Nzapa ayeke na iri?

Aye so azo mingi ayeke tene:

▪ “Iri ti lo ayeke Seigneur.”

▪ “Lo yeke na airi mingi.”

Jésus atene ti lo nyen?

▪ “A lingbi ala sambela tongaso: ‘Babâ ti e so mo yeke na yayu, zia a sara si iri ti mo aga nzoni-kue.’ ” (Matthieu 6:9). Jésus ahinga biani so Nzapa ayeke na iri.

▪ “Mbi sara si ala hinga iri ti mo na fade mbi yeke sara si a hinga ni, tongaso si ndoye so mo ndoye na mbi aduti na popo ti ala nga mbi duti beoko na ala.” (Jean 17:26). Jésus asara si azo ahinga iri ti Nzapa.

▪ “Ala yeke bâ mbi oko pëpe juska ala tene: ‘Tënë nzoni ayeke na ndo ti lo so aga na iri ti Jéhovah!’ ” (Luc 13:35; Psaume 118:26). Jésus adi iri ti Nzapa.

NZAPA lo wani afa iri ti lo na e. Bible atene so Nzapa atene: ‘Iri ti mbi ayeke Yahvé.’a (Ésaïe 42:8, Tene ti Nzapa, Kozo Mbouki). A hinga iri ti Nzapa so ge, so lo wani lo fa ni na yanga ti Hébreu, na iri Jéhovah na yanga ti Sango. Bê ti mo alingbi ti dö ti bâ so iri so, so alingbi gi na lo oko, asigigi saki mingi na yâ ti angbene copie ti Mbeti ti Nzapa. Ti tâ tënë ni, iri so asigigi fani mingi na yâ ti Bible ahon tanga ti airi kue so ayeke dä.

Tongana a hunda ambeni zo, a tene: “Iri ti Nzapa ayeke zo wa?”, ala yeke kiri tënë: “Seigneur.” Ti tâ tënë ni, so ayeke tâ kiringo tënë ni pëpe. A yeke tongana ti so a hunda mbeni zo, a tene: “Zo wa la a soro lo ti ga gbia?”, na zo ni akiri tënë, lo tene: “Lo so azia iri ti lo ti ga gbia.” Kiringo tënë ni ayeke polele pëpe ndali ti so “Seigneur” na “lo so azia iri ti lo ti ga gbia” ayeke atâ iri ti zo pëpe.

Ngbanga ti nyen Nzapa afa iri ti lo na e? Ngbanga ti so lo ye ti mû maboko na e ti hinga lo nzoni. Zia e mû mbeni tapande: A lingbi ti iri mbeni zo Kota zo, Patron, Papa wala Âta, alingbi na dutingo ti lo. Airi so afa mbeni ye na ndo ti zo ni. Me tâ iri ti zo ni adabe ti e na ye kue so andu zo ni. Legeoko nga, airi tongana Seigneur, Lo ti Ngangu Ahon Kue, Babâ nga Wasarango ye agboto lê na ndo ti akusala nde nde so Nzapa ayeke sara. Me, gi tâ iri ti lo, Jéhovah, si adabe ti e na ndo ti aye kue so andu lo. Tongana mo hinga iri ti Nzapa pëpe, mo lingbi ti hinga lo biani tongana nyen?

A yeke kota ye ti tene e hinga iri ti Nzapa na e di iri so. Ndali ti nyen? Ndali ti so Bible atene na e, atene: “Fade a yeke sö zo kue so airi ndo na Jéhovah na iri ti lo.”​—aRomain 10:13; Joël 2:32.

[Akete tënë na gbe ni]

[Kete tënë na lembeti 6]

A lingbi ti iri mbeni zo Kota zo, Patron, Papa wala Âta, alingbi na dutingo ti lo. Me tâ iri ti zo ni adabe ti e na ye kue so andu zo ni