Bâ wala dutingo ti mo ayeke tongana nyen

1, 2. Tongana e ye ti nzere na lê ti Nzapa, a lingbi sarango ye ti e aduti tongana nyen?

MINGI ti azo aye ti hinga ye so amba ti ala apensé na ndo ti ala. Ye oko, e so e yeke aChrétien ye so Jéhovah apensé na ndo ti e la ayeke kota mingi. Lo la lo yeke Kota ahon azo kue na yâ ti dunia nga lo yeke “lingu so amû fini”.​—Ps. 36:10.

² Bazengele Pierre afa so ti tene e nzere na lê ti Jéhovah, a lingbi e bi tere ti e na yâ ti “sarango ye so ayeke nzoni-kue nga na akusala so afa so [e] gbu tënë ti Nzapa ngangu”. (Diko 2 Pierre 3:11.) Ti tene e nzere na lê ti Nzapa, a lingbi “sarango ye” ti e aduti nzoni-kue, so ti tene e duti na saleté pëpe na lege ti aye so e sara, pensé ti e nga na lege so e yeke voro na Nzapa. A lingbi nga ndoye so e yeke na ni teti Nzapa nga nengo so e ne na lo la apusu e ti sara ‘akusala so afa so e gbu tënë ti Nzapa ngangu’. Tongaso, ti tene e nzere na lê ti lo a lingbi sarango ye ti e nga na apensé ti e aduti nzoni-kue. Teti so Jéhovah ayeke “tara bê ti azo,” lo hinga wala asarango ye ti e ayeke nzoni-kue nga e yeke voro gi lo oko.​—1 Chron. 29:17.

3. Ahundango ndo wa a yeke nzoni e hunda tere ti e na ni?

³ Satan Zabolo aye pëpe ti tene e gi ti nzere na lê ti Nzapa. Lo yeke sara ye kue so lo lingbi ti sara ti buba songo ti e na Jéhovah. Satan ayeke sara kua lakue na atënë ti mvene ti gi ti handa e tongaso si e zia ti voro Jéhovah (Jean 8:44; 2 aCor. 11:13-15). Ni la, a yeke nzoni e hunda tere ti e: ‘Satan ayeke handa azo tongana nyen? Mbi lingbi ti sara nyen ti bata nzoni songo ti mbi na Jéhovah?’

SATAN AYEKE HANDA AZO TONGANA NYEN?

4. Satan ayeke gi ti sara nyen ti buba songo ti e na Nzapa? Ngbanga ti nyen?

⁴ Disciple Jacques atene: “Zo oko oko ayeke wara tara tongana nzara ti bê ti lo agboto lo na ahanda lo. Na pekoni, tongana nzara ti bê ni amû ngo awe, a yeke dü siokpari; na siokpari nga, tongana a hunzi ti sara ni awe, a dü kuâ.” (Jacq. 1:14, 15). Ti buba nzoni songo ti e na Jéhovah, Satan ayeke gi ti sara ngangu na ndo ti bê ti e, ndo so anzara ti e alondo dä.

5, 6. (a) Na lege wa Satan agi ti sara ngangu na ndo ti bê ti e? (b) Aye ota wa Satan ayeke sara kua na ni ti maï asioni nzara na yâ ti bê ti e? Tongana nyen la lo yeke sara kua na ni?

⁵ Tongana nyen la Satan ayeke gi ti sara ngangu na ndo ti bê ti e? Bible atene: “Dunia so kue ayeke na gbe ti Zo ti sioni.” (1 Jean 5:19). Aye ti bira ti Satan andu “aye so ayeke na yâ ti dunia so.” (Diko 1 Jean 2:15, 16.) Teti angu saki mingi, Zabolo aleke aye na kode na yâ ti dunia so ti handa na azo. Teti so e yeke na yâ ti dunia so, a lingbi e sara hange na akûkû ti lo.​—Jean 17:15.

⁶ Satan ayeke gi ti maï asioni nzara na yâ ti bê ti e. Ti sara ni, lo yeke sara kua na “aye” ota so “ayeke na yâ ti dunia so” so bazengele Jean asara tene ni: (1) “nzara ti mitele,” (2) “nzara ti lê,” nga na (3) “sarango baba ti akungba so zo ayeke na ni.” Satan asara kua na aye ota so kue ti handa na Jésus na yando. Teti so Satan asara kua na akûkû so teti angu mingi, lo hinga ti sara kua na ni nzoni mingi nga lo hinga so wa la lo lingbi ti sara kua na ni ti handa na zo oko oko. Kozoni si e bâ aye so e lingbi ti sara ti bata tere ti e, zia e bâ tongana nyen la Zabolo awara lege ti handa Ève me lo wara lege pëpe ti handa Molenge ti Nzapa.

