Bible achangé fini ti azo
Nyen la asara si mbeni wali so ândö mabe ti lo atï ayeke mû ngoi mingi fadeso ti mû maboko na azo ti manda ye na ndo ti Nzapa? Nyen la apusu mbeni koli so aye lani ngia ti awanguru so andu sarango ngangu ti ga zo so aye siriri? Tongana nyen mbeni koli so lani ayeke nyon mbangi, ayeke nyon sämba ahon ndo ni nga ayeke tiri na azo na yâ ti avaka ti wara nginza na pekoni achangé fini ti lo? Diko ye so ala tene.
IRI TI LO: PENELOPE TOPLICESCU
NGU TI LO: 40
KODORO SO A DÜ LO DÄ: AUSTRALIE
MBAÏ TI LO: BÊ TI LO ANZE NA ABUNGBI TI VORONGO NZAPA
GIGI TI MBI ÂNDÖ: A dü mbi na Sydney na kodoro ti Australie, me na ngoi so mbi yeke gi na ngu use, sewa ti e ague asara kodoro na Nouvelle Guinée. E sara ngu use tongaso na kodoro ti Rabaul na pekoni e gue e sara ngu miombe na Bougainville. Na angoi ni so, télé ayeke dä lani na kodoro ti Nouvelle Guinée pëpe, tongaso mbi na ngambe ti mbi ti koli e mû ngoi mingi ti gue ti tï ngu wala ti gue na ando nde nde ti gbara tente ti lango na gbe ni.
Na ngoi so mbi yeke na ngu bale-oko, mbi komanse ti sara nzara ti vorongo Nzapa. Mama ti mbi ayeke Catholique, tongaso lo tene na mbi ti gue legeoko na mbeni mamère ti ndo so e yeke dä ti manda Bible. Mbi ga Catholique na mbi wara batême na ngu bale-oko.
Ye oko, na pekoni, e kiri na kodoro ti Australie; na ngoi so mbi to nda ti ga wali, mbi komanse ti dë kite na ndo ti aye so a fa na mbi na yâ ti bungbi ti nzapa ti mbi. Na yâ ti ngoi kue so mbi yeke na lycée, mbi manda mbaï ti aye so asi ândö, na mbi na babâ ti mbi e sara yongoro lisoro na ndo ti lege so abungbi ti nzapa abâ gigi nga na ndo ti atënë ti yâ ti Bible so e bâ ni tongana asenge toli. Ye so asara si na pekoni mbi ke nzapa ti Catholique.
Babâ na mama ti mbi akangbi tere na ngoi so mbi yeke na ngu 16. Gigi akpengba lani mingi na mama ti mbi, na tongaso mbi gue mbi duti na ndo ti babâ ti mbi na ndeko ti lo. Ngambe ti mbi ti koli angbâ na Mama, na ala gue aduti na mbeni gbata nde. Mbi bâ lani so mbi yeke tâ gi mbi oko. Ngu use ahon awe si mbi kiri mbi lë songo na mama ti mbi. Mbi to nda ti nyon sämba, ti nyon mbangi nga ti gue ti dodo na ti sara ngia. Mbi ke ekole na mbi sara mbeni kua; nga na ngoi so mbi yeke na ngu 20 tongaso, mbi to nda ti buba fini ti mbi na sarango aye so ayeke sioni.
Na ngoi so mbi wara ngu 25, mbi kiri mbi to nda ti gbu li na ndo ti Bible. Mbi to nda ti sara mbeni fini kua na mbi tingbi na Liene, mbeni nzoni wali so ayeke ne patron ti lo mingi, atâa so patron ni ayeke son na ndo ti lo mingi. Na ngoi so mbi hunda ti hinga ndani so lo suku na patron ti lo pëpe, lo tene so mbeni Témoin ti Jéhovah ayeke manda Bible na ni nga ni yeke gi ti sara ye na yâ ti gigi ti ni alingbi na akpengba-ndia ti Bible. Liene ahunda ti manda Bible na mbi. Teti so mbi gbu nda ti tënë so lo tene nzoni pëpe, mbi bâ mbi tene lo tene so lo lingbi ti fa na mbi ye kue so lo hinga na ndo ti Bible gi na yâ ti ngbonga oko. Na bï ni so, Liene amû ngbonga ota ti kiri tënë na ahundango tënë ti mbi. Bê ti mbi apika ti bâ so akiringo tënë kue so lo mû alondo na yâ ti Bible.
