KIRINGO TËNË NA AHUNDA TI AZO

Iri ti Nzapa ayeke nyen?

Azo ti sewa ti e kue ayeke na iri. Même anyama so e bata ayeke na iri. Ka ti Nzapa, lo yeke na iri ape? Na yâ ti Bible, a mû atitre mingi na Nzapa, atitre tongana Nzapa ti Ngangu Ahon Kue, Gbia ti Dunia Kue nga na Wasarango ye kue, me lo yeke nga na iri ti lo wani.​—Diko Ésaïe 42:8, Tene ti Nzapa, Kozo Mbouki.

Na yâ ti mingi ti aBible mo yeke wara iri ti Nzapa na Psaume 83:18. Na tapande, na yâ ti Bible Tene ti Nzapa, Kozo Mbouki, na Psaume 83:17 a tene: “Fade ala hinga: iri ti mo ayeke Yahve!” wala Jéhovah na yâ ti La Sainte Bible en sango na Genèse 22:14.

Ti di iri ti Nzapa ayeke kota ye ngbanga ti nyen?

Nzapa aye si e di iri ti lo. Tongana e yeke sara ka tënë na azo so e ye ala, na tapande akamarade ti e, e yeke di ka iri ti ala. Ka ti Nzapa tongana e sara tënë na lo, a yeke nzoni e di iri ti lo ape? Jésus Christ awa e ti di ni.​—Diko Matthieu 6:9; Jean 17:26.

Me, ti ga kamarade ti Nzapa, e yeke na bezoin ti hinga gi iri ti lo ape me nga ti hinga ambeni ye nde na ndo ti lo nzoni. Na tapande, Nzapa ayeke tongana nyen? Zo alingbi biani ti ga nduru na lo la? Mo lingbi ti wara kiringo tënë ni na yâ ti Bible.