti dengo bê so na yâ ti ndangba mbage ti kozo mbeti ti Pierre. Na yâ ti mbage so, bazengele ni asara tënë ti aye so andu “nda ti aye kue”.—1 Pi. 4:7.
4 Pierre atene: “So zo oko oko awara mbeni matabisi, ala mû ni ala sara na kua na amba ti ala tongana anzoni wabatango ye ti kota nzobe ti Nzapa so lo yeke sara ni na alege nde nde.” (1 Pi. 4:10). Pierre akiri asara kusala na tënë “nde nde.” A yeke tongana ti so lo tene: ‘Atara ayeke ga na alege nde nde, me Nzapa ayeke fa kota nzobe ti lo nga na alege nde nde.’ Ngbanga ti nyen tënë so ayeke dë bê ti zo? Tënë so aye ti fa so atâa tara ni ayeke so wa, Nzapa ayeke fa lakue kota nzobe ti lo na e na mbeni lege so ayeke mû maboko na e ti gbu ngangu na yâ ti tara ni. Ye oko, mo bâ na yâ ti tënë ti Pierre so lege so Jéhovah ayeke fa kota nzobe ti lo na mbage ti e? Lo yeke fa ni na lege ti amba ti e aChrétien.
“Ala sara na kua na amba ti ala”
5 Na sarango tënë na aita kue ti congrégation ti aChrétien, Pierre atene: “Kota ye ni kue ayeke ti tene ala ndoye tere ngangu na popo ti ala.” Na pekoni, lo kiri lo tene: “So zo oko oko awara mbeni matabisi, ala mû ni ala sara na kua na amba ti ala.” (1 Pi. 4:8, 10). Tongaso, a lingbi aita oko oko kue ti congrégation agi ti kpengba amba ti ala. A mû na e mbeni ye so ngere ni ayeke ngangu, so ayeke ti Jéhovah, na a hunda na e ti kangbi ni na amba ti e. Me, ye wa la a mû na e ni? Pierre atene a yeke “mbeni matabisi”. Matabisi wa? Na lege wa e yeke ‘mû ni ti sara na kua na amba ti e’?
6 Mbeti ti Nzapa atene: “Nzoni matabisi kue nga na matabisi so alingbi kue alondo na nduzu si azu.” (Jacq. 1:17). Ti tâ tënë ni, amatabisi kue so Jéhovah amû na awakua ti lo afa na gigi kota nzobe ti lo. Mbeni kota matabisi so Jéhovah amû na e ayeke yingo vulu. Matabisi so amû maboko na e ti gi ti duti na asarango ye ti Nzapa tongana ndoye, bê so aye gi ti sara nzoni na zo nga na sarango ye na ngangu pëpe. Asarango ye so ayeke pusu e na pekoni ti fa na amba ti e so e ye ala na bê ti e oko nga ti mû maboko na ala. Tâ ndara na tâ hingango ye ayeke nga na popo ti anzoni matabisi so e yeke wara ni grâce na yingo vulu (1 aCor. 2:10-16; aGal. 5:22, 23). Biani, a lingbi ti bâ ngangu kue so e yeke na ni nga na akode ti e kue tongana amatabisi so e lingbi ti mû ti gonda na ti ne na Babâ ti e ti yayu. Nzapa aku na mbage ti e ti mû akode ti e nga na asarango ye ti e ti fa kota nzobe ti Nzapa na mbage ti amba ti e aChrétien.
Na lege wa e yeke ‘mû ni ti sara na kua’?
7 Pierre atene nga na ndo ti amatabisi so e wara, lo tene: “So zo oko oko awara mbeni matabisi, ala mû ni ala sara na kua.” Atënë so afa so a mû na e oko oko mbeni “matabisi”, wala asarango ye nga na akode. Asarango ye nga na akode so e wara ayeke nde nde, nga asarango ye na akode so mbeni Chrétien ayeke na ni alingbi tere na ti mba ti lo pëpe. Atâa so kue, a hunda na ita oko oko kue ti ‘mû ni [so ti tene, matabisi so lo wara] ti sara na kua na amba ti lo’. Na ndo ni, tënë ‘mû ni ti sara na kua tongana anzoni wabatango ye’ ayeke mbeni yanga so a mû. Ni la, a yeke nzoni e hunda tere ti e: ‘Mbi yeke sara kua biani na amatabisi so a mû na mbi ti kpengba amba ti mbi aChrétien?’ (Bâ 1 Timothée 5:9, 10.) ‘Wala mingi ni, mbi yeke mû akode so Jéhovah amû na mbi ti gi na aye teti nzoni ti mbi wani: peut-être ti wara mosoro wala kota ndo?’ (1 aCor. 4:7). Tongana e mû amatabisi ti e ti ‘sara na kua na amba ti e’, e yeke nzere na lê ti Jéhovah.—aProv. 19:17; diko aHébreu 13:16.