Mbi dabe ti mbi so na ngoi so mbi yeke kpe na kutukutu ti mbi ti kiri na da na peko ti lisoro ti mbi na Liene, ngonzo asara mbi na tere ti Nzapa ndali ti so lo zia lege na mbi pëpe ti manda tâ tënë na ndo ti lo hio. Mbi hinga so sarango ye ti aTémoin ti Jéhovah ayeke na lege ni na mbi pensé so mbi lingbi pëpe ti changé asarango ye ti mbi. Mbi bâ nga so mbi lingbi pëpe ti gue da na da ti fa tënë tongana ti aTémoin ti Jéhovah. Mbi ngbâ lani ti manda Bible, me mbi sara ni ti wara mbeni faute na yâ ti afango ye ti ala ti mû lege na mbi ti ke mandango Bible ni sân ti tene yingo-ti-hinga ti mbi agi mbi. Mbeni lâ, mbi bâ so mbi yeke wara ande faute na yâ ti afango ye ti ala pëpe.
LEGE SO BIBLE ACHANGÉ FINI TI MBI: Aye so mbi yeke manda lani na yâ ti Bible na ndo ti anzoni sarango ye asara si yingo-ti-hinga ti mbi agi mbi mingi. Ti dë yingo-ti-hinga ti mbi, mbi zia mbangi. Me na pekoni, mbi gue na mbeni kodoro wande na mbi kiri mbi tï na yâ ti dodo, ti ngia nga na yâ ti nyongo sämba. Mbi bâ so lakue tongana mbi tara ti sara ye alingbi na akpengba-ndia ti Bible, mbi yeke kiri gi na peko. Mbi yeke sambela Jéhovah na kamene na lê, me yingo-ti-hinga ti mbi angbâ lakue ti gi mbi.
Na ngoi so mbi manda ye na ndo ti sarango ye ti Gbia David na mbage ti Bath-Séba nga lege so Jéhovah asara nzoni bê na mbage ti ala, ye so amû maboko na mbi. Na ngoi so a mû wango na David, na mbeto pëpe lo yeda na faute so lo sara sân ti gi ti zi tënë na li ti lo. Nga, na tâ be-ti-molenge, lo yeda na sengo ndo so a se na lo (2 Samuel 12:1-13). Lakue tongana mbi tï na yâ ti angbene sarango ye ti mbi, mbi yeke dabe ti mbi na ye so, na a sara si a yeke ngangu na mbi pëpe ti tene na Jéhovah so mbi yeke na vundu ndali ti ye so mbi sara. Na pekoni, mbi mû desizion ti tene tongana bê ti mbi aye ti pusu mbi ti sara sioni, mbi yeke sambela kozoni si mbi sara ni pëpe, ahon ti tene mbi sambela na pekoni so mbi sara sioni ni awe, na ye so amû maboko na mbi mingi.
LEGE SO MBI BÂ NZONI DÄ: Lani mbi yeke zo ti ngonzo. Ye oko, atënë ti aÉphésien 4:29-31 amû maboko na mbi ti bâ so a yeke nzoni mbi kpe “batango zo na bê, songo bê [nga na] ngonzo”. Teti so mbi manda ti kanga bê, mbi manda ti bata yanga ti mbi. Na ndo ni, wango ti Jésus so atene “tongana ala tene En, zia a ngbâ gi En” amû maboko na mbi ti mû desizion.—Matthieu 5:37.
Mama ti mbi, so na tongo nda ni ake ti tene aTémoin ti Jéhovah amanda Bible na mbi, na pekoni atene so sarango ye ti mbi anzere na lo mingi. Même lo tene: “Mbi hinga so ye so asara si mo ga nzoni wali ayeke pëpe fango ye ti mbi na babâ ti mo, me a yeke ye so mo manda na ndo ti Jéhovah.” Bê ti mbi anzere mingi ti mä tënë so lo tene so.
