“Nzapa andoye zo so amû ye na ngia”

Tongana mbeni zo amû na mo mbeni cadeau, ti so wa la ayeke nzere na mo mingi? Ti so lo mû ni na ndoye? Wala ti so lo mû ni gi tongaso, wala gi ngbanga ti so a hunda na lo ti mû ni na mo? Mingi ti e ayeke ye ti lo so a mû ni na ndoye. Biani, ye so ayeke na gbe ti bê ti mbeni zo la ayeke kota ye mingi na lê ti e nga na lê ti Nzapa. Bâ tënë so bazengele Paul asû na gbe ti yingo ti Nzapa so e wara ni na 2 aCorinthien 9:7.

Nyen la apusu lani Paul ti tene atënë so? Lo ye lani si aChrétien ti Corinthe amû ye na aita ti ala ti Judée so awara akpale. Lo gbu aChrétien ni so gbungo na ngangu ti mû ye na aita ti ala ni? Oko ape, nde na so lo tene: “Zia zo oko oko asara tongana ti so lo leke na bê ti lo ti sara, na vundu na bê pëpe wala a gbu lo gbungo na ngangu pëpe, teti Nzapa andoye zo so amû ye na ngia.” Zia e bâ nda ti tënë so nzoni.

“Tongana ti so lo leke na bê ti lo ti sara.” Paul atene so nzoni Chrétien ayeke mû ye ngbanga ti so lo wani la lo ye “na bê ti lo” ti mû. Nga, tongana lo bâ aita ti lo na yâ ti bezoin, lo yeke zia ala gi tongaso ape. Tënë “leke na bê” aye ti fa so Chrétien ni so ayeke gbu li kozo na ndo ti aye so amanke aita ti lo si lo yeke hunda tere ti lo na ye so lo lingbi ti sara ti kanga dû ni.​—1 Jean 3:17.

“Na vundu na bê pëpe wala a gbu lo gbungo na ngangu pëpe.” Paul afa asarango ye use so a lingbi atâ Chrétien aduti na ni ape tongana ala mû ye na azo: ti mû ye na vundu na bê nga ti mû ye ngbanga ti so a gbu ala gbungo na ngangu. Mbeni bakari atene so zo so amû ye na vundu na bê ayeke zo so tongana lo mû ye, lo tene nginza la ayeke hon so. Ti ambeni zo, ala mû ye na zo ngbanga ti so a gbu ala gbungo na ngangu. Tâ zo wa na popo ti e aye ti wara mbeni ye na maboko ti mara ti azo tongaso zo wa?

“Nzapa andoye zo so amû ye na ngia.” Paul atene so tongana mbeni Chrétien azia na bê ti lo ti mû ye na zo, zia si lo mû ni na ngia na bê. Biani, mungo ye na zo na nzoni bê aga na ngia (Kusala 20:35). Azo kue ayeke bâ ngia so zo ti mungo ye ni ayeke duti na ni. Tënë “ngia na bê” alingbi ti ndu ye so ayeke na yâ ti bê ti zo ni wala ye so azo ayeke bâ na lê ti zo ni. A nzere ka na e tongana zo amû ye na mba ti lo na ngia. A nzere nga na Nzapa. Mbeni Bible ni nde atene ti lo tënë so: “Nzapa aye azo so aye ka ti mû ye na amba ti ala.”​—Contemporary English Version.

Atënë ti bazengele Paul so ayeke tâ nzoni mingi ndali ti e aChrétien. A fa na e ye so a lingbi e sara tongana e ye ti mû ye na zo. Atâa ngoi ti e la e mû ni ti sara na mbeni ye, wala ngangu ti e wala nginza ti e wala mbeni ye tongaso, zia a duti mbeni ye so alondo na bê ti e. Zia a duti nga mbeni ye so e wani e wara ngia dä ndali ti so e mû ye na azo, mbilimbili na azo so ye amanke ala. Mungo ye tongaso ayeke zia ngia na bê ti e na ayeke sara si Nzapa aye e, ngbanga ti so lo ndoye “zo so amû ye na ngia.”