Mû maboko na aita so asara divorce Tongana nyen ti sara ni?

Mbeni wali ayeke dë bê ti mbeni mba ti lo so adivorcé na koli ti lo

Tongana peut-être mo hinga mbeni zo so asara divorce wala mo hinga gbâ ti azo so asara divorce, a yeke ngbanga ti so divorce ahon ndo ni. Na tapande, mbeni gingo nda ti ye so a sara na Pologne afa so azo so ayeke na ngu 30 so asara mariage asara ngu ota ti si na ngu omene mingi ti ala asara divorce. A yeke pëpe gi azo so ayeke na ngu so la si asara divorce.

Na Espagne mbeni ndokua so abâ tënë na ndo ti sewa atene so “atondo afa so na [Poto] ndambo ti azo so asara mariage asara divorce na pekoni “. A yeke oko ye so asi na yâ ti ambeni kodoro so ague na li ni.

AYE SO ALINGBI TI SI NA ZO HIO NA PEKO TI DIVORCE

Aye wa la ayeke si ka na pekoni ti divorce? Mbeni wamungo wango na Poto ti Tö so ahinga ye nzoni na ndo ti kpale ti divorce atene: “Divorce ayeke fango polele na gigi ye so asi awe. A yeke fango yâ ti songo nga aye ti pekoni amû vundu mingi.” Lo kiri lo tene: “Divorce ayeke sara si zo aduti na kota vundu, ngonzo asara lo, lo regretté, lo gi bê ti lo mingi nga kamene asara lo.” Na ambeni ngoi zo ni alingbi ti pensé ti fâ tere ti lo. “Na pekoni so ngbanga ayeda na tënë ti divorce awe, . . . zo so asara divorce abâ so lo yeke gi lo oko nga lo hinga ye so lo yeke sara ape. Lo lingbi ti hunda tere ti lo, lo tene: ‘So fadeso mbi sara divorce awe so, mbi yeke zo wa? Nyen la mbi yeke sara na gigi ti mbi nyen?’”

Ewa adabe ti lo na ye so asi na lo teti angu mingi, lo tene: “Kamene asara mbi mingi na pekoni so e sara divorce. Avoizin ti mbi, azo so mbi na ala e sara kua ndo oko ahinga mbi tongana ‘zo so asara divorce awe’. Ngonzo ahon ndo ti mbi. Koli ti mbi azia mbi na amolenge use so ade kete, na a yeke na mbi ti ga babâ nga mama ti ala.”a Adam, so ayeke ancien a sara ngu 12 atene: “Mbi bâ so mbi ne encore ape, ngonzo ayeke sara mbi nga mbi yeke na nzara ti ga nduru na zo ape.”

SARA NGANGU TI KIRI TI DUTI NA NZONI BANGO NDO

Teti so ye so asi na ala asara ala vundu mingi nga ala gi bê ti ala mingi teti gigi ti ala ti kekereke, ambeni zo asara ngangu ti kiri ti duti na nzoni bango ndo atâa so ala sara divorce asara angu mingi. Ala lingbi ti pensé so azo asara sanka ti ala. Mbeni zo ti sungo mbeti-sango atene so “a lingbi ala changé sarango ye ti ala nga ala manda ti leke akpale ti ala, ala wani.”

Stanisław atene: “Na ngoi so e sara divorce, ngbene wali ti mbi ake ti tene mbi bâ akete molenge ti mbi ti wali use. Ye so asara si mbi bâ so zo ti bango lege ti mbi ayeke dä encore ape nga même Jéhovah kue ake mbi awe. Mbi yeke na nzara ti ngbâ na fini ape. A si na mbeni ngoi mbi bâ so bibe so mbi yeke na ni ayeke na lege ni ape.” Wanda so asara nga divorce agi bê ti lo mingi teti gigi ti lo ti kekereke, lo tene: “Biani mbi pensé so na peko ti ye so asi na mbi so, teti mbeni ngoi azo nga aita ayeke ga nduru na mbi na amolenge ti mbi ape. Me fadeso mbi bâ so aita aga nduru mingi na e na ala mû maboko na mbi na ngoi so mbi yeke sara kue ti bata amolenge ti mbi ti ga awakua ti Jéhovah.”

Na lege ti atënë so mo lingbi ti hinga so na peko ti divorce ambeni zo ayeke na ambeni pensé so ayeke na lege ni ape. Ala lingbi ti maï ambeni pensé so ayeke na lege ni ape na ndo ti ala, ala pensé so ala ne ape nga zo oko abi bê ti lo na ala ape. Tongana ala pensé tongaso ala lingbi ti kasa azo so ayeke nduru na ala. Ye so ayeke sara si ala lingbi ti to nda ti pensé so aita ti congrégation ayapu na mbage ti ala ape nga aita ni amû maboko na ala ape. Ye so asi na Stanisław nga na Wanda afa so azo so asara divorce alingbi ti bâ so aita amû maboko biani na ala. Aita amû maboko na ala atâa so kozo ala bâ ni polele ape.

