Nzapa ayeke bi bê ti lo na mbi nga la?

Aye so azo mingi ayeke tene:

▪ “Nzapa ayeke bi bê ti lo na ndo ti akpale ti senge zo tongana mbi so pëpe.”

▪ “Mbi pensé so lo yeke bi bê ti lo na ndo ti mbi pëpe.”

Jésus atene ti lo nyen?

▪ “A yeke kä anzêrë oku na alê ti pata use senge, ni la pëpe? Atâa so kue, Nzapa agirisa mbeni oko na popo ti ala pëpe. Me ti ala, a diko même kuä ti li ti ala kue awe. Tongaso, ala sara mbeto pëpe: ngere ti ala ahon ngere ti gbâ ti anzêrë.” (Luc 12:6, 7). Kite ayeke dä pëpe so Jésus afa na azo so Nzapa ayeke bi bê na ala.

▪ “Ala gi bê ti ala lâ oko pëpe, ti tene: ‘E yeke te ande nyen?’ wala ‘E yeke nyon ande nyen?’ wala ‘E yeke yü ande nyen?’ Aye so kue, a yeke aye so amara ayeke gi ni gingo na bê ti ala kue. Me Babâ ti ala so ayeke na yayu ahinga so ala yeke na bezoin ti aye so kue.” (Matthieu 6:31, 32). Jésus ahinga na bê ti lo kue so Nzapa ahinga aye so e yeke na bezoin ni.

BIBLE afa polele so Nzapa ayeke bi bê ti lo na e (Psaume 55:23; 1 Pierre 5:7). Tongana a yeke tongaso, ngbanga ti nyen e yeke bâ pasi mingi laso? Tongana Nzapa ayeke na ndoye nga lo yeke na ngangu so ahon atanga ni kue, ngbanga ti nyen lo sara mbeni ye pëpe ti tene pasi kue ahunzi?

Kiringo tënë ni andu mbeni ye so azo mingi ahinga ni pëpe: Satan Zabolo la ayeke komande sioni dunia so. Na ngoi so Satan atara lani Jésus lo ye ti mû na lo aroyaume kue ti dunia, lo tene: “Fade mbi yeke mû na mo komandema so kue nga na gloire ni, ngbanga ti so a mû ni na mbi awe, na mbi yeke mû ni na zo so bê ti mbi aye.”​—Luc 4:5-7.

Azo wa la asara si Satan akomande dunia? Na ngoi so kozo babâ na mama ti e, Adam na Ève, amä yanga ti Satan na ala ke commandement ti Nzapa, ala soro Satan ti komande na ndo ti ala. Ngbene ye na ngoi ti kengo yanga so, Jéhovah Nzapa akanga bê ti lo na lo zia ngoi ahon ti tene a bâ so komandema ti Satan ayeke ga na ye ti nzoni oko pëpe na zo. Jéhovah agbu azo na ngangu pëpe ti sara na lo, me lo zi lege na e ti kiri na mbage ti lo.​—aRomain 5:10.

Teti so Nzapa ayeke bi bê ti lo na e, lo leke mbeni ye ti sara si Jésus azi e na gbe ti komandema ti Satan. Na yâ ti ngoi kete, Jésus ayeke “neka lo so ayeke na ngangu ti ga na kuâ, so ti tene Zabolo”. (aHébreu 2:14). Na sarango tongaso, lo yeke “futi akusala ti Zabolo.”​—1 Jean 3:8.

A yeke sara ande si sese akiri aga paradis. Na ngoi ni so, Nzapa ayeke “mbô ngu ti lê kue na lê ti [azo], kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”​—Apocalypse 21:4, 5.a

[Kete tënë na gbe ni]

[Kete tënë na lembeti 8]

A yeke sara si sese akiri aga paradis