“NZARA TI MITELE”

7. Tongana nyen la Satan asara kua na “nzara ti mitele” ti handa na Ève?

⁷ Azo kue ayeke na bezoin ti te kobe ti ngbâ na fini. Wasarango ye aleke sese ti tene adü gbâ ti kobe. Satan alingbi ti sara kua na nzara ti kobe ti handa e ti sara ye so anzere na Nzapa pëpe. Bâ tongana nyen la lo sara ye so na Ève. (Diko Genèse 3:1-6.) Satan atene na Ève so na lango so lo yeke te lê ti “keke ti hinga nzoni na ti hinga sioni” lo yeke kui ape. Lo tene na Ève so tongana lo te ni, lo yeke ga tongana Nzapa (Gen. 2:9). Zabolo aye ti tene so Ève ayeke na bezoin ti mä yanga ti Nzapa pëpe si lo ngbâ na fini. A yeke lani mbeni kota mvene. Na pekoni so Zabolo asara tënë so na Ève awe, Ève ayeke lani na aye use na gbele lo: Lo lingbi lani ti soro ti ke tënë ni wala ti ngbâ ti pensé na ndo ni nga ti zia si nzara ti lê ti keke ni amaï na yâ ti bê ti lo. Atâa so Ève alingbi lani ti te alê ti tanga ti akeke kue ti yaka ni, lo ngbâ lani ti pensé na ndo ti keke so ayeke na bê ti yaka ni, nga lo “kamata lê ni, lo te”. Satan amaï na yâ ti bê ti Ève nzara ti mbeni ye so Wasarango lo agbanzi na lo.

8. Tongana nyen la Satan asara kua na “nzara ti mitele” ti tara na Jésus? Ngbanga ti nyen ye so lo sara so atï na ngu?

⁸ Satan asara kua na oko kode so na ngoi so lo gi lani ti tara Jésus na yando. Na pekoni so Jésus asara lango 40 nga na bï 40 sân ti te ye, Satan agi ti tara lo na sarango kua na nzara ti kobe. Satan atene na lo atene: “Tongana mo yeke mbeni molenge ti Nzapa, tene na tênë so ti ga mapa.” (Luc 4:1-3). Jésus ayeke lani na aye use na gbele lo: Lo lingbi ti soro ti sara kua na ngangu ti lo ti kaï na nzara ti kobe so asara lo wala ti sara kua na ni ape. Jésus ahinga so a lingbi lo sara kua na ngangu ti lo gi ndali ti aye ti lo wani ape. Atâa so nzara asara lo, lo bâ lani nzoni songo so lo yeke na ni na Nzapa na nene ni mingi ahon kobe. Jésus akiri tënë atene: “A sû na Mbeti ti Nzapa a tene: ‘Zo ayeke ngbâ na fini gi na lege ti mapa pëpe, me na lege ti tënë kue so asigigi na yanga ti Jéhovah.’”​—Mat. 4:4; Luc 4:4.

“NZARA TI LÊ”

9. Tënë “nzara ti lê” aye ti tene nyen? Tongana nyen la Satan asara kua na ni ti handa na Ève?

⁹ Jean asara nga tënë ti “nzara ti lê” tongana mbeni kûkû ti Satan. Tënë so aye ti tene so mbeni zo alingbi ti komanse ti sara nzara ti mbeni ye gi na bango ye ni. Satan asara kua na kûkû so ti handa na Ève. Lo tene: “Fade lê ti i alungula.” So Ève angbâ ti bâ lê ti keke ni mingi, nzara ni akiri asara lo mingi. Ève abâ so keke ni “a nzere na lê”.

10. Tongana nyen la Satan asara kua na “nzara ti lê” ti tara na Jésus? Jésus asara ye tongana nyen?

¹⁰ Tongana nyen la Satan asara kua na “nzara ti lê” ti tara na Jésus? “Gi na yâ ti kete ngoi, lo fa na [Jésus] aroyaume kue so ayeke na ndo ti sese so azo ayeke dä. Na Zabolo atene na lo: ‘Fade mbi yeke mû na mo komandema so kue nga na gloire ni.’” (Luc 4:5, 6). Jésus alingbi lani pëpe ti bâ aroyaume kue ti sese gi na yâ ti kete ngoi, me âmanke Satan apensé so tongana lo fa na Jésus gloire ti aroyaume so na yâ ti mbeni ye tongana suma si Jésus abâ ni lo lingbi ti sara nzara ni. Sân kamene Satan atene na Jésus, a tene: “Tongana mo voro mbi, aye so kue ayeke ga ande ti mo.” (Luc 4:7). Jésus aye lani pëpe ti sara ye tongana ti so Satan aye. Hio, Jésus akiri tënë atene: “A sû na Mbeti ti Nzapa a tene: ‘A yeke gi Jéhovah Nzapa ti mo si a lingbi mo voro lo, na a yeke gi lo oko si a lingbi mo sara kusala so ayeke nzoni-kue na lo.’”​—Luc 4:8.

