Tondo ti bungbi ti ngu oko
Oko bungbi so afa dutingo beoko nga apendere ye so a leke ti sara
ABUNGBI so société Watch Tower ayeke sara ngu oko oko anzere ka mingi. A yeke ye so a bâ ni na ngoi ti bungbi 127 ni so a sara na lango oko ti octobre ngu 2011. Azo so aga alondo na ambage kue ti sese la abungbi na yâ ti Da ti assemblée ti aTémoin ti Jéhovah ti Jersey City na New Jersey, Amerika.
Gerrit Lösch membre ti Bebungbi la atene gango nzoni na gbâ ti azo so aga so ayeke na ngia. Azo so aga alondo na yâ ti akodoro 85. Lo tene beoko so ayeke na popo ti ala, mara ni ayeke use ape. Azo ayeke bâ dutingo beoko so na amû gloire na Jéhovah. Dutingo beoko la ayeke mama-tene ti bungbi ni.
ANZONI YE SO A SARA NA MEXIQUE
Kozo mbage ti bungbi ni afa tapande ti beoko so ayeke na popo ti azo ti Jéhovah. Baltasar Perla ahunda tënë na ambeni membre ota ti sewa ti Béthel ti Mexique. Lo hunda ala na ndo ti filiale ti Mexique so a bungbi ni oko na ambeni filiale omene ti Be-Amerika. Ye so asara si na yâ ti Béthel ni a yeke wara mara ti azo nde nde so alondo na akodoro nde nde. So aita ti ando nde nde alango ndo oko asara si ala yeke kpengba tere na popo ti ala. A yeke mo bâ mo tene Nzapa amû mbeni ye lo mbö akatikati ti akodoro ni.
Mbeni kpale so bungbingo afiliale so oko aga na ni na so a lingbi a hon ndo ni ayeke ti mû maboko na awafango tënë si ala pensé pëpe so ala yeke yongoro na bungbi ti Jéhovah atâa so filiale ayeke mbeni pëpe na kodoro ti ala. Ni la, a leke ti tene na lege ti Internet congrégation oko oko, même ala so ayeke na ando so ayo, alingbi ti sû mbeti droit na filiale.
ANDANGBA SANGO NA NDO TI JAPON
James Linton ti filiale ti Japon afa tongana nyen sese so ayengi nga na ngu-ingo so asuku lani na mars 2011 aga na kpale na aita. A-Témoin mingi agirisa azo so ala ye ala mingi nga aye ti ala abuba. A-Témoin so ayeke pëpe na ando so aye ti ngangu ni asi dä amû ando ti lango ahon 3 100 nga na a-oto ngbangbo mingi ti mû maboko na amba ti ala aTémoin. Avolontaire abungbi oko na aita ti Komite ti lekengo ada ti bungbi ti e ti sara kua bï na lâ ti leke ada ti aita so abuba. Avolontaire ahon 1 700 la asara kua na ando so bezoin ayeke dä. Mbeni bungbi ti avolontaire so alondo na États-Unis nga na ambeni volontaire 575 amû maboko ti leke aDa ti Royaume so abuba.
A mû maboko mingi na lege ti yingo na aita so aye ti ngangu so asi na ala nga a dë bê ti ala. A-ancien ahon 400 amû maboko na ando so a yeke na bezoin ti aberger dä. A bâ biani so ye so agbu bê ti Bebungbi na ngoi so asurveillant ti zone use alondo na kota ndokua ti aTémoin ti Jéhovah ague na ndo so ye ti ngangu asi dä ti kpengba aita. Atënë so aTémoin ti Jéhovah ti dunia atene ti fa so ala bi bê ti ala na aita adë bê biani.