Fadeso, mbi bâ so mbi sara nzoni ye na yâ ti fini ti mbi. A sara angu gumbaya awe so mbi na koli ti mbi e yeke sara kusala ti ngoi kue ti fa Bible na azo. Nga, mbi yeke fa tënë da na da, na fadeso mbi bâ so mbi yeke bâ nzoni mingi na yâ ti kusala so ahon atanga ti kusala so mbi sara na yâ ti gigi ti mbi.
IRI TI LO: DENIS BUSIGIN
NGU TI LO: 30
KODORO SO A DÜ LO DÄ: RUSSIE
MBAÏ TI LO: LO YE KARATÉ MINGI
GIGI TI MBI ÂNDÖ: A dü mbi na gbata ti Perm na mbi kono na Furmanov, mbeni gbata so azo 40 000 tongaso ayeke dä na mbage ti Ivanovo na Russie. Furmanov ayeke mbeni pendere gbata so na mbeni ngoi na yâ ti ngu oko oko, couleur ti akugbe ti akeke ni ayeke changé. Ti londo na ngu 1980 tongaso ti si na ngu 2000 tongaso, sarango ye so ndia ake ague na li ni mingi na yâ ti gbata so. Sewa ti e ayeke na nginza mingi pëpe. Mbi, babâ na mama ti mbi nga na ngambe ti mbi ti koli e lango na yâ ti mbeni kete da ti chambre oko.
Na ngu mbasambala, mbi to nda ti manda karaté. Mbi ye ngia ti awanguru so mingi; fini ti mbi kue aluti gi na ndo ni. Na ngoi kue so mbi yeke na mbeni ye ti sarango ni pëpe, mbi yeke gue na da ti mandango angia ti awanguru; ni la, akamarade ti mbi kue ayeke azo ti sarango ngia ti awanguru. Na ngu 15, mbi wara ceinture ti bengba nga ngu oko na pekoni, mbi wara mbeni ceinture so ahon ti so. Mbi yeke na popo ti azo ti karaté so a soro ala ti gue ti sara mandako so a sara na Russie nga na ambeni kodoro ti Poto na ti Asie. Mbi bâ so gigi ti mbi ayeke ga nzoni, me na ngu 17, gigi ti mbi kue achangé.
Mbi na ambeni kamarade ti mbi e sara mbeni ye so ndia ake, na a gbu e dä. A bi mbi na kanga ngu use. Gigi akpengba mingi kâ. Me kâ na da ti kanga la si mbi bâ Bible. Mbi diko Genèse, Psaume nga na Fini Testament. Mbi manda même na li sambela so Jésus afa na adisciple ti lo, na mbi yeke tene ni lakue na bï kozo ti lango, mbi pensé so sarango tongaso alingbi ti mû maboko na mbi.
A zi mbi na kanga na ngu 2000, me mbi hinga ye ti sarango ni na yâ ti gigi ti mbi pëpe. Mbi to nda ti nyon mbangi. Na ngoi ni so, mama ti mbi akui. Mbi ye lo lani mingi, na a yeke ngangu na mbi ti kanga bê. Ye oko, mbi wara lege ti zia nyongo mbangi na mbi kiri mbi to nda ti gue na da ti mandango ngia ti awanguru ti sara karaté. Nga, mbi gue mbi sara kodoro na gbata ti Ivanovo. Kâ, mbi wara kua na yâ ti mbeni magasin ti kango kobe. Wali so patron ti magasin ni azia lo na ndo ni ayeke Témoin ti Jéhovah. Lo fa na mbi ambeni tâ tënë ti Bible na lo leke ti tene mbeni ita-koli aga amanda Bible na mbi lakue lakue.
