KIRINGO TËNË NA AHUNDA TI AZO

Nzapa ayeke mä asambela kue?

Nzapa ayeke mä sambela ti azo kue (Psaume 145:18, 19). Bible awa e ti fa na lo agingo bê ti e kue (aPhilippien 4:6, 7). Me ambeni sambela ni anzere na mê ti Nzapa ape. Na tapande, asambela so zo amanda ni awe si lo yeke tene gi pekoni anzere na mê ti Nzapa ape.​—Diko Matthieu 6:7.

Nga, Jéhovah ayeke mä pëpe sambela ti azo so ayeke doro ndia ti lo na mbana (aProverbe 28:9). Na tapande, ândö Nzapa ake ti mä sambela ti azo ti Israël ndali ti so ngbanga ti mênë ayeke na li ti ala. Tongaso, a yeke nzoni e sara ambeni ye awe si Nzapa amä sambela ti e.​—Diko Ésaïe 1:15.

A yeke nzoni e sara nyen si Nzapa amä sambela ti e?

Ti sambela Nzapa, a yeke nzoni e yeke na mabe (Jacques 1:5, 6). E doit ti hinga so Nzapa ayeke dä nga lo yeke bi bê ti lo na ndo ti e. A yeke nzoni e manda Bible ti sara si mabe ti e akpengba, ndali ti so tâ mabe adoit ti luti na ndo ti aye so ayeke polele so ayeke na yâ ti Bible.​—Diko aHébreu 11:1, 6.

A yeke nzoni e sara tere ti e kete nga e tene tâ ye so ayeke na bê ti e. Même Jésus so lo yeke Molenge ti Nzapa asara tere ti lo kete tongana lo yeke sambela (Luc 22:41, 42). Tongaso, ahon ti tene atënë ti sambela ti e afa so ye ti bê ti e la e ye si Nzapa asara, a yeke nzoni e diko Bible ti hinga ye so lo ye. Na tongana e yeke sambela, zia si a gue oko na ye so Nzapa ni aye.​—Diko 1 Jean 5:14.