Mbeni nzoni hakango ye so ahon atanga ni kue

ESKÊ mo bâ tere ti mo tongana mbeni Chrétien? Tongana a yeke tongaso, mo yeke na popo ti azo milliard use so atene ani yeke adisciple ti Christ. Laso, a yeke wara gbâ ti abungbi so atene ala yeke aChrétien, me so afango ye nga na abango ndo ti ala ayeke nde na ti mba. Ni la, ye so mo mä na bê na ni alingbi ti duti nde mingi na ti ambeni zo so atene nga so ala yeke aChrétien. Eskê a yeke kota ye ti gbu li na ndo ti ye so mo mä na bê na ni? En, a yeke kota ye tongana mo ye ti sara ye tongana tâ Chrétien tongana ti so Bible wani ahunda.

A hinga lani akozo disciple ti Jésus Christ na iri ti “aChrétien.” (Kusala 11:26). A bezoin lani pëpe ti iri ala na ambeni iri nde, ndali ti so a yeke gi oko ye la aChrétien ayeke mä na bê na ni lani. Na bê oko, aChrétien amû lani peko ti afango ye nga na awango ti Jésus Christ, so ayeke Zo so azia na sese bungbi ti aChrétien. Ka ti eglize ti mo? Mo pensé so a yeke fa na mo ye so Christ afa lani nga ye so akozo Chrétien amä na bê na ni? Nyen la mo lingbi ti sara ti duti na kite na ndo ni ape? Oko ye so mo lingbi ti sara ayeke ti mû afango ye ni so ti haka na ye so Bible afa.

Gbu li na ndo ti tënë so: Jésus Christ abâ lani Mbeti ti Nzapa na nene ni mingi. Lo yeda lani pëpe na azo so ayeke woko yâ ti afango ye ti Bible na ziango na devant tënë ti angobo ti kodoro (Marc 7:9-13). E lingbi biani ti tene na nda ni so, aye so atâ disciple ti Jésus amä na bê na ni lani aluti na ndo ti Bible. Tongaso, a yeke nzoni ti tene Chrétien oko oko ahunda tere ti lo na hunda so: ‘Afango ye ti eglize ti mbi ague oko na ye so Bible afa?’ Ti wara kiringo tënë na hunda so, ngbanga ti nyen mo haka pëpe ye so eglize ti mo afa na ye so Bible afa biani?

Jésus atene lani so a lingbi vorongo Nzapa aluti na ndo ti tâ tënë, tâ tënë so ayeke na yâ ti Bible (Jean 4:24; 17:17). Nga bazengele Paul atene lani so a yeke sö ande e gi tongana e wara “tâ hingango ye na ndo ti tâ tënë.” (1 Timothée 2:4). Tongaso, a yeke kota ye ti tene aye so e mä na bê na ni aluti na ndo ti tâ tënë ti Bible. A yeke ni la ayeke mû lege na e ti wara fini!

TONGANA NYEN TI HAKA AYE SO E MÄ NA BÊ NA NI NA AFANGO YE TI BIBLE?

E wa mo ti diko ahunda omene so ayeke na yâ ti encadré so ayeke na yâ ti mbage so, nga ti bâ akiringo tënë ti Bible na ndo ti ahunda ni so. Bâ aversê ti Bible so asara tënë ni, nga gbu li na ndo ti akiringo tënë ni. Na pekoni, hunda tere ti mo: ‘Afango ye ti eglize ti mbi ague oko na ye so Bible afa biani?’

Ambeni hundango tënë nga na akiringo tënë so ge alingbi ti mû maboko na mo ti sara mbeni nzoni hakango ye so ahon atanga ni kue. Eskê mo ye ti haka ambeni fango ye ti eglize ti mo na ye so Bible afa? A-Témoin ti Jéhovah ayeke duti ande na ngia ti mû maboko na mo ti bâ tâ tënë ti Bible polele. Ngbanga ti nyen mo hunda na mbeni Témoin ti Jéhovah ti manda Bible na mo senge senge ape? Mo lingbi nga ti gue na ndo ti site internet ti e, jw.org.

1 HUNDANGO TËNË: Nzapa ayeke zo wa?

KIRINGO TËNË NI: Jéhovah, Babâ ti Jésus, la ayeke Nzapa ti lakue lakue, Nzapa so asara aye kue nga ngangu ti lo ahon angangu kue.

