Atënë so azo ahunda

Na lege wa kuâ ti azo so ayeke be-ta-zo na Nzapa ayeke “ye ti ngere ngangu na lê ti L’Éternel”?

▪ Mbeni wasungo psaume ahe bia atene: “Kui ti azo ti nzobe ayeke ye ti ngere ngangu na lê ti L’Éternel.” (Ps. 116:15). Jéhovah abâ fini ti atâ wakua ti lo oko oko kue na nene ni mingi. Ye oko, Psaume 116 aye pëpe ti sara gi tënë ti kuâ ti mbeni wakua ti Jéhovah oko.

Na ngoi ti mungo diskur ti kuâ ti mbeni Chrétien, a yeke na lege ni pëpe ti sara kusala na Psaume 116:15 na ndo ti zo ni so akui so, même tongana zo ni akui be-ta-zo na Jéhovah. Ndali ti nyen? Ndali ti so tënë ti wasungo psaume so aye ti sara tënë ti ye mingi. Aye ti tene so Nzapa ayeke zia lege pëpe ti tene awakua ti lo kue tongana mbeni groupe akui ndali ti so lo bâ ala tongana ye ti ngere ngangu.​—Bâ Psaume 72:14; 116:8.

Psaume 116:15 adë bê ti e so Jéhovah ayeke zia pëpe si a futi awakua ti lo so ayeke be-ta-zo kue tongana mbeni groupe na ndo ti sese. Mbaï ti ngoi ti e afa angangu tara nga na asarango ngangu so e gbu ngangu na yâ ni. Ye so afa polele so Nzapa ayeke zia lege lâ oko pëpe ti tene a futi e kue.

Teti so Jéhovah ayeke na ngangu so ahon angangu kue na ye so lo leke ti sara ayeke ga biani tâ tënë, lo yeke zia lege pëpe si a futi e kue. Tongana Nzapa azia lege na ni, a yeke duti mo bâ mo tene awato ti lo ayeke na ngangu mingi ahon lo. Me, a lingbi ti duti tongaso ape. Tongana Jéhovah azia lege na ni, ye so lo leke ti sara so ayeke ti tene awakua be-ta-zo ti lo aduti na ndo ti sese ayeke ga tâ tënë ape. Me mbeni ye ti kanga lege na ye so Jéhovah aleke ti sara ayeke dä ape (És. 45:18; 55:10, 11). Même kusala so ayeke nzoni-kue so a yeke sara na Jéhovah na sese ge ayeke kaï tongana zo oko ayeke dä pëpe ti voro lo na yâ ti sedu ti kota temple ti lo ti yingo na sese. Azo so ayeke duti ande na yâ ti “fini sese” ayeke duti dä pëpe: azo ti mbilimbili so ayeke duti ande na ndo ti sese na gbe ti komandema ti “fini yayu”. (Apoc. 21:1). Nga tongana zo oko ayeke na fini na ndo ti sese ape, Komandema ti Ngu Saki Oko ti Christ ayeke ga tâ tënë ape.​—Apoc. 20:4, 5.

Tongana Nzapa azia lege na awato ti lo si ala hunzi awakua ti lo kue, a yeke dë kite na ndo ti lo nga iri ti lo ayeke buba. A yeke fa so lo lingbi pëpe ti komande dunia kue nzoni. Nga, ndali ti so Jéhovah abâ iri ti lo so ayeke nzoni-kue na nene ni, lo yeke zia lege ande pëpe ti tene a futi awakua ti lo so ayeke be-ta-zo kue tongana mbeni groupe. Nga girisa pëpe so: Teti so Nzapa ‘ayeke na sioni oko pëpe,’ lo yeke bata ande lakue azo so asara na lo lakue be-ta-zo tongana mbeni groupe (Deut. 32:4; Gen. 18:25). Na ndo ni, tongana lo zia si a futi awakua ti lo kue tongana mbeni groupe, ye so ayeke gue nde na tënë ti Nzapa so atene: “Ngbanga ti kota iri ti Lo, fade L’Éternel azia azo ti Lo pëpe.” (1 Sam. 12:22). Biani, “fade L’Éternel ake azo ti Lo pëpe, na Lo zia ye ti héritier ti Lo nga pëpe.”​—Ps. 94:14.

A dë bê ti e ti hinga so a yeke futi ande pëpe awakua ti Jéhovah kue na ndo ti sese. Tongaso, zia e ngbâ lakue be-ta-zo na Nzapa, na e zia bê ti e na zendo ti lo: “Ye ti bira so azo asara ti ke mo na ni alingbi sara ye na mo pëpe; na fade mo fâ ngbanga na ndo menga ti azo kue so alondo na ngbanga ti ke mo.”​—És. 54:17.

[Tënë na lembeti 22]

Nzapa ayeke zia lege pëpe ti tene a hunzi azo ti lo kue