Asambela ti mo afa nyen na ndo ti mo?
“O Mo so Mo mä sambela, fade mi kue aga na mo.”—PS. 65:3.
1, 2. Ngbanga ti nyen awakua ti Jéhovah alingbi ti sambela lo na beku so lo yeke mä ala?
JÉHOVAH ayeke kanga mê ti lo lâ oko pëpe na asambela ti awakua ti lo so ayeke be-ta-zo. E lingbi ti duti na beku so lo yeke mä e. Même tongana aTémoin ti Jéhovah kutu na kutu ayeke sambela lo na oko ngoi, lo lingbi lakue ti mä ala oko oko kue.
2 Teti so David ahinga so Nzapa amä lo lani tongana lo voro yanga na lo, lo he bia so lo tene: “O Mo so Mo mä sambela, fade mi kue aga na mo.” (Ps. 65:3). Jéhovah akiri tënë lani na asambela ti David ngbanga ti so David ayeke mbeni wakua ti lo so ayeke be-ta-zo. A yeke nzoni e hunda tere ti e na atënë so: ‘Asambela ti mbi ti vorongo tere na Jéhovah afa so mbi zia bê ti mbi kue na lo nga so tënë ti vorongo lo agbu bê ti mbi ahon aye kue? Asambela ti mbi afa nyen na ndo ti mbi?’
Sara tere ti mo kete tongana mo yeke ga nduru na Jéhovah
3, 4. (a) A lingbi e sara tere ti e tongana nyen na ngoi so e yeke ga nduru na Nzapa? (b) A lingbi e sara nyen tongana e duti gbä ngbanga ti mbeni kota “sioye” so e sara?
3 Tongana e ye si Jéhovah akiri tënë na asambela ti e, a lingbi e sara tere ti e kete tongana e ga nduru na lo (Ps. 138:6). A lingbi e hunda Jéhovah ti bâ yâ ti asarango ye ti e ti hinga bê ti e, tongana ti so David atene lani, lo tene: “O Nzapa, tara mbi ti hinga bê ti mbi! Tara mbi ti hinga bibe ti mbi! Bâ tongana sioye ayeke na yâ mbi, na Mo fa lege ti lakue lakue na mbi.” (Ps. 139:23, 24). Zia e sambela gi senge pëpe me e yeda si Jéhovah atara e ti hinga bê ti e nga si Mbeti ti lo afa lege na e. Jéhovah alingbi ti fa na e “lege ti lakue lakue”, na mungo maboko na e ti sara ye so amû lege na e ti wara fini ti lakue lakue.
4 Ka tongana e duti gbä ngbanga ti mbeni kota “sioye” so e sara? (Diko Psaume 32:1-5.) Tongana e tara ti pete ndo ti yingo-ti-hinga ti e, ye so alingbi ti sara si ngangu ti e ahunzi legeoko tongana ti so ngu ti yâ ti mbeni keke ahule na ngoi ti ngangu buru. Ndali ti siokpari so lo sara, David agirisa ngia ti lo na âmanke tere ti lo ason. Me pupu aya lo biani na peko ti so lo fa siokpari ti lo na gigi! Tara ti bâ ngia so lani David awara tongana lo bâ so ‘a pardone kengo-ndia ti lo awe,’ na Jéhovah ahon na ndo ni. Biani, tongana zo afa siokpari ti lo na Nzapa, pupu alingbi ti ya lo, na mungo maboko so a-ancien ayeke mû na lo ayeke sara nga si lo kiri lo wara seni na lege ti yingo.—aProv. 28:13; Jacq. 5:13-16.
Voro tere na Nzapa na kiri singila na Lo
5. Tongana mbeni ye asara si e gi bê ti e mingi, a lingbi e sara nyen?
5 Tongana mbeni ye asara si e gi bê ti e mingi, a lingbi e sara ye alingbi na wango ti Paul so: “Ala gi bê ti ala na ndo ti mbeni ye pëpe, me na yâ ti aye kue, na lege ti sambela, na lege ti vorongo tere na Nzapa nga na sambela ti kiringo singila, ala hunda na Nzapa aye so agbu bê ti ala.” (aPhil. 4:6). Na ngoi so e tingbi na mbeni kpale wala a yeke sara ngangu na e, a lingbi e voro tere na Jéhovah ti mû maboko na e nga ti fa lege na e.
6, 7. Ndali ti aye wa si a lingbi e kiri singila na Nzapa na yâ ti asambela ti e?
