Tongana mo duti be-ta-zo, mo yeke zia ngia na bê ti Jéhovah
“Molenge ti mbi, mo duti na ndara na mo mû ngia na bê ti mbi, si mbi lingbi kiri tënë na zo so azonga mbi.”—APROV. 27:11.
1, 2. (a) Tënë ti kite wa so Satan asigigi na ni mbeti ti Job asara tënë na ndo ni? (b) Nyen la afa so Satan angbâ lakue ti gi yanga ti Jéhovah na peko ti kuâ ti Job?
JÉHOVAH azia lege na Satan ti tara mabe ti wakua ti lo Job so ayeke be-ta-zo. Ye so asara si Job agirisa anyama ti lo, amolenge ti lo nga na nzoni seni ti lo. Me na ngoi so Satan ayeke dë kite na ndo ti dutingo be-ta-zo ti Job, lo yeke bi bê na ambeni zo nga. Satan atene: “Poro teti poro, biani, fade zo amû ye ti lo kue ti bata fini ti lo.” Dengo kite so asara si mbeni kota tënë so abâ gi Job pëpe abâ gigi, na tënë ni so angbâ ti gue juska laso.—Job 2:4.
2 Ngu 600 tongaso na peko ti atara so Job awara, yingo ti Nzapa apusu Salomon ti sû atënë so: “Molenge ti mbi, mo duti na ndara na mo mû ngia na bê ti mbi, si mbi lingbi kiri tënë na zo so azonga mbi.” (aProv. 27:11). A yeke polele so na ngoi ni so, Satan angbâ lani ti dë gaba na Jéhovah. Na ndo ni, na yâ ti suma so bazengele Jean abâ, lo bâ so Satan ayeke bi tënë na ndo ti awakua ti Jéhovah na pekoni so a tomba lo na yayu na peko ti so Royaume ti Nzapa abâ gigi na ngu 1914. Biani, même laso nga, na ngoi so aye ti sioni dunia ti laso aga nduru mingi ti hunzi, Satan angbâ lakue ti dë kite na ndo ti dutingo be-ta-zo ti awakua ti Jéhovah.—Apoc. 12:10.
3. Akpengba ye wa e lingbi ti manda na yâ ti mbeti ti Job?
3 Tongaso, gbu li na ndo ti akpengba ye ota so e lingbi ti manda na yâ ti mbeti ti Job. Kozo ni, atara so asi na Job agboto lê na ndo ti tâ wato ti azo nga na zo so asara si a yeke kanga lege na awakua ti Jéhovah. Wato ni so ayeke Satan Zabolo. Use ni, atâa akpale wa e yeke wara, dutingo na nzoni songo na Nzapa ayeke mû maboko na e ti ngbâ be-ta-zo. Ota ni, na ngoi so e wara akpale nga e yeke na yâ ti mbeni tara, Nzapa ayeke mû maboko na e tongana ti so lo sara na Job. Laso, Jéhovah ayeke mû maboko na e na lege ti Mbeti ti Nzapa, bungbi ti lo nga na yingo vulu ti lo.
Girisa pëpe tâ wato ni
4. Zo wa la ayeke na gunda ti akpale so ayeke si laso?
4 Azo mingi ayeda pëpe so Satan ayeke dä. Ni la, atâa so ala gi bê ti ala na ndo ti aye so ayeke si laso, ala hinga pëpe tâ zo so ayeke na gunda ni: Satan Zabolo. A yeke tâ tënë so azo wani ayeke na gunda ti mingi ti apasi so ala yeke bâ. Kozo babâ na mama ti e, Adam na Ève, asoro ti sara ye so bê ti ala wani aye ahon ti sara ye so bê ti Wasarango ala aye. Nga, ngbene ye na ngoi ni so, azo so ayeke ga na peko ti ala asara ye na lege ti ndara oko pëpe. Me, a yeke Zabolo la ahanda Ève si lo ke yanga ti Nzapa. A yeke Zabolo la asigigi na mbeni dunia so na lege ni lo yeke komande na ndo ti azo so ayeke mbilimbili-kue pëpe na so ayeke kui. Teti so Satan ayeke “nzapa ti aye ti ngoi so”, azo ayeke sara ye gi tongana ti lo: baba, papa, mbanda, bê ti ye, handango ndo nga na kengo yanga. (2 aCor. 4:4; 1 Tim. 2:14; 3:6; diko Jacques 3:14, 15.) Aye so asara si azo atiri na ndo ti tënë ti poroso nga na ndo ti tënë ti vorongo nzapa; a sara nga si azo ake amba ti ala, ala maï tënë ti goro nga ala sara ye kirikiri, aye so asara si azo abâ pasi mingi.
