KOTA MAMA-TENE NI | MO YE TI MANDA BIBLE?

Mbeni kapa ti mandango Bible ndali ti azo kue

A hinga aTémoin ti Jéhovah nzoni na fango tënë ti Nzapa na azo kue. Me, eskê mo hinga so, na yâ ti dunia kue, e yeke na mbeni kapa ti mandango Bible na azo?

Mbeni koli angbâ ti manda Bible na place ti kua ti lo

Na ngu 2014, aTémoin ti Jéhovah ahon 8 000 000, so ayeke na yâ ti akodoro 240, ayeke manda Bible na azo nduru na 9 500 000 nze na nze.a So ti tene, tongana a mû ambeni kodoro 140 tongaso, wungo ti azo so e yeke manda Bible na ala ahon wungo ti azo ti yâ ti akodoro ni oko na oko kue.

Ti wara lege ti sara kua ti ala ti fango ye so nzoni, ngu oko oko, aTémoin ti Jéhovah asigigi na aBible nduru na milliard oko na ndambo, abuku, ambeti-sango nga na ambeni mbeti ni nde so ayeke mû maboko na ala ti manda na Bible na azo na ayanga ti akodoro 700 tongaso. Mara ti kota kua so ala sara so, ade ambeni zo asara mara ni lâ oko ape, kua ni so la ayeke mû lege na azo ti manda Bible na yanga ti kodoro ti bê ti ala.

“Mbi ye ka ti manda ye na ekole ape, me mandango ye ti so ni so anzere na mbi mingi. Nga, aye so mbi manda adë bê ti mbi mingi.”—Katlego, na Afrique du Sud.

“Mandango ye ni akiri tënë na ahunda ti mbi kue nga na ambeni mingi.”—Bertha, na Mexique.

“A manda na mbi Bible ni na yanga-da ti mbi nga na l’heure ti bê ti mbi. A yeke mbeni ye so anzere na mbi mingi!”—Eziquiel, na Brésil.

“Aye ti manda ni aninga penze-ngbonga 15 ti si na 30, me na ambeni ngoi a ninga a hon so. Me lakue, angoi ni so alingbi na mbi.”—Viniana, na Australie.

“Li ti mbi akpe kue ti bâ so a yeke manda Bible ni na zo sân ti tene lo payé.”—Aimé, na Bénin.

“Zo so amanda Bible na mbi ayeke kanga bê nga lo yeke sara ye na nzoni bê. Ye so asara si e lë mbeni kpengba songo na popo ti e.”—Karen, na Irlande du Nord.

“Azo mingi amanda Bible sân ti tene ala ga mbeni Témoin ti Jéhovah na pekoni.”—Denton, na Angleterre.

KIRINGO TËNË NA AHUNDA TI AZO NA NDO TI KAPA TI E TI MANGANGO BIBLE NA AZO

Nyen la a yeke sara na ngoi ti mandango ye ni?

E yeke soro ambeni tënë na ndo ti Bible, na e yeke bâ aversê so asara tënë na ndo ni. Na tapande, Bible ayeke kiri tënë na mara ti ahundango ndo tongana ti so: Nzapa ayeke zo wa? Lo yeke tongana nyen? Lo yeke na iri? Lo yeke na ndo wa? E lingbi ti ga nduru na lo? Ye ni fadeso ayeke ti hinga ndo so e lingbi ti wara akiringo tënë ni dä na yâ ti Bible.

Ti mû maboko na azo ti wara akiringo tënë ni, mingi ni, e yeke sara kua na buku Bible afa nyen biani?,b so alembeti ni kue ayeke 224. A sigigi na buku ni so, mbilimbili, ti mû maboko na azo ti mä yâ ti akota fango ye ti Bible. A ndu tënë na ndo ti Nzapa, na ndo ti Jésus Christ, na ndo ti pasi ti azo, zingongo ti akuâ, sambela nga na ambeni tënë ni nde tongaso.

A yeke manda ye ni na ndo wa nga na l’heure ti nyen?

A yeke manda ye ni na l’heure so mo ye nga na ndo ti bê ti mo.

Mandango ye ni ayeke ninga ka l’heure oke?

