Atënë so azo ahunda
Teti so Jéhovah ake vorongo yanda, ngbanga ti nyen lo se pëpe Aaron so aleke kete bagara ti lor?
Na ngoi so Aaron aleke kete bagara ti lor, tongana ti so a sara tënë ni na Exode chapitre 32, lo doro ndia ti Nzapa na ndo ti tënë ti vorongo yanda (Ex. 20:3-5). Ye so asara si “ngonzo ti L’Éternel alondo na tere ti Aaron ti fâ lo. Na lâ ni kâ, [Moïse a]sambela teti Aaron nga.” (Deut. 9:19, 20). Sambela ti Moïse zo ti mbilimbili ‘asara aye mingi’ ndali ti Aaron? (Jacq. 5:16). E lingbi ti tene so Jéhovah akiri tënë na sambela ti Moïse. Peut-être Jéhovah ase Aaron pëpe ndali ti so Moïse avoro tere na lo nga ndali ti ambeni raison use.
Mbeni raison ni alingbi ti duti so Aaron aduti be-ta-zo teti angu mingi. Na ngoi so Jéhovah atokua Moïse ti gue na gbele Pharaon na ti mû azo ti Israël na sese ti Égypte ti sigigi na ala, lo soro Aaron ti gue oko na Moïse na ti sara tënë na place ti lo (Ex. 4:10-16). Akoli use so amä yanga na ala gue na gbele Pharaon gbia ti Égypte fani mingi, ala bâ pasi mingi ndali ti kpengba li ti Pharaon. Tongaso, na ngoi so Aaron ayeke na Égypte, a hinga lo tongana zo so ayeke be-ta-zo nga lo mû bê ti lo kue na kusala ti Jéhovah.—Ex. 4:21.
Zia e bâ nga aye so ague na Aaron ti leke kete bagara ti lor. Moïse ague lani na li ti Hoto ti Sinaï a sara lango 40 awe. Tongana “azo abâ so Moïse angbâ na li ti hoto, lo zu fade pëpe,” ala pusu Aaron ti sara mbeni yanda teti ala. Aaron ayeda na lo sara mbeni kete bagara ti lor (Ex. 32:1-6). Ye oko, aye so Aaron asara na pekoni afa so lo mû bê ti lo kue pëpe na vorongo yanda ni. Peut-être lo tï na yâ ti vorongo yanda ni ndali ti so ala forcé lo. Na ngoi so Moïse aga ti hunzi tënë ti vorongo yanda ni na mbeni lege so ayeke ngangu mingi, amolenge ti Lévi kue, so Aaron nga ayeke na popo ni, amû mbage ti Jéhovah na bê ti ala kue. A fâ azo saki ota so ayôro tere ti ala na yâ ti vorongo yanda ni.—Ex. 32:25-29.
Na pekoni Moïse atene na azo ni, lo tene: “I sara kota siokpari awe.” (Ex. 32:30). Na lê ti Jéhovah, a yeke gi pëpe Aaron lo oko la tënë ayeke na li ti lo. Jéhovah asara nzoni bê na lo nga na azo ni.
Na peko ti kpale so asi ndali ti kete bagara ti lor, Jéhovah amû yanga ti tene a zia Aaron ti sara kusala tongana kota prêtre. Nzapa atene na Moïse, lo tene: “Mo yü Aaron na bongo nde nde ti nzoni-kue, na mo sa mafuta na li ti lo, mo zia lo nde teti Mbi, si lo lingbi sara na Mbi na kusala ti sacrificateur” wala ti prêtre (Ex. 40:12, 13). A yeke polele so Jéhovah apardone Aaron ndali ti wokongo ti lo. Aaron ayeke lani zo so tâ vorongo agbu bê ti lo ngangu, me lo yeke pëpe mbeni zo so asara kpengba-li ti voro yanda.