Kuâ ti Jésus nga na zingongo ti lo: A ga na aye ti nzoni wa na mo?

A leke azo ti tene ala kui ape

“L’Éternel Nzapa akamata zo, Lo zia lo na yaka ti Éden ti leke na ti bata yaka so. L’Éternel Nzapa alu ndia na zo, Lo tene, Mo lingbi te le-keke kue ti yaka tongana bê ti mo aye; me lê ti keke ti hinga nzoni na ti hinga sioni, mo te pëpe; teti na lâ ni so mo te lê ni so, fade mo kui biani.”—Genèse 2:15-17.

Nzapa azia lani Adam na yâ ti yaka ti Éden, so ayeke mbeni paradis so ayeke na sese ge, na so a si singo na anyama, apendere keke nga na afleur. Na yâ ni, a yeke wara alê ti keke so Adam alingbi ti te ni tongana ti so bê ti lo aye. Ye oko, Jéhovah Nzapa afa polele na Adam mbeni keke so a lingbi lo te lê ni ape, na so tongana lo te ni, fade lo yeke kui.

Adam amä lani yâ ti commandement ni so tongana nyen? Lo hinga lani ye so a iri ni a tene kuâ, ngbanga ti so lo yeke bâ lani anyama na kuingo ni. Tongana Nzapa aleke Adam lani ti tene lo kui, ka nda ti commandement so Nzapa amû lani ayeke même dä ape. Me ye ni ayeke tongaso ape, Adam ahinga lani so tongana lo mä yanga nga lo te lê ti keke ni ape, lo lingbi ti ngbâ na fini lakue lakue, lo yeke kui ape.

Ambeni zo atene so keke ni so aye gi ti sara tënë ti bungbingo ti koli na wali. Me, tënë ti ala ni so ayeke tâ tënë ape. Girisa ape so, Jéhovah aye lani si Adam na wali ti lo, Ève, ‘adü amolenge mingi, ala wu, ala si singo na sese, ala sara si ye kue aga na gbe gere ti ala’. (Genèse 1:28). A yeke vrai lê ti keke la Nzapa ake na ala ti te ni lani so. Jéhovah airi ni “lê ti keke ti hinga nzoni na ti hinga sioni,” ngbanga ti so a yeke fa so lo la lo yeke na droit ti fa na e azo ye so ayeke nzoni wala sioni. Tongana Adam ate lê ti keke ni ape, lo yeke fa so lo mä yanga, me lo yeke fa nga so lo ne Zo so asara lo nga so airi gbâ ti atufa na ndo ti lo.

Adam akui ngbanga ti so lo ke yanga ti Nzapa

“[Nzapa atene] na Adam, Teti mo . . . te lê ti keke so Mbi komande mo, . . . fade mo te kobe na lege ti sô ti lê ti mo juska mo kiri na sese, teti A kamata mo na sese; na fade mo kiri na pupu-sese, teti mo yeke pupu-sese.”—Genèse 3:17, 19.

Adam ate lê ti keke so a ke na lo ti te ni so. A lingbi e bâ pëpe kengo yanga ti Adam so tongana mbeni ye ti ngia. A yeke kpengbango-li la lo sara so. Lo fa, tâ dandara so, lo bâ na nene ni ape anzoni ye kue so Jéhovah asara na lo. Na tengo lê ti keke ni, Adam ake Jéhovah. Lo soro ti sigigi na gbe ti Jéhovah, na ye so aga na akota kpale mingi na pekoni.

Tâ gi tongana ti so Jéhovah atene lani, Adam akui na pekoni. Nzapa asara lo na “pupu-sese” na lo tene na lo so fade lo “kiri na pupu-sese”. Tënë so aye pëpe ti tene so, Adam ayeke duti na fini na mbeni tere nde wala lo yeke gue na mbeni ndo. So lo kui so, lo yeke encore na fini ape tongana fuku ti sese so a mû ni lani si a leke na lo so.—Genèse 2:7; Zo-ti-fa-tene 9:5, 10.

E yeke kui ngbanga ti so e yeke amolenge ti Adam

“Na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari.”—aRomain 5:12.

Kengo yanga so Adam ake, wala siokpari so lo sara, aga na akota kpale mingi na pekoni. Na sarango siokpari, Adam agirisa pëpe gi fini so ayeke ninga angu 70 wala 80 tongaso, me lo girisa fini ti lakue lakue. Na ndo ni, na ngoi so lani Adam ake yanga, lo ga wasiokpari, na lo mû siokpari na amolenge ti lo kue.

E kue e yeke amolenge ti Adam. Na lege ti lo, atâa so e la e soro ni ape, e wara mbeni tere so ayeke pusu e lakue ti sara siokpari, na so na nda ni e yeke kui. Paul afa sioni dutingo ti e so nzoni mingi. Lo tene: “Mbi yeke zo ti mitele, na a kä mbi awe ti ga ngbâa ti siokpari. So mawa na mbi! Zo wa si ayeke sö mbi ande na yâ ti tere so ayeke gue na mbi ti wara kuâ so?” Paul lo wani lo kiri tënë na hunda ti lo ni, lo tene: “Singila na Nzapa na lege ti Jésus Christ Seigneur ti e!”—aRomain 7:14, 24, 25.

Jésus amû fini ti lo tongaso si e lingbi ti wara fini ti lakue lakue

“Babâ ni atokua Molenge ti lo tongana Sauveur ti dunia.”—1 Jean 4:14.