YE SO BIBLE AFA:

“Lakue tongana e yeke sambela teti ala, e yeke kiri singila na Nzapa Babâ ti Seigneur ti e Jésus Christ.”—aColossien 1:3.

“Jéhovah, mo so mo yeke Nzapa ti e, mo lingbi ti tene a mû na mo gloire, na gonda na ngangu ngbanga ti so mo sara aye kue.”—Apocalypse 4:11.

Bâ nga aRomain 10:13; 1 Timothée 1:17.

2 HUNDANGO TËNË: Jésus Christ ayeke zo wa?

KIRINGO TËNË NI: Jésus ayeke kozo Molenge ti Nzapa. A leke lo lekengo, tongaso lo yeke na tongo nda ni. Nzapa ayeke kota ahon Jésus, na Jésus ayeke sara gi ye so bê ti Nzapa aye.

YE SO BIBLE AFA:

“Babâ ayeke kota ahon mbi.”—Jean 14:28.

“[Jésus ayeke] image ti Nzapa so lê abâ pëpe, kozo ye na popo ti aye kue so Nzapa asara.”—aColossien 1:15.

Bâ nga Matthieu 26:39; 1 aCorinthien 15:28.

3 HUNDANGO TËNË: Yingo vulu ayeke nyen?

KIRINGO TËNË NI: Yingo vulu ayeke ngangu so Nzapa ayeke sara na kua ti sara ye so lo ye. Yingo vulu ayeke mbeni zo ape. Azo alingbi ti si na yingo vulu nga yingo vulu alingbi ti mû ngangu na ala.

YE SO BIBLE AFA:

“Tongana Élisabeth amä bara ti Marie, foroto so ayeke na yâ ti lo ahuru, na Élisabeth asi na yingo vulu.”—Luc 1:41.

“Fade ala yeke wara ngangu tongana yingo vulu aga na ndo ti ala.”—Kusala 1:8.

Bâ nga Genèse 1:2; Kusala 2:1-4; 10:38.

4 HUNDANGO TËNË: Royaume ti Nzapa ayeke nyen?

KIRINGO TËNË NI: Royaume ti Nzapa ayeke mbeni gouvernement so ayeke na yayu. Jésus la ayeke Gbia ni. Na yâ ti ngoi kete, Royaume ni ayeke sara ye so bê ti Nzapa aye na ndo ti sese kue.

YE SO BIBLE AFA:

“Mbasambala ange ni ahuru trompette ti lo. Ago asara tënë na kota go na yayu, a tene: ‘Fadeso royaume ti dunia aga royaume ti Seigneur ti e na ti Christ ti lo awe, na fade lo yeke komande tongana gbia teti lakue lakue nga kpu na kpu.’”—Apocalypse 11:15.

Bâ nga Daniel 2:44; Matthieu 6:9, 10.

5 HUNDANGO TËNË: Eskê azo ti nzoni kue la ayeke gue na yayu?

KIRINGO TËNË NI: Ên-ën. Nzapa asoro gi kete groupe ti azo so ayeke be-ta-zo, so a iri ala “kete kundu,” ti gue na yayu. Ala yeke komande ande tongana agbia legeoko na Jésus na ndo ti sese kue.

YE SO BIBLE AFA:

“Kete kundu, ala sara mbeto pëpe, ngbanga ti so Babâ ti ala abâ so a yeke nzoni ti mû na ala royaume ni.”—Luc 12:32.

“Fade ala yeke duti aprêtre ti Nzapa na ti Christ na fade ala yeke komande tongana agbia legeoko na Christ.”—Apocalypse 20:6.

Bâ nga Apocalypse 14:1, 3.

6 HUNDANGO TËNË: Nyen la Nzapa aleke ti sara teti sese nga teti azo?

KIRINGO TËNË NI: Na gbe ti Royaume ti Nzapa, sese ayeke ga mbeni paradis, na azo so angbâ be-ta-zo ayeke duti ande na nzoni seni, ala yeke duti na siriri teti lakue lakue nga na fini ti lakue lakue.

YE SO BIBLE AFA:

“Azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.”—Psaume 37:10, 11.

“Fade lo yeke mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”—Apocalypse 21:3, 4.

Bâ nga Psaume 37:29; 2 Pierre 3:13.