Amosoro so alondo na Nzapa

TONGANA mo yeke be-ta-zo na Nzapa, fade lo iri tënë nzoni na ndo ti mo na mungo na mo amosoro? Lo lingbi ti mû mosoro na mo, me a yeke pëpe mara ti mosoro so mo ye ti wara. Bâ tapande ti Marie, mama ti Jésus. Ange Gabriel asi na lo, na lo tene na lo so Nzapa “abâ [lo] na nzoni lê mingi” na lo yeke dü ande Molenge ti Nzapa (Luc 1:28, 30-32). Me, Marie ayeke zo ti mosoro pëpe. Na ngoi so Marie amû sandaga na peko ti dungo Jésus, lo mû “akolokoto use wala akete pigeon use”, a yeke ye so azo ti mawa ayeke mû ka lani na sandaga na Jéhovah.​—Luc 2:24; Lévitique 12:8.

So Marie ayeke lani zo ti mawa afa so Nzapa airi tënë nzoni na ndo ti lo pëpe? Ên-ën, tongana lo gue ti bâ sewa ti lo Élisabeth, “Élisabeth asi na yingo vulu, si lo sara tënë na kota go, lo tene: ‘Nzapa airi tënë nzoni na ndo ti mo na popo ti awali, na lo iri tënë nzoni na ndo ti molenge so ayeke na yâ ti mo!’ ” (Luc 1:41, 42). Marie ayeke na pasa ti ga mama ti Molenge ti Nzapa na sese ge, Molenge so Nzapa aye lo mingi.

Jésus ayeke lani mbeni zo ti mosoro pëpe. A dü lo na a bata lo gi pëpe na yâ ti sewa ti azo ti mawa, me lo yeke nga zo ti mawa na yâ ti fini ti lo kue na sese. Mbeni lâ, lo tene na mbeni koli so aye ti ga disciple ti lo, lo tene: “Anyama ti mungo kondo ayeke na adû ti ala, na andeke ti nduzu ayeke na ando ti wu tere ti ala dä. Me Molenge ti zo ayeke na mbeni ndo ti zia li ti lo dä pëpe.” (Luc 9:57, 58). Me, ye so Jésus Christ asara na gango na ndo ti sese azi lege na adisciple ti lo ti wara akota mosoro. Bazengele Paul atene: “Lo ga wayere ndali ti ala ti tene ala ga azo ti mosoro na lege ti yere ti lo.” (2 aCorinthien 8:9). Mara ti mosoro wa Jésus amû na adisciple ti lo? Ka ti e laso a yeke tongana nyen?

Mara ti mosoro wa Jésus amû?

Mingi ni, amosoro ti mitele ayeke kanga lege na zo ti duti na mabe, teti so mbeni zo ti mosoro alingbi ti zia bê ti lo gi na nginza ti lo ahon ti zia bê ti lo na Nzapa. Jésus atene: “A yeke duti ande ngangu biani na azo so ayeke na nginza ti lï na yâ ti royaume ti Nzapa!” (Marc 10:23). A yeke polele so mosoro so Jésus atene ni yeke mû na adisciple ti ni andu tënë ti nginza pëpe.

Biani, mingi ti akozo Chrétien ayeke azo ti mosoro pëpe. Tongana mbeni koli so a dü lo wazin ayeke iri nginza, Pierre atene: “Mbi yeke na argent nga na lor pëpe, me ye so mbi yeke na ni, mbi yeke mû na mo: Na iri ti Jésus Christ, zo ti Nazareth, tambela!”​—Kusala 3:6.

Atënë ti disciple Jacques afa nga so mingi ti azo so ayeke na yâ ti congrégation ti aChrétien ayeke awayere. Lo tene: “Aita so mbi ye ala mingi, ala mä mbi. A yeke Nzapa si asoro ala so dunia so abâ ala tongana awayere ti ga azo ti mosoro na lege ti mabe nga ti ga ahéritier ti royaume so lo mû zendo ni na ala so andoye lo, ni la pëpe?” (Jacques 2:5). Na ndo ni, bazengele Paul atene nga so a yeke pëpe mingi ti “azo ti ndara na lege ti mitele,” wala “azo ti ngangu,” wala azo so “a dü ala na yâ ti sewa ti akota zo” si a iri ala ti ga amembre ti congrégation ti aChrétien.​—1 aCorinthien 1:26.

