Bata tere ti mo nde na asioni yingo

JACQUES akono na yâ ti mbeni kete kodoro so ayeke yongoro na yâ ti zoa ti Malaita, mbeni zoa ti Azoa ti Salomon. Ngbene ye na ngoi so Jacques ade maseka, a fa na lo ti ne ayingo. Lo tene: “Mbi pensé lani kete pëpe ti hunda na ayingo ti sara sioni na azo. Me mbi pensé zo alingbi ti wara ngia na yâ ti gigi ti lo gi tongana lo sara kua na rarafono [aye ti akotara so azo ayeke sara ti hunda mungo maboko ti ayingo] ti bata ala si sioni asi na ala pëpe.”

Tongana ti so azo ayeke sara na yâ ti akodoro mingi, azo ti Azoa ti Salomon amä na bê so ayingo alingbi ti mû maboko na azo wala ti sara sioni na ala. Ti tâ tënë ni, gbâ ti azo ti Mélanésie aye ayingo so ala bâ atene ala yeke mû maboko na azo, na ala sara mbeto ti ala pëpe.

Na alege nde nde azo afa so ala mä na bê so ayingo ayeke sara ye. Na tapande, na ngoi so Jacques ade maseka, awali ti kete kodoro ni ayeke dekongo ti tene amolenge ti ala akpe na yâ ti ada tongana ala mä toto ti mbeni ndeke so a iri lo korokoro. Ndali ti nyen? Ndali ti so ala bâ ti ala so toto ti ndeke so afa so mbeni ye ti sioni aga nduru ti si na mbeni zo awe.

Ambeni zo ti kete kodoro ni ayeke zia mbeni vuru tênë na ndo ti ayanga-da ti ala. Jacques asara nga tongaso, lo pensé so tênë ni so ayeke kanga lege si asioni yingo asara sioni na lo pëpe. Nga na ngoi so Jacques ayeke na place ti kua, lo yeke bungbi tanga ti kobe ti lo so angbâ, lo bata ni na yâ ti bozo ti lo ti tuku ni ande. Ye so lo gi bê ti lo mingi na ndo ni ayeke ti tene mbeni zo ti likundu amû tanga ti kobe ni so na lo sara kua na ni ti sara si lo tï kobela.

Atâa so peut-être azo ti ndo so mo yeke dä ayeke sara tongaso pëpe, peut-être tongana ti Jacques, mo bâ so a yeke nzoni mo sara aye ti akotara si asioni yingo asara sioni pëpe na mo. Peut-être mo bâ so a lingbi mo sara aye so si sioni asi na mo pëpe.

Tongana mo ne atënë ti yâ ti Bible, kite ayeke dä pëpe so mo ye ti hinga kiringo tënë ti Bible na ahundango tënë so: (1) Aye ti sioni wa asioni yingo alingbi ti sara na mo? (2) Sarango ambeni ye ti akotara alingbi ti sara si mo tï na gbe ti ngangu ti asioni yingo? (3) Mo lingbi ti sara nyen ti bata tere ti mo biani nde na asioni yingo nga mo duti na ngia?

Lege so asioni yingo ayeke sara sioni na zo

Bible afa so asioni yingo ayeke pëpe ayingo ti akuâ. Mbeti ti Nzapa atene: “Ala so ayeke na fini, ala hinga fade ala kui; me akinda ahinga ye oko pëpe.” (Zo-ti-fa-tene 9:5). Ti tâ tënë ni, asioni yingo ayeke a-ange so ake yanga ti Nzapa na ala mû peko ti Satan ti tara ti handa azo.​—Apocalypse 12:9.

Bible afa polele so a lingbi e bata tere ti e si asioni yingo asara sioni pëpe na e. Bazengele Paul atene na aChrétien ti Éphèse, lo tene: “E yeke tiri na mitele na mênë pëpe, me e yeke tiri na . . . asioni yingo so ayeke na yayu.” Bazengele Pierre atene so mokonzi ti asioni yingo kue, Satan Zabolo, ayeke tongana “mbeni bamara so ayeke toto, na lo yeke gi mbeni zo ti te lo.”​—aÉphésien 6:12; 1 Pierre 5:8.

Satan ayeke gi kozoni kue ti sara sioni na azo na handango ala wala na pusungo ala ti sara aye so ason bê ti Nzapa. Bible atene so Satan “ayeke gbian tere ti lo lakue ti ga mbeni ange ti lumière.” (2 aCorinthien 11:14). Lo ye si azo abâ so lo yeke mbeni yingo so ayeke bata zo, me ti tâ tënë ni lo yeke gi ti sara sioni na zo. Satan asara si bibe ti azo avuko si ala hinga tâ tënë pëpe na ndo ti lo nga na ndo ti Nzapa (2 aCorinthien 4:4). Nyen la ayeke pusu Satan ti handa azo?