ANGBANGA SO E SÖ BENDA DÄ
Azo adengi mê kue ti mä Stephen Hardy ti filiale ti Grande-Bretagne so amû li ni na yâ ti mbeni lisoro na ndo ti angbanga so ahon ade ti ninga pëpe so e sö benda dä. Na tapande, ngorogbia ti France ahunda lani ti tene Association les Témoins de Jéhovah ti France afuta mbeni lapo so wungo ni ayeke nduru na ngbundangbu 40. A leke tënë ni na ngoi so Kota Da-ngbanga ti Poto amû raison na e atene so ngorogbia ti France asara ye alingbi pëpe na tënë so ayeke na Article 9 ti Kota mbeti ti mango tere so abungbi akodoro ti Poto so amû liberté na abungbi ti vorongo Nzapa. Desizion ni afa so tënë ni ayeke pëpe tënë ti nginza, ndali ti so atene: “Ti ke ti yeda so mbeni bungbi ayeke bungbi ti vorongo Nzapa, ti gi ti sara si bungbi ti vorongo Nzapa ni amiro, ti tene asioni tënë na ndo ti mbeni bungbi ti vorongo Nzapa; aye so kue ague tâ nde na article 9 ti Kota mbeti ti mango tere so abungbi akodoro ti Poto.”
Kota da-ngbanga ti akodoro ti Poto so amû nga raison na e na ndo ti tënë so andu kodoro ti Arménie. Ngbene ye na ngu 1965, Kota da-ngbanga ti akodoro ti Poto abata pëpe azo so ake ti sara kua ti turugu so ndia ti kodoro ti ala ahunda na ala ti sara. Kota kubu ti Kota da-ngbanga ti Poto so atene: “Tongana ndali ti mbeni raison so ayeke ngangu mingi na lê ti mbeni zo nga so lo lingbi pëpe ti sara kua ti turugu,” a lingbi Kota da-ngbanga ti akodoro ti Poto agbu koko ti zo ni. Desizion so apusu kodoro ti Arménie nga na akodoro tongana Azerbaïdjan na Turquie ti sara ye alingbi na ndia so.
LEKENGO ADA
Guy Pierce so ayeke mbeni membre ti Bebungbi la amû diskur ti pekoni na lo tene so azo kue so aga na bungbi so aye ti hinga ye na ndo ti akua ti lekengo da so a yeke sara na New York. Lo fa mbeni vidéo so afa akua so a yeke sara na Wallkill, Patterson, nga na ando so a vo ni ade ti ninga pëpe na Warwick nga na Tuxedo so ayeke na New York. Na ngu 2014 a yeke hunzi ande ti leke na Wallkill mbeni fini da ti lango so amû lege ti kiri ti wara ambeni chambre ahon 300.
A leke ti sara ada na ndo ti mbeni terrain ti hectare 100 na Warwick. Ita Pierce atene: “Atâa so ade e hinga pëpe tënë ti bê ti Jéhovah na ndo ti Warwick, e yeke leke ti kiri na kota ndokua ti aTémoin ti Jéhovah kâ.” A leke nga ti mû mbeni ndo so akono hectare 20 so ayeke na akilomètre bale-oko na banga ti Warwick ti bata amasini nga na akungba ti lekengo na da kâ. Ita Pierce atene: “Tongana a mû lege na e ti leke ada ni, e pensé ti hunzi kua ni na yâ ti ngu osio. Na pekoni e yeke kä ndo ti e so ayeke na Brooklyn.”
Pierce ahunda tënë, lo tene: “Bebungbi achangé pensé ti lo na ndo ti kota ye ti vundu so ayeke pusu nduru nduru so awe?” Lo kiri tënë, lo tene: “Oko pëpe. Tongana kota ye ti vundu akaï akua ni, a yeke duti tâ nzoni mingi!”
HANGE NA BAMARA SO AYEKE TOTO
Stephen Lett, mbeni membre ti Bebungbi, amû ti lo diskur na ndo ti 1 Pierre 5:8 so atene: “Ala zia li ti ala kpô, zia lê ti ala akpengba. Wato ti ala Zabolo ayeke tambela tongana mbeni bamara so ayeke toto, na lo yeke gi mbeni zo ti te lo.” Ita Lett atene so mingi ti asarango ye ti tere ti abamara asara si tapande so Pierre amû so alingbi biani na Zabolo.