Tongana amosoro so Jésus amû na adisciple ti lo ayeke amosoro ti mitele pëpe, mara ti amosoro wa la lo mû na ala? Na yâ ti mbeni mbeti so Jésus atokua na congrégation ti Smyrne, lo tene: “Mbi hinga aye ti vundu so ayeke si na mo, yere ti mo (me mo yeke na mosoro).” (Apocalypse 2:8, 9). Atâa so aChrétien ti Smyrne ayeke awayere, ala yeke na mosoro mingi so ngere ni ahon argent na lor. Ala yeke na mosoro teti so ala yeke na mabe nga ala yeke be-ta-zo na Nzapa. Mabe ayeke mbeni mosoro teti so ayeke “azo kue si ayeke na ni pëpe.” (2 aThessalonicien 3:2). Biani, azo so ayeke na mabe pëpe ayeke awayere na lê ti Nzapa.​—Apocalypse 3:17, 18.

Amosoro so zo awara na dutingo na mabe

Tongaso, na lege wa mabe ayeke ye ti kota ngere? Azo so ayeke na mabe na Nzapa abâ nzoni na lege ti “amosoro ti nzoni ye so lo yeke sara na zo, ti kangango bê ti lo ti ku nga na ti bê ti lo so ason hio hio pëpe.” (aRomain 2:4). Nga “a pardone afaute ti [ala]” teti so ala yeke na mabe na fini ti Jésus so lo mû tongana ngere so a futa ti zi na azo (aÉphésien 1:7). Na ndo ni, ala yeke na mbeni ndara so “tënë ti Christ” amû na azo so ayeke na mabe (aColossien 3:16). Tongana ala yeke sambela Nzapa na mabe, “siriri ti Nzapa so ahon ndo ti bibe kue” ayeke bata bê ti ala nga na li ti ala, na ye so asara si ala yeke na ngia nga ala wara ngia na yâ ti ye so ala yeke na ni.​—aPhilippien 4:7.

Na ndo ti anzoni ye so kue, azo so amä na bê na Nzapa na lege ti Molenge ti lo Jésus Christ ayeke na pendere beku ti fini ti lakue lakue. Azo ahinga atënë ti Jésus so mingi so atene: “Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.” (Jean 3:16). Tongana mbeni zo awara tâ hingango ye na ndo ti Babâ na Molenge ni, fade pendere beku so ayeke kpengba, teti Jésus atene: “Ti wara fini ti lakue lakue, a lingbi ala manda ti hinga mo, mo so gi mo oko ayeke tâ Nzapa, nga ti hinga lo so mo tokua lo, Jésus Christ.”​—Jean 17:3.

Atâa so tënë nzoni so Nzapa ayeke iri na ndo ti e andu mingi ni songo ti e na lo, a yeke sara nga si bibe ti e na tere ti e aduti nzoni. Bâ tapande ti Dalídio mbeni koli so ayeke na Brésil. Kozo si lo hinga tënë na ndo ti aye so Nzapa aleke ti sara, lo yeke nyon sämba mingi. Ye so asara sioni mingi na ndo ti sewa ti lo. Na ndo ni, lo yeke na kpale ti nginza. Na pekoni, lo to nda ti manda Bible na aTémoin ti Jéhovah na aye mingi achangé na yâ ti fini ti lo.

Ye so Dalídio amanda na yâ ti Bible asara si lo zia lege ti asioni sarango ye ti lo. Lo gue na li ni mingi na lege ti yingo, na lo tene: “Kozo mbi yeke gue na da ti nyongo sämba nde nde, me fadeso mbi yeke gue da na da.” Lo ga wakua ti fango tënë ti Nzapa na ngoi kue. Mara ti gbiango ye so asara si lo yeke gi pëpe na nzoni seni, me a sara si lo lingbi fadeso ti bata nginza. Dalídio atene: “Nginza so kozo mbi yeke buba na tere ti sämba, mbi mû ni fadeso ti mû maboko na amba ti mbi so ayeke na bezoin ti ye wala ti vo na aye so mbi yeke na bezoin ni.” Lo lë nga songo na azo so ayeke na bango ndo ti yingo tongana lo. Fadeso, Dalídio ayeke na siriri ti bê nga lo yeke na ngia mingi ahon ti so lo yeke na ni kozoni si lo hinga Nzapa.

