Duti na nzoni bibe, atâa mariage ti mo ayeke na yâ ti kpale

“Mbi mû wango so na ala so asara mariage awe, na wango ni alondo na mbi pëpe, me na Seigneur.”​—1 ACOR. 7:10.

MO YEKE KIRI TËNË TONGANA NYEN?

Na lege wa Nzapa abungbi koli na wali so asara mariage na gbe ti joug oko?

Tongana nyen la a-ancien ayeke mû maboko na aChrétien so ayeke na kpale na yâ ti mariage ti ala?

A lingbi e bâ mariage tongana nyen?

1. A lingbi aChrétien abâ mariage tongana nyen? Ngbanga ti nyen?

NA NGOI so aChrétien asara mariage, ala yeke deba yanga ti ala na gbele Jéhovah. A yeke ye so a lingbi ala bâ ni na nene ni (Zo-ti. 5:3-5). Jéhovah so azia gere ti mariage na sese “abungbi na gbe ti joug oko” koli na wali so asara mariage awe (Marc 10:9). Koli na wali so asara mariage awe a bungbi ala na gbe ti joug oko atâa ndia ti kodoro ti ala ayeke so wa. A lingbi awakua ti Jéhovah abâ yanga so ala mû na ngoi ti mariage ti ala tongana ti so Jéhovah abâ na ni, même tongana na ngoi so ala sara mariage ni lani ala yeke awakua ti Jéhovah wala pëpe.

2. Ahundango ndo wa e yeke bâ na yâ ti article so?

² Nzoni mariage alingbi ti ga na kota ngia. Me nyen la e lingbi ti sara tongana mariage ti e ayeke na yâ ti kpale? Mbeni mariage so ayeke na yâ ti kpale alingbi ti kiri ti ga nzoni? Mungo maboko wa ayeke dä ndali ti azo so mariage ti ala ayeke na yâ ti kpale?

A YEKE GA NA NGIA WALA VUNDU?

3, 4. Nyen la alingbi ti si tongana mbeni zo asoro na lege ti ndara pëpe zo ti sara mariage na lo?

³ Tongana mariage ti mbeni Chrétien ayeke nzoni, a yeke ga na ngia na a yeke mû gonda na Jéhovah. Me tongana mariage ni ayeke nzoni ape, a yeke ga na vundu mingi. Mbeni Chrétien so ayeke gi mbeni zo ti sara mariage na lo alingbi ti to nda ti mariage ti lo nzoni tongana lo sara ye alingbi na aye so Nzapa afa. Me zo so asoro na lege ti ndara pëpe koli wala wali so lo ye ti sara mariage na lo, lo lingbi ti wara vundu na pekoni. Na tapande, ambeni maseka akomanse ti bâ tere na mbeni zo ti sara mariage na ngoi so ade ala lingbi pëpe ti sara ye so a ku na mbage ti azo so asara mariage. Ti ambeni ala wara zo ni na ndo ti Internet na hio ala sara mariage na lo me kete na pekoni ala yeke na ngia na yâ ti mariage ni ape. Ambeni asara kota siokpari na ngoi so ala ngbâ ti bâ tere ti sara mariage. Ye so asara si gi na tongo nda ti mariage ti ala ala ne mba mingi ape.

⁴ Ambeni Chrétien asara mariage pëpe “gi na yâ ti Seigneur” na ala yeke bâ pasi ndali ti so zo ni avoro Jéhovah ape (1 aCor. 7:39). Tongana a yeke ye so asi na mo la, sambela Nzapa ti pardonné mo na ti mû maboko na mo. Lo yeke zi pëpe akpale so aga na peko ti faute so mbeni zo asara, me lo yeke mû maboko na azo so achangé bê ti ala ti gbu ngangu na yâ ti akpale ni (Ps. 130:1-4). Tongaso sara kue ti nzere na Nzapa laso nga teti lakue lakue, na fade “tâ ngia ti L’Éternel” ayeke kpengba mo.​—Néh. 8:10.