6 Me tongana e ku gi na ngoi so e yeke na bezoin ti mbeni ye si e sambela, sarango tongaso ayeke fa nyen na ndo ti songo ti e na Jéhovah? Paul atene so na ngoi so e yeke hunda na Nzapa aye so agbu bê ti e, a lingbi e sara nga sambela ti “kiringo singila”. Biani, e yeke na raison ti fa atënë ti bê ti e tongana ti David so atene: “O L’Éternel, kota ndo, na ngangu, na gloire, na kozo ndo, na yango-iri kue ayeke ti Mo. Ye kue so ayeke na ayayu na ye kue na sese ayeke ti Mo. O L’Éternel, ndo ti komande ayeke ti Mo, Mo yeke Li ti ye kue. . . O Nzapa ti e, e mû merci na Mo, na e sepela gloire ti iri ti Mo fadeso.”—1 Chron. 29:11-13.
7 Jésus akiri lani singila na Nzapa ndali ti kobe, nga ndali ti mapa na vin so lo sara na kua na ngoi ti Kobe ti Seigneur (Mat. 15:36; Luc 22:18, 19). A lingbi e kiri singila tongana ti Jésus so, me nga a lingbi e kiri singila na Jéhovah ndali ti “akusala ti kpene ti Lo so Lo sara teti amolenge ti azo”, ndali ti “kpengba-tene ti [Lo] ti mbilimbili”, nga ndali ti atënë ti lo so a wara ni laso na yâ ti Bible.—Ps. 107:15; 119:62, 105.
Sambela ndali ti ambeni zo
8, 9. Ngbanga ti nyen a lingbi e sambela ndali ti aita ti e ti bungbi?
8 Kite ayeke pëpe so e yeke sambela ndali ti e wani, me a yeke nzoni e sambela nga ndali ti ambeni zo, même ndali ti ambeni ita so e hinga ala na iri ti ala pëpe. Atâa so bazengele Paul ahinga aita ti Colosses kue pëpe, lo tene: “Lakue tongana e yeke sambela teti ala, e yeke kiri singila na Nzapa Babâ ti Seigneur ti e Jésus Christ, teti e mä tënë ti mabe ti ala na Christ Jésus nga ndoye so ala yeke na ni na mbage ti azo kue so ayeke nzoni-kue.” (aCol. 1:3, 4). Paul asambela nga ndali ti aChrétien ti Thessalonique (2 aThes. 1:11, 12). Mara ti asambela tongaso afa ye mingi na ndo ti songo ti e na Nzapa nga na ndo ti lege so e yeke bâ na aita ti e na yâ ti mabe.
9 Asambela so e sara ni ndali ti aita so a soro ala ti gue na yayu nga ndali ti akamarade ti ala “ambeni ngasangbaga” ayeke fa polele na gigi so e ye gi nzoni ti bungbi ti Jéhovah (Jean 10:16). Paul ahunda lani na amba ti lo Chrétien ti sambela tongaso si ‘a mû na lo ngangu ti sarango tënë, na ngoi so lo zi yanga ti lo ti sara tënë na kamene pëpe na ndo ti tënë so Nzapa ahonde nda ni, so ayeke nzoni tënë’. (aÉph. 6:17-20). E yeke sambela ka tongaso ndali ti aita ti e ti bungbi?
10. Ti sambela ndali ti ambeni zo alingbi ti sara nyen na ndo ti e?
10 Ti sambela ndali ti ambeni zo alingbi ti gbian bango ndo ti e na mbage ti ala. Tongana e ye tënë ti mbeni ita pëpe me si e sambela ndali ti lo, fade e kiri ti ke lo tongana nyen? (1 Jean 4:20, 21). Mara ti asambela tongaso ayeke kpengba zo nga a yeke sara si e duti lakue beoko na aita ti e. Na ndo ni, mara ti asambela tongaso afa so e yeke na mara ti ndoye so Christ ayeke na ni (Jean 13:34, 35). Ndoye so ayeke mbeni mbage ti lengo ti yingo ti Nzapa. Na yâ ti asambela ti e wani, e yeke hunda ti wara yingo vulu? E yeke hunda na Jéhovah ti mû maboko na e ti lë lengo ti yingo ni? Lengo ni so ayeke “ndoye, ngia, siriri, kangango bê ti ku, sarango nzoni na zo, bê so aye gi ti sara nzoni na zo, mabe, sarango ye na ngangu pëpe, kangango nzara ti bê.” (Luc 11:13; aGal. 5:22, 23). Tongana e sara tongaso, fade atënë ti yanga ti e nga na asarango ye ti e ayeke fa so e yeke tambela na lege ti yingo nga e yeke duti na fini na lege ti yingo.—Diko aGalate 5:16, 25.