8 Mbeti ti Nzapa afa alege nde nde so akozo Chrétien asara na amba ti ala. (Diko aRomain 15:25, 26; 2 Timothée 1:16-18.) Laso nga, atâ Chrétien ayeda na bê ti ala kue ti sara ye alingbi na yanga so a mû na ala ti mû amatabisi so ala wara ti sara na amba ti ala. Zia e bâ ambeni lege so ala yeke sara ni.
9 Aita-koli mingi ayeke mû angbonga mingi nze oko oko ti leke adevoir ti ala. Na ngoi so ala yeke fa na bungbi aye so ala wara na ngoi so ala yeke leke ni, atënë ti ndara so ala yeke fa ayeke pusu aita kue ti congrégation ti gbu ngangu (1 Tim. 5:17). A hinga aita-koli nga na aita-wali mingi na ndoye so ala yeke na ni na mbage ti amba ti ala nga ala yeke bâ mawa ti ala (aRom. 12:15). Ambeni ita ayeke gue lakue ti bâ amba ti ala so ayeke lakue na vundu nga ti sambela na ala (1 aThes. 5:14). Ambeni ita ayeke sû na yâ ti lettre na amba ti ala atënë so ayeke kpengba ala na yâ ti tara so ala yeke dä. Ti ambeni ita, na nzoni bê ala mû maboko na amba ti ala so ayeke na kpale ti seni ti tene ala gue na abungbi. A-Témoin ti Jéhovah saki mingi ayeke mû mbage na yâ ti kua ti mungo maboko na aita so agirisa aye ti ala; ala yeke leke ada so aye tongana kota pupu wala kota ngu-nzapa abuba ni. Kota ndoye so aita-koli nga na aita-wali so ayeke fa na amba ti ala nga na maboko so ala mû na ala afa na gigi “kota nzobe ti Nzapa so lo yeke sara ni na alege nde nde.”—Diko 1 Pierre 4:11.
So wa la ayeke kota mingi?
10 A mû na awakua ti Jéhovah matabisi ti tene ala sara na amba ti ala nga a mû na ala mbeni tënë ti tene ala fa na azo. Na yâ ti kusala ti Jéhovah so bazengele Paul ayeke sara, lo yeda so a hunda na lo ti sara akusala use so. Lo tokua mbeti na congrégation ti Éphèse na ndo ti ‘bango lege ti kota nzobe ti Nzapa’ so a mû na lo ndali ti nzoni ti ala (aÉph. 3:2). Ye oko, lo tene nga: “Nzapa abâ so e lingbi awe ti tene lo zia nzoni tënë ni na maboko ti e ti bata.” (1 aThes. 2:4). Legeoko tongana ti Paul, e nga kue e yeda so a hunda na e ti fa tënë ti Royaume ti Nzapa. Na lege ti fango tënë so e yeke sara na bê ti e kue, e yeke sara ngangu ti mû tapande ti Paul so lani afa lakue nzoni tënë ti Royaume na lo woko dä pëpe (Kus. 20:20, 21; 1 aCor. 11:1). E hinga so fango tënë ti Royaume alingbi ti sö fini ti azo. Ye oko, na oko ngoi ni, e yeke sara ngangu ti mû tapande ti Paul na lege so e yeke gi ti ‘mû mbeni matabisi ti yingo’ na amba ti e aChrétien.—Diko aRomain 1:11, 12; 10:13-15.
