A yeke nzoni e sambela Jésus?

A DE ti ninga ape, mbeni zo ti gingo nda ti ye ahunda amaseka 800, so ayeke na yâ ti abungbi ti vorongo nzapa nde nde, ti hinga wala ala mä na bê so Jésus ayeke kiri tënë na asambela. Tongana a mû azo 100, ala 60 na ndo ni atene so ala mä na bê biani so lo yeke sara ni. Ye oko, mbeni maseka-wali asû Nzapa na place ti iri ti Jésus.

Mo tene ti mo nyen? A yeke nzoni e sambela Jésus wala Nzapa?a Ti wara kiringo tënë ni, kozoni kue, zia e bâ ye so Jésus afa na adisciple ti lo na ndo ti sambela.

JÉSUS AFA NA E TI SAMBELA ZO WA?

Jésus afa na e zo so a yeke nzoni e sambela lo.

FANGO YE TI LO: Lani, na ngoi so mbeni disciple ti Jésus ahunda lo atene, “Seigneur, fa na e tongana nyen ti sambela”, Jésus akiri tënë atene: “Tongana ala yeke sambela, ala tene: ‘Babâ.’” (Luc 11:1, 2). Na ndo ni, na yâ ti mbeni fango ye ti lo so azo ahinga ni mingi, Jésus awa azo so ayeke mä lo ti sambela. Lo tene: “Mo sambela Babâ ti mo.” Nga, lo dë bê ti ala, lo tene so Babâ ti ala “ahinga aye so ala yeke na bezoin ni kozoni si ala hunda ni na lo.” (Matthieu 6:6, 8). Na bï so si na ndade ni Jésus akui, lo tene na adisciple ti lo, lo tene: “Tongana ala hunda mbeni ye na Babâ, lo yeke mû ni na ala na iri ti mbi.” (Jean 16:23). Jésus afa na e ti sambela zo so ayeke Babâ ti lo nga Babâ ti e, Jéhovah Nzapa.—Jean 20:17.

TAPANDE TI LO: Ti lingbi na ye so lo fa na azo na ndo ti sambela, Jésus lo wani lo sambela, lo tene: “Babâ, mbi sepela mo na lê ti azo kue, mo Seigneur ti yayu na ti sese.” (Luc 10:21). Mbeni lâ, “Jésus ayô lê ti lo na nduzu na lo tene: ‘Babâ, mbi kiri singila na mo so mo mä mbi.’” (Jean 11:41). Nga, tongana lo ga lani nduru ti kui, Jésus asambela lo tene: “Babâ, mbi zia yingo ti mbi na maboko ti mo.” (Luc 23:46). Na sambelango Babâ ti lo ti yayu, so ayeke “Seigneur ti yayu na ti sese,” Jésus azia mbeni nzoni tapande teti azo kue ti mû peko ni (Matthieu 11:25; 26:41, 42; 1 Jean 2:6). Eskê adisciple ti Jésus ti ândö amä yâ ti afango ye ti lo ni tongaso?

ACHRÉTIEN TI ÂNDÖ ASAMBELA LANI ZO WA?

Ayenga kete na peko ti so Jésus akiri na yayu, awato akomanse ti zia mbeto na bê ti adisciple ti lo nga ti sara ngangu na ala (Kusala 4:18). Ni la, ala sambela ti hunda mungo maboko, me zo wa la ala sambela lo? “Na beoko ala yä go ti ala na nduzu na Nzapa,” ala sambela lo ti mû maboko na ala “na lege ti iri ti wakua ti [lo] so ayeke nzoni-kue, Jésus.” (Kusala 4:24, 30). Adisciple ti Jésus amû lani gi peko ti aye so lo fa na ndo ti sambela. Ala sambela Nzapa, me Jésus ape.

Angu mingi na pekoni, bazengele Paul afa tongana nyen la lo na amba ti lo asambela lani. Lo sû mbeti na amba ti lo aChrétien, lo tene: “Lakue tongana e yeke sambela teti ala, e yeke kiri singila na Nzapa Babâ ti Seigneur ti e Jésus Christ.” (aColossien 1:3). Paul asû nga mbeti na amba ti lo aChrétien ti tene “na iri ti Seigneur ti e Jésus Christ ala kiri singila lakue teti aye kue na Nzapa so ayeke Babâ ti e.” (aÉphésien 5:20). Na lege ti atënë so, e bâ so Paul awa azo ti sambela ‘teti aye kue na Nzapa Babâ’, me na iri ti Jésus.—aColossien 3:17.

Legeoko tongana ti aChrétien ti ândö, e lingbi ti fa so e ye Jésus tongana e sara ye alingbi na awango so lo mû na ndo ti sambela (Jean 14:15). Tongana e sambela gi Babâ ti e so ayeke na yayu, e yeke bâ so lo yeke kiri tënë na asambela ti e, nga e yeke tene oko tënë so ayeke na Psaume 116:1, 2, e tene: “Mbi ndoye L’Éternel teti Lo mä [mbi] . . . Fade mbi di iri ti Lo na lâ ti fini ti mbi kue.”b