Teti so abamara ayeke ngangu mingi nga ala mû loro ahon azo, a yeke nzoni e gi pëpe ti tiri na Satan wala ti mû loro ti hon lo na lege ti ngangu ti e wani. E yeke na bezoin ti mungo maboko ti Jéhovah (És. 40:31). Bamara ayeke gi ti gbu mbeni nyama na ngoi so nyama ni aku tere ti lo na ni pëpe. Tongaso, a lingbi e kpe ando so avuko na lege ti yingo ndali ti so na yâ ni la Satan ayeke gi ti gbu azo. Tongana ti so bamara ayeke fâ mbeni lekpa so ayeke sara nga sioni na amba ti lo pëpe wala kete lele ti ngonda so alango, Satan ayeke bâ mawa ti e pëpe nga anzere na lo ti fâ e. Tongana bamara ate mbeni nyama, mingi ni a yeke ngangu ti hinga nyama wa la. Legeoko nga azo so Satan ate ala na lege ti yingo, “dutingo ti ala ti nda ni aga sioni mingi ahon ti kozoni.” (2 Pi. 2:20). Ni la, a lingbi e ke Satan nga e gi lakue ti sara ye alingbi na afango ye ti Bible so e manda.—1 Pi. 5:9.
BÂ NA NENE NI PLACE TI MO NA YÂ TI DA TI JÉHOVAH
Ita Samuel Herd, mbeni membre ti Bebungbi, amû nga diskur so mama-tene ni ayeke: “E kue e yeke na mbeni place na yâ ti da ti Jéhovah.” A-Chrétien kue ayeke na mbeni place na yâ ti “da” ti Nzapa so ayeke temple ti lo ti yingo, ye so lo leke ti tene e voro lo na lege ti sandaga ti Jésus. A yeke mbeni place so a lingbi e ye ni mingi nga e bâ ni tongana mbeni kota pasa. Tongana David, e ye ti “duti na da ti L’Éternel na lâ ti [e] kue”.—Ps. 27:4.
Ita Herd adiko Psaume 92:13-15 na lo hunda lo tene: “Tongana nyen la Jéhovah ayeke mû lege na e ti maï?” Lo kiri tënë, lo tene: “Na yâ ti paradis ti yingo, Nzapa asara si e duti nzoni, lo bata e nga lo mû na e tâ tënë so adë bê ti e tongana ngu. Zia e kiri singila na lo ndali ni.” Ita Herd awa azo so ayeke mä lo, lo tene: “Zia e gi ti ngbâ na yâ ti da ti Jéhovah gi teti kete ngoi pëpe me teti lakue lakue.”
ACHRÉTIEN ABÂ MBETI TI NZAPA NA NENE NI
David Splane so ayeke nga mbeni membre ti Bebungbi afa na yâ ti diskur ti lo so atâ Chrétien abâ lakue Mbeti ti Nzapa na nene ni. Na ngoi ti akozo Chrétien, ni la ala luti na ndo ni ti leke tënë ti fango ganza (Kus. 15:16, 17). Me ti londo na ngu ngbangbo oko ti ga na ni, ambeni Chrétien so amanda senda-ndara ti aGrec ato nda ti bâ na nene ni hingango ye ti ala ti senda-ndara ahon Mbeti ti Nzapa. Na yâ ti angu so aga na pekoni, ambeni achangé afango ye ti Bible na abango ndo ti azo so a iri ala akota zo ti Eglize nga na atogbia ti Rome, ala sigigi na gbâ ti afango ye ti wataka.
Ita Splane atene so na yâ ti mbeni toli, Jésus afa so na ndo ti sese a yeke ngbâ ti wara atâ Chrétien so a soro ala ti gue na yayu so ayeke gbu koko ti tâ tënë (Mat. 13:24-30). E lingbi pëpe ti hinga mbilimbili azo ni so. Ye oko, na yâ ti angu ngbangbo mingi, gbâ ti azo alondo ti ke afango ye nga na ambeni sarango ye so ague nde na Bible. Na popo ti ala, a yeke wara azo tongana kota bua Agobard ti Lyon ti londo na ngu 800 ti si na ngu 900, Pierre ti Bruys, Henry ti Lausanne, nga na Valdès (wala Waldo) ti londo na ngu 1100 ti si na ngu 1200, John Wycliffe ti londo na ngu 1300 ti si na ngu 1400, William Tyndale ti londo na ngu 1500 ti si na ngu 1600, Henry Grew nga na George Storrs ti londo na ngu 1800 ti si na ngu 1900. Laso aTémoin ti Jéhovah angbâ ti yä na nduzu afango ye ti Mbeti ti Nzapa na ala hinga so tâ tënë ayeke na yâ ti Bible. A yeke ndali ni la Bebungbi asoro atënë so ayeke na Jean 17:17 so atene: “Tënë ti mo ayeke tâ tënë” ti duti versê ti ngu 2012.