“SARANGO BABA TI AKUNGBA SO ZO AYEKE NA NI”

11. Tongana nyen la Satan ahanda Ève?

¹¹ Na ngoi so Jean ayeke sara tënë ti aye so ayeke na yâ ti dunia so, lo sara tënë ti “sarango baba ti akungba so zo ayeke na ni.” Na ngoi so gi Adam na Ève la ayeke lani na ndo ti sese, ala lingbi pëpe ti ‘sara baba ti akungba so ala yeke na ni’ na lê ti azo. Me ala ga azo ti baba. Na ngoi so Satan ahanda Ève, lo sara si Ève abâ so mbeni pendere ye ayeke dä so lo lingbi fade ti wara me so Nzapa agbanzi ni na lo. Zabolo atene na lo so na lango so lo yeke te “lê ti keke ti hinga nzoni na ti hinga sioni” lo yeke “ga tongana Nzapa,” lo yeke “hinga nzoni na sioni.” (Gen. 2:17; 3:5). Satan aye lani ti tene Ève apensé so lo lingbi ti duti na fini sân Jéhovah. E lingbi ti tene so mbeni ye so asara si Ève ayeda na mvene ti Satan ayeke baba. Lo te lê ti keke so a tene na lo ti te ape, nga lo pensé so lo yeke kui ape. Ye so lo sara so ayeke tâ na lege ni ape.

12. Mbeni lege so Satan agi ti tara na Jésus ayeke so wa? Jésus asara ye tongana nyen ?

¹² Nde na Ève, Jésus azia mbeni pendere tapande ti sarango tere kete. Satan agi ti tara Jésus na mbeni lege nde ti tene lo sara mbeni ye so alingbi ti dö bê ti azo na ti zia Nzapa na tara. Me Jésus ake na kuru go ti sara ni ndali ti so ye so alingbi ti duti sarango ye na baba. Kiringo tënë ti lo ayeke droit nga ayeke polele. Lo tene: “A tene: ‘A lingbi mo zia Jéhovah Nzapa ti mo na tara pëpe.’”​—Diko Luc 4:9-12.

TONGANA NYEN LA E LINGBI TI BATA NZONI SONGO NA NZAPA?

13, 14. Tongana nyen la Satan ayeke gi ti handa e laso?

¹³ Laso, Satan ayeke sara kua na a-oko kûkû so lo sara lani na kua ti handa na Ève nga ti tara na Jésus. Lo yeke sara kua na “nzara ti mitele” ti handa azo ti sara sioni wala ti te ye nga ti nyon sämba ahon ndo ni. Lo yeke sara kua na “nzara ti lê” ti handa azo ti bâ porno, mbilimbili na ndo ti Internet. Lo yeke sara nga kua na “sarango baba ti akungba so zo ayeke na ni” ti sara si azo aga azo ti baba, ala ye komandema, yango-iri nga na aye ti mitele ahon ndo ni.

¹⁴ “Aye so ayeke na yâ ti dunia so” ayeke tongana aver so zo ti gbungo asusu ayeke sara kua na ni ti gbu na asusu. Na lê ti susu ver ni akpa mbeni nzoni ye, me lê ti yango ayeke na yâ ni. Legeoko nga, Satan ayeke sara kua na aye so azo alingbi ti bâ ni tongana anzoni ye so ala yeke na bezoin ni lâ oko oko ti pusu ala ti sara ye so ague nde na andia ti Nzapa. Satan aye si e mä na bê so ti bâ lege ti abezoin ti e nga ti sara si gigi ti e aga nzoni ayeke kota ye mingi ahon sarango ye so bê ti Nzapa aye. Mo yeke zia si Satan ahanda mo?

