ATËNË SO AZO AHUNDA
Ngbanga ti nyen kozo si Jésus azingo Lazare na kuâ, lo toto na ngu ti lê tongana ti so Jean 11:35 afa?
Tongana mbeni zo so e ye lo akui, e yeke toto ka ndali ti so e yeke bâ lo ape. Atâa so Jésus aye Lazare mingi, a yeke pëpe ndali ti so Lazare akui la lo toto. Tongana ti so atënë so angoro Jean 11:35 afa, a yeke mawa ti afami na akamarade ti Lazare la apusu Jésus ti toto.—Jean 11:36.
Na ngoi so Jésus amä lani so tere ti Lazare ason, lo gue hio pëpe na ndo ti Lazare ti kaï kobela ti lo. Bible atene: “Tongana Jésus amä so tere ti Lazare ason, lo kiri lo ngbâ lango use na ndo so lo yeke dä.” (Jean 11:6). Ngbanga ti nyen Jésus ague hio ape? Lo hinga ndani. Lo tene: “Kobela so ayeke hunzi gi na kuâ pëpe, me a yeke ti mû gloire na Nzapa, si na lege ni a lingbi ti mû gloire na Molenge ti Nzapa.” (Jean 11:4). Ni la, Jésus asara kusala na kuâ ti Lazare “ti mû gloire na Nzapa”. Na lege wa? Jésus ayeke sara mbeni kpengba miracle na lege so lo yeke zingo kota kamarade ti lo na yâ ti dû ti kuâ.
Na yâ ti lisoro ti Jésus na adisciple ti lo na ngoi ni so, lo haka kuâ na lango. A yeke nda ni la lo tene na ala so lo yeke “gue kâ ti zingo [Lazare] na lango”. (Jean 11:11). Ti Jésus, zingongo Lazare na kuâ ayeke tongana ti so mbeni babâ wala mama ayeke zingo molenge ti lo na lango. Tongaso, lo yeke na mbeni raison pëpe ti sara vundu ti kuâ ti Lazare.
Me, nyen la apusu Jésus ti toto na ngu ti lê? Gi atënë so angoro versê ni amû lege na e ti wara kiringo tënë ni. Na ngoi so Jésus atingbi na Marie, ita ti Lazare, lo bâ so lo na ambeni zo ayeke toto, Jésus ‘adema na yâ ti bê ti lo na vundu asara lo.’ Gi so Jésus abâ vundu ti ala, vundu agbu lo na asara si lo “dema na yâ ti bê ti lo”. A yeke ye so la asara si “Jésus atoto na ngu ti lê.” Na ngoi so Jésus abâ so akamarade ti lo so lo ye ala mingi ayeke na yâ ti vundu, vundu agbu lo mingi.—Jean 11:33, 35.
Mbaï so afa so Jésus ayeke na ngangu ti kiri na azo ti e so e ye ala mingi na fini nga na nzoni seni na yâ ti fini dunia so ayeke ga. A fa nga na e so Jésus ahinga ti zia tere ti lo na place ti azo so mbeni fami ti ala so ala ye lo mingi akui. Mbeni ye so e lingbi ti manda na lege ti mbaï so ayeke so a yeke nzoni e hinga ti bâ mawa ti azo so ayeke na vundu ndali ti afami ti ala so akui.
Jésus ahinga lani so lo yeke gue ti zingo Lazare na kuâ. Me, ndoye so lo yeke na ni na mbage ti akamarade ti lo nga so lo bâ mawa ti ala, a pusu lo ti toto na ngu ti lê. Legeoko nga, tongana e zia tere ti e na place ti amba ti e, a yeke pusu e ti “toto legeoko na azo so atoto.” (aRom. 12:15). Tongana mbeni zo asara vundu, a ye pëpe ti tene so lo yeke na mabe mbeni pëpe na beku ti zingongo ti akuâ. Biani, Jésus ayeke nzoni tapande ti zo so ahinga ti zia tere ti lo na place ti azo so ayeke na vundu na lege so lo toto tâ na ngu ti lê, atâa so lo yeke gue lani ti zingo Lazare na kuâ.