11 Na popo ti akua use so, so wa la ayeke kota mingi? Ti hunda mara ti tënë tongaso ayeke tongana ti so e hunda tënë so na ndo ti ndeke: Na popo ti akpangbi ti lo use, ti so wa la lo yeke na bezoin ni mingi? Kiringo tënë ni ayeke polele. Ndeke ayeke na bezoin ti akpangbi ti lo use kue ti tene lo huru nzoni. Legeoko nga, ti sara ye kue so Nzapa ahunda na e aChrétien, e yeke na bezoin ti sara akua use so kue. Ni la, ahon ti bâ kua so a mû na e ti fa nzoni tënë nga na kua so a mû na e ti kpengba aita ti e tongana akua so ayeke nde nde, e yeke bâ akua use so kue tongana ti so bazengele Pierre nga na bazengele Paul abâ ni lani: ala bâ ni tongana akua so ague tâ gi oko. Na lege wa akua so ague tâ gi oko?
12 Teti so e yeke awafango tënë, e yeke mû akode ti fango ye kue so e yeke na ni ti gi ti ndu bê ti azo na tënë ti Royaume ti Nzapa so ayeke sara si zo ayapu. Na sarango tongaso, e ye ti mû maboko na ala ti ga adisciple ti Christ. Ye oko, e yeke mû nga akode ti e nga na amatabisi so e yeke na ni ti gi ti kpengba amba ti e aChrétien na lege ti atënë so ayeke yapu zo nga ti sara akua so ayeke mû maboko na ala, na aye so afa na gigi kota nzobe ti Nzapa (aProv. 3:27; 12:25). Aye so afa so e ye ti mû maboko na ala ti ngbâ lakue adisciple ti Christ. E yeke na kota pasa ti tene Jéhovah asara kusala na e na yâ ti akua use so, fango tënë na azo nga ‘sarango na amba ti e’.—aGal. 6:10.
“Zia ala duti na tâ yengo tere na popo ti ala”
13 Paul awa amba ti lo aChrétien, lo tene: “Na yâ ti yengo tere ti aita, zia ala duti na tâ yengo tere na popo ti ala. Na ndo ti tënë ti nengo mba na popo ti ala, zia ala duti azo so amû li ni kozo ti sara ni.” (aRom. 12:10). Biani, ti ye aita ti e ayeke pusu e ti tene na bê ti e kue e sara na ala tongana awabatango kota nzobe ti Nzapa. E hinga so tongana Satan akanga lege na e ti ‘sara na amba ti e’, andâ lo sara si e duti beoko pëpe tongana ti kozo (aCol. 3:14). Na pekoni, tongana e duti beoko mbeni pëpe, a yeke sara si e fa tënë gi tongaso. Satan ahinga so lo yeke gi na bezoin ti kanga lege na e ti sara mbeni kusala ti e oko, na tongaso e yeke sara tanga ti kua ni nzoni pëpe.
14 ‘Sarango na amba ti e’ ayeke ga na ye ti nzoni na azo so awara kota nzobe ti Nzapa nga na azo so afa kota nzobe ni (aProv. 11:25). Bâ tapande ti Ryan na wali ti lo Roni, so ayeke na kodoro ti Illinois na Amerika. Na ngoi so ala mä tënë ti Katrina, kota pupu so aga na ngu si abuba ada ti aTémoin ti Jéhovah ngbangbo mingi, ndoye ti ala na mbage ti aita apusu ala ti zia kua ti nginza ti ala nga na da ti ala, ala vo mbeni kete da so kutukutu agboto ni, na ala gue na kodoro ti Louisiane so ayeke na kilomètre 1 400. Kâ, ala sara ngu oko tongaso, nga ala mû ngoi ti ala, ngangu ti ala nga na aye ti ala ti mû maboko na aita ti ala. Ryan so ayeke na ngu 29 atene: “Sarango kua ti mungo maboko na aita so aye ti ala abuba asara si mbi ga nduru mingi na Nzapa. Mbi bâ tongana nyen Jéhovah ayeke bâ lege ti awakua ti lo.” Ryan akiri atene: “Ti sara kua na tere ti aita so ngu ti ala ahon ti mbi asara si mbi manda ye mingi na ndo ti bango lege ti aita nzoni. Mbi bâ nga so akua ayeke mingi ti tene e amaseka e sara na yâ ti bungbi ti Jéhovah.” Roni, so ayeke na ngu 25 atene: “Mbi kiri singila mingi ndali ti so mbi mû maboko na aita. Ade mbi wara mara ti ngia tongaso lâ oko pëpe. Mbi hinga so na yâ ti angu so ayeke ga, mbi yeke ngbâ ande ti wara aye ti nzoni na lege ti apendere ye so mbi manda lani.”