LEGE SO BIBLE ACHANGÉ FINI TI MBI: Na ngoi so mbi manda Bible, ye so andu bê ti mbi mingi ayeke ti hinga so Jéhovah aleke na bê ti lo ti sara si sese aga paradis, na mbi ye lani ti sara ye so a hunda si mbi duti ande na fini na ngoi ni so. Kete na pekoni, mbi bâ so Jéhovah Nzapa ayeke na akpengba-ndia so lo ye si azo asara ye alingbi na ni. Mbi mû mingi ti gigi ti mbi ti pensé gi na ndo ti mbi wani. Me, mbi manda so Jéhovah aye si mbi bi bê na ndo ti amba ti mbi nga lo ye si mbi gi ti duti na asarango ye so mbi yeke na ni na ngoi ni so pëpe. A yeke asarango ye tongana sarango nzoni bê, ndoye nga na siriri.
Na ngoi so mbi to nda ti gbu li mingi na ndo ti aye kue so Jéhovah asara ndali ti mbi, na tapande lo mû Molenge ti lo na sandaga ndali ti siokpari ti mbi, bê ti mbi asi na singila na mbage ti Jéhovah na apusu mbi ti changé aye na yâ ti fini ti mbi. Na tapande, Psaume 11:5 amû maboko na mbi ti bâ so Jéhovah ake sarango ye ti ngangu. Tongaso, mbi zia ti bâ alimo so afa sarango ye ti ngangu nga na kengo tere. Na ndo ni mbi ke angia ti awanguru so andu sarango ye ti ngangu, atâa so a yeke kete ye pëpe ti sara tongaso. Kpengba-ndia so ayeke na 1 aCorinthien 15:33 amû maboko na mbi ti bâ so azo so mbi yeke sara kamarade na ala ayeke sara ngangu mingi na ndo ti mbi. So a bi mbi lani na da ti kanga afa biani so tënë so ayeke tâ tënë. Ni la mbi mû desizion ti zia ti sara kamarade na azo so fini ti ala aluti gi na ndo ti angia ti awanguru so andu sarango ye ti ngangu.
LEGE SO MBI BÂ NZONI DÄ: Bungbingo oko na aTémoin ti Jéhovah nga na mandango Bible amû maboko na mbi ti ga mbeni zo so ayeke sara ye na lege ni. Na tapande, aHébreu 13:5 afa na mbi ti wara ngia gi na ye so mbi yeke na ni nga ti ke ndoye ti nginza, atâa so a yeke kete ye pëpe na mbi ti sara ni. Sarango ye alingbi na wango so amû maboko na mbi ti kpe ti tene mvene nga ti nzi ye.
Mbi bâ lani tënë ti sarango kamarade na nene ni mingi. Ândö, mbi bâ tongana nyen songo ti azo abuba ndali ti so ala yeke na bê ti ye wala ala yeke na mbeto ti amba ti ala. A-Témoin ti Jéhovah ayeke pëpe azo so alingbi kue, me mbi bâ so ala yeke ne akpengba-ndia ti Nzapa na ala sara ngangu ti sara ye alingbi na awango ti Nzapa na yâ ti sarango ye ti ala na mbage ti azo. Fadeso, mbi wara ambeni tâ kamarade na popo ti ala.
Mbi yeke hunda tere ti mbi wala fini ti mbi alingbi ti duti tongana nyen tongana mbi gi fade pëpe ti sara ye alingbi na akpengba-ndia ti Bible. Peut-être mbi yeke kiri fade na da ti kanga wala mbi yeke sara sioni na azo nga mbi yeke sara pasi na ala. Ye oko, ti fadeso, mbi wara mbeni nzoni wali nga na amolenge-koli use; nga tongana mbeni sewa, e yeke na ngia mingi ti mû maboko na azo ti hinga tâ tënë na ndo ti Nzapa.
IRI TI LO: JOSÉ CARLOS PEREIRA DA SILVA
NGU TI LO: 31
KODORO SO A DÜ LO DÄ: BRÉSIL
MBAÏ TI LO: ZO TI TIRINGO NA AZO TI WARA NGINZA NA PEKONI
GIGI TI MBI ÂNDÖ: Mbi kono na yâ ti kota vaka ti Americana, na gbata ti São Paulo; a yeke mbeni vaka so azo ni ayeke lango na yâ ti agbagbara da. E yeke pëpe na nzoni ngu ti nyongo ni nga azo ayeke tuku azende kirikiri. Azo ahinga vaka so tongana mbeni ndo so a yeke sara aye ti ngangu na azo dä mingi nga na aye so ndia ake.