Satan ayeke na kota nzara ti tene a voro lo na lo ye si azo asara ni, atâa ala hinga ni wala pëpe. Na ngoi so Jésus, Molenge ti Nzapa ayeke na ndo ti sese, Satan aye si lo ‘kuku na sese na lo voro’ lo. Jésus atene: “Hon kâ, Satan! Teti a sû na Mbeti ti Nzapa a tene: ‘A yeke gi Jéhovah Nzapa ti mo si a lingbi mo voro lo.’ ” (Matthieu 4:9, 10). Jésus ake ti sara mbeni ye so alingbi ti fa so lo woko tere ti lo na gbe ti Satan na lo voro lo.

Jéhovah ayeke yingo so ayeke ngangu ahon atanga ti ayingo kue, nga lo yeke zia ande pëpe si mbeni ye angbâ ande lakue ti sara sioni na azo so amä yanga ti lo (Psaume 83:19; aRomain 16:20). Me tongana e ye ti nzere na lê ti Jéhovah Nzapa tongana ti Jésus, a lingbi e kpe ti sara mbeni ye so afa so e woko tere ti e na gbe ti Satan wala ti asioni yingo ti lo. Ti sara ni, a lingbi e hinga asarango ye ti akotara so andu vorongo asioni yingo. Mo yeke sara ni tongana nyen?

Hinga asarango ye ti akotara so Nzapa ake

Jéhovah Nzapa awa azo ti lo ti Israël ti giriri ti kpe ti mû peko ti ambeni sarango ye ti akotara ti amara so angoro ala. Lo tene: “A lingbi zo oko ayeke na popo ti i pëpe, so . . . [ayeke] wagingo bendo, wala zo so agi nda ti ye na yâ mbinda, wala wadeli, wala zo ti yorö, wala zo ti hundango bendo.” Na ndo ti azo so ayeke mû peko ti angobo so, Bible atene: “Zo so asara ye so ayeke zo ti sioni mingi na lê ti L’Éternel.”​—Deutéronome 18:10-12.

Ni la, na ngoi so mo yeke gi ti hinga asarango ye ti akotara so amû ndo na ndo so mo yeke dä, bâ ahundango tënë so: Asarango ye ti akotara ni so ayeke pusu zo ti bâ so mbeni ye so asi afa so mbeni ye ti nzoni wala ti sioni ayeke si ande? A sara si zo abâ so mbeni ye so ayeke na fini pëpe ayeke na ngangu ti bata zo? A ndu mbeni ye so a yeke mû ni ti sara sioni na zo wala ti bata zo si sioni asi na lo pëpe? A ndu mbeni ye so zo ayeke sara ti fa so lo woko tere ti lo na gbe ti mbeni yingo nde, me pëpe na gbe ti Jéhovah wala Jésus so lo zia lo ti sara kua na iri ti lo?​—aRomain 14:11; aPhilippien 2:9, 10.

A yeke kota ye mingi ti tene mo ke asarango ye ti akotara kue so ayeke pusu zo ti sara aye so. Ndali ti nyen? Yingo ti Nzapa apusu bazengele Paul ti tene: “Ala lingbi ti te ye na ‘table ti Jéhovah’ nga na table ti asioni yingo pëpe.” Lo tene so azo so ayeke gi ti nzere na Nzapa nga na oko ngoi ti nzere na ambeni yingo nde ayeke “pusu Jéhovah ti sara mbanda”. (1 aCorinthien 10:20-22). Jéhovah Nzapa ahunda ti tene a voro gi lo oko, na lo lingbi biani na ni.​—Exode 20:4, 5.

