Atënë so azo ahunda

A lingbi ti bi na gigi ti congrégation mbeni ita so bango porno aga ye ti tere ti lo?

▪ En, a lingbi ti bi lo na gigi. A yeke ndali ni la a yeke kota ye ti tene e kpe yongoro na aye kue so andu porno. A lingbi ti duti aye tongana abuku, ambeti-sango, afilm, avidéo nga na Internet.

Laso porno ayeke mbeni ye so a yeke wara ni na ndo kue. Internet asara si porno amû ndo na wungo ti azo so ayeke bâ ni ayeke gue gi guengo na li ni. Ambeni zo atï na ndo ti porno na ndo ti Internet sân ti tene ala wani la aye. Ambeni abâ ni na bê ti ala wani. Peut-être ala pensé so ala lingbi ti diko ni wala ti bâ ni na hondengo ni na yanga-da wala na yâ ti bureau. Ngbanga ti nyen a lingbi aChrétien abâ tënë so nzoni?

Kota raison ni ayeke na yâ ti wango so Jésus amû lo tene: “Zo kue so angbâ ti bâ mbeni wali si lo sara nzara ti wali ni so, andâ lo gi lo na wali na yâ ti bê ti lo awe.” (Mat. 5:28). Biani, a yeke sioni pëpe ti tene koli na wali so asara mariage awe abungbi koli na wali, a yeke même mbeni ye so alingbi ti mû na ala ngia (aProv. 5:15-19; 1 aCor. 7:2-5). Me a yeke pëpe ye so porno aye ti fa. Porno ayeke fa bungbingo koli na wali so ayeke na lege ni pëpe so ayeke maï na yâ ti zo asioni nzara so Jésus agboto mê ti e ndali ni. A yeke polele so ti diko wala ti bâ porno ague tâ nde na commandement ti Nzapa so atene: “Tongaso ala sara si amembre ti tere ti ala so ayeke na sese so akui tongana a ndu lango-sioni, sioni ye, nzara ti tere, sioni nzara ti bê na sarango bê ti ye, so ayeke vorongo ayanda.”​—aCol. 3:5.

Ka tongana mbeni Chrétien abâ porno fani oko wala use? A lingbi ti ga na lo kpale tongana ti Asaph mbeni zo ti sungo psaume so atene: “Me mbi, gere ti mbi aye ti zene; a ngbâ kete, tambela ti mbi ague kirikiri.” Mbeni Chrétien alingbi pëpe ti duti na nzoni yingo-ti-hinga nga na siriri na Nzapa tongana lo yeke bâ a-image ti akoli wala awali so tere ti ala ayeke senge wala ti mbeni koli na wali so ayeke sara lango-sioni. Asaph nga kue ayeke na siriri lani pëpe. Lo tene: “Kamême ye asara mbi lakue, na a se mbi na ndapre kue.”​—Ps. 73:2, 14.

A lingbi mbeni Chrétien so atï na yâ ti ye ti sioni so ahinga so a lingbi lo gi mungo maboko na lege ti yingo. Lo yeke wara ni na yâ ti congrégation. Bible atene: “Biani mbeni zo alingbi ti mû sioni lege sân ti tene lo hinga ni. Même tongana ye ni ayeke tongaso, ala so ala kpengba awe na lege ti yingo, ala tara ti kiri na zo so na nzoni lege, na ala sara ni na ngangu pëpe. Na oko ngoi ni, zia ala oko oko asara hange.” (aGal. 6:1). Ancien oko wala use alingbi ti mû na lo maboko so lo yeke na bezoin ni. Ala lingbi ti sambela na lo nga ala yeke na mabe so Jéhovah “ayeke sara si zo ti kobela ni awara sava” nga “fade a yeke pardone” siokpari ti lo (Jacq. 5:13-15). Asaph awara ye ti nzoni lani na ngoi so lo ga nduru na Nzapa. Ala so a mû maboko na ala ti zia ti bâ porno nga kue ayeke wara ye ti nzoni ndali ti so ala yeke duti na nzoni songo na Jéhovah.​—Ps. 73:28.

