Ga nduru na Nzapa

Tongana Nzapa apardone siokpari ti mbeni zo, lo yeke girisa na ndo ni?

KIRINGO tënë ni ayeke En. Ti azo so Jéhovah asara nzoni bê na ala, lo tene: “Fade Mbi pardone sioye ti ala, na Mbi dabe Mbi na siokpari ti ala mbeni pëpe.” (Jérémie 31:34). Tënë so aye ti fa so tongana azo azia lege ti siokpari ti ala, Jéhovah ayeke pardone ala nga lo yeke dabe ti lo na siokpari ti ala mbeni pëpe. Me tënë ti “dabe” ni ge so aye biani ti fa so a yeke ngangu na Nzapa, lo so asara dunia kue, ti dabe ti lo na asiokpari ni? Atënë ti yâ ti Ézéchiel so ge ayeke vuru yâ ti tënë ni so polele. —Diko Ézéchiel 18:19-22.

Jéhovah amû lani yanga na prophète Ézéchiel ti fa tënë ti ngbanga so lo Jéhovah lo fâ na ndo ti Jérusalem, li-kodoro ti Juda. Azo ti Jérusalem azia lani Jéhovah, ala voro ambeni nzapa nde nga ala sara si kodoro ni asi singo na sarango ye ti ngangu. Ni la, Jéhovah atene so ande azo ti Babylone ayeke ga ti futi Jérusalem ni. Me na oko ngoi ni nga, lo fa mbeni tënë so amû beku. Lo zia lege na zo oko oko ti soro ye ti bê ti lo wani; nga zo oko oko ayeke yô ngbanga ti aye so lo sara na li ti lo wani.​—Versê 19, 20.

Ka tongana mbeni zo azia lege ti sioni si asara ye so ayeke nzoni? Jéhovah atene: “Tongana zo ti sioni azia lege ti lo na siokpari kue ti lo so lo sara, lo bata kpengba-ndia ti Mbi kue, na lo sara ye so ayeke na lege ni na ayeke mbilimbili, fade lo ngbâ na fini biani, lo kui pëpe.” (Versê 21). Biani, zo so azia lege ti sioni sarango ye ti lo si lo fa na gigi so lo changé tâ bê ti lo, Jéhovah ayeke “pardone lo kue.”​—Ésaïe 55:7.

Ka ti asiokpari so zo ni asara? Jéhovah akiri atene: “Fade Mbi dabe Mbi oko pëpe na kengo-ndia ti lo so lo sara”. (Versê 22). Wala tongana ti so a sû na yâ ti Bible ti Fini dunia, “asiokpari kue so lo sara ayeke kiri ande na ndö ti lo pëpe.” Bâ, lo tene so siokpari ti zo so achangé bê ti lo ayeke “kiri ande na ndö ti lo pëpe.” Tënë ni so ane mingi. Ngbanga ti nyen?

Na yâ ti Bible, tënë na yanga ti Hébreu so a kiri pekoni na “dabe” aye nga ti sara tënë ti mbeni ye nde, me pëpe gi ti dabe na mbeni ye so asi kozo. Mbeni bakari atene so tënë ni so aye ka nga ti sara tënë ti sarango mbeni ye. Tongaso, tënë “dabe” aye nga ti tene “ti sara ye.” Ni la, tongana Jéhovah atene na mbeni zo so achangé bê ti lo so asiokpari ti lo ayeke “kiri ande na ndö ti lo pëpe”, lo ye ti tene so Ni, Jéhovah, Ni yeke mû ande asiokpari ti lo ni so ti sara na mbeni ye na tere ti lo pëpe, na tapande ti fâ ngbanga na ndo ti lo pëpe.a

Biani, atënë ti Ézéchiel 18:21, 22 andu bê ti e mingi. A fa so tongana Jéhovah apardone zo, lo yeke girisa na ndo ni biaku biaku. Lo yeke mû ande lâ oko pëpe siokpari so e sara kozo si lo pardone ni ti fâ ngbanga na ndo ti e. Nde na so, lo girisa na ndo ni, mo bâ mo tene lo bi ni na peko ti lo (Ésaïe 38:17). A yeke tongana ti so lo mbô ni kue, si mbeni oko angbâ pëpe.​—Kusala 3:19.

So e yeke asenge zo, e ye si Nzapa asara be-nzoni na e ngbanga ti so e yeke sara siokpari lege mingi (aRomain 3:23). Me Jéhovah aye si e hinga so tongana e changé tâ bê ti e, lo yeke nduru ti pardone e. Nga tongana lo pardone, lo girisa na ndo ni, so ti tene, lo yeke kiri na ndo ti asiokpari ti e pëpe ti fâ ngbanga na ndo ti e, lâ oko pëpe. So tâ tënë ti dengo bê! So Nzapa asara be-nzoni na mo, kite ayeke pëpe so mo ye ti lë kpengba songo na lo.

[Kete tënë na gbe ni]