Mo hinga?

Ngbanga ti nyen azo ti changengo nginza ayeke lani na yâ ti temple na Jérusalem?

▪ Ngoi kete kozoni si Jésus akui, lo kaï mbeni kota ye ti sioni so azo ayeke sara lani na yâ ti temple. Bible atene: “Jésus . . . [a]tomba azo so ayeke kä ye nga na azo kue so ayeke vo ye na yâ ni. Nga, lo kinda atable ti azo so ayeke changé nginza na aye ti duti ti azo so ayeke kä akolokoto. Na lo tene na ala: ‘A sû na Mbeti ti Nzapa a tene: “Fade a yeke iri da ti mbi da ti sambela.” Me ala sara si da ni aga kota dû ti azo ti gbungo aye ti azo na ngangu.’”​—Matthieu 21:12, 13.

A-Juif ti ngoi ti Jésus nga na aprosélyte ayeke londo lani na ando nga na agbata nde nde ti ga na temple na Jérusalem, na gango ti ala, ala yeke ga na alê ti nginza ti ndo so ala yeke dä. Ye oko, a hunda ti tene a sara kusala gi na lê ti nginza so azo ayeke vo na ye na yâ ti kodoro ni ti futa na lapo ti temple so zo ayeke futa ngu oko oko, ti vo na anyama ndali ti sandaga wala ti mû ambeni sandaga so zo ayeke mû na bê ti lo wani. Ni la, azo ti changengo nginza ayeke changé anginza ti ando nde nde so azo aga na ni na nginza so a yeke sara kusala na ni na Jérusalem na awa ti nginza ni ayeke futa ala ndali ni. Tongana ngoi ti amatanga ti aJuif apusu nduru, azo ti changengo nginza so ayeke zia atable ti ala na yâ ti temple na Sedu ti aGentil.

So Jésus ake na azo ti changengo nginza so lo tene ala sara si temple aga “kota dû ti azo ti gbungo aye ti azo na ngangu” afa so nginza so ala yeke hunda lani na maboko ti azo so ahon ndo ni.