NA NGOI SO ZO NI ABÂ SO LO YEKE GI LO OKO NGA LO BÂ SO A KE LO

E girisa ape so atâa ngangu kue so e sara ti mû maboko na aita so asara divorce, ngoi na ngoi ala lingbi ti bâ so ala yeke gi ala oko. Mingi ni aita-wali so asara divorce alingbi ti bâ so azo so abi bê na ala ayeke mingi ape. Alicja atene: “Mbi sara divorce asara ngu miombe. Me, na ambeni ngoi mbi ngbâ ti bâ so mbi ne ape. Na angoi tongaso, mbi yeke gi ti duti gi mbi oko na mbeni ndo na mbi yeke toto nga mawa ti tere ti mbi ayeke sara mbi.”

Atâa so aye so e londo ti sara tënë na ndo ni so ayeke si ka na ambeni zo so asara divorce, Bible ake ti tene zo agi ti duti gi lo oko. Tongana zo ake ti sara ye alingbi na tënë so, a yeke sara si lo ke “ye kue so ayeke na lege ti tâ ndara.” (aProv. 18:1). Me, a lingbi zo so abâ so lo yeke gi lo oko ahinga so, a yeke na lege ti ndara ti kpe ti gi wango lakue na mbage ti zo so ayeke mba ti lo koli ape wala mba ti lo wali ape. Tongana lo sara tongaso ape, a lingbi ti sara si lo sara nzara ti koli ni wala ti wali ni.

Aita ti e so asara divorce alingbi ti gi bê ti ala mingi na ndo ti gigi ti ala ti kekereke nga ala bâ so ala yeke gi ala oko wala a ke ala. E hinga so ye so ayeke si na azo so asara divorce ayeke oko nga ayeke ngangu na ala ti hon ndo ni. Tongaso, a lingbi e mû tapande ti Jéhovah na lege so e yeke mû maboko na bê ti e kue na mara ti aita tongaso (Ps. 55:23; 1 Pi. 5:6, 7). A lingbi e hinga so mungo maboko so e yeke mû na ala ala yeke bâ ni na nene ni mingi. Ala yeke wara na yâ ti congrégation atâ kamarade so ayeke mû maboko na ala.—aProv. 17:17; 18:24.

a A changé ambeni iri ni.

Duti na nzoni bango ndo na ndo ti divorce

Awakua ti Jéhovah abâ mariage na nene ni mingi. A yeke teti so bango ndo ti e ague oko na ye so Bible afa. Na tapande, na Malachie 2:16 Nzapa atene polele atene: “Mbi ke ziango wali.” Oko raison so ndali ni Bible amû lege na mbeni koli wala mbeni wali ti sara divorce na koli wala wali ti lo ayeke tongana mbeni oko na popo ti ala agi mbeni koli wala mbeni wali nde. Tongana mbeni zo asara divorce teti araison so ague nde na tënë ti Bible peut-être lo sara divorce teti so lo leke na bê ti lo ti mû mbeni zo nde, lo sara kota faute la.—Gen. 2:22-24; Deut. 5:21; Mat. 19:4-6, 9.

Me tongana asi so mbeni ita-koli wala ita-wali asara divorce ndali ti so mbeni oko agi mbeni koli nde wala mbeni wali nde, aita na yâ ti congrégation ayeke mû maboko na lo. Aita ni ayeke sara ye tongana ti Jéhovah, ala yeke sara ye kue so ala lingbi ti sara ti mû maboko na lo so teti mbeni ngoi “yingo ti [lo] ayeke na vundu.”—Ps. 34:16, 19; És. 41:10.

TONGANA NYEN LA MO LINGBI TI MÛ MABOKO?

Mo lingbi ti mû maboko mingi na aita so ayeke na bezoin ni? Nyen la mo lingbi ti sara ti mû maboko na mbeni zo so dutingo ti lo ayeke tongana ti so e sara tënë ni kozo na yâ ti article so? Bâ ye so Bible atene nga gi ti bâ tongana nyen la aChrétien so ayeke be-ta-zo amû maboko nzoni na aita ti ala.

Duti zo so amä tënë nzoni (aProv. 16:20, 23).