NA NGOI SO MARIAGE AYEKE NA YÂ TI KPALE

5. Abibe wa a lingbi zo akpe ni tongana mariage ti lo ayeke na yâ ti kpale?

⁵ Azo so mariage ti ala ayeke na yâ ti kpale alingbi ti hunda tere ti ala: ‘Mariage ti mbi so alingbi biani ti kiri ti ga nzoni la? Peut-être mbi yeke wara ngia gi tongana mbi kiri mbi sara mariage na mbeni zo nde!’ Ala lingbi ti pensé ti zia koli wala wali ti ala na tenengo so: ‘Mbi ye ti kiri ti wara liberté! A lingbi mbi sara divorce? Même tongana lo sara pëpe mbeni ye so Bible amû lege na mbi ti sara divorce, mbi lingbi ti kangbi na lo na mbi duti na ngia.’ A hon ti tene aChrétien aduti na mara ti abibe tongaso nga ti pensé so tongana ala sara lani mbeni ye nde ka ala yeke duti na ngia, a yeke nzoni ala sara ye kue so ala lingbi ti sara ti tene mariage ti ala akiri aga nzoni na sarango ye alingbi na aye so Nzapa afa.

6. Tënë ti Jésus so ayeke na Matthieu 19:9 aye ti tene nyen?

⁶ Tongana mbeni Chrétien aye ti sara divorce, Bible alingbi ti mû lege na lo wala pëpe ti kiri ti sara mbeni mariage. Jésus atene: “Tongana a yeke ndali ti lango-sioni pëpe, si mbeni zo asara divorce na wali ti lo na lo sara mariage na mbeni wali nde, lo gi mbeni wali nde la.” (Mat. 19:9). Ge, “lango-sioni” andu gingo koli wala wali nde nga na akota siokpari so andu bungbingo koli na wali. Tongana koli wala wali ti mo asara lango-sioni pëpe me bibe ti sarango divorce aga na li ti mo, a yeke nzoni ti gi mungo maboko nga na fango lege ti Nzapa.

7. Tongana mariage ti ambeni Chrétien ayeke na yâ ti kpale azo alingbi ti tene nyen?

⁷ Mbeni mariage so ayeke na yâ ti kpale afa peut-être so songo ti azo ni so na Nzapa awoko. Bazengele Paul ahunda kpengba tënë so: “Tongana mbeni zo ahinga ti fa lege nzoni na azo ti da ti lo pëpe, fade lo yeke bata congrégation ti Nzapa ni tongana nyen?” (1 Tim. 3:5). Tongana koli na wali so asara mariage awe atene ala yeke aChrétien si mariage ti ala ayeke na yâ ti kpale, azo alingbi ti tene so ala yeke sara pëpe ye so ala afa.​—aRom. 2:21-24.

8. Tongana ambeni Chrétien aleke ti kangbi tere wala ti sara divorce, a fa so nyen la asava ape na yâ ti fini ti ala?

⁸ Tongana mbeni koli na wali ti lo so ayeke aChrétien aleke ti kangbi tere wala ti sara divorce ndali ti mbeni raison so Bible ayeda na ni pëpe, a fa biani so mbeni ye asava pëpe na yâ ti fini ti ala na lege ti yingo. Peut-être oko na popo ti ala wala ala use kue asara ye pëpe alingbi na aye so Bible afa. Tongana ala ‘zia bê ti ala kue na L’Éternel,’ ka ala yeke leke kpale so ayeke na yâ ti mariage ti ala.​—Diko aProverbe 3:5, 6.

9. Ye ti nzoni wa aChrétien so asara ngangu ti ngbâ na koli wala wali ti ala ayeke wara?

⁹ Ambeni mariage mingi so kozo ayeke na yâ ti kpale akiri aga nzoni na pekoni. A-Chrétien so mariage ti ala ayeke na yâ ti kpale si ala ke ti mû desizion hio ti zia tere, mingi ni ala wara aye ti nzoni na pekoni. Bâ mbeni ye so alingbi ti si tongana koli ti mbeni ita ayeke Témoin ape. Bazengele Pierre atene: “Awali, ala woko tere na gbe ti akoli ti ala, si tongana ambeni koli ni ayeke dä so ayeda na tënë ti Nzapa pëpe, a lingbi ti ga na ala ti mä na bê, na lege ti tënë pëpe, me na lege ti sarango ye ti tere ti awali ti ala, ngbanga ti so akoli ni abâ na lê ti ala sarango ye ti ala so sioni oko ayeke dä pëpe nga na nengo so ala ne na ala mingi.” (1 Pi. 3:1, 2). Ndali ti nzoni sarango ye ti zo ni koli wala wali ti lo so ayeke Témoin ape alingbi ti yeda na tâ tënë. A-Chrétien so asara ngangu si mariage ti ala aga nzoni na ala ngbâ na koli wala wali ti ala amû gonda na Nzapa, na sewa ni kue ayeke wara ye ti nzoni.

