Royaume ti Nzapa: Mo lingbi ti sara nyen ti bâ nzoni dä?

Tongana ti so mo bâ na yâ ti a-article so ahon, aTémoin ti Jéhovah abâ tënë ti Royaume ti Nzapa na nene ni mingi. Nga, peut-être li ti mo akpe na ngoi so a sara tënë na ndo ti ambeni nzoni ye so Royaume ti Nzapa ayeke ga na ni ande. Na peut-être mo tene so atënë ni so ayeke gi atënë ti bango li senge la.

Mo yeke na raison, a yeke na lege ni pëpe ti tene zo ayeda hio na aye kue so lo mä (aProverbe 14:15). E lingbi ti haka gingo bê ti mo ni na ye so azo ti Bérée ti ândö asara.a Lani gi na ngoi so a fa nzoni tënë ti Royaume na azo ti Bérée ni pân, ala yeda na ye ni so ala mä so, me pëpe gi ndali ti so ala ye si tënë ni aduti tâ tënë. Me, a yeke ndali ti so ala gi nda ti Mbeti ti Nzapa nzoni “ti bâ wala aye so a fa na ala ayeke tongaso biani.” (Kusala 17:11). E lingbi ti tene so azo ti Bérée ni ahaka nzoni tënë so ala mä, na ye so Bible atene. Na pekoni la ala ga ti yeda biani so nzoni tënë ni so ala mä so alondo tâ na yâ ti Bible.

A-Témoin ti Jéhovah atisa mo ti sara nga tongaso. Ala yeke manda Bible na azo senge senge, ni la, ala ye si mo nga kue mo mû oko ngoi ni so ti haka na aye so ala mä na bê na ni na ndo ti Royaume ti Nzapa na ye so Bible afa.

Nde na aye so mo yeke manda ande na ndo ti Royaume ti Nzapa ni, mo yeke wara nga akiringo tënë na ambeni kota hundango ndo so agbu bê ti azo mingi.

• E azo, e bâ gigi tongana nyen?

• E yeke na fini ngbanga ti nyen?

• Nzapa azia si azo ayeke bâ pasi ngbanga ti nyen?

• Tongana e kui, nyen la ayeke si na e na pekoni nyen?

• A yeke futi ande sese so?

• Nyen la alingbi ti sara si sewa aduti na ngia?

Na ndo ni kue, mandango Bible ayeke mû ande maboko na mo ti “ga nduru na Nzapa”. (Jacques 4:8). Na ngoi so mo yeke ga nduru na Nzapa, mo yeke kiri ti bâ so, biani, Royaume ti Nzapa ayeke ga na mo anzoni ye laso nga kekereke. Jésus wani atene lani na yâ ti sambela na Babâ ti lo, lo tene: “Ti wara fini ti lakue lakue, a lingbi ala manda ti hinga mo, mo so gi mo oko ayeke tâ Nzapa, nga ti hinga lo so mo tokua lo, Jésus Christ.” —Jean 17:3.