Bâ ye so Bible afa

Royaume ti Nzapa ayeke nyen?

Article so ahunda ambeni tënë so peut-être mo hunda tere ti mo na ni awe nga a yeke fa na mo ndo so mo lingbi ti wara akiringo tënë ni dä na yâ ti Bible ti mo. A yeke nzere mingi na aTémoin ti Jéhovah ti sara lisoro na mo na ndo ti akiringo tënë ni so.

1. Royaume ti Nzapa ayeke nyen?

Royaume ti Nzapa ayeke mbeni ngorogbia so ayeke na yayu. Ngorogbia so ayeke mû ande place ti ngorogbia kue ti azo nga a yeke sara si a sara ye so bê ti Nzapa aye na yayu nga na sese. Tongaso, Royaume ti Nzapa la ayeke sara na e aye so e ye ti tene mbeni nzoni ngorogbia asara ndali ti e.​—Diko Daniel 2:44; Matthieu 6:9, 10.

Na yâ ti mbeni royaume a yeke wara gbia ni. Jéhovah asoro Molenge ti lo, Jésus, ti duti Gbia ti Royaume ti lo.​—Diko Luc 1:30-33.

2. Ngbanga ti nyen Jésus la ayeke nzoni Gbia?

Molenge ti Nzapa la ayeke nzoni Gbia ndali ti so lo yeke sara ye na nzoni bê, lo yeke sara lakue ye so ayeke mbilimbili, nga lo yeke na ngangu ti mû maboko na azo (Matthieu 11:28-30). Na pekoni so a zingo lo na kuâ, Jésus ague na yayu na lo duti na tere ti Jéhovah na mbage ti maboko ti lo ti koli, lo ku (aHébreu 10:12, 13). Na nda ni, Nzapa amû na lo ngangu ti to nda ti komande na yayu.​—Diko Daniel 7:13, 14.

3. Azo wa la ayeke komande ande na Jésus?

Mbeni groupe ti azo so a iri ala “azo ti be-vulu” ayeke komande ande legeoko na Jésus na yayu (Daniel 7:27). Abazengele ti Jésus so ayeke be-ta-zo ayeke akozo zo so a soro ala ti ga “azo ti be-vulu”. Juska laso Jéhovah angbâ ti soro azo so ayeke be-ta-zo ti ga “azo ti be-vulu”. Tongana Jésus, a yeke zingo ala na kuâ na tere so ayeke ti yingo.​—Diko Jean 14:1-3; 1 aCorinthien 15:42-45.

Azo oke la ayeke gue na yayu? Jésus airi ala “kete kundu”. (Luc 12:32). Wungo ti ala kue ayeke duti ande 144 000, na yayu kâ, ala yeke komande legeoko na Jésus na ndo ti sese.​—Diko Apocalypse 5:9, 10; 14:1.

4. Royaume ti Nzapa ato nda ti komande lawa?

Jésus aga Gbia na ngu 1914.a Kete na pekoni, lo bi Satan na asioni yingo ti lo na ndo ti sese (Apocalypse 12:7-10, 12). Ngbene ye na ngoi ni so, pasi ti azo ayeke gue gi guengo na li ni ahon ti kozo. Abira, nzara, asioni kobela ti fango zo, nga na kpengo ndia pëpe ayeke na popo ti aye so afa so e yeke na andangba lango ti aye ti ngoi so (2 Timothée 3:1-5). Azo kue so aye ti bâ nzoni na lege ti Royaume ti Nzapa, a lingbi ala manda tongana nyen ti ga adisciple ti Gbia ni, Jésus.​—Diko Luc 21:7, 10, 11, 31, 34, 35.

5. Royaume ti Nzapa ayeke sara nyen?

Na lege ti fango tënë ti Royaume ti Nzapa na ndo ti sese kue, Royaume ti Nzapa amû maboko awe na azo kutu na kutu ti amara kue ti manda afango lege ti Nzapa (Matthieu 24:14). Royaume ni ayeke bata ande “azo mingi mingi” so ayeke be-ta-zo na so ayeke na gbe ti komandema ti Jésus na ngoi so Royaume ni ayeke futi aye ti ngoi ti fadeso.​—Diko Apocalypse 7:9, 10, 13-17.

Na yâ ti ngu 1000, Royaume ni ayeke sara ande si yeke na yeke sese aga Paradis. Na nda ni, Jésus ayeke kiri na Royaume ni na Babâ ti lo (1 aCorinthien 15:24-26). Mo hinga mbeni zo so mo ye ti sara tënë na lo na ndo ti Royaume ti Nzapa?​—Diko Psaume 37:10, 11, 29.

Ti hinga ye mingi na ndo ni, bâ chapitre 8 na 9 ti buku Bible afa nyen biani?, so aTémoin ti Jéhovah asigigi na ni.

[Kete tënë na gbe ni]