15 Biani, ti yeda na yanga so Nzapa amû ti fa nzoni tënë ti Royaume nga ti kpengba aita ti e ayeke ga na aye ti nzoni na azo kue. Tongana e mû maboko na aita ti e, a yeke sara si ala kpengba na lege ti yingo. A yeke sara nga si e wara mbeni ngia so gi mungo ye na zo la alingbi ti ga na ni (Kus. 20:35). Tongana e oko oko kue e yeke bi bê ti e na amba ti e, a yeke sara si aita kue ti congrégation aye tere mingi ahon ti kozo. Na ndo ni, ndoye so e yeke na ni na mbage ti amba ti e afa polele so e yeke atâ Chrétien. Jésus atene: “A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.” (Jean 13:35). Ahon ye kue, gonda ni ayeke gue gi na Jéhovah, Babâ ti e so ayeke bâ lege ti e nzoni, ndali ti so a yeke bâ nzara so lo yeke na ni ti kpengba azo so ayeke na bezoin ni na lege ti awakua ti lo so ayeke na sese ge. Tongaso, e yeke tâ na anzoni nda ti tënë ti mû amatabisi so e yeke na ni ti ‘sara na kua na amba ti e tongana anzoni wabatango ye ti kota nzobe ti Nzapa’. Mo yeke ngbâ ande ti sara tongaso?—Diko aHébreu 6:10.
Mo dabe ti mo na ni?
• Jéhovah ayeke kpengba awakua ti lo na alege wa?
• A mû na e nyen?
• Ambeni lege so e lingbi ti sara na aita ti e ayeke so wa?
• Nyen la ayeke pusu ande e ti ngbâ ti mû matabisi so e yeke na ni ti ‘sara na kua na amba ti e’?
[Ahundango tënë ti manda na ye]
1. Atënë ti dengo bê wa e yeke wara na yâ ti Bible?
2. Na alege wa Jéhovah ayeke mû maboko na awakua ti lo?
3. (a) Bazengele Pierre atene nyen na ndo ti atara? (b) Ndangba mbage ti kozo mbeti ti Pierre asara tënë na ndo ti nyen?
4. Ngbanga ti nyen atënë ti 1 Pierre 4:10 ayeke dë bê ti e?
5. (a) A lingbi Chrétien oko oko asara nyen? (b) Ahundango tënë wa abâ gigi?
6. Ambeni matabisi so a mû na aChrétien ayeke so wa?
7. (a) Kozo mbeti ti Pierre 4:10 atene nyen na ndo ti “matabisi” so e wara? (b) A yeke nzoni e hunda tere ti e na atënë wa? Ngbanga ti nyen?
8, 9. (a) Ambeni lege so na ndo ti sese kue aChrétien ayeke sara na amba ti ala ayeke so wa? (b) Tongana nyen aita-koli nga na aita-wali ti congrégation ti mo ayeke sara na amba ti ala?
10. (a) Paul ayeke bi bê ti lo lani na ndo ti kusala use wa so lo yeke sara na Nzapa? (b) Laso, e yeke mû tapande ti Paul tongana nyen?
11. A lingbi e bâ kua so a mû na e ti fa tënë nga ti kpengba amba ti e tongana nyen?
12. Na lege wa Jéhovah ayeke sara kua na e?
13. Nyen la ayeke si tongana e ‘sara na amba ti e’ pëpe?
14. Azo wa ayeke wara ye ti nzoni na lege ti ‘sarango na amba ti ala’? Mû mbeni tapande.
15. Anzoni nda ti tënë wa e yeke na ni ti ngbâ ti sara na amba ti e tongana awabatango ye ti kota nzobe ti Nzapa?
[Foto na lembeti 17]
Mo yeke mû “matabisi” so mo yeke na ni ti sara na amba ti mo wala ti sara na mo wani?
[Foto na lembeti 19]
E yeke fa nzoni tënë na azo nga e yeke mû maboko na amba ti e aChrétien
[Foto na lembeti 20]
Aita so ayeke zia aye ti ala ti mû maboko na aita so aye ti ala abuba alingbi na gonda