10, 11. Akpale wa so zo aku tere ti lo na ni ape alingbi ti si na yâ ti mariage? Nyen la mbeni Chrétien ahinga na bê ti lo kue?

¹⁰ Ti zia ngia na bê ti Jéhovah, mingi ti aChrétien asoro ti sara mariage gi na amba ti ala so amû tere ti ala na lo awe. Me atâa so kue, ye alingbi ti changé na mbeni lege so ala ku tere ti ala na ni pëpe. Na tapande, koli wala wali ni alingbi ti wara kobela ti li. Wala asi na mbeni ngoi na peko ti mariage ni, koli wala wali ni azia lege ti fango tënë. Zia e bâ mbeni tapande ni. Linda,a mbeni Chrétien so ayapu na so ayeke mbeni mama so ayeke sara ye na ndoye, abâ so ye ti sarango ni ayeke dä ape na ngoi so koli ti lo so awara batême awe asara siokpari na lo ke ti changé bê ti lo na a bi lo na gigi. Mbeni Chrétien so mariage ti lo ayeke na yâ ti mara ti ye tongaso na so apensé so mbeni ye ti sarango ni ayeke dä ape, nyen la ayeke nzoni lo sara?

¹¹ Mo lingbi ti hunda tere ti mo: ‘A lingbi mbi ngbâ ti gi ti tene mariage ti mbi akiri aga nzoni atâa ye wa asi? A yeke na mo ti mû desizion ni, mbeni zo la alingbi ti mû ni na place ti mo ape. Ye oko, ambeni nzoni raison ayeke dä so ndali ni a lingbi mo ngbâ ti gi ti kpengba mariage ti mo. A-Chrétien so ayeke gbu ngangu na yâ ti mariage so ayeke na yâ ti kpale ndali ti so yingo-ti-hinga ti ala ake na ala ti zia koli wala wali ti ala, Nzapa abâ ala na nene ni. (Diko 1 Pierre 2:19, 20.) Na lege ti Bible nga na yingo ti lo, Jéhovah ayeke mû maboko na mbeni Chrétien so asara ngangu ti kpengba mariage ti lo.

A-ANCIEN AYEKE NDURU TI MÛ MABOKO

12. Tongana e hunda mungo maboko na a-ancien, ala yeke bâ e tongana nyen?

¹² Tongana mariage ti mo ayeke na yâ ti kpale, gi mungo maboko na mbage ti aChrétien so akpengba na lege ti yingo. A-ancien ayeke sara kua tongana aberger na yâ ti congrégation, na ala yeke na ngia ti fa na mo awango so ayeke na yâ ti Bible (Kus. 20:28; Jacq. 5:14, 15). Tene pëpe so tongana mo na koli wala wali ti mo agi mungo maboko na mbage ti a-ancien na ala sara lisoro na ndo ti kota kpale so ala wara na yâ ti mariage ti ala, a-ancien ni ayeke ne ala ape. Ala yeke kiri ti ndoye mo nga ti ne mo mingi ndali ti so ala bâ so mo ye biani ti nzere na Nzapa.

13. Wango wa ayeke na 1 aCorinthien 7:10-16?

¹³ Na ngoi so a-ancien ayeke mû maboko na aChrétien so koli wala wali ni ayeke Témoin pëpe, a-ancien ni ayeke sara kusala na mara ti wango ti Paul so atene: “Mbi mû wango so na ala so asara mariage awe, na wango ni alondo na mbi pëpe, me na Seigneur: a yeke nzoni mbeni wali akangbi na koli ti lo pëpe. Me tongana a si so lo kangbi na lo, zia lo mû mbeni koli pëpe wala zia lo kiri lo leke songo na koli ti lo. Nga, a yeke nzoni mbeni koli azia wali ti lo pëpe. . . . Mo wali, mo hinga tongana nyen so mo yeke sö ande koli ti mo pëpe? Wala mo koli, mo hinga tongana nyen so mo yeke sö ande wali ti mo pëpe?” (1 aCor. 7:10-16). Na ngoi so koli wala wali ti mbeni Chrétien aga wakua ti Jéhovah, a yeke ga na aye ti nzoni mingi.