5. E ye ti sara nyen na pendere hingango ye so e wara?
5 So tâ pendere hingango ye si e awakua ti Jéhovah e yeke na ni! E hinga zo so asara si aye ayeke buba gi bubango. Tongaso, bê ti e apusu e pëpe ti sigigi na fango tënë ti fa na azo tâ wato so ayeke na gunda ti aye ti wusuwusu so? Nga, e yeke na ngia pëpe ti mû mbage ti tâ Nzapa, Jéhovah, na ti fa na azo ye so lo yeke sara ande ti futi Satan na ti hunzi apasi so azo ayeke bâ?
6, 7. (a) Zo wa la ayeke na gunda ti aye ti ngangu so a yeke sara na awakua ti Jéhovah? (b) E lingbi ti sara nyen ti mû tapande ti Élihu?
6 Satan ayeke na gunda ti mingi ti aye ti vundu so ayeke si laso nga lo la lo sara si a gi ti kanga lege na awakua ti Jéhovah. Lo leke na bê ti lo ti tara e. Jésus Christ atene na bazengele Pierre: “Simon, Simon, bâ, Satan ahunda ti mû ala ti tene lo yengere ala na yengere tongana blé.” (Luc 22:31). Legeoko nga, e oko oko kue so e yeke mû peko ti Jésus, e yeke wara atara na alege nde nde. Pierre ahaka Zabolo na mbeni “bamara so ayeke toto, na lo yeke gi mbeni zo ti te lo.” Nga, Paul atene: “Azo kue so aye ti gbu tënë ti Nzapa ngangu na yâ ti gigi ti ala na sarango beoko na Christ Jésus, a yeke sara ande aye ti ngangu na ala nga.”—1 Pi. 5:8; 2 Tim. 3:12.
7 E lingbi ti sara tongana nyen ti fa so e girisa pëpe zo so ayeke tâ wato ni na ngoi so ye ti ngangu asi na mbeni ita ti e? Ahon ti tene e zi tere ti e na tere ti ita ti e, e yeke sara ye tongana ti Élihu, so ândö asara tënë na Job tongana tâ kamarade. E yeke mû maboko na ita ti e ti luti na wato ti e Satan (aProv. 3:27; 1 aThes. 5:25). Ye so e zia na gbele e ayeke ti mû maboko na mba ti e wakua ti Jéhovah ti ngbâ be-ta-zo atâa ye wa asi, na tongaso lo zia ngia na bê ti Jéhovah.
8. Ngbanga ti nyen Satan awara lege pëpe ti sara si Job ane Jéhovah mbeni pëpe?
8 Kozo ye ti Job so Satan asara si lo girisa ni ayeke anyama ti lo. Anyama so asara peut-être si lo yeke wara nginza mingi. Me Job ayeke mû ka ala ti sara na sandaga na Nzapa. Na pekoni so Job azia amolenge ti lo nde teti Nzapa, “lo londo fade na ndapre, lo mû offrande so a-zo-na-wa alingbi na wungo ti ala kue; teti Job atene, Peut-être amolenge ti mbi asara siokpari, na ala zonga Nzapa na bê ti ala. Job asara tongaso lakue.” (Job 1:4, 5). Tongaso, Job ayeke mû sandaga ti anyama lakue na Jéhovah. Na ngoi so atara ato nda ti si na lo, lo lingbi mbeni pëpe ti mû asandaga so. Job ayeke pëpe na mbeni “ye” ti mû ti gonda na Jéhovah (aProv. 3:9). Me lo lingbi ti gonda Jéhovah na yanga ti lo, na a yeke ye so lo sara.