11. Ngbanga ti nyen mo lingbi ti tene so a yeke na lege ni ti hunda na ambeni ita ti sambela ndali ti e?
11 Tongana bê ti amolenge ti e aye ti pusu ala ti triché na ngoi ti adevoir na da-mbeti si e hinga tënë ni, a lingbi e sambela ndali ti ala nga e mû maboko na ala na lege ti ambeni versê si ala sara ye mbilimbili nga ala kpe ti sara mbeni ye ti sioni. Paul awa aChrétien ti Corinthe, lo tene: “E sambela Nzapa si ala lingbi ti sara mbeni ye ti sioni oko pëpe.” (2 aCor. 13:7). Mara ti asambela tongaso ayeke nzere na Jéhovah na afa so e yeke na anzoni sarango ye. (Diko aProverbe 15:8.) E lingbi ti hunda na ambeni ita ti sambela ndali ti e, tongana ti so bazengele Paul asara ni ândö. Lo tene: “Ala sambela ndali ti e, teti e hinga e tene e yeke na nzoni yingo-ti-hinga, ngbanga ti so e ye ti sara ye mbilimbili na yâ ti aye kue.”—aHéb. 13:18.
Ambeni ye nde so asambela ti e ayeke fa na ndo ti e
12. A lingbi atënë wa agbu bê ti e mingi na yâ ti asambela ti e?
12 Asambela ti e afa so e yeke na ngia nga so e yeke aTémoin ti Jéhovah so ayapu na kusala ti lo? Tongana e yeke voro tere na Jéhovah, e yeke luti mingi na ndo ti sarango ye so bê ti lo aye? E yeke luti mingi na ndo ti kusala ti fango tënë ti Royaume? ti droit ti Nzapa ti komande dunia kue? Nga e yeke luti mingi na ndo ti sarango si iri ti lo aga nzoni-kue? A lingbi atënë so si agbu bê ti e mingi tongana e yeke sambela, tongana ti so Jésus afa ni lani na yâ ti mbeni sambela; lo to nda ni na atënë so: “Babâ ti e so mo yeke na yayu, zia a sara si iri ti mo aga nzoni-kue. Zia royaume ti mo aga. Zia a sara ye so bê ti mo aye, na yayu legeoko nga na ndo ti sese.”—Mat. 6:9, 10.
13, 14. Asambela ti e afa nyen na ndo ti e?
13 Asambela ti e amû lege na Nzapa ti hinga aye so apusu e ti sara ye, aye so agbu bê ti e nga na anzara ti bê ti e. Jéhovah ahinga ye so ayeke na yâ ti bê ti e. A-Proverbe 17:3 atene: “Ta ayeke ti lungula saleté ti argent, na four ayeke teti lor, me L’Éternel atara bê ti azo.” Nzapa abâ bê ti zo (1 Sam. 16:7). Lo hinga tongana nyen e yeke bâ abungbi ti e, fango tënë nga na aita ti e ti koli na ti wali. Jéhovah ahinga nzoni mingi lege so e yeke bâ na “aita” ti Christ (Mat. 25:40). Tongana ye so e hunda na yâ ti sambela ti e agbu bê ti e biani, lo yeke hinga, me tongana e ye ti kiri gi na ndo ti oko tënë fani mingi, lo yeke hinga. Jésus atene : “Tongana mo yeke sambela, mo kiri gi na ndo ti tënë oko fani mingi pëpe. Azo ti amara ayeke sara tongaso, ngbanga ti so ala bâ ti ala atene na sarango tënë mingi si fade Nzapa ayeke mä ala [andâ lo yeke mä ti lo ala pëpe].”—Mat. 6:7.
14 Atënë ti yâ ti asambela ti e ayeke fa nga wala e zia bê ti e kue na Nzapa. David atene: “Mo [Jéhovah, Mo] yeke Ndo Ti Bata Tere ti mbi, Tour Ti Ngangu ti honde mbi ngbanga ti wato. Fade mbi duti na Tabernacle ti Mo lakue. Fade mbi honde Tere ti mbi na gbede ti kpangbi ti Mo.” (Ps. 61:4, 5). Tongana Nzapa ‘agbara ande tente ti lo na ndo ti e’, e yeke bâ so mbeni ye ti sioni ti si na e ayeke dä pëpe nga e yeke bâ tongana nyen lo yeke bâ ndo na ndo ti e (Apoc. 7:15). So tâ nzerengo tere si e wara ti ga nduru na Jéhovah na yâ ti sambela na beku so lo yeke ‘na tere ti e’ na ngoi ti tara kue so asi na mabe ti e!—Diko Psaume 118:5-9.
