KOTA MAMA-TENE NI | ATÉMOIN TI JÉHOVAH AYEKE AZO WA?
E yeke fa ka tënë ti Nzapa ngbanga ti nyen?
Kua so azo ahinga e na ni mingi ayeke kua ti fango tënë ti Nzapa. E yeke fa ni da na da, na ando so azo ayeke dä mingi nga na ndo kue so e wara azo dä. E sara ka kua ni so ngbanga ti nyen?
E aTémoin ti Jéhovah e yeke fa ka tënë ti mû gloire na Nzapa nga ti sara si azo ahinga iri ti lo (aHébreu 13:15). E ye nga ti sara ye alingbi na commandement so Jésus amû, so lo tene: “Tongaso ala gue, ala sara si azo na popo ti amara kue aga adisciple. . . . Ala fa na ala ti bata aye kue so mbi mû yanga na ala ti sara.”—Matthieu 28:19, 20.
Na ndo ni, e ye amba ti e (Matthieu 22:39). E hinga so azo mingi ayeke na atënë ti nzapa ti ala, nga so zo kue la si aye tënë so e yeke fa so ape. Me, e hinga so aye so Bible afa ayeke sö fini ti zo. Ni la si e ngbâ lakue “ti fa ye na ti fa nzoni tënë na ndo ti Christ”, tongana ti so aChrétien ti ândö asara.—Kusala 5:41, 42.
Mbeni wandara, so iri ti lo ayeke Antonio Cova Maduro, atene so “atâa akpale so aTémoin ti Jéhovah ayeke tingbi na ni, même ala woko kue, ala yeke sara effort . . . ti tene tënë ti Nzapa asi na andangoro osio ti sese kue.”—Mbeti-sango El Universal, Venezuela
Mingi ti azo so ayeke diko ka ambeti ti e ayeke aTémoin ti Jéhovah ape. Nga, azo gbani gbani, so e yeke manda Bible na ala, ayeke na abungbi ti nzapa ti ala. Me, a nzere na ala so aTémoin ti Jéhovah ayeke ga ka ti fa tënë na ala.
Peut-être mo yeke na ambeni hunda na ndo ti aTémoin ti Jéhovah. Tongana mo ye ti wara akiringo tënë ni, e wa mo
Ti hunda mbeni Témoin ti Jéhovah.
Ti gue na ndo ti site ti e, www.pr2711.com.sg.
Ti gue na abungbi ti e, so zo kue apeut ti gue dä senge senge.