Ye oko, Bazengele Paul atene so ambeni zo so asara siokpari lani achangé bê ti ala pëpe ti ke “sioni ye, lango-sioni nga na sarango sioni ye na kamene pëpe”.a (2 aCor. 12:21). Wafango mbeti Marvin R. Vincent asara tënë ti mbupa ti Grec so a kiri pekoni na “sioni ye” lo tene so a ye ti sara tënë ti mbeni ye so ayeke tâ sioni mingi. A yeke biani tâ tënë so ambeni ye so porno afa ayeke tâ sioni mingi ahon ti so ayeke fa koli wala wali tere senge wala mbeni koli na wali so ayeke sara lango-sioni. Ambeni porno ni so ayeke sioni mingi ayeke ati so afa koli na koli wala wali na wali so ayeke bungbi, akoli na awali so ayeke bungbi koli na wali na mbeni place oko na ala yeke changé awali ni na popo ti ala, bungbingo na nyama, langongo na akete molenge, gbâ ti akoli so ayeke lango na mbeni wali na ngangu, gbungo wali na ngangu ti lango na lo, a kanga wali ni na tere ti mbeni ye si a bungbi na lo, sarango sana na awali. Na ngoi ti Paul, ambeni zo so “hingango ndo ti ala ayeke na yâ ti bingo” adö “nzoni lege ti tambela kue ala zia [nga] ala bi tere ti ala na yâ ti sarango sioni ye na kamene pëpe ti sara sioni ye nde nde kue na bê ti warango ye.”​—aÉph. 4:18, 19.

Na aGalate 5:19, Paul asara nga tënë ti “sioni ye”. Mbeni wandara so ayeke anglais atene so “sioni ye” so a sara tënë ni ge andu anzara kue so ayeke na lege ni pëpe. A-Chrétien kue ayeke yeda so amara ti porno so e londo ti sara tënë na ndo ni so ayeke sioni mingi nga ayeke pusu azo ti duti na anzara so ayeke na lege ni pëpe. Na aGalate 5:19-21, Paul atene so “azo so angbâ ti sara” mara ti sioni ye so “fade royaume ti Nzapa ayeke ga ti ala pëpe.” Ni la, tongana mbeni zo aga zo ti bango asioni ye, wala porno so ayeke fa abungbingo koli na wali so ayeke na lege ni pëpe, peut-être teti ngoi mingi, na lo changé bê ti lo pëpe, lo lingbi pëpe ti ngbâ na yâ ti congrégation. A lingbi a bi lo na gigi tongaso si ye ti sioni alï na yâ ti congrégation pëpe nga si a bata bibe ti congrégation.​—1 aCor. 5:5, 11.

A yeke nzoni ti hinga so ambeni zo so atï na yâ ti bango porno ague awara mungo maboko na mbage ti a-ancien na ala changé. Jésus awa aChrétien ti congrégation ti Sardes lo tene: “Mû ngangu na aye so angbâ me so aga nduru ti kui, . . . ngbâ ti dabe ti mo tongana nyen mo wara ni, tongana nyen mo mä ni na ngbâ ti bata ni, nga changé bê ti mo. Biani, . . . fade mo hinga oko pëpe na ngoi wa mbi yeke si na ndo ti mo; tongana mo zingo na lango, mbi yeke sara tongaso pëpe.” (Apoc. 3:2, 3). Zo alingbi ti changé na lo sigigi na yâ ti akpale so porno ayeke ga na ni.​—Jude 22, 23.

A yeke tâ nzoni mingi ti tene e oko oko kue e sara ngangu kue ti pusu nduru lâ oko pëpe na sioni ye so. Biani, a yeke nzoni e sara kue ti kpe aye kue so andu porno.

[Kete tënë na gbe ni]

[Kete tënë na lembeti 30]

A lingbi mbeni Chrétien so atï na yâ ti ye ti sioni ahinga so a lingbi lo gi mungo maboko na lege ti yingo