Bâ nga hundango tënë so: Sarango ye ti akotara ni ayeke sara si mbeni zo abâ so tënë ti ye so lo sara ayeke na li ti lo pëpe? Na tapande, na yâ ti ando mingi, azo abâ na sioni lê gingo koli wala wali nde nga bungbingo koli na wali kozoni na mariage; Bible nga afâ ngbanga na ndo ti aye so (1 aCorinthien 6:9, 10). Ye oko, na yâ ti ambeni kodoro ti mbage ti Pacifique, a lingbi ti kanga lê na ndo ti mara ti asarango ye so tongana mbeni maseka-wali atene so mbeni yorö so lo te la apusu lo ti bungbi na koli.a

Ye oko, Bible afa na e so tënë ti aye so e sara ayeke na li ti e wani (aRomain 14:12; aGalate 6:7). Na tapande, kozo wali, Ève, atene so Satan la ahanda lo si lo nga lo ke yanga ti Nzapa. Lo tene: “Ngbo ahanda mbi si mbi te.” Ye oko, ti Jéhovah, tënë ti aye so Ève asara ayeke na li ti lo wani (Genèse 3:13, 16, 19). Jéhovah abâ nga so tënë ti aye so e sara ayeke na li ti e wani.​—aHébreu 4:13.

A lingbi mo sara nyen?

Tongana mo ye ti nzere na lê ti Nzapa nga ti sara ye alingbi na akpengba-ndia ti Bible, a lingbi mo sara ye kue so mo lingbi ti sara ti bata tere ti mo. Azo ti Éphèse so ayeke lani tâ na nzara ti voro Nzapa na ngoi ti akozo Chrétien azia na e nzoni tapande na ndo ti tënë so. Ti zi tere ti ala yamba na asioni yingo, ala bungbi abuku ti ala kue so andu asarango ye ti yorö na ala “zö ni na lê ti azo kue.”​—Kusala 19:19.

Kozo ti tene ala gbi abuku ti ala so, ala bungbi ndo oko “ala yeke fa na gigi aye so ala yeke sara lani na ala yeke tene ni dandara.” (Kusala 19:18). Ye so Paul afa na ndo ti Christ andu bê ti ala mingi na apusu ala ti gbi abuku ti ala so andu asarango ye ti yorö. Ala changé nga abango ndo ti ala na ndo ti asarango ye ti akotara.

A yeke tâ tënë so a yeke kete ye pëpe ti tene zo azia lege ti asarango ye ti akotara. Jacques so e sara tënë ti lo fade awara mara ti kpale so. A-Témoin ti Jéhovah ato nda ti manda Bible na lo nga ye so lo yeke manda anzere na lo mingi. Ye oko, lo ngbâ lani ti sara kua na rarafono. Na ngoi so lo gi ti bâ bibe ti lo na ndo ti asarango ye so, lo bâ so lo zia bê ti lo na ndo ti azendo so Jéhovah amû teti kekereke, me lo pensé so ti tene sioni asi na lo pëpe, a lingbi lo ngbâ ti zia bê ti lo na ndo ti asarango ye ti akotara.

Nyen la amû maboko na Jacques ti changé bango ndo ti lo? Lo tene: “Mbi sambela Jéhovah ti bata mbi na ti mû maboko na mbi ti zia bê ti mbi kue na lo. Na oko ngoi ni, mbi zia lege ti asarango ye ti akotara so mbi yeke sara.” Mbeni ye ti sioni asi na lo? Jacques atene: “Ên-ën! Ye kue so asi ayeke so mbi manda ti zia bê ti mbi kue na Jéhovah. Mbi bâ tongana nyen Jéhovah ayeke nduru mingi na mbi tongana mbeni kamarade.” Biani, na yâ ti angu mbasambala so ahon, Jacques asara kua tongana wafango tënë ti ngoi kue, lo mû maboko na azo ti hinga aye so Bible afa.

Ngbanga ti nyen mo mû pëpe tapande ti Jacques? Gi ti hinga aye ti akotara so azo ti ndo so mo yeke dä ayeke sara, na sara kua na “hingango ndo” ti mo ti bâ wala aye ti akotara ni so ague oko na “ye so bê ti Nzapa aye”. (aRomain 12:1, 2). Na pekoni, na mbeto pëpe, zi tere ti mo na yâ ti asarango ye so aluti na ndo ti tâ ye pëpe. Tongana mo sara tongaso, mo lingbi ti hinga na bê kue so Jéhovah ayeke “yamba” mo nga lo yeke bata mo (2 aCorinthien 6:16-18). Tongana ti Jacques, mo yeke hinga ande so zendo so Bible amû ge ayeke tâ tënë: “Iri ti L’Éternel ayeke tour ti ngangu; zo ti mbilimbili akpe dä na lo bata tere ti lo.”​—aProverbe 18:10.

[Kete tënë na gbe ni]

[Foto na lembeti 30]

“Korokoro”

[Lingu ti foto ni]

Courtesy of Dr. Bakshi Jehangir

[Foto na lembeti 30]

Mbeni maseka-wali aro atanga ti kobe so angbâ si a mû ni pëpe ti sara na sioni na lo