Oku mvene ni: Marie ayeke mama ti Nzapa
Tënë so abâ gigi tongana nyen? Mbeni kota bakari atene: “Tënë ti vorongo mama ti Nzapa ato nda ti maï ngangu na ngoi so . . . gbâ ti apaïen alï na yâ ti Eglize. . . . Angu mingi kozoni si apaïen so alï na yâ ti Eglize, ala yeke voro nzapa-wali so a iri lo ‘kota mama’ nga na ‘masia so ayeke mbeni nzapa.’ Ye so aleke ala kozo awe ti yeda na tënë ti vorongo ‘Mama ti Nzapa.’ ”—The New Encyclopædia Britannica (1988), Mbage 16 ni, lembeti 326 na 327.
Bible atene ti lo nyen? “Mo yeke mû ngo na mo yeke dü mbeni molenge ti koli, na a lingbi mo zia iri ti lo Jésus. Fade lo yeke ga kota na a yeke iri lo Molenge ti Lo so ayeke na nduzu na ndo ti aye kue. . . . Ndani la si molenge so mo yeke dü lo, lo yeke duti ande nzoni-kue, na a yeke iri lo Molenge ti Nzapa.”—Luc 1:31-35.
Aversê so afa polele so Marie ayeke mama ti “Molenge ti Nzapa”, me mama ti Nzapa pëpe. Marie alingbi lani ti yô na yâ ti lo Nzapa so ‘ayayu alingbi na lo pëpe’ so? (1 aGbia 8:27). Marie atene lâ oko pëpe so ni yô Nzapa na yâ ti ni. A yeke fango ye na ndo ti tënë ti Nzapa Babâ, Nzapa Molenge, na Nzapa yingo vulu la asara si li ti azo aga kirikiri na ndo ti Marie. Kota lïngö so a sara ni na gbata ti Éphèse na ngu 431, so na ngoi ni a tene Marie ayeke Théotokos (so ti tene “wali so ayô Nzapa na yâ ti lo”), wala “Mama ti Nzapa,” la apusu azo ti to nda ti voro Marie. Gbata ti Éphèse so a sara kota lïngö so dä ayeke lani mbeni ndo so a yeke voro nzapa-wali Artémis so ayeke sara si azo, anyama na aye adü gbani.
Tongaso, mingi ti aye so a yeke sara ti voro na image ti Artémis so “alondo na yayu si atï”, ye tongana kpongo molongo ti gue na mbeni ndo, alï yeke yeke na yâ ti vorongo Marie (Kusala 19:35). Mbeni sarango ye so alï na yâ ti Eglize ayeke sarango kua na a-image ti Marie nga na ti ambeni zo nde ti voro na Nzapa.
Bâ nga aversê so: Matthieu 13:53-56; Marc 3:31-35; Luc 11:27, 28
TÂ TËNË NI AYEKE SO:
Marie ayeke giriri mama ti Molenge ti Nzapa, me ti Nzapa lo mveni pëpe. Tënë ti Nzapa Babâ, Nzapa Molenge, na Nzapa yingo vulu asara si azo avoro Marie tongana Mama ti Nzapa