Bâ ye so Bible afa
Na lege wa andia ti Nzapa aga na ye ti nzoni na e?
Article so ahunda ambeni tënë so peut-être mo hunda tere ti mo na ni awe nga a yeke fa na mo ndo so mo lingbi ti wara akiringo tënë ni dä na yâ ti Bible ti mo. A yeke nzere mingi na aTémoin ti Jéhovah ti sara lisoro na mo na ndo ti akiringo tënë ni so.
1. Ngbanga ti nyen a lingbi e mä yanga ti Nzapa?
A yeke na lege ni ti tene e mä yanga ti Nzapa ndali ti so lo la lo sara e. Même Jésus amä yanga ti Nzapa lakue (Jean 6:38; Apocalypse 4:11). Andia ti Nzapa amû lege na e ti fa so e ye lo.—Diko 1 Jean 5:3.
Andia kue ti Jéhovah Nzapa ayeke ndali ti nzoni ti e. A fa na e nzoni lege ti dutingo na fini so ahon atanga ni kue laso nga afa na e tongana nyen e lingbi ti wara fini ti lakue lakue.—Diko Psaume 19:7, 11; Ésaïe 48:17, 18.
2. Na lege wa andia ti Nzapa ayeke sara si e duti na nzoni seni?
Andia ti Nzapa so ake nyongo sämba ahon ndo ni abata e yongoro na akobela so alingbi ti sara si zo awara kuâ nga na andao. Nyongo sämba ahon ndo ni alingbi ti sara si zo aga ngbâa ni nga a gue na zo ti sara ye sân ti gbu li ti lo (aProverbe 23:20, 29, 30). Jéhovah ake ti tene e nyon sämba pëpe, me a lingbi e nyon ahon ndo ni pëpe.—Diko Psaume 104:15; 1 aCorinthien 6:10.
Jéhovah agboto nga mê ti e na ndo ti sarango bê ti ye, sarango ngonzo ahon ndo ni, nga na ambeni sarango ye so ayeke sara nzoni na zo pëpe. Tongana e sara ye alingbi na awango ti lo, e yeke duti na nzoni seni.—Diko aProverbe 14:30; 22:24, 25.
3. Na lege wa andia ti Nzapa ayeke bata e?
Mbeti ti Nzapa ake bungbingo koli na wali na gigi ti mariage (aHébreu 13:4). Akoli na awali ti ala so asara ye alingbi na ndia so abâ so ala duti nzoni nga ala sara si amolenge ti ala aduti nzoni. Na mbage, bungbingo koli na wali na gigi ti mariage aga ka na kobela, divorce, sarango ngangu na zo, vundu, nga a sara si na yâ ti ambeni sewa mo yeke wara gi babâ wala mama ni.—Diko aProverbe 5:1-9.
Tongana e kpe aye so alingbi ti pusu e ti bungbi koli na wali na gigi ti mariage, a yeke sara si e yeke bata songo ti e na Nzapa. A yeke sara nga si e yeke kpe ti sara sioni na ambeni zo.—Diko 1 aThessalonicien 4:3-6.
4. Na lege wa bango fini na nene ni aga na ye ti nzoni na e?
Azo so abâ na nene ni matabisi ti fini so Nzapa amû na e ayeke na nzoni seni na ngoi so ala zia lege ti aye tongana nyongo manga nga na ambeni ye so ala ga ngbâa ni so ayeke sara sioni na fini ti zo (2 aCorinthien 7:1). Nzapa abâ même na nene ni fini ti mbeni foroto so angbâ ti maï na yâ ti mama ti lo (Exode 21:22, 23). Tongaso, a lingbi e kpe ti buba ngo. Nga, azo so abâ fini tongana ti so Nzapa ayeke bâ na ni, na place ti kua, na ndo ti ala, nga na yâ ti kutukutu, ala yeke zia fini ti ala wala ti ambeni zo na yâ ti kpale pëpe (Deutéronome 22:8). Na ndo ni, ala yeke sara pëpe angia ti wanguru so ayeke zia fini ti zo na yâ ti kpale, ndali ti so fini ayeke mbeni matabisi so alondo na Nzapa.—Diko Psaume 36:10.
5. Na lege wa ti bâ mênë tongana ye so ayeke nzoni-kue aga na ye ti nzoni na e?
Mênë ayeke nzoni-kue ndali ti so Nzapa atene so ayeke fini, wala âme ti mbeni créature (Genèse 9:3, 4). Ndia ti Nzapa, so afa so mênë ayeke fini, aga na ye ti nzoni na e. Na lege wa? Na lege ti ndia so, Nzapa asara si lege ayeke dä ti tene a pardone asiokpari ti e.—Diko Lévitique 17:11-13; aHébreu 9:22.
Mênë ti Jésus ayeke lani kota mingi ndali ti so Jésus ayeke mbeni zo so alingbi kue. Jésus afa lani na Nzapa mênë ti lo so ayeke fä ti fini ti lo (aHébreu 9:12). Mênë ti lo so atuku asara si lege ayeke dä ti tene e wara fini ti lakue lakue.—Diko Matthieu 26:28; Jean 3:16.
Ti hinga ye mingi na ndo ni, bâ chapitre 12 na13 ti buku Bible afa nyen biani?, so aTémoin ti Jéhovah asigigi na ni.