Gi ti duti na kpengba songo na Jéhovah
9. Ye wa ayeke kota ye mingi na lê ti e?
9 Atâa e yeke na mosoro wala ye ti e ayeke dä pëpe, e yeke maseka wala ngu ti e ague na li ni, e yeke na nzoni seni wala pëpe, e lingbi ti duti na nzoni songo na Jéhovah. Atâa akpale wa e yeke wara ni, dutingo na kpengba songo na Nzapa ayeke mû maboko na e oko oko kue ti ngbâ be-ta-zo nga ayeke zia ngia na bê ti Jéhovah. Même ambeni zo so ahinga tâ tënë mingi pëpe asara ye lani na mbeto pëpe nga ala ngbâ be-ta-zo.
10, 11. (a) Mbeni ita ti e ti wali asara ye tongana nyen na ngoi so lo yeke na yâ ti atara ndali ti mabe ti lo? (b) Ye wa ita-wali so asara ti fa so Satan ayeke biani zo ti mvene?
10 Bâ tapande ti Ita-wali Valentina Garnovskaya, oko ti gbâ ti aTémoin ti Jéhovah ti Russie so tongana ti Job angbâ be-ta-zo atâa angangu tara so ala wara. Na ngu 1945, na ngoi so lo yeke na ngu 20 tongaso, mbeni ita-koli afa tënë na lo. Ita-koli ni akiri fani use ti sara lisoro na lo na ndo ti Bible, me na pekoni, lo bâ ita-koli ni mbeni pëpe. Atâa so kue, Valentina ato nda ti fa tënë na avoizin ti lo. Ye ti pekoni ayeke so a gbu lo na a dë ngbanga na li ti lo ti sara kanga na yâ ti kando teti ngu miombe. A zi lo na ngu 1953 nga kete na pekoni, lo kiri lo to nda ti fa tënë. A kiri a gbu lo na a kanga lo: ti so ni so teti ngu bale-oko. Na pekoni so lo sara angu mingi na yâ ti mbeni kando, a gue na lo na yâ ti mbeni nde. Na yâ ti use kando ni, ambeni ita-wali ayeke na copie ti Bible. Mbeni lâ, mbeni ita-wali ni afa Bible ni na Valentina. Tere ti lo anzere mingi! Bâ so gi oko Bible so Valentina abâ ayeke ti ita-koli so afa tënë na lo na ngu 1945!
11 Na ngu 1967, a zi Valentina na kanga; lege azi na lo fadeso ti wara batême ti ngu ti fa so lo mû tere ti lo na Jéhovah awe. Na bê kue, lo mû ngoi ti liberté so lo wara ti fa tënë juska na ngu 1969. Ye oko, na ngu ni so, a kiri a gbu lo; na ti so ni so a dë ngbanga na li ti lo ti sara kanga ti ngu ota. Atâa so kue, Valentina angbâ ti fa tënë. Kozo ti tene lo kui na ngu 2001, lo mû maboko na azo 44 ti manda tâ tënë. Lo sara ngu 21 na yâ ti ada ti kanga nga na akando. Lo yeda na bê ti lo kue ti zia ye kue, so na popo ni a yeke wara liberté ti lo, si lo ngbâ be-ta-zo. Na ngoi so Valentina ague ti kui, lo tene: “Mbi yeke lâ oko pëpe na da ti li ti mbi. Akungba ti mbi kue ayeke gi na yâ ti mbeni bozo oko, me mbi yeke na ngia nga a nzere na mbi ti sara na Jéhovah.” Ye so Valentina asara afa biani so Satan, so atene so azo ayeke ngbâ be-ta-zo pëpe na Nzapa na yâ ti atara, ayeke zo ti mvene (Job 1:9-11). E hinga na bê ti e kue so lo zia ngia na bê ti Jéhovah nga so Jéhovah ayeke ku kungo ngoi so lo yeke zingo ande Valentina nga na tanga ti azo kue so angbâ be-ta-zo na lo juska na kuâ.—Job 14:15.