15. Legeoko tongana ti Jésus, e lingbi ti sara nyen ti kpe ti tene Satan ahanda e?

¹⁵ Atâa so Satan awara lege ti handa Ève, Jésus adö sese na lo. Na ngoi ti tara oko oko kue, lo kiri tënë na lege ti Mbeti ti Nzapa, lo tene: “A sû na Mbeti ti Nzapa a tene” wala “A tene.” Tongana e manda Bible nzoni, e yeke hinga aversê nzoni nga e yeke dabe ti e na ati so alingbi ti mû maboko na e na ngoi ti atara (Ps. 1:1, 2). Ti dabe ti e na tapande ti awakua be-ta-zo ti Nzapa so Bible asara tënë ti ala, a yeke mû maboko na e ti duti be-ta-zo tongana ala (aRom. 15:4). Tongana e yeke na tâ kpengo mbeto ti Jéhovah, so ti tene e ndoye ye so lo ye nga e ke ye so lo ke, a yeke bata e.​—Ps. 97:10.

16, 17. Tongana nyen la “hingango ndo” ti e alingbi ti sara ngangu na ndo ti sarango ye ti e?

¹⁶ Bazengele Paul awa e ti sara kua na “hingango ndo” ti e ti ga azo so ayeke pensé tongana ti Jéhovah, me tongana ti dunia so pëpe (aRom. 12:1, 2). Paul adabe ti e so a lingbi e sara hange na aye so e yeke pensé na ndo ni. Lo tene: “E yeke kinda atënë so ayeke na lege ni pëpe nga na kota ye kue so alondo ti ke hingango ye ti Nzapa. Na e mû bibe kue na ngbâa ti sara si bibe ni amä yanga ti Christ.” (2 aCor. 10:5). Apensé ti e ayeke sara ngangu mingi na ndo ti sarango ye ti e, tongaso a lingbi e “ngbâ ti bi bê” ti e na ndo ti aye so akpengba zo.​—aPhil. 4:8.

¹⁷ E lingbi pëpe ti ga nzoni-kue tongana e yeke na apensé nga na anzara ti bê so ayeke sioni. A lingbi e ndoye Jéhovah na “vuru bê”. (1 Tim. 1:5). Me teti so bê ti e alingbi ti handa e, “aye so ayeke na yâ ti dunia so” alingbi même ti sara ngangu mingi na ndo ti e sân ti tene e hinga ni (Jér. 17:9). Tongaso, a yeke kota ye ti tene e mû peko ti wango ti Paul so atene: “Ala ngbâ ti bâ tere ti ala ti bâ wala ala yeke na yâ ti mabe, ala ngbâ ti bâ tere ti ala ti bâ wala ala wani ala yeke tongana nyen.” Tongana e yeke manda Bible, a yeke nzoni e hunda tere ti e: ‘Apensé ti mbi nga na anzara ti bê ti mbi anzere na lê ti Nzapa?’​—2 aCor. 13:5.

18, 19. Ngbanga ti nyen a yeke nzoni e sara kue ti sara ye tongana ti so Jéhovah aye?

¹⁸ Mbeni ye so alingbi ti mû maboko na e ti ke “aye so ayeke na yâ ti dunia so” ayeke ti dabe ti e na tënë ti Jean so atene: “Dunia so angbâ ti hon nga na nzara ti lo kue. Me zo so asara ye so bê ti Nzapa aye, lo ngbâ lakue lakue.” (1 Jean 2:17). Dunia ti Satan akpa ye so ayeke ngbâ lakue lakue. Me, mbeni lâ a yeke futi ni ande. Tongana e dabe ti e so aye kue so ayeke na yâ ti dunia so ayeke ngbâ lakue lakue pëpe, a yeke mû maboko na e ti zia lege na Satan pëpe ti handa e.

¹⁹ Bazengele Pierre awa e ti duti azo so anzere na lê ti Nzapa na ngoi so e yeke “ku na [e] bata na li ti [e] ngoi so lâ ti Jéhovah ayeke si na ayeke duti dä, so na yâ ni ayayu so wâ amû ni ayeke ga tongana ngu si a girisa na aye ni so amû wâ ngangu mingi ayeke ga tongana ngu.” (2 Pi. 3:12). Na yâ ti ngoi kete, lâ ti Jéhovah ayeke si na lo yeke futi dunia ti Satan kue. Me juska ti si na ngoi ni so, Satan ayeke ngbâ ti sara kua na “aye so ayeke na yâ ti dunia so” ti tara e tongana ti so lo tara lani Ève na Jésus. A lingbi e duti tongana Ève pëpe ti gi gi ti kaï anzara ti bê ti e. Tongana e gi gi ti kaï anzara ti bê ti e, e yeke fa so Satan la ayeke nzapa ti e. A lingbi e duti tongana Jésus nga e dö sese na atara, atâa aye so Satan ayeke sara kua na ni ti handa na e ayeke pendere tongana nyen. Zia e sara kue ti ngbâ ti sara ye tongana ti so Jéhovah aye.