Jéhovah Nzapa asara mbeni ye ti zi aye ti peko ti siokpari nga ti zi e na gbe ti ngbâa ti kuâ. Tongana nyen? Na lege so lo tokua Molenge ti lo, so lo ye lo mingi, ti tene a dü lo tongana mbeni zo so ayeke na siokpari oko ape na tere ti lo, tongana ti Adam. Me nde na Adam, Jésus asara “siokpari oko pëpe”. (1 Pierre 2:22). Ni la, lo yeke lani na gbe ti ngbâa ti kuâ ape, nga lo lingbi lani ti ngbâ na fini lakue lakue, tongana ti mbeni zo so ayeke na siokpari ape.

Me atâa so kue, Jéhovah azia lege si awato ti Jésus afâ lo. Lango ota na pekoni, Jéhovah azingo lo na kuâ na mbeni tere so ayeke ti yingo tongaso si na pekoni lo lingbi ti kiri na yayu. Kâ, Jésus afa na Nzapa ngere ti fini ti lo so siokpari oko ayeke na tere ni ape, ti tene amû lege ti vo ye so Adam na amolenge ti lo agirisa ni. Jéhovah ayeda na sandaga ni so, so ayeke mû lege na azo kue so afa so ala yeke na mabe na Jésus ti wara fini ti lakue lakue.—aRomain 3:23, 24; 1 Jean 2:2.

Na sarango tongaso, Jésus akiri avo ye so Adam agirisa ni lani. Lo bâ pasi lani juska na kuâ ti tene amû lege na e ti wara fini ti lakue lakue. Bible atene: “Jésus . . . [akui], si na lege ti kota nzobe ti Nzapa lo bâ pasi juska ti kui teti zo oko oko kue.”—aHébreu 2:9.

Ye so Jéhovah amû so afa aye mingi na ndo ti lo. Ndia ti lo ti mbilimbili asara si a yeke duti ngangu na e azo, so e yeke na siokpari na tere ti e, ti futa mbeni ye e wani ti tene azi e na yâ ti sioni dutingo so e yeke na yâ ni so. Ni la, teti so lo ye e nga lo bâ mawa ti e, ye so apusu lo ti sara ye alingbi na andia ti lo ni atâa so a yeke kete ye ape, ndali ti so a yeke Molenge ti lo wani la lo yeke mû tongana mbeni ngere ti zi na e.—aRomain 5: 6-8.

So a zingo lani Jésus na kuâ, a ye ti fa so a yeke zingo ande ambeni zo nga

“A zingo Christ na kuâ awe, na lo yeke kozo li ni ti azo so akui. Teti so kuâ aga na lege ti koli oko, zingongo ti akuâ aga nga na lege ti koli oko. Legeoko tongana ti so na yâ ti Adam ala kue akui, tongaso nga na yâ ti Christ ala kue ayeke wara fini.”—1 aCorinthien 15:20-22.

Kite ayeke dä ape so Jésus ayeke lani dä, nga lo kui. Me nyen la afa biani so a zingo lani Jésus na kuâ? Mbeni kota ye so afa atene Jésus azingo lani na kuâ ayeke so, lo fa tere ti lo lani na gbâ ti azo na ando nde nde nga na angoi nde nde. Na mbeni ngoi oko tongaso, lo fa tere ti lo na azo ahon 500. Bazengele Paul atene na yâ ti mbeti ti lo na aCorinthien so ambeni témoin ti ye ni so angbâ na fini lani na ngoi ti lo, so ti tene ala lingbi ti fa na azo peko ti aye so ala bâ na ala mä.—1 aCorinthien 15:3-8.

Ni la, tongana Paul atene lani so Christ ayeke “kozo li ni” ti azo so a zingo ala na kuâ, lo ye lani ti fa so ambeni zo nga kue ayeke zingo ande na kuâ. Jésus lo wani lo tene so mbeni ngbonga ayeke ga so “ala kue so ayeke na yâ ti asende [wala dû] ti kuâ” ayeke “sigigi.”—Jean 5:28, 29.

Ti wara fini ti lakue lakue, a lingbi e mä na bê na Jésus

“Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.”—Jean 3:16.

Akozo lembeti ti Bible afa na e lawa la kuâ abâ gigi na tongana nyen la Paradis agirisa lani. Andangba lembeti ti Bible afa na e lawa la a yeke futi ande kuâ biaku biaku na tongana nyen la a yeke kiri na Paradis na ndo ti sese. Na pekoni, azo alingbi ti duti na ngia lakue lakue. Apocalypse 21:4 atene: “Kuâ ayeke duti ande dä mbeni pëpe.” Me ti fa na azo so tënë ni so ayeke tâ tënë, versê 5 atene: “Atënë so ayeke atënë so a lingbi ti zia bê dä nga ayeke tâ tënë.” Azendo so kue Jéhovah amû ni so, lo yeke na ngangu ti sara ni.

Mo mä na bê so “atënë so ayeke atënë so a lingbi ti zia bê dä nga ayeke tâ tënë”? Gi ti manda ye mingi na ndo ti Jésus nga fa so mo yeke na mabe na lo. Tongana mo sara tongaso, Jéhovah ayeke yeda na mo. Mo yeke wara gbâ ti atufa laso, na mo lingbi nga ti duti ande na beku ti wara fini ti lakue lakue na yâ ti Paradis na ndo ti sese ge, so kuâ ayeke duti ande dä mbeni pëpe, “mua, wala toto, wala pasi ayeke duti dä mbeni pëpe.”