APENDERE GBIANGO YE NA YÂ TI FANGO YE NGA NA KUSALA
Anthony Morris so ayeke membre ti Bebungbi adiko mbeni tokua so afa agbiango ye so andu amissionnaire na apionnier spécial. A to nda ni na septembre 2012, a yeke sara ande na yâ ti ambeni kodoro Ekole ti aita-koli na awali ti ala. Ye so a zia na sese Ekole ti Galaad ndali ni achangé. A to nda ni na octobre ti ngu so ahon, azo kue so ayeke gue na Ekole ti Galaad ayeke amissionnaire so ade ti gue na Ekole ti Galaad pëpe, apionnier spécial, asurveillant so ague na ando nde nde wala aBéthelite. A yeke tokua ande azo so asigigi na Ekole ni so ti gue ti kpengba azo ti Nzapa atâa na yâ ti afiliale, na yâ ti kua ti asurveillant so ague na ando nde nde, wala na ando so azo ayeke dä mingi ti tene ala mû ngangu na acongrégation na yâ ti kusala ti fango tënë.
A yeke tokua ande ambeni pionnier spécial ti to nda ti fa tënë na ando so ayo na tanga ti azo. A komanse na lango oko ti janvier 2012, a yeke tokua ambeni zo so ague na Ekole ti aita-koli so ayeke kumbamba nga na ala so ague na Ekole ti aita-koli na awali ti ala ti sara kusala ti pionnier spécial temporaire nga ti to nda ti fa tënë na ando so ayo so a yeke fa tënë dä pëpe. Ala yeke sara kua ti pionnier spécial temporaire ngu oko nga ala kiri a sara mbeni juska ti si na ngu ota. Azo so asara kua ni nzoni alingbi ti ngbâ biani biani na yâ ti kua ni.
Bungbi ti ngu oko oko so a sara na ngu 2011 ayeke lani mbeni ngoi ti ngia. E yeke ku kungo ti tene Jéhovah airi tënë nzoni na ndo ti afini changement so ti sara si kusala ti fango tënë ague na li ni nga ti sara si aita akiri aduti beoko mingi tongaso si Jéhovah awara gloire na gonda.
[Encadré/Afoto na lembeti 18, 19]
TI HINGA ALA NZONI
Na yâ ti kapa ni a leke nga ti hunda tënë na awomua oku na popo ti ala gumbaya so akoli ti ala ayeke lani amembre ti Bebungbi. Aita-wali tongana Marina Sydlik, Edith Suiter, Melita Jaracz, Melba Barry, nga na Sydney Barber afa tongana nyen la ala hinga tâ tënë nga tongana nyen la ala mû kua ti ngoi kue. Ala oko oko kue afa apendere ye so asi na ala ândö, ala sara tënë na ndo ti akoli ti ala nga na aye ti nzoni so ala na akoli ti ala awara. Na nda ti lisoro ni azo kue so aga ahe bia 86 so iri ni ayeke: “Awali be-ta-zo, awali Chrétien.”
[Afoto]
(Na nduzu) Daniel na Marina Sydlik; Grant na Edith Suiter; Theodore na Melita Jaracz
(Na gbe ni) Lloyd na Melba Barry; Carey na Sydney Barber
[Karte na lembeti 16]
(Ti bâ karte ni na atënë ni, bâ Tour ti Ba Ndo ni)
A bungbi afiliale omene na gbe ti filiale ti Mexique
MEXIQUE
GUATEMALA
HONDURAS
SALVADOR
NICARAGUA
COSTA RICA
PANAMA
[Foto na lembeti 17]
Dessin ti fini kota ndokua ti aTémoin ti Jéhovah na Warwick, New York