Azo mingi ayeke mû l’heure oko wala ahon so, yenga oko oko, ti manda na Bible ni. Yongo ti mandango ye ni adépend na dutingo ti zo oko oko. E yeke sara ni alingbi na programme ti mo. Ambeni apeut ti ninga gi penze-ngbonga 10 wala 15 yenga na yenga.

A yeke payé ka ni oke?

A yeke payé ka ni ape, nga a yeke mû ambeti ti mandango ye ni na azo gi senge senge. Ye ni so ague oko na yanga so Jésus amû lani na adisciple ti lo, lo tene: “Ala wara senge senge, ala mû na azo senge senge.”—Matthieu 10:8.

A yeke mû ngoi oke ti hunzi mandango ye ni so kue?

A yeke na mo ti soro ti bâ wala mo ye ti manda ye ni juska lawa. Buku Bible afa nyen biani? ayeke na aye ti manda 19. Mo peut ti manda gi ambeni wala mo peut ti manda ala kue, na mo yeke sara ni alingbi na ngangu ti mo.

A yeke forcé ti tene mbi ga Témoin ti Jéhovah na pekoni?

A yeke forcé ape. E hinga e tene zo oko oko ayeke na droit ti soro ye so lo ye ti mä na bê na ni. Me, azo so awara tâ hingango ye na ndo ti Bible alingbi ti mû mbeni nzoni desizion.

Mbi peut ti wara ambeni sango na ndo ni na ndo wa?

Site jw.org ayeke mû na mo anzoni sango na ndo ti aye so aTémoin ti Jéhovah amä na bê na ni nga na ndo ti aye so ala yeke sara.

Nyen la mbi lingbi ti sara ti hunda ti tene a manda Bible na mbi?

Azo angbâ ti hunda ti tene a manda Bible na ala na alege nde nde: na ndo ti Internet, na lege ti lettre nga na lege ti anumero ti téléphone ti ndo so ala yeke dä

Hunda ni na lege ti Internet na ndo ti site www.pr2711.com.
Sû mbeti na mbeni oko ti a-adresse so ayeke na lembeti use ti mbeti so.
Sara tënë ni na aTémoin ti Jéhovah so ayeke nduru na mo.

a Mingi ni, aTémoin ti Jéhovah ayeke manda Bible na zo oko wala na akete groupe ti azo.

b So aTémoin ti Jéhovah asigigi na ni. Wungo ti buku ni kue, so a pete ni, ahon million 230, na a yeke na ayanga ti kodoro ahon 260.

MBENI YE TI MÛ MABOKO NA ASEWA

“Na ngoi so wali ti mbi akomanse lani ti manda Bible, mbi bâ achangement mingi na yâ ti fini ti lo. Dutingo ti sewa ti e aga nzoni ahon ti kozo. So mbi yeke na nzara ti hinga ye so lo yeke manda so, ni la a sara si mbi nga kue mbi komanse ti manda Bible. Aye so mbi manda lani asara si mbi ga tâ mbeni nzoni zo. Mandango Bible asara si e ga nduru mingi na mba na yâ ti sewa ni.” —Eziquiel.

“Na peko ti so mbi komanse ti manda Bible, mbi zia lege ti nyongo mbangi, ti nyongo sämba ahon ndo ni nga mbi manda ti kanga ndo ti ngonzo ti mbi. Yâ ti da ti mbi aga pendere nga aye kue ayeke na place ni. Mbi bâ sewa ti mbi na nene ni mingi nga mbi ye ti sara gi aye so alingbi ti zia ngia na bê ti ala. Ye so asara si mbi yeke na ngia mingi.”—Karen.

“Ambeni zo akasa mbi lani ndali ti so mbi yeke manda Bible. Me, koli ti mbi amû maboko na mbi, lo tene: ‘Mbi yeke mä tënë ti yanga ti azo ape. Ti mbi, anzere na mbi mingi so mo changé ti ga nzoni zo so. Ngbâ lakue ti sara ye so mo yeke sara so.’ Dutingo ti sewa ti e aga fadeso nzoni mingi ahon ti kozo!”—Viniana.