Ambarata ti Apocalypse: mo hinga ndani?

Ambarata osio so ayeke sigi na ngangu, go ti gere ti ala atoto ngangu. Ye so Bible afa na ndö ti angangu mbarata osio so nga na azo so aduti na ndö ni asara si zo abâ ni tongana ye so ayeke passé tâ na lê ti lo. Kozo mbarata ni ayeke vuru, zo so aduti na ndö ni ayeke mbeni gbia so ayeke na gloire, na so a zia lo na ndö ti mbata ti gbia ni fini fini. Na peko ti lo ayeke mbeni mbarata so couleur ti terê ti lo abe tongana wâ, a mû lege na zo so aduti na ndö ni ti zi siriri na ndö ti sese kue. Kâ na peko, ota mbarata ni ayeke ga, terê ti lo ayeke vuko vuko, zo so aduti na ndö ti lo, agbu mbeni kilo, lo yeke tö mbela na mbeni sioni sango na ndö ti tënë ti warango kobe so aga ngangu. Osio mbarata ni couleur ti terê ti lo akpa ti mbeni nyama so kobela asara lo, aye ti sara tënë ti kobela nga na asioni ye so ayeke fâ zo, na lo Kuâ wani la ayeke kpe na mbarata ni. Dû ti kuâ ayeke mû peko ti lo nduru nduru, na lo yeke fâ azo gbani gbani.​—Apocalypse 6:1-8.

“Na ngoi so mbi diko ye pan na ndö ti azo ti kpengo na ambarata osio so, mbeto ahon ndö ti mbi. Mbi bâ so Lâ ti fango ngbanga aga nduru awe me so mbi leke terê ti mbi ape so mbi lingbi ande ti sö kuâ ape.”—Crystal.

“Tënë ti azo osio so aduti na ndö ti ambarata osio so couleur ti terê ti ala ayeke nga nde nde, anzere na mbi mingi. So mbi hinga nda ti vision so, ye ni aga tâ polele na li ti mbi.”—Ed.

Mo yeke na oko pensé so Crystal ayeke na ni na ndö ti ambarata osio ti Apocalypse so? Wala mo bâ ti mo ye ni tongana ti Ed? Atâa tënë ti bê ti mo ayeke so wa, azo mingi ahinga tënë ti ambarata so a sara tënë ni na Apocalypse. Eskê mo hinga so mo wani mo lingbi ti wara ye ti nzoni tongana mo mä yâ vision so nzoni? Tongana nyen? Nzapa atene so tongana mo yeke diko aye so asû na yâ ti mbeti ti prophétie so, mo manda ni nga mo sara ye alingbi na ni, mo lingbi ti wara tâ ngia.—Apocalypse 1:1-3.

Atâa so ambeni zo asara mbeto ti vision ti ambarata osio so, ndani ayeke pëpe ti zia mbeto na yâ ti mo. Azo kutu mingi abâ so vision ni so akpengba mabe ti ala nga amû même na ala beku ti pendere gigi ti kekereke. Ti mo nga kue alingbi ti duti tongaso. Ni la, e wa mo ti diko mbage so aga na pekoni so.