KOTA MAMA-TENE NI | ATËNË TI MVENE SO ASARA SI AMBENI ZO AYE NZAPA APE
Ndani so a yeke ngangu na ambeni zo ti ye Nzapa
“‘Mo ndoye Jéhovah Nzapa ti mo na bê ti mo kue, na âme ti mo kue nga na bibe ti mo kue.’ So ayeke commandement so ayeke kota ahon atanga ni kue na a yeke kozoni la.”—Jésus Christ, ngu 33.a
Ambeni zo abâ so a yeke ngangu na ala ti ye Nzapa. Ti ala, zo ahinga li ti lo na Nzapa ape, lo yeke pensé na azo ape wala lo yeke même sioni. Bâ ambeni tënë ni so ambeni zo ni atene:
“Mbi sambela lani Nzapa ti tene lo mû maboko na mbi, me na oko ngoi ni, mbi bâ so lo yeke pensé na zo ape. Ti mbi lani, ye oko ayeke gbu ka bê ti Nzapa ape.”—Marco, na Italie.
“Ti tâ tënë ni, atâa so mbi ye lani ti sara na Nzapa, mbi bâ ti mbi mbi tene lo yeke pensé na e ape. Nga lo yeke sioni Nzapa so aye gi ti punir e. Mbi pensé lâ oko ape so lo ye e azo.”—Rosa, na Guatemala.
“Na kete ti mbi, mbi tene ti mbi so Nzapa ayeke gi ka gi afaute ti e, na lo yeke nduru ti punir e. Na pekoni, mbi bâ lo tongana Nzapa so ayeke pensé na azo ape. Lo yeke tongana mbeni kozo gbenyon-gbia so ayeke sara kua ndali ti azo ti kodoro ti lo me so ti tâ tënë ni lo yeke pensé na azo ni ape.”—Raymonde, na Canada.
Mo tene ti mo nyen? A yeke ngangu na zo ti ye Nzapa? Teti angu ngbangbo mingi aChrétien ahunda mara ti tënë so. Même na ngu 500 ti si na ngu 1 500, mingi ti azo so ayeke gue na eglize azia lege ti sambela Nzapa ti Ngangu Ahon Kue. Ndali ti nyen? Ndali ti so mbeto ti lo asara ala sioni. Na tapande, pakara Will Durant atene: “So Nzapa ayeke pensé na zo ape nga lo yeke sioni so, wasiokpari wa la akpa ti sambela lo?”
Nyen la apasêe si azo abâ Nzapa tongana “mbeni sioni Nzapa so ayeke pensé na zo ape so?” Bible afa ti lo nyen biani na ndo ti Nzapa? Tongana mo hinga tâ tënë na ndo ti Nzapa alingbi ti mû maboko na mo ti ye lo?