14, 15. Na ngoi wa mbeni wali Chrétien alingbi ti soro ti kangbi na koli ti lo? Ngbanga ti nyen a yeke nzoni Chrétien ni azia tënë ni na yâ ti sambela na lo gi ti bâ tâ ye so ayeke na gbe ti bê ti lo nzoni?

¹⁴ Na ngoi wa mbeni wali Chrétien alingbi ti ‘kangbi na koli ti lo’? Ambeni asoro ti kangbi na koli ti ala ndali ti so koli ni ake na mbana ti bâ lege ti ala na lege ti mitele. Ti ambeni ndali ti so koli wala wali ti ala ayeke pika ala mingi wala lo yeke sara ambeni ye so akanga lege na ala ti sara kusala ti ala ti Chrétien.

¹⁵ Ti ngbâ wala ti kangbi ayeke na mo ti mû desizion. Ye oko, a yeke nzoni Chrétien ni azia tënë ni na yâ ti sambela na lo gi ti bâ tâ ye so ayeke na gbe ti bê ti lo nzoni. Na tapande, a yeke gi koli wala wali ni so ayeke Témoin ape so la akanga lege na Chrétien ni ti sara akusala ti lo ti Chrétien? Wala Chrétien ni wani la abâ pëpe nene ti mandango Bible, ti guengo lakue na bungbi nga ti fango tënë?

16. Nyen la ayeke nzoni akanga lege na aChrétien ti mû desizion hio ti sara divorce?

¹⁶ Teti so e bâ songo ti e na Nzapa na nene ni nga e ne mariage so ayeke matabisi so alondo na lo, a lingbi e mû desizion hio pëpe ti sara divorce. E awakua ti Jéhovah, e ye mingi ti tene iri ti Jéhovah angbâ nzoni-kue. Kite ayeke pëpe so e yeke ye ande lâ oko pëpe ti gi ti zia koli wala wali ti e na lekengo na bê ti e ti gue ti sara mariage na mbeni zo nde.​—Jér. 17:9; Mal. 2:13-16.

17. Na yâ ti ye wa a lingbi ti tene so Nzapa airi aChrétien so asara mariage ti duti na siriri?

¹⁷ A yeke nzoni mbeni Chrétien so asara mariage na mbeni zo so ayeke Témoin ape asara kue ti tene mariage ti ala angbâ nzoni. Me tongana atâa ngangu so lo sara si koli wala wali ni so ayeke Témoin ape ake ti ngbâ na lo, a lingbi lo pensé pëpe so a yeke faute ti lo. Paul atene: “Tongana koli wala wali so amä na bê pëpe aye ti kangbi na ita ni, zia lo kangbi na lo. Na yâ ti mara ti ye tongaso, mbeni ye ti kanga ita-koli ni wala ita-wali ni na lo ayeke dä pëpe, me ti ala Nzapa airi ala ti duti na siriri.”​—1 aCor. 7:15.b

ZIA BÊ TI MO NA JÉHOVAH

18. Même tongana e sara ngangu ti tene mariage ti e angbâ si e sara gbä, ye ti nzoni wa alingbi ti ga na pekoni?

¹⁸ Tongana e yeke na kpale na yâ ti mariage ti e, a yeke nzoni e sambela Jéhovah ti wara ngangu na ti zia bê ti e lakue na lo. (Diko Psaume 27:14.) Bâ tapande ti Linda so e sara tënë ti lo fade. Teti angu mingi lo sara ngangu ti tene mariage ti lo angbâ, me atâa so kue mariage ti lo ahunzi na divorce. Lo bâ so lo buba lani ngoi ti lo senge senge? Lo tene: “Ên-ën, ngangu so mbi sara asara nzoni tënë ti témoin na azo. Mbi yeke na nzoni yingo-ti-hinga. Me ye so ayeke nzoni mingi ayeke so, angangu so amû maboko na molenge ti e ti wali ti luti ngangu na yâ ti tâ tënë. Lo ga mbeni wakua ti Jéhovah so asara na lo na nzara ni.”