Mbeni tapande ti zo so awara aye ti nzoni na dutingo na mabe na Jéhovah Nzapa ayeke Renato. Tongana mo bâ ngia so lo yeke na ni laso, mo bâ mo tene a yeke pëpe lo so ândö a sara sioni mingi na lo. Tongana mama ti lo adü lo, lo ke lo. Lo zia lo na yâ ti mbeni bozo na lo zia lo na gbe ti mbeni banc, tere ti lo kue amboko na asuku kirikiri na turungu ti lo ade ti tï pëpe. Ambeni wali use so ayeke hon abâ bozo ni so ayeke yengi na gbe ti banc. Kozoni ala bâ ti ala atene mbeni zo la agirisa kete nyau ti lo. Tongana ala bâ so ayeke fini bébé, hio ala gue na lo na mbeni da-nganga so ayeke nduru na ala ti tene a mû na lo yorö.

Mbeni oko ti awali ni ayeke Témoin ti Jéhovah, na lo sara tënë ti molenge ni na Rita so ayeke nga mbeni mba ti lo Témoin ti Jéhovah. Fani mingi Rita adü amolenge gi na kuâ ni na ye so asara lo vundu mingi, na lo yeke gi na molenge-wali oko. Lo ye mingi ti wara molenge-koli, tongaso lo yeda ti bata Renato.

Rita atene na Renato na ngoi so lo de kete so ni yeke mama ti dungo lo pëpe. Me na ndoye lo bata lo na lo sara ngangu ti fa na lo akpengba-ndia ti Bible. Tongana lo yeke kono, Bible ato nda ti gbu bê ti lo mingi. Na ndo ni, tongana lo mä tongana nyen so a sö fini ti lo bê ti lo asi na singila. Ngu ti lê ti lo ayeke sigigi lakue tongana lo diko tënë ti David so atene: “Tongana babâ na mama ti mbi azia mbi, fade L’Éternel akamata mbi.”​—Psaume 27:10.

Ti fa singila ti bê ti lo teti aye kue so Jéhovah asara teti lo, Renato awara batême na ngu 2002, nga ngu oko na pekoni, lo ga wakua ti fango tënë ti Nzapa na ngoi kue. Lo de ti hinga babâ na mama ti dungo lo pëpe, na peut-être lo yeke hinga ande ala lâ oko pëpe. Ye oko, Renato abâ so mbeni oko ti apendere matabisi so lo wara ayeke so lo hinga Jéhovah na lo mä na bê na lo tongana Babâ ti lo so andoye lo na abata lo nzoni.

Peut-être mo yeke na nzara ti duti na mbeni kpengba songo na Nzapa so alingbi ti sara si mo wara aye ti nzoni mingi na yâ ti fini ti mo. Lege azi na azo kue (azo ti mosoro na awayere) ti lë mara ti songo tongaso na Jéhovah Nzapa nga na Molenge ti lo, Jésus. Peut-être dutingo na nzoni songo na Nzapa alingbi ti ga na mosoro na zo na lege ti mitele pëpe, me a lingbi ti sara si zo awara siriri ti bê na ngia na yâ ti aye so lo yeke na ni, aye so nginza ti dunia so kue alingbi ti vo ni pëpe. Biani, atënë ti aProverbe 10:22 so ayeke tâ tënë: “Tënë nzoni ti L’Éternel asara si zo awara mosoro, na Lo zia vundu dä pëpe.”

Jéhovah Nzapa abi bê ti lo mingi na azo so aga na mbage ti lo: “O, tongana mo mä commandement ti Mbi giriri! ka siriri ti mo aga tongana ngu so asua, na mbilimbili ti mo aga tongana mapo ti kota ngu ti ingo.” (Ésaïe 48:18). Lo mû nga zendo na azo so ayeke ga na mbage ti lo na nzoni bibe nga na nzoni bê so fade lo yeke futa ala na ye mingi: “Futa ti tâ be-ti-molenge na kpengo mbeto ti L’Éternel ayeke mosoro, na yango-iri, na fini.”​—aProverbe 22:4.

[Kete tënë na lembeti 6]

Mango na bê na Nzapa asara si zo aduti na siriri ti bê, lo yeke na ngia na yâ ti ye so alingbi na lo nga lo duti na tâ ngia

[Foto na lembeti 5]

Atâa so sewa ti Jésus na sese ge ayeke sewa ti awayere, Nzapa airi tënë nzoni mingi na ndo ni