Tënë ti Jéhovah ayeke na fini

Akota tënë ti mbeti ti Apocalypse: Use mbage ni

NYEN la ayeke ku azo so ayeke voro Jéhovah Nzapa na ala so ayeke voro lo pëpe? Nyen la ayeke ku Satan na adémon ti lo? Aye ti nzoni wa azo so amä yanga ayeke wara ande na ngoi ti Komandema ti Ngu Saki Oko ti Christ? A yeke wara akiringo tënë ni nga na ti ambeni nde na Apocalypse 13:1–22:21.a Na yâ ti achapitre so, a yeke wara atanga ti asuma 9 ti asuma 16 so a fa na bazengele Jean nduru na ngu 100.

Jean atene: “Ngia ayeke na zo so adiko atënë ti prophétie so na kota go, ala so amä ni nga so asara ye alingbi na aye so a sû na yâ ni.” (Apoc. 1:3; 22:7). Tongana e diko aye so ayeke na yâ ti mbeti ti Apocalypse na e sara ye alingbi na ni, a yeke sara ye na ndo ti bibe so apusu e ti sara na Nzapa, a yeke kpengba mabe ti e na Nzapa nga na Molenge ti lo Jésus Christ nga a yeke sara si e duti na kpengba beku teti kekereke.b​—aHéb. 4:12.

A TUKU ADÛ TI SEMBE MBASAMBALA TI NGONZO TI NZAPA

(Apoc. 13:1–16:21)

Apocalypse 11:18 atene: “Amara asara kota ngonzo na ngonzo ti [Nzapa] asi awe, na ngoi so a fa awe . . . ti buba azo so ayeke buba sese.” Ti fa ndani so ngonzo ti Nzapa aga, suma miombe ni afa kusala ti ‘mbeni nyama ti ngonda so ayeke na adidi bale-oko na ali mbasambala’.​—Apoc. 13:1.

Na yâ ti suma gumbaya ni, Jean abâ “Molenge ti ngasangbaga ayeke luti na ndo ti Hoto ti Sion,” lo na “azo saki ngbangbo oko na saki bale-osio na saki osio na tere ti lo”. “A vo lani azo so na popo ti azo ti sese”. (Apoc. 14:1, 4). Na pekoni, a-ange afa ambeni tënë. Na yâ ti suma so aga na pekoni, Jean abâ “a-ange mbasambala so ayeke na asioni ye mbasambala.” A yeke polele so Jéhovah lo wani amû yanga ti tene a-ange so atuku “adû ti sembe mbasambala ti ngonzo ti Nzapa” na ndo ti aye nde nde ti dunia ti Satan. Na yâ ti adû ti asembe ni, a yeke wara atënë ti fango ngbanga ti Nzapa nga tënë ti sarango ye alingbi na ngbanga so lo fâ (Apoc. 15:1; 16:1). Asuma use so afa anzene nzene tënë na ndo ti ambeni tënë ti fango ngbanga so andu Royaume so ague oko na ota ye ti mawa ni nga na hurungo trompette mbasambala ni.​—Apoc. 11:14, 15.

Akiringo tënë na atënë na ndo ti Bible:

13:8​—“Mbeti ti fini so ayeke ti Molenge ti ngasangbaga” ayeke nyen? A yeke mbeni mbeti na lege ti fä so na yâ ni a yeke wara gi iri ti azo so ayeke komande legeoko na Jésus Christ na yâ ti Royaume ti yayu. A yeke wara nga na yâ ni iri ti aChrétien so a soro ala ti gue na yayu me so angbâ na sese.

13:11-13​—Na lege wa nyama ti ngonda so ayeke na adidi use asara tënë tongana mbeni sioni nyama so akpa ngbo na lo sara si wâ alondo na yayu azu na sese? Nyama ti ngonda so ayeke na adidi use ayeke komandema ti Angleterre nga na ti Amerika so amû ndo. Lo sara tënë tongana nyama so akpa ngbo na lege so lo yeke gi ti bi mbeto na bê ti azo, lo yeke forcé ala nga lo yeke sara ye ti ngangu na ala ti tene ala yeda na ngorogbia so lo yeda na ni. Lo sara si wâ alondo na yayu aga na ndo ti sese na lege so lo sara ye tongana prophète na tenengo so lo hon azo ti sioni na ngoi ti abira use so amû ndo ti sese kue na yâ ti angu 100 so ahon. Lo fa nga so lo hon ngorogbia ti acommuniste na ngangu.

16:17​—“Pupu” so a tuku dû ti sembe mbasambala ni na ndo ni ayeke nyen? “Pupu” so aye ti sara tënë ti bibe ti Satan, “yingo [bibe] so ayeke sara kua fadeso na yâ ti amolenge ti kengo yanga.” Azo kue ti dunia ti Satan ayeke nyon sioni pupu so.​—aÉph. 2:2.