A lingbi mo hinga so ambeni zo so asara divorce aye pëpe ti sara tënë mingi na ndo ti anzene nzene ye so apusu ala ti sara divorce. Nga ti gi ti pusu ala na ngangu ti tene ala sara tënë na ndo ni ayeke sara si vundu ti ala akiri ahon ndo ni (aProv. 12:25; aRom. 12:15). Michał, so amû maboko na Adam so e sara tënë ti lo fade atene so mo lingbi ti dë bê ti zo ni, mo lingbi nga ti duti zo so amä tënë nzoni sân ti tene mo gi ti hinga aye kue na ndo ti ye so asi. Lo tene: “Mbi tara lani ti mû lege na Adam ti bâ so na ngoi so lo bâ so vundu ahon ndo ti lo, lo lingbi ti tene na mbi mbeni tënë so lo ye fade ti tene ni ape sân ti tene lo hinga.” Michał afa polele so lo yeke gi pëpe ti hinga aye kue. Me lo mä lo tongana tâ kamarade. E lingbi ti sara aye ti nzoni mingi na ita ti e kozo ti tene bungbi ato nda ni wala na peko ti bungbi. E lingbi ti tene na lo, e tene: “Mo wara ngangu kete? Mbi hinga so ye ni ayeke ngangu na mo. Mbi yeke nduru ti mû maboko na mo.”

Fa so mo bi bê ti mo na ita ti mo (aPhil. 2:4).

Mirosław atene: “Mbi na wali ti mbi e leke mbeni kapa ti mû maboko na mbeni ita-wali so asara divorce. Na tapande e leke clé ti porte ti da ti lo na lo. E mû nga maboko na lo ti gue ti bâ docteur.” Aye so akpa asenge ye me ayeke aye so amû lani maboko mingi. Ita-wali so Mirosław na wali ti lo amû maboko na lo akiri awara ngangu yeke yeke. Ye so ayeke kota ye ayeke so na pekoni lo ga pionnier nga molenge ti lo ti wali so ayeke na ngu 11 awara batême.

Dë bê ti zo so asara divorce. Fa na lo so Jéhovah ahinga ye so asi na lo so.

Tongana mbeni zo agi bê ti lo ndali ti so lo bâ so lo yeke ye oko ape, mo lingbi ti dë bê ti lo so Nzapa aye awakua ti lo oko oko kue. Biani, “ngere ti [e] ahon ngere ti gbâ ti anzêrë”. Na lê ti lo e oko oko kue e yeke nde nde nga lo bâ e kue na nene ni (Mat. 10:29-31). “L’Éternel atara bê ti azo” nga lo lingbi ti comprendre azo so asara divorce. Lo yeke ke ande ape awakua ti lo so ayeke be-ta-zo (aProv. 17:3; Ps. 145:18; aHéb. 13:5). Tongaso, na ngoi so mo yeke mû maboko na zo ni, dë bê ti lo so Nzapa abâ na nene ni yengo so lo ye na tâ tënë nga na angangu so lo yeke sara ti mû maboko na tâ vorongo.—aPhil. 2:29.

Wa zo so asara divorce ti ngbâ nduru na congrégation.

A yeke ngangu na ambeni zo ti gue na abungbi na ngoi so agingo bê ahon ndo ti ala. Me a yeke na ngoi ti abungbi la si ala yeke wara awango so alingbi ti kpengba ala na yâ ti ngoi ti ngangu. E yeke sara abungbi ti “kpengba” mba (1 aCor. 14:26; Ps. 122:1). Tongaso, a yeke nzoni mingi ti tene a-ancien amû li ni ti kpengba aita ni. Wanda, so e sara tënë ti lo fade, atene: “E ngbâ ti dabe ti e na mungo maboko so ala mû na e na nzoni bê.”

Wa zo so asara divorce ti tene lo kpengba songo ti lo na Nzapa na lege ti sambela, mandango ye lo wani nga ti gbu li ti lo na ndo ti aye so lo yeke manda (Jacq. 4:8).

Atâa so Jéhovah ayeke na ngangu mingi nga lo yeke na yayu, lo yeke bi bê ti lo na ‘zo so ayeke na tâ be-ti-molenge, so yingo ti lo ayeke na vundu, so tere ti lo adö tongana lo mä tënë ti lo’. Dë bê ti zo so asara divorce na tënë so nga fa na lo so e oko oko kue e yeke wara mungo maboko tongana e ga nduru na Nzapa na lege ti sambela nga na mandango ye e wani.—És. 66:2.

Hunda ti tene mo na lo asigigi na fango tënë wala ti tene mo na lo aleke abungbi.

Tongana e sara ni, a yeke mû maboko na ita so asara divorce ti gi bê ti lo ape na yâ ti fini ti lo. Marta, so amû maboko na mbeni ita-wali so agi bê ti lo mingi na pekoni so lo sara divorce, atene: “Mbi na lo e yeke sigigi lakue na fango tënë. E yeke na ngia mingi tongana e si na ambeni ye so e zia na gbele e ti si dä. Na ambeni ngoi, e yeke leke abungbi legeoko nga na pekoni e yeke tö mbeni pendere kobe e te.”