12. Ndoye ti e na mbage ti Jéhovah ayeke sara nyen na ndo ti songo ti e na lo?
12 Ndoye ti e na mbage ti Jéhovah la asara si e yeke na kpengba songo na lo. E gonda mingi asarango ye ti lo nga e yeke sara ye kue so e lingbi ti sara ti sara ye ague oko na aye so lo leke na bê ti lo ti sara. Nde na ye so Zabolo atene, e ye Jéhovah na bê ti e kue sân ti gi kozoni ti wara mbeni ye na maboko ti lo. Tâ ndoye so asara si e wara ngangu ti ngbâ be-ta-zo na yâ ti atara. Âdu ti Jéhovah, lo yeke “bata lege ti azo ti lo ti nzobe”, wala so ayeke be-ta-zo.—aProv. 2:8; Ps. 97:10.
13. Jéhovah ayeke bâ ye so e sara ndali ti lo tongana nyen?
13 Ndoye apusu e ti gonda iri ti Jéhovah, atâa tongana e bâ so e lingbi pëpe ti sara ye mingi. Lo yeke bâ nzoni bibe so apusu e ti sara ye, na lo yeke fâ ngbanga na ndo ti e pëpe tongana e lingbi pëpe ti sara aye kue so e ye ti sara. Kota ye ni ayeke gi pëpe ye so e sara me ayeke nga ndani so e sara ye ni. Atâa so Job ayeke na vundu mingi nga lo gbu ngangu na yâ ti aye mingi, lo tene na azo so abi tënë na li ti lo so lo ye asarango ye ti Jéhovah mingi. (Diko Job 10:12; 28:28.) Na yâ ti ndangba chapitre ti mbeti ti Job, Nzapa afa so ngonzo asara lo mingi na tere ti Éliphaz, Bildad nga na Tsophar ndali ti so ala tene tâ tënë pëpe. Na oko ngoi ni, Jéhovah afa na Job so lo bâ lo na nzoni lê na lege so fani osio, lo iri lo “boi ti Mbi” nga lo hunda na lo ti sara mbeni ye ndali ti akoli so ason bê ti lo ahon ti dë bê ti lo so (Job 42:7-9). E nga kue, zia e sara aye so ayeke sara si Jéhovah abâ e na nzoni lê.
Jéhovah ayeke mû maboko na awakua ti lo so ayeke be-ta-zo
14. Na lege wa Jéhovah amû maboko na Job ti changé bango ndo ti lo?
14 Job angbâ be-ta-zo atâa so lo yeke mbilimbili-kue pëpe. Ngoi na ngoi, tongana lo yeke na yâ ti ngangu kpale, bango ndo ti lo ayeke nzoni pëpe. Na tapande, lo tene na Jéhovah: “Mbi toto na Mo, na Mo kiri tënë na mbi pëpe . . . Mo tiri na mbi na ngangu ti tïtî Mo.” Na ndo ni, Job aluti ahon ndo ni na ndo ti fango mbilimbili ti lo tongana lo tene: “Mbi yeke zo ti sioni pëpe” na “maboko ti mbi asara ye ti ngangu oko pëpe, na sambela ti mbi ayeke nzoni kue.” (Job 10:7; 16:17; 30:20, 21). Ye oko, na nzoni bê Jéhovah amû maboko na Job na hundango na lo atënë na peko ti tere ti sara si Job aluti gi na ndo ti lo wani pëpe. Ahundango tënë so amû nga maboko na Job ti bâ polele so Nzapa ayeke kota mingi na so zo alingbi pëpe ti haka tere ti lo na lo. Job ayeda na lege so Nzapa afa na lo, na lo changé bango ndo ti lo.—Diko Job 40:8; 42:2, 6.
15, 16. Na alege wa Jéhovah ayeke mû maboko na awakua ti lo laso?