Aye ti manda teti e:

13:1-4, 18. “Mbeni nyama ti ngonda,” so ayeke angorogbia ti azo asigigi “na yâ ti ngu-ingo”, so ti tene na popo ti azo so aduti kpô pëpe (És. 17:12, 13; Dan. 7:2-8, 17). Nyama so, so Satan asara si lo bâ gigi na lo mû ngangu na lo, numero ti lo ayeke 666 ti fa so awokongo ti lo ayeke mingi mingi. Ti hinga nyama ni ayeke mû maboko na e ti mû peko ti lo lâ oko pëpe ti gonda lo wala ti voro lo tongana ti so tanga ti azo ayeke sara.​—Jean 12:31; 15:19.

13:16, 17. Atâa akpale so e lingbi ti wara na yâ ti akusala ti e ti lâ oko oko, tongana ‘vongo ye wala kango ye’, a lingbi e zia lege pëpe si nyama ti ngonda so asara ngangu na ndo ti e juska lo komande fini ti e. Tongana e yeda ti tene ‘a zia marque ti nyama ti ngonda ni na yâ ti maboko ti e wala na ndo ti lê ti e,’ a fa so e yeda ti tene nyama ni afa na e aye ti sarango ni wala lo komande bibe ti e.

14:6, 7. Tënë so a-ange ayeke fa amû lege na e ti bâ so a lingbi e fa hio nzoni tënë ti Royaume ti Nzapa so ayeke komande. A yeke nzoni e mû maboko na azo so e yeke manda Bible na ala ti kpe mbeto ti Nzapa nga ti mû gloire na lo.

14:14-20. Na ngoi so ‘fango alê ti kobe ti sese’ ahunzi, so ti tene bungbingo azo so ayeke sö ala ande, a yeke duti ande ngoi ti tene ange atuku “na yâ ti kota dû ti petengo na vin ti ngonzo ti Nzapa” “vigne ti sese” so a bungbi ni. Fade a yeke futi ande teti lakue lakue vigne ni, angorogbia ti dunia ti Satan so abuba kue nga “ali ti vigne” ni so alë aye ti sioni. A yeke nzoni e leke na bê ti e ti zia lege pëpe si vigne ti sese asara ngangu na ndo ti e.

16:13-16. ‘Asioni tënë so alondo na yingo’ aye ti sara tënë ti atënë so adémon ayeke kangbi na ando nde nde ti sara si tukungo adû ti sembe mbasambala ti ngonzo ti Nzapa asara ngangu pëpe na ndo ti agbia ti sese. Me ahon ti sara tongaso, atënë so apusu ala ti londo ti ke Jéhovah.​—Mat. 24:42, 44.

16:21. So hunzingo ti aye ti dunia ti laso aga nduru awe, fango atënë ti ngbanga ti Jéhovah na tere ti sioni dunia ti Satan alingbi ande ti ndu atënë so a tene ni dandara na so ason bê mingi, so peut-être aglason ni aduti fä ni. Atâa so kue, mingi ti azo ayeke ngbâ ande ti zonga Nzapa.

GBIA SO AHON NA NGANGU AKOMANDE

(Apoc. 17:1–22:21)

“Babylone, Ngangu gbata” ayeke mbeni mbage ti aye ti sioni ti dunia ti Satan. Suma 11 ni afa so Babylone ayeke “kota wali-ndumba” so ayeke na sioni tambela mingi, na lo ‘duti na ndo ti mbeni bengba nyama ti ngonda’. “Adidi bale-oko” ti nyama ni so lo duti na ndo ti lo ayeke futi ande lo kue kue kue (Apoc. 17:1, 3, 5, 16). Na hakango wali-ndumba so na mbeni “kota gbata,” suma so aga na peko asara tënë ti tingo ti lo nga a hunda na azo ti Nzapa ti “sigigi na yâ ti gbata so”. Tingo ti kota gbata so asara si azo mingi asara mua. Ye oko, ngia ayeke na yayu ndali ti “mariage ti Molenge ti ngasangbaga”. (Apoc. 18:4, 9, 10, 15-19; 19:7). Na yâ ti suma 13 ni, zo so amontê na ndo ti “vuru mbarata” ague ti sara bira na amara. Lo futi dunia ti Satan.​—Apoc. 19:11-16.

Ka ti “ngbo ti giriri, so ayeke Zabolo na Satan,” a yeke tongana nyen? Lawa si a yeke “bi lo na yâ ti lac ti wâ”? So ayeke mbeni tënë so suma 14 ni asara tënë na ndo ni (Apoc. 20:2, 10). A-use ndangba suma ni amû lege na e ti hinga kozoni awe dutingo ti azo na ngoi ti Komandema ti Ngu Saki Oko. Na ngoi so ‘aye so a fa’ ague ti hunzi, Jean abâ ‘mbeni bale so ngu ni amû fini so asua na bê ti balabala ti gbata ni’ na a tisa “zo so nzara ti ngu asara lo” ti nyon ni.​—Apoc. 1:1; 22:1, 2, 17.

