Paradis so Bible asara tënë ni ayeke na ndo wa? — BIBLIOTHÈQUE NA NDÖ TI INTERNET Watchtower

Azo ahunda atene . . .

Paradis so Bible asara tënë ni ayeke na ndo wa?

▪ Jésus atene na mbeni koli so aga nduru ti kui na so afa polele so lo mä na bê na Jésus, lo tene: “Mo yeke duti ande na mbi na Paradis.” (Luc 23:43). Koli ni so ayeke duti ande na ndo wa? Paradis ni ayeke na yayu, wala ayeke na sese wala ayeke na mbeni ndo na popo ti yayu na sese so azo aduti dä ti ku fango ngbanga?

Akotara ti e ayeke lani na yâ ti Paradis. Bible atene: “L’Éternel Nzapa alu yaka na yâ Éden na mbage ti est; na zo so Lo sara lo, Lo zia lo dä. L’Éternel Nzapa akamata zo, Lo zia lo na yaka ti Éden ti leke na ti bata yaka so.” (Genèse 2:8, 15). Na ngoi so a kiri peko ti atënë so na Grec, a kiri na peko ti mbupa “yaka” na pa·raʹdei·sos, so na Sango ayeke “paradis.”

Legeoko tongana ti so mbeni koli na wali ti lo ayeke kono yâ ti da ti ala na ngoi so ala wara gbâ ti amolenge, a ku lani ti tene kozo babâ na mama ti e akono yâ ti Paradis so ayeke na Éden tongana sewa ti azo aga kota. Nzapa atene na ala lo tene: “I si singo na sese, i sara si ye kue aga na gbe gere ti i.”—Genèse 1:28.

Tongaso, ye so Wasarango e aye lani ayeke ti tene azo angbâ na fini na ala dü amolenge na yâ ti Paradis na sese ge. Ala yeke ngbâ lani na fini lakue lakue na ndo ti sese nga ala yeke na bezoin ti adü ti kuâ pëpe. Sese ayeke ga lani ndo so azo kue ayeke duti dä teti lakue lakue. A yeke ye ti dongo bê pëpe so apendere ye so Nzapa asara so ayeke na ndo ti sese anzere na e mingi! A créé e ti duti na fini na ndo ti mbeni pendere sese.

Ye so bê ti Nzapa aye so achangé? Oko pëpe. Teti so Jéhovah adë bê ti e lo tene: “Fade tënë so asigigi na yanga ti Mbi ayeke legeoko tongaso; fade tënë ti Mbi akiri na Mbi senge pëpe, me a sara ye so Mbi ye, na fade tënë ni awu na kusala so Mbi to lo dä.” (Ésaïe 55:11). Ngu 3 000 na ndo ni na pekoni so Nzapa aleke zo, Bible asara tënë ti “Nzapa so aleke na asara sese” atene: “Lo sara sese ni pëpe ti ga ye so afuti” me lo “leke sese so si azo alingbi duti dä”. (Ésaïe 45:18). Ye so bê ti Nzapa aye achangé pëpe. Sese ayeke ga ande mbeni paradis.

A yeke nzoni ti hinga so mingi ti aversê ti Bible so asara tënë ti Paradis asara gi tënë ti fini na ndo ti sese. Na tapande, prophétie ti Ésaïe atene: “Fade azo asara da, na ala duti na yâ ni; fade ala lu vigne na yaka, na ala te lê ni.” (Ésaïe 65:21). A yeke sara da na ndo wa? A yeke lu vigne na ndo wa? Alê ti keke ti tengo ni ayeke na ndo wa? A yeke na sese. A-Proverbe 2:21 atene polele: “Azo ti mbilimbili, fade ala duti na sese so”.

Jésus nga kue asara tënë ti paradis ti sese. Tâ tënë, lo mû nga zendo ti paradis ti yayu, me a yeke ndali ti mbeni kete wungo ti azo so a soro ala (Luc 12:32). Na peko ti kuâ ti ala, a yeke zingo ala ti gue na Paradis ti yayu ti bungbi oko na Christ ti komande na ndo ti Paradis so ayeke na sese (Apocalypse 5:10; 14:1-3). Agbia so ayeke sara ande kue ti komande nzoni na ndo ti Paradis so ayeke na sese na ti bata ni alingbi na aye so Nzapa afa.

Jésus ahinga so a yeke ye so bê ti Nzapa aye lani teti sese la. Kozoni kue, lo yeke lani na yayu na tere ti Babâ ti lo na ngoi so a leke yaka ti Éden. Laso lege azi na azo kue so amä na bê ti wara ande fini na yâ ti paradis ti sese (John 3:16). Jésus amû zendo na mara ti azo tongaso, lo tene: “[Ala] yeke duti ande na mbi na Paradis.”—Luc 23:43.

[Lingu ti foto na lembeti 10]