Na ngoi so mbi yeke kono, mbi yeke sara aye ti ngangu na azo nga mbi ye tiri mingi. Mbi yeke manke pëpe ti duti na popo ti azo so ayeke tiri na yâ ti avaka ti wara nginza na pekoni, ye so asara si azo ti vaka ni asara mbeto ti mbi mingi. Yungo bongo ti mbi, lekengo tere ti mbi nga na asarango ye ti mbi asara si azo abâ mbi tongana mbeni sioni zo. Mbi yeke nyon ye ahon ndo ni; na fani mingi mbi yeke nyon ye juska mbi hinga tere ti mbi pëpe. Mbi nga kue mbi yeke nyon mbangi tongana ti aita ti mbi ti koli. Mbeni ita ti mbi ti koli akui ndali ti so lo nyon mbangi ahon ndo ti lo.
LEGE SO BIBLE ACHANGÉ FINI TI MBI: Na ngoi so mbi tingbi na aTémoin ti Jéhovah, ala fa na mbi na yâ ti Bible so Nzapa ayeke sara ande si sese kue aga mbeni paradis (Luc 23:42, 43; Apocalypse 21:3, 4). Ala fa na mbi nga so akuâ ahinga ye oko pëpe, tongaso Nzapa ayeke se asioni zo pëpe na lê ti wâ (Zo-ti-fa-tene 9:5, 6). Atënë so asara si bê ti mbi adë mingi. Aye so mbi manda na ndo ti Nzapa asara si mbi ye tâ ti changé asarango ye ti mbi. Me a yeke kete ye pëpe na mbi ti changé: ti ke nyongo mbangi na sämba, tiringo na azo nga na sioni yanga so a hinga mbi na ni.
Ye oko, ye so amû ngangu mingi na mbi ayeke atënë ti bazengele Paul so ayeke na 1 aCorinthien 6:9-11. Aversê so afa so na ngoi ti akozo Chrétien, sarango ye ti ambeni zo ayeke tongana ti mbi so kozo ti tene ala ga aChrétien. Me aversê so atene: “Ambeni na popo ti ala ayeke ândö tongaso. Me a sukula ala si ala ga nzoni, a sara si ala ga nzoni-kue, a diko ala tongana azo ti mbilimbili na iri ti Seigneur ti e Jésus Christ nga na lege ti yingo ti Nzapa ti e.” Atënë so amû na mbi beku so mbi nga kue mbi lingbi ti changé na yâ ti fini ti mbi aye so a hunda si mbi lingbi ti nzere na lê ti Nzapa.
Na ngoi so mbi to nda ti bungbi oko na aTémoin ti Jéhovah, mbi bâ biani so ala yeke na yâ ti tâ bungbi ti vorongo Nzapa. Ala hinga aye so mbi yeke sara ândö; ye oko, ala yamba mbi na popo ti ala na ngia nga na ndoye.
LEGE SO MBI BÂ NZONI DÄ: Tongana fade mbi manda Bible pëpe nga mbi changé asarango ye ti mbi pëpe, ka peut-être mbi kui awe. Ye oko, mbi yeke na ngia ti mû maboko na mbeni oko ti aita ti mbi ti koli ti manda ye na ndo ti Bible nga ti zia lege ti nyongo mbangi. Na ndo ni, mbi sara si ambeni fami ti mbi ato nda ti manda Bible. Mbi kiri singila mingi ndali ti so mbi wara lege ti mû fini ti mbi ti sara na Nzapa, lo so ayeke bi bê mingi na e.
[Kete tënë na lembeti 23]
“Mbi mû desizion ti tene tongana bê ti mbi aye ti pusu mbi ti sara sioni, mbi yeke sambela kozoni si mbi sara ni pëpe, ahon ti tene mbi sambela na pekoni so mbi sara sioni ni awe, na ye so amû maboko na mbi mingi”