Bâ ye so Bible afa

Nzapa ayeke zo wa?

Article so ayeke sigigi na ahundango tënë so mo lingbi ti hunda tere ti mo na ni nga ayeke fa na mo ndo so mo lingbi ti wara akiringo tënë ni dä na yâ ti Bible ti mo. A yeke nzere mingi na aTémoin ti Jéhovah ti sara lisoro na mo na ndo ti akiringo tënë ni.

1. Nzapa ayeke zo wa?

Tâ Nzapa ayeke Lo so asara aye kue. Bible atene lo yeke “Gbia ti lakue lakue,” so ti tene lo yeke na tongo nda ni pëpe nga lo yeke na kongo nda ni pëpe (Apocalypse 15:3). Teti so fini kue alondo na Nzapa, a lingbi e voro gi lo oko.​—Diko Apocalypse 4:11.

2. Nzapa ayeke tongana nyen?

Mbeni zo ade ti bâ Nzapa pëpe ngbanga ti so lo yeke Yingo, so ti tene lo yeke na mbeni fini so ayeke kota mingi ahon acréature so ayeke na ndo ti sese (Jean 1:18; 4:24). E yeke hinga asarango ye ti tere ti Nzapa na lege ti aye so lo sara. Na tapande, tongana e gbu li ti e na ndo ti lege so a leke na alê ti keke nga na afleur so ayeke nde nde, e yeke bâ ndoye nga na ndara ti Nzapa. Kota ti dunia afa na e ngangu ti Nzapa.​—Diko aRomain 1:20.

E lingbi même ti hinga ye mingi na ndo ti asarango ye ti tere ti Nzapa na lege ti Bible. Na tapande, Bible afa na e aye so Nzapa aye nga na aye so lo ke, lege so lo yeke sara ye na azo nga tongana nyen la lo yeke sara ye na yâ ti aye nde nde so asi.​—Diko Psaume 103:7-10.

3. Nzapa ayeke na iri?

Jésus atene: “Babâ ti e so mo yeke na yayu, zia a sara si iri ti mo aga nzoni-kue.” (Matthieu 6:9). Atâa so azo airi Nzapa na airi mingi, lo yeke gi na iri oko. A yeke di iri ti lo na alege nde nde na yâ ti ayanga ti kodoro oko oko kue. Na Sango, mingi ni e yeke tene “Jéhovah” wala “Yahweh.”​—Diko Genèse 22:14.

Na yâ ti aBible mingi a zi iri ti Nzapa na a zia na place ni Seigneur wala Nzapa. Me na ngoi so a sû Bible giriri, a yeke wara iri ti Nzapa na yâ ni nduru na 7000. Jésus asara si azo ahinga iri ti Nzapa na sarango kusala na ni na ngoi so lo yeke zi nda ti Mbeti ti Nzapa na azo. Lo mû maboko na azo ti hinga Nzapa.​—Diko Jean 17:26.

4. Jéhovah ayeke pensé nga na e la?

Jéhovah ayeke pensé na e na lege so lo yeke mä asambela ti e lo wani (Psaume 65:3). So apasi ahon ndo ni so aye ti tene so Nzapa ayeke pensé na e pëpe? Ambeni zo atene so Nzapa la ayeke tara e na lege ti apasi, me tënë so ayeke tâ tënë pëpe. Bible atene: “Nzapa alingbi sara sioye kete pëpe.”​—Job 34:10; diko Jacques 1:13.

Nzapa ane e azo na lege so lo mû lege na e ti soro ye e wani. A nzere na e pëpe ti mû liberté so e yeke na ni ti gi ti sara na Nzapa? (Josué 24:15). Pasi ayeke mingi ngbanga ti so azo mingi ayeke sara ye ti sioni na amba ti ala. Bê ti Jéhovah ason ti bâ aye ti kirikiri tongaso.​—Diko Genèse 6:5, 6.

Na yâ ti kete ngoi, Jéhovah ayeke mû Jésus ti tene lo zi apasi nga na azo so ayeke na gunda ni. Me ti ku na ngoi ni so, Jéhovah ayeke na nzoni raison ti zia si pasi angbâ teti kete ngoi. Mbeni article so ayeke ga ande na yâ ti Tour ti Ba Ndo ti peko ayeke fa ngbanga ti nyen Nzapa azia lege na pasi.​—Diko Ésaïe 11:4.

5. Nyen la Nzapa aye ti tene e sara?

Jéhovah aleke e na lo zia na yâ ti tere ti e ngangu ti tene e hinga lo na e ndoye lo. Lo ye si e hinga tâ tënë na ndo ti lo (1 Timothée 2:4). Tongana e manda Bible, e lingbi ti hinga Nzapa nzoni tongana Kamarade ti e.​—Diko aProverbe 2:4, 5.

Teti so Jéhovah la amû na e fini, a yeke nzoni e ndoye lo mingi ahon tanga ti azo kue. E lingbi ti fa na Nzapa so e ndoye lo na sarango tënë na lo na yâ ti sambela nga na sarango aye so lo hunda na e (aProverbe 15:8). Jéhovah ahunda na e ti sara ye na amba ti e na ndoye.​—Diko Marc 12:29, 30; 1 Jean 5:3.

Ti hinga ye mingi na ndo ni, bâ chapitre 1 ti buku Bible afa nyen biani?, so aTémoin ti Jéhovah asigigi na ni.

[Foto na lembeti 23]

Mbeni nzoni raison ayeke dä ti tene a zia lege na pasi teti kete ngoi?