Jésus: ngbanga ti nyen lo kui?

“Molenge ti zo aga . . . ti mû âme ti lo tongana ngere so a futa ti zi na azo mingi.”​—MARC 10:45.

JÉSUS ahinga ye so ayeke ku lo. Lo hinga so lo yeke duti na siriri na yâ ti fini ti lo pëpe. Me lo hinga so lo yeke kui ande kuâ ti ngangu na ngoi so lo yeke wara ngu 30 na ndo ni na lo leke tere ti lo ndali ni.

Bible abâ kuâ ti Jésus na nene ni mingi. Mbeni buku atene so a sara tënë ti kuâ ti Jésus droit tongaso fani 175 na yâ ti mbage ti Mbeti ti Nzapa so aChrétien asû ândö na Grec, wala Fini Testament. Ye oko, ngbanga ti nyen a lingbi Jésus abâ pasi na lo kui? A lingbi e hinga ni ndali ti so kuâ ti Jésus alingbi ti sara ye mingi na yâ ti fini ti e.

▪ Ye so Jésus aku ti tene asi na lo. Na yâ ti tanga ti ngu ti fini ti Jésus na ndo ti sese ge, fani mingi lo sara tënë na adisciple ti lo na ndo ti pasi nga na kuâ so ayeke ku lo. Na ngoi so lo yeke gue na Jérusalem ti sara ndangba matanga ti Pâque ti lo, lo tene na abazengele ti lo 12 lo tene: “Fade a yeke zia Molenge ti zo na maboko ti aprêtre-mokonzi nga na ascribe. Fade ala yeke fâ ngbanga ti kuâ na li ti lo na fade ala yeke zia lo na maboko ti azo ti amara, na fade ala he lo, ala tuku ngu ti yanga na tere ti lo, ala pika lo na zaza nga ala fâ lo.”a (Marc 10:33, 34). Ngbanga ti nyen Jésus ahinga so aye so ayeke si ande na lo biani?

Jésus ahinga nzoni mingi gbâ ti aprophétie ti yâ ti mbage ti Mbeti ti Nzapa so a sû ândö na Hébreu so afa tongana nyen lo yeke kui ande (Luc 18:31-33). Bâ ambeni prophétie ni nga na aversê so afa tongana nyen ala ga tâ tënë.

Aye so ayeke si na Messie:

▪ A yeke kä lo teti alê ti nginza ti argent 30.​—ZACHARIE 11:12; MATTHIEU 26:14-16.

▪ A yeke pika lo nga a yeke tuku ngu ti yanga na ndo ti lo.​—ÉSAÏE 50:6; MATTHIEU 26:67; 27:26, 30.

▪ A yeke kanga lo na ndo ti keke.​—PSAUME 22:17; MARC 15:24, 25.

▪ Azo adiko asioni tënë na tere ti lo na ngoi so lo yeke na ndo ti keke.​—PSAUME 22:8, 9; MATTHIEU 27:39-43.

▪ A fâ lo sân ti tene yâ ti mbeni oko ti abio ti lo akungbi.​—PSAUME 34:21; JEAN 19:33, 36.

Aprophétie so nga na ambeni mingi aga tâ tënë na ndo ti Jésus. Mbeni lege nde ti tene Jésus lo wani lo sara si aprophétie so aga tâ tënë ayeke dä pëpe. So aprophétie so kue aga tâ tënë na ndo ti Jésus afa biani so Nzapa la atokua lo.b

Me ngbanga ti nyen a lingbi Jésus abâ pasi nga lo kui?

▪ Jésus akui ti leke ambeni kota tënë. Jésus ahinga akota tënë so andu zo so ayeke na droit ti komande dunia kue so abâ gigi lani na yaka ti Éden. Adam na Ève azia si mbeni ange so ake yanga asara ngangu na ndo ti ala na ala ke yanga ti Nzapa. Ala dë kite na ndo ti droit ti Nzapa ti komande dunia kue, wala lege so lo yeke komande na ni. Siokpari so ala sara asara nga si mbeni hundango tënë abâ gigi: azo ayeke ngbâ be-ta-zo na Nzapa na yâ ti tara?​—Genèse 3:1-6; Job 2:1-5.

Jésus akiri tënë na akota tënë use so: Jéhovah la ayeke Gbia ti dunia nga azo alingbi ti ngbâ be-ta-zo na Nzapa. So Jésus amä tâ yanga nzoni “juska na kuâ . . . na ndo ti keke ti pasi”, lo fa so Nzapa la ayeke Gbia ti dunia (aPhilippien 2:8). Jésus afa nga so mbeni zo so alingbi kue alingbi ti ngbâ be-ta-zo na Jéhovah même na gbe ti angangu tara.

▪ Jésus akui ti sö azo. Prophète Ésaïe afa kozoni awe so pasi nga na kuâ ti Messie so a mû zendo ti lo ayeke mû lege ti kanga ndo ti siokpari ti azo (Ésaïe 53:5, 10). Jésus ahinga ni nzoni na lo yeda ti mû “âme ti lo tongana ngere so a futa ti zi na azo mingi.” (Matthieu 20:28). Fini ti Jésus so lo mû na sandaga amû lege na azo so alingbi kue pëpe ti duti na nzoni songo na Jéhovah nga ti zi ala na gbe ti siokpari nga na kuâ. Kuâ ti Jésus azi nga lege na e ti kiri ti wara ye so Adam na Ève agirisa ni lani: Beku ti ngbâ na fini lakue lakue nga nzoni na ndo ti sese.c—Apocalypse 21:3, 4.

▪ Ye so mo lingbi ti sara. Na yâ ti molongo ti a-article so e bâ aye so Bible afa na ndo ti Jésus: ndo so lo londo dä, lege so lo sara ye na fini ti lo nga ndani so lo kui. Hingango atâ tënë so na ndo ti Jésus ayeke sara ye mingi ahon gi ti zi abango ndo so ayeke na lege ni pëpe so e yeke na ni na ndo ti lo. Ti sara ye alingbi na ni ayeke ga na e aye ti nzoni mingi: laso e yeke duti na mbeni fini so ayeke nzoni nga fini ti lakue lakue na yâ ti ngoi so ayeke ga. Bible afa ye so a lingbi e sara tongana e ye ti wara aye ti nzoni so.

▪ Gi ti hinga ye mingi na ndo ti Jésus Christ nga na kusala ti lo na yâ ti ye so Jéhovah aleke ti sara.​—JEAN 17:3.

▪ Mä na bê na Jésus, fa na lege ti sarango ye ti mo so mo yeda so lo yeke Sauveur ti mo.​—JEAN 3:36; KUSALA 5:31.

A-Témoin ti Jéhovah ayeke na ngia ti mû maboko na mo ti hinga ye mingi na ndo ti Jésus Christ “oko Molenge” ti Nzapa so na lege ti lo e lingbi ti wara “fini ti lakue lakue.”​—Jean 3:16.

[Akete tënë na gbe ni]