15, 16. Sambela alingbi ti mû maboko na e ti hinga nyen na ndo ti aye so apusu e ti sara nzara ti sara ambeni kusala na yâ ti bungbi?
15 Tâ tënë ti bê ti e so e yeke fa polele na yâ ti sambela so e yeke sara ni na Jéhovah na ndo ti atâ ye so apusu e ti duti na nzara ti sara mbeni ye alingbi ti mû maboko na e ti hinga tâ tënë na ndo ti aye so apusu e ti sara ye ni so. Na tapande, tongana e yeke tâ na nzara ti ga ancien, ye so apusu e ayeke nzara ti mû maboko na amba ti e nga ti sara kue ti maï aye so andu Royaume? wala âmanke a yeke nzara ti wara “kota ndo” wala nzara ti “sara mokonzi” na ndo ti aita la asara e? A yeke tongaso la pëpe si a lingbi aye atambela na popo ti azo ti Jéhovah. (Diko 3 Jean 9, 10; Luc 22:24-27.) Tongana e yeke na asioni nzara ti bê, tenengo tâ tënë na yâ ti asambela ti e na Jéhovah alingbi ti fa ni na gigi nga ti mû maboko na e ti zi ni kozo si bibe ni so aluti ngangu na yâ ti bê ti e.
16 Aita-wali so amû koli awe alingbi ti duti na nzara ti tene akoli ti ala aga awakua ti mungo maboko wala même a-ancien. Aita-wali so alingbi ti sara ye alingbi na atënë so ala tene na yâ ti asambela ti ala na sarango kue ti tene ala wani aduti na mbeni nzoni tambela. Ye so ayeke kota ye mingi, teti tënë ti yanga nga sarango ye ti azo ti sewa ti mbeni ita-koli ayeke sara mbeni ye na ndo ti lege so aita ti congrégation ayeke bâ na lo.
Sambela so a sara ni na gbele gbâ ti azo
17. Tongana e ye ti sambela, ngbanga ti nyen e yeke nga na bezoin ti duti gi e oko?
17 Fani mingi, Jésus agboto tere ti lo na popo ti azo mingi ti gue gi lo oko ti sambela Babâ ti lo (Mat. 14:13; Luc 5:16; 6:12). Ngoi na ngoi, e nga kue e yeke na bezoin ti duti gi e oko. Ti sambela na gbe ti go na mbeni ndo so ayeke kpo alingbi ti mû lege na e ti mû adesizion so anzere na Jéhovah na ayeke mû maboko na e ti kpengba na yâ ti vorongo so e yeke voro na lo. Me Jésus asambela nga na gbele azo, na a yeke nzoni ti hinga tongana nyen si e lingbi ti sara ni na tâ lege ni.
18. Ambeni ye wa a lingbi aita-koli abata na li ti ala na ngoi so ala yeke sambela na iri ti congrégation?
18 Na ngoi ti abungbi, aita-koli so ayeke be-ta-zo ayeke na pasa ti sambela na iri ti congrégation (1 Tim. 2:8). Na hunzingo ti sambela ni, a lingbi tanga ti aita ni awara lege ti tene “amen” so nda ni aye ti tene “zia a duti tongaso.” Me ti tene ala sara tongaso, a lingbi ala yeda na ye so ita ni atene na yâ ti sambela ni so. Mbeni tënë ti mbana wala so a tene ni na ndara pëpe ayeke pëpe na yâ ti tapande ti sambela so Jésus afa ni lani (Luc 11:2-4). Nga, na yâ ti sambela ni, Jésus afa pëpe abezoin kue wala akpale kue so azo so ayeke mä lo lani ayeke na ni. Tënë ti ye so agbu bê ti zo wani a yeke nzoni a tene ni na yâ ti sambela so zo ni lo oko si ayeke sara ni, me pëpe na yâ ti sambela so a sara ni na gbele gbâ ti azo. Tongana e yeke sambela na gbele gbâ ti azo, a lingbi e kpe ti yôro na yâ ti sambela ni atënë so abâ fade azo kue pëpe.