19. Tongana e sara ngangu ti tene mariage ti e akiri aga nzoni, ye wa alingbi ti ga na pekoni?

¹⁹ Marilyn, mbeni ita-wali, ayeke na ngia ti zia bê ti lo na Nzapa nga ti sara ngangu mingi ti tene mariage ti lo so ayeke na yâ ti kpale akiri aga nzoni. Lo tene so ndali ti so koli ti ni ayeke bâ lege ti ni na lege ti mitele pëpe nga lo zia songo ti ni na Jéhovah na yâ ti kpale, a sara si ni pensé ti tene ni na lo e zia tere. Kozo, koli ti lo asara kusala tongana ancien, me na ndara pëpe lo bi tere ti lo na yâ ti mbeni dengo buze. Lo komanse ti manke abungbi, na ala sara lisoro na popo ti ala mbeni ape. Na peko ti mbeni kpale so aterroriste abi na yâ ti gbata ti ala, a sara mbeto na Marilyn mingi na asara si a yeke ngangu na lo ti duti na popo ti azo. Me Marilyn aga ti bâ so lo nga kue lo yeke na faute na yâ ti kpale ti mariage ti ala. Lo na koli ti lo akiri ato nda ti sara lisoro, ti manda ye na sewa, ti gue na bungbi lakue. A-ancien asara ye na ala na nzoni bê nga a-ancien amû maboko na ala. A yeke mo bâ mo tene mariage ti ala ato nda ni fini fini. Ala yeke na ngia mingi. Koli ti lo awara akusala na yâ ti bungbi. Lo tene so a yeke lani ye ti vundu, me ye ti nzoni aga na pekoni.

20, 21. Tongana e bâ mariage na nene ni nyen la a lingbi e sara kue ti sara?

²⁰ Atâa e sara mariage awe wala e yeke kumbamba, zia e sara ye lakue na mbeto pëpe na e zia bê ti e na Jéhovah. Tongana e yeke na kpale na yâ ti mariage ti e, a yeke nzoni e sara ye kue so e lingbi ti sara ti leke kpale ni na e girisa pëpe so azo so asara mariage awe ayeke “use mbeni pëpe, me mitele oko.” (Mat. 19:6). Nga zia e girisa pëpe so tongana e ngbâ na koli wala wali ti e so ayeke Témoin pëpe, atâa akpale so e wara na yâ ti mariage ti e, e lingbi peut-être ti duti na ngia tongana mbeni lâ zo ni aga wakua ti Jéhovah.

²¹ Atâa ye wa la asi na yâ ti mariage ti e, a lingbi e sara ye lakue na mbeni lege so amû lege na azo so ayeke aTémoin pëpe ti tene nzoni tënë ti e. Tongana e yeke na ngangu kpale na yâ ti mariage ti e na e ye ti kangbi na koli wala wali ti e, a lingbi e gi ti gbu li nzoni na ndo ti ye so apusu e ti sara ni. A lingbi nga e sambela ndali ni mingi, e gbu li nzoni na ndo ti aversê ti Bible nga e hunda a-ancien ti mû maboko na e. Na ahon ye kue, zia e leke na bê ti e ti ngbâ ti nzere na Jéhovah Nzapa na yâ ti aye kue nga ti fa so e bâ biani na nene ni mariage so ayeke mbeni pendere matabisi so alondo na lo.

[Akete tënë na gbe ni]

[Tënë na lembeti 10]

A-Chrétien so mariage ti ala ayeke na yâ ti kpale si ala ke ti mû desizion hio ti zia tere, mingi ni ala wara aye ti nzoni na pekoni

[Tënë na lembeti 12]

Zia bê ti mo lakue na Jéhovah na hunda lo ti mû maboko na mo mingi

[Foto na lembeti 9]

Jéhovah ayeke iri tënë nzoni na ndo ti aChrétien so ayeke sara ngangu ti kpengba mariage ti ala so ayeke na yâ ti kpale

[Foto na lembeti 11]

Congrégation ti aChrétien alingbi ti dë bê ti zo nga ti mû maboko na zo na lege ti yingo