Akiringo tënë na atënë na ndo ti Bible:

17:16; 18:9, 10​—Ngbanga ti nyen “agbia ti sese” atoto ndali ti bungbi so ala wani la afuti ni? Bibe ti kion la apusu ala ti toto. Na pekoni so a futi Babylone, Ngangu gbata, kite ayeke dä pëpe so agbia ti sese abâ so lo yeke mû maboko lani mingi na ala. Abungbi ti nzapa so asara si azo abâ so Nzapa ayeda na aye ti ngangu so angorogbia ti azo ayeke sara na ala. Babylone, Ngangu gbata amû nga maboko na ala ti sara si amaseka ague ti sara abira. Na ndo ni, Babylone asara aye mingi ti sara si azo angbâ lakue na gbe ti angorogbia ti sese.

19:12​—Ngbanga ti nyen Jésus oko si ahinga iri so a mû na lo me so a fa ni pëpe? Âmanke iri ni so andu kamba ti kua ti lo nga na akusala so a mû na lo, na tapande ati so a fa na Ésaïe 9:5, so lo yeke sara ni na lâ ti Seigneur. Zo oko ahinga iri ti lo pëpe gi lo oko la ahinga ni ndali ti so akua so lo yeke sara ayeke nde nga gi lo oko la ahinga ye so ti duti na mara ti kamba ti kua so aye ti tene. Ye oko, Jésus ayeda ti sara ambeni ti akusala so legeoko na azo so ayeke fini wali ti lo, na a yeke tongana ti so lo ‘sû na ndo ti ala fini iri ti lo.’​—Apoc. 3:12.

19:14​—Azo wa la ayeke mû peko ti Jésus na ndo ti ambarata na ngoi ti Harmaguédon? Na popo ti “aturugu so ayeke na yayu” so amû peko ti Jésus na yâ ti bira ti Nzapa so a yeke wara a-ange nga na aChrétien so a soro ala ti gue na yayu na so awara futa ti ala awe.​—Mat. 25:31, 32; Apoc. 2:26, 27.

20:11-15​—Azo wa la a zia iri ti ala na “mbeti [wala, “buku”] ti fini”? Na yâ ti mbeti so a yeke wara iri ti azo kue so ayeke wara ande fini ti lakue lakue: aChrétien so a soro ala ti gue na yayu, azo mingi mingi nga na awakua ti Jéhovah so ayeke be-ta-zo, so ayeke ‘azo ti mbilimbili so a zingo ande ala na kuâ’. (Kus. 24:15; Apoc. 2:10; 7:9). A yeke sû ande iri ti ‘azo so ayeke mbilimbili pëpe so a zingo ande ala na kuâ’ na yâ ti “mbeti ti fini” gi tongana ala sara ye ague oko na “aye so a sû ni na yâ ti ambeti so” a rulê ni rulengo, so na yâ ni a fa na azo aye ti sarango ni na ngoi ti Komandema ti Ngu Saki Oko. Ye oko, a lingbi ti zi airi so a sû ni dä. Ti aChrétien so a soro ala ti gue na yayu, a lingbi ti zi iri ti ala pëpe tongana ala ngbâ be-ta-zo juska na kuâ (Apoc. 3:5). A yeke sû ande biani biani iri ti azo so ayeke wara ande fini na ndo ti sese na ngoi so ala sigigi na yâ ti ndangba tara so ayeke si na hunzingo ti ngu saki oko ni.​—Apoc. 20:7, 8.

Aye ti manda teti e:

17:3, 5, 7, 16. “Ndara so alondo na nduzu” ayeke mû maboko na e ti gbu nda ti ‘tënë so zo amä yâ ni pëpe so, tënë ti wali ni na ti bengba nyama ti ngonda ni so ayô wali ni.’ (Jacq. 3:17). Nyama so, so ayeke tâ nyama pëpe abâ gigi kozoni tongana Bungbi ti Amara na lo tï; nga na pekoni lo kiri lo bâ gigi tongana Bendo ti Gigi. Ti gbu nda ti tënë so zo amä yâ ni pëpe so nzoni ayeke pusu e ti fa nzoni tënë ti Royaume ti Nzapa na bê ti e kue nga ti fa tënë ti lango ti fango ngbanga ti Jéhovah.

21:1-6. E hinga na bê ti e kue so aye ti nzoni so a mû zendo ni ayeke bâ ande gigi biani na ngoi so Royaume ti Nzapa ayeke komande. Ndali ti nyen? Ndali ti so Bible atene na ndo ti azendo so, atene: “A sara aye so awe!”

22:1, 17. “Bale so ngu ni amû fini na zo” aye ti sara tënë ti aye so Jéhovah aleke ti sara si azo so amä yanga asigigi na gbe ti siokpari na kui. A lingbi ti wara mbage ti ngu so laso. Na singila na bê, zia e yeda na tisango ndo so a hunda na e ti ga ti ‘nyon ngu so amû fini na zo, na ti nyon ni senge senge’ nga na ngia na bê e tisa azo ti ga ti nyon ni.

[Akete tënë na gbe ni]

[Foto na lembeti 15]

So aye ti nzoni mingi si azo so amä yanga ayeke wara ande na ngoi so Royaume ti Nzapa ayeke komande!