Nzapa ayeke dë bê ti e tongana nyen?

Bazengele Paul afa Jéhovaha tongana “Nzapa ti dengo bê kue, lo so adë bê ti e na yâ ti ye ti vundu kue so e wara”. (2 aCorinthien 1:3, 4). Ni la Bible afa na e biani so zo kue alingbi ti wara mungo maboko ti Nzapa, na so mbeni kota kpale so alingbi ti kanga lege na Babâ ti e ti yayu ti dë bê ti e ayeke ti lo dä pëpe.

Me, a lingbi e kue e sara mbeni ye tongana e ye ti tene Nzapa adë bê ti e. Mbeni docteur alingbi ti aidé e tongana nyen, tongana e wani e gue na hôpital ti bâ lo ape? Ndali ni la Bible amû na e wango so: “Ala ga nduru na Nzapa, na fade lo yeke ga nduru na ala.”—Jacques 4:8.

Nyen la afa biani na e so Nzapa ayeke ga ande nduru na e? Kozoni kue, ngbanga ti so lo tene na e lege mingi awe so lo ye ti aidé e. (Bâ encadré na hunzingo ti article ni.) Nga use ni, e yeke na aye so afa biani so lo aidé ambeni zo awe, atâa na ngoi ti e wala na ngoi ti giriri.

Tongana ti so a si na azo mingi so ayeke gi mungo maboko ti Nzapa laso, Gbia David ayeke nga mbeni zo so akpale asi na lo lani mingi. Mbeni lâ, lo dema na Jéhovah lo tene: ‘A yeke nzoni mo mä toto ti mbi tongana mbi iri mo ti mû maboko na mbi.’ Eskê Nzapa amä lo? En. David atene: ‘Lo mû maboko na mbi. Bê ti mbi kue asi singo na ngia.’—Psaume 28:2, 7, Mbeti ti Nzapa, Tënë so amu fini.

NZAPA AMÛ NA JÉSUS KUA TI DENGO BÊ TI AZO KUE SO AYEKE NA VUNDU

Nzapa aleke ti tene Jésus aduti na mbeni kota kua ti sara na ndo ti tënë ti dengo bê ti azo. Na popo ti akua so Nzapa amû lani na lo, Jésus asara “si bê ti zo so afâ awe aga nzoni” nga lo “lungula vundu ti azo kue so atoto na vundu.” (Ésaïe 61:1, 2). Tongana ti so a fa ni kozo awe, Jésus ayeke mû maboko lani mbilimbili na azo so “asara ngangu kua na kungba ane ala”.—Matthieu 11:28-30.

Jésus adë bê ti azo na mungo na ala awango ti ndara, na sarango ye na mbage ti ala na nzoni bê, nga même na ambeni ngoi, na savango kobela ti ala. Mbeni lâ, mbeni zo ti buruma avoro yanga na Jésus lo tene: “Tongana mo ye, mo lingbi ti sara si tere ti mbi aga nzoni.” Mawa asara Jésus na lo tene: “Mbi ye. Zia tere ti mo aga nzoni.” (Marc 1:40, 41). Zo ti buruma ni awara sava.

Atâa so Molenge ti Nzapa ayeke encore na sese ge ape ti dë bê ti e lo wani, Babâ ti lo, Jéhovah, so ayeke “Nzapa ti dengo bê kue,” angbâ ti aidé azo so abezoin dengo bê (2 aCorinthien 1:3). Zia e bâ ambeni kota ye osio, so na lege ni Nzapa ayeke dë bê ti azo.

• Bible. “Aye kue so a sû ândö giriri na yâ ti Mbeti ti Nzapa, a sû ni ti tene a fa ye na e, si na lege ti gbungo ngangu ti e nga na lege ti dengo bê so alondo na yâ ti Mbeti ti Nzapa e duti na beku.”—aRomain 15:4.

• Yingo vulu ti Nzapa. Ngoi kete na peko ti kuâ ti Jésus, congrégation ti aChrétien ayeke lani na yâ ti kota bezoin ti dengo bê. Bible afa so Nzapa amû na ala dengo bê ni so na lege ti yingo vulu ti lo (Kusala 9:31). Yingo vulu, so ayeke ngangu so Nzapa ayeke sara na kua, ayeke ngangu mingi. Nzapa ayeke sara kua na ni ti dë bê ti azo kue atâa kpale ti ala ayeke so wa.

• Sambela. Bible amû wango na e atene: “Ala gi bê ti ala na ndo ti mbeni ye pëpe.” Me, lo kiri lo tene: “Ala hunda na Nzapa aye so agbu bê ti ala, na fade siriri ti Nzapa so ahon ndo ti bibe kue ayeke bata bê ti ala nga na lege ti hingango ndo ti ala.”—aPhilippien 4:6, 7.

• Aita ti e aChrétien. Ala yeke atâ kamarade so e lingbi ti wara dengo bê na mbage ti ala na ngoi ti aye ti ngangu. Bazengele Paul afa akamarade ti lo tongana “awamungo maboko so akpengba” lo “na yâ ti pono nga na yâ ti vundu”.—aColossien 4:11; 1 aThessalonicien 3:7.

Me mo lingbi ti hunda mo tene, tenengo ni la me eskê ayeke tâ tënë? Zia e tara ti gbu li na ndo ti aye so asi na ambeni zo so atingbi na akpale so e fa fade na yâ ti mbage so ahon so. Tongana ala, mo kue mo lingbi ti bâ so Nzapa angbâ ti sara ye alingbi na zendo ti lo so adë bê so: “Legeoko tongana molenge so mama ti lo alungula vundu ti lo, fade Mbi lungula vundu ti i nga.”—Ésaïe 66:13.