19. A lingbi e sara ye tongana nyen na ngoi so mbeni ita si ayeke sambela ndali ti e?
19 Tongana e yeke na popo ti azo so abungbi si e yeke mä sambela so mbeni ita ayeke sara ndali ti e, e yeke na bezoin ti fa so e “kpe mbeto ti Nzapa”. (1 Pi. 2:17). Ambeni ye ayeke dä so ayeke sioni pëpe ti sara ni na ambeni ngoi nga na ambeni ndo me so ayeke na lege ni pëpe ti sara ni na ngoi ti abungbi ti e (Zo-ti. 3:1). Na tapande, mbeni zo aye fade ti tene azo kue agbu maboko ti mba na ngoi so mbeni ita ayeke sambela ndali ti ala. Me ye so a lingbi ti son bê ti ambeni zo (na tapande ambeni fini zo so aga na bungbi) wala ti sara si a yeke ngangu na ala ti zia li ti ala na ndo ti sambela ni. Peut-être ambeni koli na wali alingbi ti gbu maboko ti tere yeke na ngoi ti sambela ni, me tongana ala yeke su yanga ti tere na ngoi ti sambela ni, ambeni zo so abâ ala alingbi ti pika gere ndali ti mara ti sarango ye tongaso. Ala lingbi ti pensé so koli na wali so ayeke bi bê gi na ndo ti bolingo ti ala ahon ti duti na mbeto ti Jéhovah. Teti so e ne Jéhovah mingi, zia e “sara ye kue teti gloire ti Nzapa” na e kpe asarango ye so alingbi ti son bê ti zo wala ti sara si lo pika gere ti lo.—1 aCor. 10:31, 32; 2 aCor. 6:3.
Ka tongana e hinga pëpe tënë ti tene?
20. Mo yeke fa nda ti aRomain 8:26, 27 tongana nyen?
20 A lingbi ti si so e hinga pëpe tënë ti tene na yâ ti asambela ti e wani. Paul atene: “Kpale ni ayeke so: ye so a lingbi e sambela ndali ni tongana e yeke na bezoin ni, e hinga ni pëpe. Me yingo [vulu] wani ayeke hunda teti e na atënë ti dema so asigigi pëpe. Me [Nzapa] so ayeke bâ yâ ti bê ahinga nda ti yingo.” (aRom. 8:26, 27). Jéhovah apusu azo ti sû na yâ ti Mbeti ti Nzapa gbâ ti asambela. Lo yeda na asambela so a sû na gbe ti yingo ti lo, mo bâ mo tene a yeke e la e tene ni, na lo yeke sara ye alingbi na ni. Nzapa ahinga e na lo hinga nda ti aye so lo pusu yingo ti lo ti fa ni na lege ti awasungo Bible. Jéhovah akiri tënë na asambela ti e ti vorongo tere na lo tongana yingo vulu “ahunda” teti e. Me na ngoi so e yeke hinga tënë ti Mbeti ti Nzapa nzoni ahon ti kozo, ye so a lingbi e sambela ndali ni ayeke ga hio na li ti e.
21. E yeke bâ ande tënë wa na yâ ti article ti peko?
21 Tongana ti so e bâ fade awe, asambela ti e ayeke fa ye mingi na ndo ti e wani. Na tapande, a lingbi ti fa biani wala e yeke tâ na nzoni songo na Jéhovah nga wala e hinga Mbeti ti Nzapa nzoni (Jacq. 4:8). Na yâ ti article ti peko, e yeke bâ ande ambeni sambela nga na atënë ti yâ ti ambeni sambela so a sû ni na yâ ti Bible. Ye so e yeke bâ ande na yâ ti Bible na ndo ti tënë so alingbi ti sara nyen na ndo ti lege so e yeke ga nduru na Nzapa na yâ ti sambela?
Mo yeke kiri tënë tongana nyen?
• A lingbi e sara tere ti e tongana nyen na ngoi so e yeke ga nduru na Nzapa?
• Ngbanga ti nyen a lingbi e sambela ndali ti aita ti e ti bungbi?
• Asambela ti e afa nyen na ndo ti e nga na ndo ti aye so apusu e ti sara ye?
• A lingbi sarango ye ti tere ti e aduti tongana nyen na ngoi ti asambela?
[Foto na lembeti 11]
Mo yeke sepela Jéhovah nga mo yeke kiri singila na lo lakue?
[Foto na lembeti 13]
A lingbi sarango ye ti tere ti e na ngoi ti asambela ane Jéhovah lakue