6. A yeke fa tënë na ndo ti sese kue
“A yeke fa ande nzoni tënë ti royaume so na ndo ti sese kue so azo ayeke dä.”—MATTHIEU 24:14.
● Vaiatea ayeke mbeni wali so alango na kodoro ti Tuamotu, mbeni zoa ti Pacifique. Atâa so a yeke akete zoa nduru na 80 la abungbi aga kodoro ti Tuamotu (so konongo ni ahon Centrafrique kete), wungo ti azo ni kue ayeke gi 16 000. A-Témoin ti Jéhovah afa tënë na Vaiatea nga na avoizin ti lo. Ngbanga ti nyen? Ngbanga ti so aTémoin ti Jéhovah ayeke na nzara ti fa nzoni tënë ti Royaume ti Nzapa na azo kue, atâa azo ni ayeke na ndo wa.
AYE SO ASI AFA NYEN? A yeke fa tënë ti Royaume na ando kue na ndo ti sese. Gi na ngu 2010, aTémoin ti Jéhovah amû ngbonga ngbundangbu oko na kutu ngbangbo omene ti fa nzoni tënë so na yâ ti akodoro 236. Ye so afa so Témoin ti Jéhovah oko oko afa tënë penze-ngbonga 30 lango oko oko. Na yâ ti angu bale-oko so ahon, ala sigigi na ambeti so aluti na ndo ti Bible so wungo ni ahon ngbundangbu 20 nga ala kangbi ni.
TËNË WA AZO AYEKE TENE KA MINGI? A sara angu mingi mingi awe la azo ayeke fa tënë ti Bible.
TËNË SO ALA TENE AYEKE NA LEGE NI? Tâ tënë, azo mingi afa ambeni tënë so ayeke na yâ ti Bible. Me, mingi ti ala asara ni gi teti mbeni kete ngoi nga na ando mingi pëpe. Nde na ala, aTémoin ti Jéhovah aleke mbeni kapa ti fango tënë na ndo ti sese kue so andu azo kutu mingi mingi. Ala gbu ngangu na yâ ti kusala ti ala so atâa so ambeni ngorogbia wala ambeni bungbi so ayeke ngangu nga ayeke sioni mingi akanga lege na ala.a (Marc 13:13). Na ndo ni, a yeke futa pëpe aTémoin ti Jéhovah ndali ti tënë so ala yeke fa. Me, ala wani ayeda ti mû ngoi ti ala ti fa tënë nga ala yeke kä ambeti ti ala kango pëpe. Kusala ti ala ayeke tambela na lege ti a-offrande so azo amû na bê ti ala wani.
MO TENE TI MO NYEN? Laso, a yeke fa “nzoni tënë ti royaume” na ndo ti sese kue? So prophétie so aga tâ tënë aye ti fa so mbeni ye ti nzoni ayeke ga?
[Kete tënë na gbe ni]
a Ti hinga atënë mingi na ndo ni, bâ avidéo ota so “Fidèles dans les épreuves,” “Les triangles violets” nga “La fermeté des Témoins de Jéhovah face à la persécution nazie” so aTémoin ti Jéhovah asigigi na ni.
[Kete tënë na lembeti 9]
“Tongana Jéhovah ayeda, e yeke ngbâ ti fa nzoni tënë ti Royaume na nzara ni, e yeke sara kusala na alege kue ti ndu azo.”—ANNUAIRE DES TÉMOINS DE JÉHOVAH 2010.