15 Nga, na nzoni bê Jéhovah ayeke fa lege na awakua ti lo ti laso nga lo yeke mû wango na ala. Na ndo ni, e yeke wara aye ti nzoni. Na tapande, Jésus Christ amû fini ti lo na sandaga ti zi e, na ye so azi lege ti tene a pardone asiokpari ti e. Na lege ti sandaga so, e lingbi ti duti na kpengba songo na Nzapa atâa so e yeke mbilimbili-kue pëpe (Jacq. 4:8; 1 Jean 2:1). Na ngoi so e yeke na yâ ti atara, e yeke sambela nga ti tene Nzapa amû maboko na e na ti tene yingo vulu ti lo akpengba e. Na ndo ni, e yeke na Bible so wungo ti ambeti ni alingbi kue; na tongana e diko ni nga e gbu li na ndo ti atënë ti yâ ni, e yeke leke tere ti e ti gbu ngangu na yâ ti atara. Mandango ye ayeke mû maboko na e ti gbu nda ti akota tënë so andu zo so ayeke na droit ti komande dunia kue nga dutingo be-ta-zo ti zo oko oko kue.
16 Nga, e yeke wara ye ti nzoni mingi ndali ti so e yeke na yâ ti sewa ti aita ti e so ala yeke na ndo ti sese kue, so Jéhovah ayeke mû na ala kobe ti yingo na lege ti “ngbâa be-ta-zo so ayeke sara ye na ndara”. (Mat. 24:45-47). Na yâ ti acongrégation ti aTémoin ti Jéhovah so wungo ni ahon 100 000, a yeke sara abungbi so na ngoi ni a yeke fa ye na e nga a yeke kpengba e ti gbu ngangu na yâ ti atara so e lingbi ti wara ndali ti mabe ti e. E lingbi ti bâ ni na lege ti ye so asi na Sheila, mbeni maseka-wali Témoin ti Jéhovah so ayeke na kodoro ti Zamani.
17. Mû mbeni tapande ti fa tongana nyen a yeke na lege ti ndara ti sara ye tâ gi tongana ti so bungbi ti Jéhovah ayeke fa na e laso.
17 Mbeni lâ na ekole, mbeni zo ayeke dä pëpe ti bâ ndo na ndo ti klasse so Sheila ayeke dä. Amba ti lo ti yâ ti klasse amû desizion ti tara mbeni sarango ye ti yorö so ayeke sara na lê ti mbeni tableau. Hio tongaso, Sheila asigigi na yâ ti klasse ni, na tënë so lo mä na pekoni asara si lo yeke na ngia so lo hon ti lo. Na ngoi so amba ti lo ayeke sara kusala na tableau so, ambeni abâ so asioni yingo asi na ndo ni, na tongaso mbeto ahon ndo ti ala na ala kpe. Me nyen la amû maboko na Sheila ti soro ti sigigi hio na yâ ti klasse ni? Sheila atene: “Ngoi kete kozo ti tene ye so asi, e sara lisoro na Da ti Royaume na ndo ti sioni so zo alingbi ti wara tongana lo sara kua na tableau so. Tongaso, mbi hinga ye so a lingbi mbi sara. Mbi ye ti sara ye so anzere na Jéhovah, tongana ti so Bible atene na aProverbe 27:11.” A yeke tâ nzoni mingi so Sheila ayeke lani dä na ngoi ti bungbi so na lo dengi mê nzoni na aye so a yeke fa!
18. Ye wa mo leke na bê ti mo ti sara?
18 Zia e oko oko kue e leke na bê ti e ti duti nduru ti sara ye alingbi na wango so bungbi ti Jéhovah amû na e. Tongana e ga lakue na abungbi, e diko Bible, e manda ambeti so ngbâa be-ta-zo asigigi na ni, e sambela nga e lë songo na aChrétien so akpengba na lege ti yingo, e yeke wara fango lege nga na mungo maboko so e yeke na bezoin ni. Jéhovah aye ti tene e sö benda, nga lo hinga na bê ti lo kue so e yeke ngbâ ande ti duti be-ta-zo na lo. So kota pasa si e yeke na ni ti ne mingi iri ti Jéhovah, ti ngbâ be-ta-zo na lo nga ti zia ngia na bê ti lo!
Mo dabe ti mo na ni?
• Satan ayeke na gunda ti akpale wa nga na atara wa?
• Ye wa ayeke kota ye mingi na lê ti e?
• Songo ti e na Jéhovah aluti na ndo ti nyen?
• Fa ambeni lege so Jéhovah ayeke mû maboko na e laso.
[Foto na lembeti 15]
E lingbi ti mû maboko na amba ti e aChrétien ti ngbâ be-ta-zo